Ho du Mo ni na Kere Kaza

“Ho mi aini gupai ni nga mi na kansa ti gimi fukuyufukuyu na ti rere, mi aberẽ gupai nga mi ima kpi. Ono tifuo mi ga ku kporo yo fuo bi mi munganga, mi aberẽ gupai nga, ‘Sidu, si nga gupai mi aidaha te, ono si naida mi gbata gene agbata ka hihe.’”—Linda, du garãri nga 71.

“Mi nawoka be gu kere kaza nga gu na igirãsi agu agbaga du pavuru ri re ku garebe yo. Ti kura aregbo, gu kere igirã re nasa re mi du na bakere gberãrago. Tipa badungu aregbo, mi naabi tire nga boro tire te na mi kini berẽpa kina imo tire.”—Elise, du garãri nga 49.

Kumba du na kaza sungu rii gako ngbagida agumeko kidu patiko

KA SI du nga i biro watadu gu boro mo akpinyemu ni na gu kaza nandu sa kpio, mo ima inopa gu gberãrago si aye na ni. Kupati kaza nitihe, mo nikaa sovura na bakere gberãrago watadu bakabangirise tipa gu kpakarapai re. Gunde na bakabangirise ima rengba kaa maapai kina kumbatayo gbiati mbugo be mbakadapai kaa bi munganga, kpakarapai ka gbia marã tipa dawa, watadu gbegberẽ sangbanapai nga ga dia dawa. Gu rungo nga ga berã naye mbiko du na kere kaza ima du ni ba gbegberẽhe.

Wari gu rengbe ani ka gbia undo ni? Dungu aboro bi gupai nga i nagbia bakere wasa ti kpara fu Mbori na ti geda agu afugo nga ga wasa du rogo Ziazia Kekeapai yo. Ani rengbe ka gbia kura undo berewe ti gu nyemuse nga ga gaani aborokporo gbiati abakure.

GUPAI RENGBE KA UNDORO MO HIPAI

Robert du garãko nga 58 aya: “Mo du na idapase kuti Mbori na ko nika undoro mo hipai na gamo kaza. Mo kparikpee fu Yekova. Mo gumba gupai fuko mo aberãha. Mo sana ko tipa ziazia toro. Mo sanako tipa ko undo ro mo du na ruru bipai na kini ngarasi gamo aborokporo na tipa mo du zezeredi na aboro na kini hipai na gamo kaza.

“Si nga pa undo ho gamo aborokporo aundo ro ni na gayo abipai. Mi nagbia yambahe na foni na aˈuru dũ be boro watadu be aboro ue nga aguyo nasana re nga, ‘Mo wai areme?’ Mi nagbia ngarasaro be abakure nga aguyo naraka rogo aba ni bakiakia. I nasa re mi nidu wenengai, na i naundo re mi naahipai kindi.”

Ka si ngia bakure nga mo nandu ka bi borokaza, mo makia gupai Linda agumbaha nga: “Borokaza naida kaa raka kina gu raka aboro arakaha na aˈuru dũ, na ni aidanga kaa fura tipa kina kaza ti aregbo dũ te. Sidu, mo nifura tipa kina agu apai oni naafura tipaha dedede.”

Mbiko gu ome nga ga Mbori na gu wasa du rogo Ziazia Kekeapai, gbiati gu undo nga ga gaani aborokporo gbiati abakure, ani ima rengba ka du na gu kido nga raka kindi na nyanyakipaha, zavura ho ani ahi kere kaza ni vurũ.

Agu Averesi Nga ga Ziazia Kekeapai Rengbe ka Undoro

Mo kido kuti Mbori.

“Mi agbata Yekova, ko ki karaga pai fere, ki batasi re be gimi agunde dunduko. Gi rungorungo boro re akpari, Yekova ki gi pa ni.”—Atambuahe 34:4, 6.

Linda ani nifura tipa ri mbata aya: “Mi anaakparanga nga, ‘Mo husi re te.’ Mi anaakpara dedede nga, ‘Mo undo re mi du nyanyaki, na mo undo re mi hi gimi kaza.’”

Mo gbia ome rogo Fugo Mbori yo.

“A nga boro kporo sa ayá, ‘Mi nawoka’ te.’”—Yesaya 33:24.

Mo niberẽ kurii ga Mbori akidohe tipa kumbatayo. Si nika undoro ka mo mbunga gamo maabangirise ya, nga gu nika fu ome foro tipa mo nihipai.

Mo sana agumero na abakureamo tipa undo.

“Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.”—Asanza 17:17.

Elise ani nifura tipa ri mbata aya: “Ka mo kparanga tiro kusayo ti aboro ya. Mo mbugene fu abakureamo i undoro. Kura aregbo kinaho mo narengbe kaa bihe nga zavura Mbori, ko adeganga tuko foro te, ono ka mo kparanga tiro ti aboro ya.”