‘Oni Nimangi Gere Nitingidi Pare’—Tingida Pakpio Yesu Nikadu Rogo Zerekpe 5

1. Tipagine nyakipa manga gu dunguratise nga ga Tingida Pakpio Yesu ti ni?

¹ ‘Oni nimangi gere nitingidi pare.’ (Rk. 22:19) Gure nga gupai Yesu agumbaha fu apefuoko tipa tingida pakpioko, nga gu kpio ko akpihe nimotumo. Nibi gupai kpio Yesu amangaha furani, uru ho nyakipaha fu aKristano susi uru Tingida Pakpio Yesu te. Wa gu uru nga Zerekpe 5 re ambeda, wai rengbe ani ka yugo gaani tambuahe fu Yekova?—Koro. 3:15.

2. Wai rengbe ani ka yugo gaani tambuahe tipa Tingida Pakpio Yesu niwisigo ani pai na kini berẽkuriihe?

² Oni Mbakadi Tironi: Ani naambakada tirani ambakada tipa agu apai ani abihe na nyanyakipaha. Ani rengbe ka mbakada ngbaduraniyo tipa Tingida Pakpio Yesu na gaani aborokporo niwisigo ani agu apai namangi rogo gu yangara aʹuru Yesu adu auru kpotosende na kini berẽkuriihe. (Eza. 7:10) Bete agu averesi re gudu rogo karendaria yo gbiati Wisigo Ziazia Kekeapai Na Aʹuru Dunduko, ono agu averesi re dunduko gu tangarayo ho ti kpewaraga 23-24 nga ga gu Ngbaõbambu Sinziri nga ga Wegebe 1, 2011 (gu nga ga pa-Ngirisi). I ima tangara pa agu akapita a nga ga gu buku nga Greatest Man sakipai tipa agu averesi re.

3. Wai rengbe ani ka yugo gaani tambuahe tipa Tingida Pakpio Yesu nikiiso gaani regbo tungusapai?

³ Oni Tungusipai: Ani rengbe ka yugo gaani tambuahe a nifu ani tirani sa tungusapai. (Rk. 6:45) Rago Nzengu, Marungu 17, ani nika tona manga tua rogo zegino dunduko ka yamba aboro tipa Tingida Pakpio Yesu. Ya mo oni rengbe ka mbakada gaoni apai tipa ka dia bakere regbo ka yamba aboro, singia ka mangasunge nimoundo abazakigene? Si ngba angba ka oni saki gipai re na gaoni aborokporo ti regbo gu gaoni Irisombori Nga ga Aborokporo naye.

4. Gini aundo rengbe ani ka gbiaha ka ani du pati Tingida Pakpio Yesu?

⁴ Ani nagbia bakere undo ho ani adu ni pati Tingida Pakpio Yesu na agarã dũ. Gaani ngbarago na nyemuse tipa Mbori nakio ho ani aberã ni kurii gako wene sino wa ko afu bangisa Wiriko nimotumo tipa rani. (Yo. 3:16; 1 Yo. 4:9, 10) Gipai re nafõngbaduraniyo ka ani rakinga berewe fu tirani ya. (2 Kor. 5:14, 15) Si nakiiso gaani nyemupai a ka tambua Yekova gbaiga. (Tam. 102:19-21) Nirengo, ga Yekova amoyambu namaabangiriyo nganganga tipa gu momu ani kadu nani ti regbo Tingida Pakpio Yesu rogo Zerekpe 5 ka ‘takapande ga Gbia kpio.’—1 Kor. 11:26.