Sanduki Sanahe

◼ Da si aida ní ke waraga fu be-basunge ti kpoto waraga watadu rogo Internet tipa ka sanahe tipa undo?

Kura gaani awaraga kinaho du na ba ti kpotoho rengbe boro ka kepai rogoho ki kedihe ku be-basunge yo tipa ka sanahe tipa kura buku watadu tipa aDezire Yekova ye fuoni. Kurigure, gaani bangiriba nga ga Internet nga www.watchtower.org na bangiriba rogoho rengbe boro ka kepai rogoho ka sanahe tipa boro ye fuoni ka yugo Ziazia Kekeapai funi. Gi mbakadapai re naundo badungu aboro aundo i wiriki rengo. Ono tie, kpakarapai nakura akura ho kura abatungusipai ake waraga ni rogo agi abangiriba re tipa ka sanahe i kedi abuku fu agumeyo watadu fu gu kura aboro, watadu i kedi aDezire Yekova fuoyo i ndu ka undoyo rogo toro yo.

Gu kura aboro i akedi agu abuku fuyo i aidanga ha ya akpakanahe, kini ya wee gaani riigbu namanga yó gbegberẽe kini kedi dungu abuku fuyo ti aregbo dũ nga gu i aidanga ha ya. Gu kura abatungusipai i aya fuyo i ndu ka bi kura boro nga guni naasananga he nitini tipa boro ye fuoni ya, si nadu fuyo nimbumbupai ho i andu ni ki bi gu boro re ní ki zingi azinga. Sidu tie, si naida kina agu aboro duna nyemu rengo nitiyo sanahe tipa awaraga watadu tipa aDezire Yekova ye fuoyo rogo gaani bangiriba nga ga Internet watadu ti kpoto waraga. Si aidanga abatungusipai sanahe kubayo te. Ka be-basunge inihe ya boro du nasanahe kuba kura boro, si nikadu adu dindikodindiko ka manga gupai ní asanahe tipaha.

Wai tie rengbe ani ka undo gumerani watadu kura boro rogo toro yo nga guni naraka tuturũu? Ka si du nga oni naida gaoni boro gbia waraga, si ngbaangba kina roni kedihe funi. Ka si du nga ní na nyemupai na ní naida aDezire Yekova ye fuoni ono ka oni ainongo wai ka gumbaha fu agu abaakumba du rogo gu rago du ní rogoho ya, si naida oni hiisi gu fuomu nga Please Follow Up (S-43) ki fuhe fu gu bakeapai nga ga gaoni dungurati, ko nika kedaha ku be-basunge yo. Ono ka si du nga gu boro duna nyemupai re ní bambukiso yo watadu bambungua yo, ka oni kedinga fuomu ku be-basunge yo tipa ní ya. Gupai rengbe oni ka mangaha nga ka ngarasa ní ní asadi ka gbia agu aDezire Yekova ninaandu kurogo gu ba re watadu ní ke waraga nitini ku be-basunge yo.