Oni Mangisunge na Gaoni Regbo Wenengai Gene Tungusapa Yo
ADezire Yekova adi asaa 1,945,487,604 kuti tungusapai rogo gu garã nga ga sunge nga 2014—gere nga gu gopai nayugo gupai nga ani ima diaberã kaa manga ga Yekova sunge kindi! (Tam. 110:3; 1 Kor. 15:58) Wa ‘rago naima guro,’ ya mo ani rengbe ka mangasunge na gaani asaa gene sunge tungusapai yo tipa ka tungusapai fu dungu aboro?—1 Kor. 7:29.
Tipa ani mangisunge wenengai na gaani regbo gene tungusapai yo, si naida ani naasaka asino mangaha asaka. Ni kpiapai, ka si du nga mo naadia bakere regbo dedede kuti bangisa gene tungusapai sa zanga mo fura na aboro, ya mo si aidanga mo mangi ariapai tipa ka gbia momu ka fura na dungu aboro te? Agu apai du tipa arago rengbe kadu ni bakiakia. Ono tie, agi aberãpai du kusende re ima rengba ka undoro tipa mo mangisunge wenengai na gamo regbo ka si adunga ‘wa ka mo ataka yuge ya.’—1 Kor. 9:26.
• Manga Dezirepai Kini Tanga na Ni ti Akporo: Tipa dungu agarã, abatungusipai aima inidotiyo na gupai nga ka manga sunge tungusapai kporo na kporo. Ono tie, wa duhe nga dungu aboro namangasunge uru, si angba gbe ka ani asadi ka manga sunge tungusapai tifuo bebere uru watadu nyemu ti gu regbo du dungu aboro tii kporo. Uru, tungusapai bangiri agene watadu ba bagaahe yo ima rengbe ka ye na wene sangbanaha.
• Manga Dezirepai Gbaiga: Si naida i moi ambisa gbiati guhe i naaturaha atura rogo agu aba dungu aboro andu rogoho ni ndu yo. (Oni bi gu Gaani Sunge Nga ga Kindo nga ga Bamburu 2013, kpe. 5.) Ka si du nga badungu aboro ima tona mbu nduge ngba gu gene ani asiaha tipa ka mangasunge tungusapai gbaiga ngbaha, gu gbuu nangerakurii sunge-tungusapai rengbe ka diaberã tipa ani di gu mbisa re ka ndu na ni ku rogo kura ba aboro andu rogoho gbe ni ndu yo.
• Karagatise Fuo Aboro Gbiati Wisigo Ziazia Kekeapai na Aboro: Ti agu aregbo adunga gu kura apapara sunge tungusapai na wene sangbana ti ni gbe ya, si angba gbe ka ani mbakadipai tipa ka karaga tirani fuo agu aboro ani afura nayo gbiati agu aboro ani naawirika Ziazia Kekeapai na yo. Ni kpiapai, ka si du nga tungusapai kporo na kporo naye na wene sangbanaha rago nzengu wiso, ani rengbe ka manga gaani wisigo Ziazia Kekeapai na aboro bebere uru watadu nyemu.
Wa vura duhe nga aregbo dunduko si aida ani ke pa agu asaa ani nadihe ho ani amangasunge tungusapai ni, ono gaani ngbarago nakio gbe ho du gaani sunge ni na wene sangbanaha. Ka mo bi gupai nga gu kura papara gaani sunge tungusapai ayengo na wene sangbanaha ti kura aregbo te, si naida mo asadi gu kura ngbatunga gene tungusapai. Mo kpari fu Yekova nga gu “Gbia du zuzuhe ni gako,” tipa gako rugapai wa ka mo rengbe ka manga wene siapai!—Mt. 9:38.