Ani Undo Akuarani Gene Tungusapai Yo

1. Gini undo ani naagbiaha be mangasunge na akuarani gene tungusapai yo?

¹ Ti kura regbo sa, Yesu asia abawiriki 70 “ki kedi yo ni ba ue ue” i ndu ka tungusapai. (Ruka 10:1) Zanga kapa, gi mbakadapai Yesu amangihe re asa gako abawiriki i naaundo tiyo na kini ngarasi akurayó gene tungusapai yo. Ho ani andu ni na akuarani gene tungusapai yo, wai rengbe ani ka undo yó?

2. Ho kuarani atungusapai ni, wai gu si aida ani degeturani na tipa gine?

² Ani Dege Turani Wenengai: Ho kuarani atungusapai ni, si naida ani degeturani wenengai. (Yak.1:19) Ka si dunga ní nageda Ziazia Kekeapai, si naida ani zara gaani Ziazia Kekeapai kini gedihe na ní wa sa. Ani dege turani wenengai ho kuarani afura ni watadu gu boro ní atungusapai funi. Manga ani he wo nika sa irakporo ní naadega tuni a.

3. Gini regbo rengbe ani ka undo gu kuarani ani atungusapai na ní?

³ Ani Ini Gini Regbo Si Aida Ani Fura: Ho kuarani atungusapai ni, ani nayugo irisa funi nimbu ani ní nipe gupai ní aida ka gumbaha. (Rom. 12:10) Si aidanga ani de fugo ade ngba ní wa gu sa te. Ka bangirini go ti gupai ní naida ka gumbaha watadu ka irakporo sana gu sanahe nyaki anyaka funi tipa ni karagapai kutini, ani mangi ome tipa ka undo ní ti gupai bangirini ni go ti ni re, angianga ka tona kina kura vovo pai berewe ya. (Snz. 16:23; Batu. 3:1, 7) Ho ani afura ni, si naida gaani afugo naandu sa na gu dezirepai kuarani naamangaha. —1 Kor. 14:8.

4. Ginihe nika sa ngbarago tirani gbiati diabese gene sunge tungusapai yo?

⁴ Ho agu abawiriki naadu 70 anyasi tungusapai ni, i ‘ayega ni ngbarago.’ (Ruka 10:17) Ani nikadu adu a na ngbarago gbiati diabese gene sunge tungusapai yo kaa ani adegaturani wenengai na kini ini gini regbo si aida ani fura ti ni ho ani atungusapai ni na akuarani.