Gu Manga Dezirepai Bangiri Agene Du Niwenehe
1. Rogo gini gene rengbe ani ka wirika Yesu rogo manga dezirepai?
1 Ti regbo ga Yesu sunge tungusapai auru kpotosende, ndundu fugo anaamanganga ko na agu aboro ko anaagbiayo bangiri agene na rogo kura aba aboro anaadunguratiyo kurogoho te. (Rk. 9:57-61; Yo. 4:7) Ko aaida dungu aboro gi gu nyanyakipa pangbanga nadu ngbako. Ti gi gaani regbo re, manga dezirepai bangiri agene nga wene gene ka undo aboro i gbia ga Mbori tatamana. (Snz. 1:20) Ani rengbe kadu na diabese ka kina rani ndu ka tona fugo na aboro na kidu na rugatinapai.
2. Gini apai si aida batungusipai mangihe ho ní atungusapai ni bangiri gene?
2 Oni Tona Fugo: Si niwenepai kina roni ndu ka tona fugo na aboro angianga ka ru watadu ka sungo rogo ba sa tipa kina agu aboro nandu ti gene ye fuo roni ya. Gupai rengbe ka undo roni nga ngana boro kini momu ti ngbaroni. Kangia oni ue, gu ngba gbe nga boro sa ndu fuo boro. Si naida oni asadi ka ndu berewe fuo gu boro duna nyemu wene pangbanga. Ka gene du, ho oni adigiso fugo ni na boro, oni sana ní tipa wai rengbe oni ka gbia ní berewe. Kura abatungusipai naamanga gu dezirepai nga ga bangiri gene rogo bangisa ba sa, si kini sa gupai nga i naafura dedede na agu aboro i aima fura naayo mbata.
3. Wai rengbe ani kadu na rugatinapai ho ani amanga dezirepai ni bangiri gene?
3 Oni Duna Rugatinapai: Si naida oni ru rogo gu ba daada na ki ini gu boro si aida oni tona fugo na ní. Anga si nidingisoro boro fura na agu aboro dunduko nasusa ti gene te. Oni kparia aboro akparia. Nikpiapai, ka si du nga boro nandu andu niipo tipa gani sunge, si ngbaangba oni mbu ní ambu ní susi. Ka oni amanga dezirepai ngbadimo babagaahe, ka oni dingisongo aboro rago ki gberẽ ti babagiahe ya. Si niwenepai gbe oni fura na aboro ho i akura ni bangbeahe yo, angianga ho i arimo ni koyo ya. Ka oni ndunga fuo aboro ngba gu gene nika ba gunde aba tiyo ya. Si naida oni duadu a na rugatinapai ho oni akparaka awaraga ni. Ka si du nga boro na nyemupai gbua tooni, si ngbaangba oni fu kina trakte funi.
4. Wai du manga dezirepai bangiri gene nigupai nafu ngbarago na kini kusi wene sangbanaha?
4 Manga dezirepai bangiri gene nasa rani ani gbandaka tunga rengo vuru guru regbo yo. (Batu. 11:6) Kura aboro kinaho ani agbiayo bangiri gene nga aguyo ani arengbanga ka gbiayo ho ani atungusapai ni rogo akporo ya. Si ngba angba oni mangi mbakadapai tipa kaa manga dezirepai bangiri agene, nga gu gene tungusapai nafu ngbarago afu na kini kusi wene sangbanaha.