God’s Word for Us Through Jeremiah
1. Gini buku ani agbiaha ti regbo gu bakere dunguratise nga ga aˈuru biata rogo 2010, na wai ani ka mangasunge nani?
1 Nairiwo gu ngbarago ani adu nani ho ani agbia gu buku ni du rimoho kuari re ti regbo Gu Bakere Dunguratise Nga ga Aˈuru Biata naadu rogo 2010, riihe adu nga “Oni Nye Mbembedii na Yekova!” Gi buku re na memeapai rogoho tipa gaani raka, nga gu du rogo agu akitabu nga Yeremaya na Abia Kpenunga. (Rom. 15:4) I mbakadihe tipa wisigoho ti regbo Gu Wisigo Ziazia Kekeapai Nga ga Dungurati, na ani ka tona wisigoho rogo gu poso nga ga Ngbangba 5, 2012.
2. Tipagine rengbe ani ti ni ka gbia undo be agu akitabu nga ga Ziazia Kekeapai nga Yeremaya na Abia Kpenunga?
2 Si Aundo Rani Areme: Yeremaya, nga gu boro nake gi kitabu du rogo Ziazia Kekeapai re, agumbapai ninebi ti gu regbo vunduvunduapai adu Yuda yo. Ti tonatonaha, Yeremaya abi tiko nga ko arẽnga tipa gako sunge te. (Yere. 1:6) Ko agbia rungosiro be agu aboro naima inoko na singia be agumeko a rogo gu gbata i avunguko rogoho nangia Anatota. (Yere. 11:21, 22) Rago anigberẽ agberã ti Yeremaya ti kura aregbo. (Yere. 20:14) A wa ani amanga gaani nyanyakipa sunge nga ka ‘sa aboro dagba arikaaboro dunduko ni abawiriki,’ ani naagbia tirani agbia dedede na ngbatunga gu kparakaapai du wakina gu naadu tipa Yeremaya. (Mt. 28:19) Wisigo agu apai ko akehe re nika undo rani tipa ani mangi gaani sunge tungusapai kakaka na ani kidu naa kido.
3. Wai ani ka mangasunge na apapara gu buku nga Jeremiah?
3 Agu Apai Du Rogoho: Agu abangua averesi du tipa gedaha ti regbo wirikaha i kehe nipigipigihe. Ti digido gu wirikapai nga ga poso, i ke nyanyakipa sanahe sa watadu ue nibibirihe na nikikindigihe tipa ka kusa gu memeapai nga ga gu wirikapai re. Si naida i sana gu sanahe re asana ti regbo fugöpai. Wenewene asura gudu rogo gu buku re nga gu dungurati nika ida aida ka fura tipaha.
4. Wai rengbe ani ka gbia undo mbiko wisigo ani gu buku nga Jeremiah?
4 Tipa ka gbia undo gbe, mo mbakadi gamo wirikapai mbata fu regboho. Mo gbata gu memeapai rengbe mo ka mangasunge nani rogo gamo raka na gene tungusapai yo. Mo nikaragapai ti regbo dunguratise wenengai. Mbiko gu undohe nga ga Yekova, Yeremaya anyasi gako sunge na bakere ngbarago. (Yere. 15:16) Gi gaani wisigopai nga gi buku re undongo rani aundo tipa ani mangi gaani sunge tungusapai kina wai Yeremaya amangihe.