Si Naida ka Ndu Fuoni Nibasa

Tona ti gu regbo i agumba pa gu gaani bangiriba nga ga Internet, bange agu aboro sanahe tipa wisigo Ziazia Kekeapai nasona kina kumbatayo. Gu kura aboro nasanahe tipa wisigo Ziazia Kekeapai ngba gu kura agene kia nga ga manga dezirepai. Ho boro asanahe ni tipa wisigo Ziazia Kekeapai, Be-basunge namangapai kutini ni kina boro ipo. Ni kpiapai, ka si du nga boro sanahe tipa wirikapai rogo gu gaani bangiriba nga ga Internet nga jw.org, be-basunge nagumbaha fu agu abaakumba du rogo gu dagbarago nga ga gu boro re tifuo auru ue. Ono gu kura aboro kinaho gumba gupai nga wa i asanahe tipa wisigo Ziazia Kekeapai, boro aadanga fuoyo te. Ginipai rengbe ani ka mangaha mbata fu gu nyemupai du yo na ni re zere?​—Mk. 4:14, 15.

Ka gu boro arakanga rogo gaoni dagbarago ya yugu nyemu rengo, oni hiisi gu fuomu nibasa nga Please Follow Up (S-43) ki fuhe fu gu bakeapai nga ga dungurati ko ti regbo gu dunguratise nika du nibasa. Si naida gu bakeapai nga ga dungurati ko kepai tipa gu boro re nibasa fu gu dungurati du rogo ga gu boro dagbarago re watadu fu be-basunge tifuo uru sa watadu ue rogo gu ba nga ga Dungurati du rogo gu gaani bangiriba nga ga Internet nga jw.org. Si naida abaakumba naazaka gu bangiriba re dedede. Ka i gedi gupai yo nga boro gu duho rogo gayo dagbarago naida ka wirika Ziazia Kekeapai, si naida i mangipai sa ni nibasa. Gu batungusipai i asia ni tipa ni ndu fuo gu boro re, si naida ni peresipa gu boro re mbatayo fu kura gaani apai dunduko. Ka oni abingo gu boro re kporo ya, oni rengbe ka kepai rii kpewaraga tipa tironi na gaoni namba terefuni watadu gu ba rengbe ni ka gbia roni rogoho ki mbuhe funi.