Ya Mo Oni Rengbe ka Manga Dezirepai Nyemu?

1. Ringbisihe kuti gupai wene bawirikipai sa akehe, gini regbo gu mokedi nangia Pauro anaatungusapai ti ni kini tanga nani ti akporo?

¹ Ringbisihe kuti gu buku du rimoho nga Daily Life in Bible Times, gu mokedi nangia Pauro anaatungusapai kini tanga nani ti akporo tona ti “ndu uru 4 nyemu ki da ku yuru.” Ani ainongo ho singia si nangia gupai Pauro anaamangaha amanga kindi te, ono ani ima ino gupai nga ko aima rengba ka ‘manga apai dunduko mbiko wene pangbanga.’ (1 Kor. 9:19-23) Gipai re akodi mbakada ko gako apai tipa kaa tungusapai kporo na kporo ti agu aregbo ko arengbe arengba ka gbia aboro.

2. Tipagine duhe ti ni nga nyemu nga wene regbo tipa tungusapai?

² Dedede rogo dungu aba, abatungusipai natungusapai kini tanga nani ti akporo wiso rogo agu aʹuru nga ga poso. Ono tie, rogo gu dagbarago du oni rogoho, ya mo wiso kindi nga gu wene regbo rengbe oni ka gbia aboro ti ni tiikporo? Gu kura bazakigene sa agumba gupai tipa gako dagbarago nga: “Si ima kpakara ka gbia boro tiikporo uru. Ono badungu aboro du kporo nyemu.” Manga dezirepai nyemu rengbe ka fu momu furani gbe tipa ani gbia akumba kporo ka gumba wene pangbanga fuyo. Dedede nyemu, aborokporo ni zezeredi yó na i ima rengba ka ida ani fura naayo riipa Ziazia Kekeapai. Ka si du nga si rẽarẽ tipa oni mangihe wo, si naida abaakumba mangi mbakadapai tipa agu adunguratise nga ga tungusapai si naamanga nyemu.

3. Wai gu rengbe ani ka mangasunge na rugatinapai ho ani amanga dezirepai ni nyemu?

³ Oni Du na Rugatinapai: Ho ani amanga dezirepai ni nyemu, si ni nyanyakipa pai ani du na rugatinapai. Nikpiapai, ka si du nga oni kuru kua aboro ti gu regbo adanga ya, i ari gayo riahe nga ga nyemu ti ni, gupai ka ngba gbe nga ka ya fuyo oni aye berewe ti kura regbo. Ka si du nga rago na bitimo, oni ru rogo gu ba irakporo nika bi roni abi rogoho na oni ki gumba pa tironi niipo na ndu gupai ye oni ti ni. Si a nipatatamana kaa mangasunge niba ue ue watadu nidungu roni na kaa mangasunge rogo agu aba adunga nigbugbuhe ya ono duadu na we rogoho. Ka oni ndunga kua aboro yo gii regbo yo ho i aida ka rimoni ya. (2 Kor. 6:3) Gu rago oni naima ino gupai nga ngbanga ha yuru te, oni tungusipai rogoho mbata fu yuru da.—Snz. 22:3.

4. Gini amaku naye furani ti manga dezirepai nyemu?

⁴ Amaku: Ani nagbia bakere ngbarago ho ani agbia boro ni ka manga dezirepai funi. A wa ani kaa manga dezirepai amanga kindi, kinawo a ani kaa gbia amomu tipa ka undo aboro i “bati dunduko, ki ye sa gu inahe nga ga rengo.” (1 Tim. 2:3, 4) Ya mo oni rengbe ka manga ariapai rogo gaoni apai yo tipa kaa manga dezirepai nyemu?