Wene Vovo Gene Tipa ka Manga Dezirepai Gbaiga
1. Ginipai i nangarasi agu adungurati du na agu aba rogoho aboro andu gbe rogo ni nduyo tipa i mangihe?
1 I ima ngarasa agu adungurati du na agu aba rogoho aboro andu gbe rogo ni nduyo tipa i naamanga dezirepai gbaiga nigbaraga yo awaraga ri mbisa watadu guhe i aturaha atura. Ho i agbaraga awaraga ni rii he, batungusipai sa naru watadu nasungo mbembedi na ni. Ono tie, si naida abatungusipai ue du pati gu mbisa i nagbaragi awaraga rii he. Agu aboro naru pati agu awaraga i nagbaragihe re si naida i du zaaza na aboro, na kidu na yo wa abakureayo na kini di yo kugume. Ka i bi gupai nga boro ima tona gbeberã ni kuti agu awaraga re, na ki tona kaa nganaha, batungusipai sa rengbe naya, “Ya mo mo abakingo bangiro tipa gu pai Ziazia Kekeapai agumbaha tipa gipai re?” Si naida kura batungusipai sa watadu abatungusipai ue du kina barabangiri gu gbaragi gbaragi awaraga re ho i amanga dezirepai ni gbaiga.
2. Oni gumbanga pangbanga nga gu nayugo wai nyakipa manga dezirepai gbaiga nigbaraga awaraga rii mbisa.
2 Gi ngbatunga gene tungusapai re ima sa dungu vovo aboro i wiriki Ziazia Kekeapai. Kura degude sukuru sa rogo bakere ba wirikapai aida ka ke pangbanga tipa aDezire Yekova, ono ri ainongo bara Bambu Kindo nga gu ka ri ndu ku rogo te. Fuo poso sa, ri abi gaani awaraga i nagbaragihe rii mbisa mbembedi na gari sukuru. I atona wirikapai na ri, na awere, gu degude sukuru re ni gu batungusipai naima zio bapatiza.
3. Wai du kura awirina abi gi ngbatunga manga dezirepai gbaiga re?
3 Wirina sa nidee nga gu ri naima gbia ngbarago mbiko manga gi ngbatunga dezirepai gbaiga re agumba gupai nga: “Kura aboro ni naaru pati mbisa tipa ka dia vovo amagazini. Kurayo kinaho naagianga pa aDezire Yekova mbata ya. Mi nabi gupai nga ngbatunga gi manga dezirepai gbaiga re nika sa gupai nga ani tungusipai fu badungu aboro.” Kura wirina nidee ape gupai nga: “Gere nga wene vovo gene manga dezirepai bambiko aboro du naye koyo du mo ni, na ka si vura du vuru nga i na nyemupai gbe te, i naida aida ka inopai tipa gupai namanga ho i abi gbaragi gbaragi awaraga ni.”
4. Tipagine duhe ti ni niwenepai tipa ka maa mbisa kina rogo bangisa ba, ti bangisa regbo na aposo dunduko?
4 Si niwenepai gbe ka maa mbisa kina rogo bangisa ba, ti bangisa regbo na aposo dunduko. Gipai re nika sa gupai nga aboro naabi gbaragi gbaragi awaraga rii ambisa dedede na kidu na ngbarago ka sana asanahe watadu ka dia waraga. Ya mo gaoni dungurati mangi mbakadapai tipa ka manga dezirepai gbaiga? Kangia wo duhe, mo rengbe arengba ka gbia ngbarago mbiko manga mo gi wene gene tungusapai du na wene sangbanaha re tipa “ka tungusa pa ga Mbori ngbi rogo arago dunduko.”—Rk. 9:60.