Kikindigi Adunguratise nga Regbo Irisombori na Ngbarago
1. Wai gu du gu pumbo aYisaraere anaamangaha wa kina gu kikindigi adunguratise ani amangaha awere?
1 Yosefa, Maria, na awiriyo gbiati kura aboro anaandu ku Yerusarema yo dedede tipa kadu pati gu pumbo nanaamanga yo na agarã dũ. Ti gu ngbatunga aregbo re, i gbiati kura airisimbori anaambupa gayó apai dunduko ka maaberã yó kuti gu nyanyaki apai nga ga toro rogo gayó raka yo. I anaagbia regbo ti regbo agi apumbo re tipa ka berã na kini fura tipa ga Yekova wene asino. Ti agi aregbo re a, i anaamakia pa ga Yekova andiko. Gu gaani kikindigi adunguratise naye re nika fu gu ngbatunga amomu re furani tipa ani irisi Yekova na ngbarago.
2. Ginipai si aida ani mangihe tipa ka mbakadatirani tipa gu bakere dunguratise nga ga aʹuru biata naye re?
2 Si Naida Mbakadatise: Si anaadia Yesu na avunguko na amairo 120 tipa ka guari Nazareta yo ka ndu ku Yerusarema yo na ki karagatiyo ku Nazareta yo. Wa vura duhe nga ani ainongo bange awirina Yesu te, ani ima rengbe ka makia pa gu nyanyaki asadatise aYosefa na Maria anaamangaha tipa ka mbakadatiyo. Ya mo oni mbakaditironi tipa kadu pati gu bakere dunguratise re rogo agu aʹuru nikadu biata re dunduko zanga kpa? Si rengbe kadu nga si naida oni di ongoda adia ti sunge watadu oni fura na gaoni baira sunge watadu si naida oni ndu andu ku sukuru yo ka ya fu abayugupai we awironi andunga ku sukuru yo rogo agu aʹuru nikadu biata re te. Ya mo oni dika bambu rame ti marã ka si du nga si naida oni dikaha adika? Ya mo oni rengbe ka undo gu boro kadu rogo gaoni dungurati adunga gene beni ya tipa ní du pati gu bakere dunguratise re?—1 Yoane 3:17,18.
3. Wai agu apumbo nga ga aYisaraere anaafu momu wene kodatise fuyó?
3 Wene Kodatise: Agu apumbo nga ga aYisaraere re anaafu momu fuyó tipa i naakodatiyo na kura airisimbori. Zanga kapa, ti agu aregbo re, Yesu na avunguko anaagbia tiyo na kuru abakureayo. I anidu a na momu beyo tipa ka manga vovo abakure dagba gu ndurumo aYuda na agu aboro nasa tiyo kurogo gu pambori nga ga aYuda ho i anaandu ni ku Yerusarema yo na ho i anaaga ni.
4. Wai gu rengbe ani ka yugo nani nga ani nabi gu riigbu nga ga agu awirina nga aKristano na nyanyakipaha?
4 Gu ndupai sa dagba agu akuraha yo nasa gupai nga ‘ruru kangara moyambu’ mangi mbakadapai tipa ani dungura tirani wasa ka gia agumbapai ti regbo kikindigi adunguratise nga ka ngarasa akuarani. (Eb. 10:24, 25) Sidu tie, oni mangi mbakadapai tipa ka da ti wene regbo tipa ka ngba be wene kodatise na awirina mbata fu basungu-rii-kiti gumba pa manzigo nga gu nayugo gupai nga regbo ima da tipa aboro sungu sende. Kuba gupai nga ani ndu ka gbata riahe rogo kura ba kia ti regbo ongoda, i nangarasa rani nga ani ye na gaani ariahe kina ku ba bakere dunguratise yo wa ka ani ruho ka gbia kura aboro na ki fura na agu aboro sungu pati rani. Gu gaani riigbu nga ga agu awirina nga aKristano nga gamahe be Yekova, nga guhe si aida ani bihe na nyanyakipaha.—Mika 2:12.
5. Ginihe nika undo roni na gaoni aborokporo tipa oni gbia undo wenengai ti apapara bakere dunguratise dunduko?
5 Regbo Wirikapai: Mbu Yesu kindi nigude, ko anaadia regbo tipa kaa wirikapai tipa Bako du ngbangbaturũ yo ti regbo agu apumbo aYisaraere anaamangaha. (Ruka 2:41-49) Ginihe nika undo roni na gaoni aborokporo tipa oni gbia undo wenengai ti apapara bakere dunguratise dunduko? Ho gumbapai amanga ni, si naida oni sungu rii gaoni abasungo ki mbu kungbo afugo. Si aidanga oni mbu terefuni na kura ahe si fudi roni gbiati kura aboro te. Oni moiberã roni kuti bagumbapai na kini keke gu meme apai i agumbaha. Oni sungu na gaoni aborokporo wasa tipa ka ngerafuo awironi wa ka i ruho ka degatuyo kuti gupai i agumbaha. Fuo ga oni ku kporoyo nyemu, oni di regbo tipa ka fura tipa agu apai ningba tironi.
6. Ginipai si aida ani moihe ku berarani yo nibipa votise na mbakadatise?
6 Votise na Mbakadatise: Si anidu taata fu agu ababagiahe nanaabi Yesu na avunguko gbiati agu airisimbori nangia aYuda tipa ka ino yó ho i anaandu ni ngbagene tipa gayó pumbo mbiko gu gayó ngba roko naanidu zawizawi na gbaya ti ngbaha. (Geda 15:37-41) Wa vura duhe nga ndikidi aKristano avonga gu rokoo du kia te, aboro ima ino rani mbiko gaani iriiri vo rokoo, giro, gbiati mbakadatise. Si naida bangera rani duadu wenengai ho ani andu ni ku ba bakere dunduratise yo, ho ani aga ni, na ho du ani ni ba bakere dunguratise yo. Ka si du nga ani vo kura rokoo kia tifuo ongoda, si naida si du nigu rokoo nafu taarimo fu Yekova na ki vo gaani karete nga ga bakere dunguratise. Rogo gi gene re, ani kadu kia ti agu aboro angianga aDezire Yekova ya na si nika fu wene bipai tipa rani fu agu aboro nabi rani.
7. Tipagine si aida ani berãpa undo sunge ti ni ba bakere dunguratise yo?
7 Si Naida Abaundosunge: Tipa bakere dunguratise mangi wenengai, si naida dungu abaundosunge. Ya mo oni rengbe ka undo sunge? (Tam. 110:3) Agu asunge namanga ba bakere dunguratise yo, si nga papara ziazia sunge na si nafu wene dezirepai. Rago angba ti gu bangerekuri ba sa nga gu awirina amangi gayó bakere dunguratise rogoho mbiko wai i afu tiyo ka giriso rago fuo nyasa yó bakere dunguratise na ko ki yaa: “Mi nakpinyemu ka tambua roni tipa gu gaoni dunguratise nga gu mangi oni he ane. Wo mi naagia pa aDezire Yekova ni agu aboro du kia na ni agu aboro nambu agu aba i amanga bakere dunguratise rogo nigigirihe susi wai i agbiaha. Oni na gaoni riigbu sa gi ba re niwene ba fu aboro dunduko na oni amangihe na ngbatunga agu aboro du na nunga rago aima ngba tirani gbe ka ino yó.”
8. Gini amomu manga dezirepai nika duho ba bakere dunguratise yo?
8 Momu Manga Dezirepai: Dungu aboro rogo gu gbata oni ka manga bakere dunguratise rogo re nika ino roni mbiko iriiri votise na wene mbakadatise na mbiko vo oni agu akarete nga ga bakere dunguratise. Gipai re nika sa yó asa i sanahe tipa roni na ki fu momu furoni tipa oni gumbapa bakere dunguratise fuyó. Gude sa garãko adu nga 4 andu na gako buku nga gu i akusihe nivovoho ba bakere dunguratise yo ku rogo bambu ririahe ti marã na ki yuguhe fu gu dee nafu riahe yo fu aboro. Gipai re afu momu fu avungu ko tipa i yambu gu dee re tipa gu bakere dunguratise re.
9. Wai rengbe ani ka wirika gu kpiapai nga ga Yesu na avunguko nibipa wai i anaandu tipa agu apumbo nanaafu momu fuyó tipa i wirikipai tipa Yekova?
9 Agu apumbo nanaamanga ti regbo aYisaraere angia wene regbo fu agu aboro nanaaida ka wirikapai tipa Yekova. (Pa Rug. 16:15) Yesu na avunguko adu na ngbarago ka mbupa gayó apai dunduko tipa ka ndu kupati agu apumbo re yo tipa ka gbia undo wenengai rogo toro yo. Kina gu bangisapai re du tipa rani, si naida ani bi agu kikindigi adunguratise nga ga aʹuru biata ni gamahe be gu Barani nga boro nyemuse du ngbangbaturũ yo. (Yak. 1:17) Awere nga gu regbo si aida ani mbakaditirani tipa ka iriso Yekova na ngbarago ti regbo bakere dunguratise!