Mbakada Gaani Gene Tungusapai—Du ni gu Badiasunge Tungusapai Naundo Aundo

Ndu Gupai Duhe na Nyanyakipaha Ti Ni: Yesu aima bi ndu gupai si aida gupai ti ni nga aboro naatungusapai niba ue ue. Ho ko aakeda gako abawiriki ni naadu 70 i ndu mbatayo fuko ka tungusapai, ko akedi yo niba ue ue. (Rk 10:1) Ho aboro akura ni ue, guni ima rengba ka undo kurani ka kerepai gbia ni watadu ka i sana ni na gu sanahe ni arengbanga ka karagapai kutini ya. (Batu 4:9, 10) Ni ima rengba ka undo gu boro ni akura na ni re na gu inohe du ni na ni watadu ka fu aberãpai funi nga gu rengbe ka undo ni ni da ni wene batungusipai. (Snz 27:17) Ni ima rengba ka ngarasa ni a na agu afugo i agumbaha dagba akporo.—Frp 4:8.

Wai Rengbe Boro ka Mangaha:

Mo degeturo ho kuaro amanga dezirepai ni. (Yak 1:19) Ho ni ageda Ziazia Kekeapai, mo naagedaha na ni wa sa rogo gamo. Mangaha wo nika sa gupai nga mo rengbe arengba ka undo ka ni aida undo.
Mo mangisunge na tatamana ka inoho singia si naida mo fura, na gu regbo si aida mo fura ti ni. (Snz 25:11) Ka mo gasi batungusipai fuo gu boro ni awisigo Ziazia Kekeapai na ni, rago agba angba tiní ka mo asongoda gu wisigopai re na bete afugo. Ono tie, ho oni atungusapai ni kporo na kporo, si angba gbe ka mo mbu kina gu boro natungusapai ni naafura. Rengo ngaha nga, ka si du nga vovo batungusipai nga ni watadu ni ainongo wai ka karagapai kuti sanahe te, rago angba angba tiní ka mo fura. Ono tie, singia oni natungusapai kporo na kporo, oni nakaraga tironi fuo boro, watadu oni nawisigo Ziazia Kekeapai na boro, ka mo denga fugo ngba kuaro ya, ka mo dinga ngbiti gu fugodagbase namanga dagba ni na irakporo ya, na ka mo kusinga kurapai kia tigu ni nafura tipaha ya.
Mo undo ni na gamo inohe. Ka mo atungusapai na boro mo ki bi gupai nga mo rengbe arengba ka fu berãpai funi nga gu rengbe ka undo ni nida ni wene batungusipai, ka mo ongonga aongo ya. (Snz 3:27) Ti gu regbo daada, mo rengbe ka ya: “Si nidu wai?” watadu “Ya mo mi rengbe ka fu berãpai foro?” watadu “Gere nga gupai mi naamangaha.” Mo banda gupai ku beraro yo nga wa vura duhe nga kura aboro naida aida na aberãpai ti kura aregbo, rago ima rengba ka gberã tiyo ka si du nga mo naˈasada ka ruga agu aingahe dunduko i amangaha.

Mo Asadingo Gipai re Rogo gi Diwi Re:

Fuo nyasa oni tungusapai, mo gumba gupai fu gu boro oni nikuru na ni ni nigumbaha watadu ni nimangihe nga gu nisa ni ni wene badiasunge tungusapai.