Arame Biata Nga ga Riahe Nga ga Toro
1. Wai ani ka gbia undo ti gu bakere dunguratise nga ga arame biata nga ga gi garã re?
1 Rogo gi zegino nga ga Satana duna kere ugure rogoho nga ga toro re, Yekova nafuka agu ariahe nga ga toro fu gako amoyambu. (Yes. 58:11) Mbakadapai sa dagba agu akuraha Yekova amangasunge nani ka riga gako amoyambu nga, gu bakere dunguratise nga ga arame biata nga gu ninaamanga na agarã dũ. Wa gu bakere dunguratise nga ga gi garã re ambeda, wai rengbe ani ka mbakadatirani ka gbia gu riahe nga ga toro na ka undo kura aboro i gbiaha?—Snz. 21:5.
2. Wai si aida ani mbakaditirani?
2 Si naida oni mbakadi gaoni apai tipa kadu pati gu bakere dunguratise re rogo agu aʹuruhe du biata re dunduko. Ya mo oni wisigipa gu regbo si ka dia roni nani ka da ba bakere dunguratise yo ki gbia basungo mbata fu dunguratise tona? Boro ho naida ka kpa papara gu riahe Yekova nambakadihe tipa rani re te! (Yes. 65:13, 14) Oni ima mbakadapai tipa gu ba oni ka bi rame rogoho gbiati gu ũnduge nika dia roni koyo?
3. Gini apai rengbe ka undo rani na gaani aborokporo ani gbia undo gbe ti bakere dunguratise?
3 Ginipai rengbe ka undo roni ka berãroni merenga fuo kungboapai ti regbo dunguratise ya? Ka gene du, oni ra ara wenengai yuru mbata fu ndu oni tipa bakere dunguratise. Oni naangana kina bagumbapai. Oni naazara Ziazia Kekeapai ka geda agu averesi dunduko bagumbapai apepa gedaha. Oni keke agu apai nika undo roni. Si ngbaangba aborokporo sungu sa tipa wa ka avunguagude aundo awiriyo i moiberãyo wenengai sa gupai i agumbaha. (Snz. 29:15) Si adu a niwenepai ka oni asakapai kporoyo nyemu watadu ba rame yo tipa gu banguaapai oni nigihe. Tipa gaoni aborokporo naagbiaha wasa kindi nga ga toro tingbafuo gu bakere dunguratise re, si naida oni kpara regbo ti regbo gu gaoni Irisombori Nga ga Aborokporo ka wisigo agu apai si aida oni mangihe.
4. Wai rengbe ani ka undo kura aboro rogo dungurati i gbia undo ti bakere dunguratise?
4 Oni Undo Kura Aboro I Gbia Undo: Ani nakpinyemu gupai nga kura aboro gbia undo a. Ya mo sosono aboro ho watadu kura aboro rogo dungurati si aida i undoyo aundo i ndu ku ba bakere dunguratise yo? Ya mo oni rengbe ka undoyo? (1 Yo. 3:17, 18) Abaakumba, gbe, agu ababiapai nga ga abadona, si aida i bi gupai nga agu awirina re ima gbia undo tipa ka ndu.
5. Wai ani ka kparaka waraga yamba aboro tipa bakere dunguratise? (Oni bi gu sanduki duti kpewaraga 5.)
5 A wa si nidumbata, aposo biata mbu bakere dunguratise koyo, ani nika manga tua ka yamba aboro i ye tipaha. Si naida adungurati moi sásá ka kparaka waraga yamba aboro rogo gayo dagbarago nidunguhe. Ono ka si du nga waraga yamba aboro nyeanye beroni kindi da ti regbo bakere dunguratise, oni ye nani ku ba bakere dunguratise yo. Awirina nika mangasunge nani ka yamba agu aboro ka i gbiayo rogo gu rago du bakere dunguratise rogoho. Gu ka nye beroni na gaoni aborokporo nga gu oni aberãnga pa kparakaha ya, oni fuhe Rago Bisue wiso fu agu aboro nambakada ba aboro ba bakere dunguratise yo. Ba bakere dunguratise yo i nika gumbapa wai rengbe ani ka mangasunge nani.
6. Wai rengbe gaani iriiri mangaapai ka sa ngbarago ti aboro?
6 Iriiri Mangaapai Nasa Ngbarago ti Aboro: Ho dungu aboro “akpi kina nyemu tiyo” ni na ka i aberãnga pa akurayo ya, si niwenepai kadu na agu akuarani naʹasadatiyo ka sa gayo mangaapai si du niiriirihe. (2 Tim. 3:2) Ani nayugo irisa nirimo ani ku ba bakere dunguratise yo saa 8 wiso ngba wene gene watadu rogo pa irisa na ki zi ba fu kina agu aboro ani araka naayo kporo, fu aguyo ye ani naayó sa, gbiati agu aboro ani awisigo Ziazia Kekeapai naayó awere. Ho basungu-rii-kiti ayani wee ani ndu ka susungo rogo abarani kini gi gu manzigo napaa, si ngbaangba ani mangihe wo. Si niwenepai a ani ongosi woro gaani aterefuni tipa ka si fudinga aboro ti regbo dunguratise ya. Fura, kekeapai na terefuni, ri hee, watadu takuari zanga wene nduhe ti regbo dunguratise nga agu apai afunga irisa ya.
7. Wai rengbe ani ka gbia wasa na ki fu wasa fu kura aboro ba bakere dunguratise yo?
7 Gu Kodatise Nafu Wasa: Gu kikindigi adunguratise nga ga aʹuru biata ningia gu mbakadapai ninaafu momu furani ani gbia ngbarago be koda ani tirani na akuarani aKristano. (Tam. 133:1-3) Si ngbaangba oni “zá ngbaduroni” fu awirinaroni nga aguyo nidu rogo kura adungurati ki ndu ka fura naayo. (2 Kor. 6:13) Oni rengbe arengba ka maaha nisásá tipa ka ino kandara boro sa watadu boro na gani aborokporo rogo uru sa. Gu regbo ongoda nga ga bebere uru nafu momu tipa gipai re. Sidu, oni ye na gaoni riahe kina kporoyo rengbearengba tipa ka ngba behe na awirinaroni kini fura, angianga ka ndu ka gbata riahe rogo kura rago ya. Gipai re rengbe ka undo roni oni zi vovo abakure nga gu nika nyeanye kindi.
8. Tipagine si aida ani fu tirani ti ni ka mangasunge ba bakere dunguratise yo, na wai rengbe ani ka mangaha wo?
8 Si nibawenepai ka mangasunge sa na airisi Yekova! Ya mo oni rengbe ka fu tironi ka undo sunge rogo basunge sa nga ga bakere dunguratise watadu ka undo gaoni dungurati na sunge girisorago? (Tam. 110:3) Ka si du nga kura sunge ho i nafuhe furoni te, ya mo oni rengbe ka sana gu Basunge Du Tipa agu Aboro Naida Nitiyo ka Fu Undo (Volunteer Service Department)? Kodabee kuti sunge naʹakpurasihe na si kini fu ngbarago.
9. Tipagine si aida ani moiberã rani ti ni tipa gaani mangaapai gbiati mbakadatise ti regbo bakere dunguratise?
9 Gaani Wene Sino Nafu Ngbarago fu agu Aboro Nabi Rani: Si naida sino rani du niwenehe ti aregbo dunduko angianga kinaho bakere dunguratise amanga ni ya. Agu aboro nabi rani rogo gu rago du bakere dunguratise rogoho, si naida i bi gu kparakparapai abi du dagbarani na agu aboro angianga aDezire Yekova ya. (1 Pet. 2:12) Gu gene ani ambakadatirani ngbaha na kini vo rokoo ngbaha ba bakere dunguratise yo, rogo gu ba ani araka rogoho, watadu ba ririahe yo, si naida si fu irisa afu fu Yekova. (1 Tim. 2:9, 10) Ka ani avo gaani akarete, si rengbe ka sa aboro i ini agu aboro nga ani isoke si ki fu momu furani a ani gumbapa gaani bakere dunguratise fuyo na ki mangi dezirepai fuyo.
10. Wai rengbe ani ka sa agu aboro namangasunge bambu rame yo watadu ba riahe yo i duna wene bipai tipa gaani bakere dunguratise?
10 Wai rengbe oni ka sa ngbarago ti agu aboro namangasunge bambu rame ti marã yo gbiati ba ririahe yo? Si aidanga ani dika avurubambu susi gu ani ka sungo tiihe te, bambiko si rengbe ka saha fu aira gu rago re nikpakarapai i gbia kura aboro tipaha berewe, na si rengbe ka sa gupai a nga ka kura awirina gbianga rago ya nga aguyo naidaha. Ka si du nga aboro nge ange ho ani andu ni ka tumo marã bambu, si naida ani duna zerangbaduse zanga papaya. (Koro. 4:6) Ka ani araka bambu rame yo nga ga marã, si naida ani fu wiri marã afu fu agu aboro naye na riahe furani, natinda gaani amangu, nagiriso gaani bambu, na kini mangi gu kura apai.
11. Gini apangbanga nayugopa gu wene dezirepai namanga mbiko gu wene sino nga ga aKristano?
11 Aboro nabi rani wai na gaani wene mangaapai ti regbo bakere dunguratise? Rogo kura waraga apangbanga sa, bangerekurii gu ba aDezire Yekova naamanga kikindigi adunguratise rogoho aya tipa yó wee: “I nga wene aboro kisusi. Ani nidu na bakere ngbarago ho i niye ni.” Rogo gu garã nasusi, mangu marã ati be kumba sa angianga Dezire Yekova ya rogo gu bambu rame aDezire Yekova adu rogoho. Ho i akaraga gu mangu re ni fu bangerekurii gu rago re na agu ahe nadu rogoho dũ, ko aya fu iraha wee: “Wa ka si naadunga nga aDezire Yekova du nabihe ya, nga aguyo nasungo ane kini ndu tipa gayo bakere dunguratise, ka mo bingoho berewe te.”
12. Wa bakere dunguratise nga ga aʹuru biata ambeda, ginipai si aida ani diberã tipaha, na tipagine?
12 Gu bakere dunguratise nga ga gi garã re nambeda wa pai. Bakere regbo du i adiaha ka mbakadapai tipa bakere dunguratise na ka saha si du niwenehe, na bakere sunge du ngaha. Oni diberã kadu pati ni rogo agu aʹuruhe biata re dunduko, na ki mbakaditironi tipa gupai Yekova na gako riigbu nambakadihe tipa roni. Oni sa ngbarago ti akuaroni nigaoni iriiri mangaapai, wene sungo, na wene sino. Ka oni mangihe wo, oni gbiati akuaroni pepai ape wa ngbatunga gu kura wirina sa agumbaha gugorö ki yaa, “Regbo ho nangba tire wa gure te!”
[Gu kpiahe du ti kpewaraga 4]
A wa si nidumbata, aposo biata mbu bakere dunguratise koyo, ani nika manga tua ka yamba aboro i ye tipaha
[Gu kpiahe du ti kpewaraga 5]
Wai Ani ka Yamba Aboro?
Tipa ka kparaka waraga yambahe rogo gaani dagbarago dunduko, si naida ani naafura niguruhe. Ani rengbe ka pepai wa: “Sene. Ani nata rogo zegino dũ ka yamba aboro i ye tipa bakere dunguratise. Gamo waraga yambahe gere. Mo abi dungu apai tipa gi bakere dunguratise re ti gi kpewaraga re.” Kpakpu gu kpewaraga re niwenehe gbe.Sidu, oni fuhe fu boro ngba gu gene ní nika bihe abi ngbaha. Oni fura na wasa. Ho oni kaa kparaka waraga yambahe ni Rago Nzengu na Rago Poso, oni rengbe arengba ka kparaka amagazini a ho rengbehe ni.
[Gu kpiahe du ti kpewaraga 6]
Gu gene ani ambakadatirani ngbaha na kini vo rokoo ba bakere dunguratise yo, rogo gu ba ani araka rogoho, watadu ba ririahe yo, si naida si fu irisa afu fu Yekova
[Gu kpiahe du ti kpewaraga 7]
Oni sa ngbarago ti akuaroni nigaoni iriiri mangaapai, wene sungo, na wene sino
[Gu kpiahe du ti kpewaraga 4]
Atingidapai Tipa Gu Bakere Dunguratise Nga Ga 2011
◼ Ringbisapa Regbo: Dunguratise nikaa tona saa 9:20 rogo agu aʹuru biata re dunduko. I nikaa zazaka angbadimo saa 8 nga ga wiso. Ho manzigo nika tona ni, ani dunduko si aida ani sungu rii gaani abasungo tipa ka tona dunguratise wa sa na akuarani ngba iriʹiri gene. Dunguratise nika digo Rago Bisue na Rago Nzengu nyemu saa 4:55. Ono tipa Rago Poso, si adigo nyemu saa 3:40.
◼ Pa Rugusa Aũnduge: Rogo agu aba dunduko nga ga gaani kikindigi adunguratise kina rani angera kurii agu aba du tipa rugusa aũnduge, marã ho i naadiaha ba-rugusa aũnduge yo te, ono wa duhe nga nunguru baperembatayo naagberãnga te, si du agu aboro nika ye mbata nika gbia ba ti ni tipa ka rugusa gayo aũnduge. I nika undo gbarigbari aboro aundo i rugusi gayo aũnduge rogo gu ba re.
◼ Dika Basungo: Boro rengbe ka dika basungo fu kina agu aboro ní aye naayo gene sa watadu ní asungo naayo sa kporo na agu aboro ní awisigo Ziazia Kekeapai naayo.—1 Kor. 13:5.
◼ Riahe Nga ga Bebere Uru: Ani nahõpai beroni, oni di gaoni riahe kina kporoyo nga gu oni nika rihe bebere uru, angianga ka mbu ba dunguratise kaa ndu ka gbata riahe rogo kura rago ti regbo ongoda ya. Si naida oni ndu na riahe rogo guhe ka i moihe amaa kutii basungo yo, angianga ka ndu nani rogo gu badugbo hee nika ka aka na gene be aboro ya. Si aidanga oni di riahe na basombe watadu rogo gu ũtinda ahe i ambakadihe rogo gizaza te, si ka kpi kpataha ki ogi boro.
◼ Agamahe: Ani rengbe ka yugo gaani tambuahe tipa bakere dunguratise nifu ani gu gamahe naye kina boro ngbaduraniyo tipa gu sunge awirina amangaha rogo zegino dunduko. Ani rengbe ka fu gu gamahe re tii Bambu Kindo yo watadu ti regbo bakere dunguratise. Ka si du nga boro fu tieke nga ga marã nigamahe ti regbo bakere dunguratise, si naida i ke kina rimo gu riigbu ti ni awirina amangasunge nani rogo gaoni dagbarago.
◼ Béno na Tunguotunguopai: Ka si du nga tunguotunguopai mangi, wa gu nga kaza so boro nga gu naida ipiipi undo, si naida i pehe fu gu boro nambakada ba aboro, ní nika tingida gu wirina nani namangasunge na aziga (First Aid Personnel) tipa ko ini pa igira gupai re gbiati gu ziga si aida ko fuhe niipo tipaha. Ka si du nga ome gu kaza re ima kio, gu wirina namangasunge na aziga re nika yamba gu tarambiri ninaatinda aborokaza ku bambungua yo tipa i ye ka ndu na ní koyo.
◼ Ngua Kaza: Ka si du nga ngua kaza ho oni naadiaha, si naida oni ye aye nani mbiko si adunga ba bakere dunguratise yo te.
◼ Arakata: Rogo agarã nibasasa dunduko, wo aboro ahoka be gu ngbatunga arakata i avodaha. Si naida ani sia gu rakata nika sa rani ani naandu andu wenengai nga gu ka boro vura si kina mbia nani ka si amanganga ní gbegberẽ ya.
◼ Wene Fuõ Anzeme: Ani naamanga kura gaani kikindigi adunguratise tii gu bambu kina amakana azeresa rago rogoho. Ka singia ngbatunga gu rago re du du oni rogoho, si adunga ninyemuse ka oni mbedi agu anzeme nafũ afũ gbe te mbiko si rengbe ka zingisa agu akaza nga ga agu aboro nawoka be kaza-onga na kura akaza duwa ngbatunga gere.—1 Kor. 10:24.
◼ Pefuo Boro: Si naida oni mangisunge na gu fuomu nga, Please Follow Up (S-43) tipa ka kekapa agu apai rogoho du tipa gu boro nadu na nyemu rengo tiní nga guni oni amangi dezirepai funi ti regbo bakere dunguratise nga ga aʹuru biata. Si naida abatungusipai dunduko nibasasa ye na gi fuomu re sa watadu ue kupati bakere dunguratise yo. Oni rengbe ka fuka agi afuomu re fuo hiiso oni he fu agu aboro du rogo gu basunge nga ga Bambu Abuku (Book Room) watadu fu gu bakeapai nga ga gaoni dungurati ko ho oni ka karaga tironi ni ku kpuroni yo.—Oni bi gu Gaani Sunge Nga ga Kindo nangia ga Ngbangba 2009 ti kpe. 4.
◼ Abambu Ririahe ti Marã: Si naida ani taasirimo Yekova rogo gaani wene mangapai ti gu regbo ani ari riahe rogo abambu ririahe ti marã. Rogo dungu aba, si nisino aboro boro mbu bete marã fu gu boro niye na riahe funi. Kangia wo duhe rogo gaoni dagbarago, oni mangihe amanga wo.
◼ Bambu Rame ti Marã:
(1) Ka oni dikanga avurubambu susi gu oni aidaha nzunzu ya, na ka oni idinga ha fu aboro i sungu vuru gaoni bambu susi gu bange aboro si aidaha ya.
(2) Kangia oni nika mbupa dika bambu, oni tingidihe nibasa fu airabambu.—Mt. 5:37.
(3) Ka sunge adunga tironi na ũtura atindiro ya, ka oni dinga ha baha ya. Ka oni mangisunge nani, oni karagaha nibasa tipa kura aboro rengbe ka mangasunge nani.
(4) Ka oni manginga riahe rogo gu vurubambu i aidanga pa manga riahe rogoho ya.
(5) Oni mbu wiri marã fu agu aboro namanga agu asunge du rogo gu bambu re na aʹuru dunduko, na ho i atinda gaoni atindiro ni.
(6) Ka oni gbirisinga pa gu riahe nga ga wiso nga gu i afunga ha ti marã furoni ya, ngbatunga gudu wa buni, fofoi ime, nga gu i afuhe fu agino tipa si undoyo ho du yó ni rogo bambu rame ti marã.
(7) Oni yugu zuzu toro rogo gaoni mangaapai na agu aboro namangasunge rogo gu bambu re. Badungu aboro du beyo i angerafuo yó, i aduna ngbarago ka bi rani ka ani amangapai naayo rogo weneringise, zerangbaduse, na niruruhe.
(8) Ka si du nga kpakarapai gbia roni na gaoni bambu rame ti marã, si naida oni tingidihe fu gu Basunge Nga ga Bambu Rame (Rooming Department) ti gu regbo oni kadu ba dunguratise yo.
◼ Agu Aboro Naida Ka Undo Sunge: Ka ani fu tirani tipa ka undo agu asunge nikadu pati bakere dunguratise, si rengbe arengba ka sa gaani ngbarago si du nibakerehe. (Amo. 20:35) Agu aboro naida ka undo sunge, si naida i fu rimoyo kurogo gu Basunge Du Tipa agu Aboro Naida Nitiyo ka Fu Undo. Agu agude du garãyo 16 na kusende, i ima rengba ka fubee a tipa ka undo sunge, ono si naida i mangisunge sa na kina avunguyo watadu gu ngangara boro avunguyo naidihe i mangisunge na ní.