Wai Rengbe Oni ka Gbia Undo ti Gaoni Badona Nga ga gu Dunguratise Nga ga Tungusapai
1. Gini aundo ani anaagbiaha ti gu wisigo buku nga ga dungurati nga gu duadu kinaho areme vurube gu gaani badona nga ga gu dunguratise du tipa tungusapai?
1 Gu wisigo buku nga ga dungurati i anaamangaha mbataano, ya mo kura apaparaha ho nyemuhe amanga roni awere? Aboro anaadunguratiyo niumba yó na apai kidu zezeredi. Gipai re anaasa gupai nga ani naasonosa wene bakure dagbarani na kidu nyanyaki rogo idapase yo. (Snz. 18:24) Gu babiapai nga ga wisigo buku ko adu na rengba beko ka ino rani wenengai na agu apai naadu tipa rani nibasasa dunduko na kidu na rengba beko ka fu ngarasaro furani. (Snz. 27:23; 1 Pet. 5:2, 3) Agi aundo re kinaho kindi areme vurube gu gaani badona nga ga gu dunguratise nga ga tungusapai.
2. Wai gu rengbe ani ka manga bambata diandue tipa ka sonosa pagume nga gu rengbe ka nyakasa rani rogo toro yo rogo gaani abadona?
2 Oni Mangi Bambata Diandue: Bakio agu abadona nga ga agu adunguratise nga ga tungusapai wakina gu naanidu nga ga wisigo buku. Ho ani amangasunge tungusapai ni “na berã sa,” ani nasonosa dawedawe pagume. (Frp. 1:27) Bange aboro wai rogo gaoni badona oni namangisunge tungusapai naayo? Ya mo oni rengbe ka “zá ngbaduroni” yo rogo gi bangiriba re? (2 Kor. 6:13) Kurigure, ani rengbe ka yamba boro rogo gaani badona nga ga tungusapai tipa Gu Irisombori Nga ga Aborokporo watadu tipa riahe. Rogo gu kura adungurati, agu abadona nga ga gu dunguratise nga ga tungusapai ninaadia agu aboro kugume naye kaa fu gumbapai. Ho si adani ti kura badona sa, i nadunguratiyo ka rihe wa sa na ki ngarasi tiyo. I namangaha wo singia bagumbapai ho watadu ko ho te.
3. Gini amomu duho rengbe ani ka gbia ngarasaro ti ni rogo gaani abadona nga ga tungusapai?
3 Wa vura duhe awere nga adungurati nagbia tihe gbua bara ue rogo poso sa, anga si te nga si aidanga i naangerafuo abatungusipai rogo toro yo wenengai te te. I namaa agu ababiapai nga ga abadona yó tipa i naafu ngarasaro fu aboro rogo gayo abadona na kini yugu tungusapai fuyo. Ka si du nga gaoni babi badona ata manganga mbakadapai ka kura na oni gene tungusapai yo te, oni sana ní tipa ka kura na ní. Kurigure, gu babiapai nga ga sunge tungusapai ko ninaandu kurogo agu abadona nga ga tungusapai nibasasa dunduko rogo diwi yo. Rogo agu adungurati du niumbaha nga gu du na abadona rogoho gbua nibetehe, ko namanga mbakadapai tipa kaa ndu kurogo agu abadona re nibasasa dunduko bara ue rogo garã yo. Ya mo oni naambakada gaoni apai tipa ka kura naako ho ko ayeni kurogo gaoni badona?
4. (a) Wai gu i ambakada agu adunguratise nga ga tungusapai? (b) Tipagine si aida ani makiapai ti ni singia ani rengbe kafu kpurani tipa i naamanga gu dunguratise rogoho nga ga tungusapai?
4 Si niwenepai tipa abadona naagbia tihe nibakiakia tipa agu adunguratise nga ga tungusapai rogo aposo dunduko. Pa mangayo agu adunguratise re rogo dungu aba ti bangisa regbo rengbe ka saha fu abatungusipai taata tipa i niindu tipaha na kini da rogo gayo adagbarago niipo. Si nasa gupai nga i mbakadi abatungusipai vuru umba regbo yo tipa tungusapai na i ki ndu kurogo gayo adagbarago zanga keesa. Si nasa gupai a nga si du taata fu babi badona ko ini agu apai du tipa agu aboro du rogo gako badona na ki undo yó. Ono ti kura aregbo, kura apai rengbe ka sa gupai nga i kodi abadona ue kurogo bangisa ba sa. Ka si du nga dungurati naabaha nadungura tihe kurogo ba sa tipa gu dunguratise nga ga tungusapai rogo gu bambata Rago Nzengu nga ga diwi watadu tifuo Wisigo Ngbaõbambu Sinziri, si adu niwenepai ka aboro susungu wa sa na agu aboro nidu rogo gayo badona nga ga tungusapai na gu boro nanungusa gu dunguratise nga ga tungusapai ki fu bete aminiti fu gayo babi badona ko mbakadi gako aboro mbata fu i digisihe na kparakpee.—Oni bi gu sanduki nga “Ya Mo Oni Rengbe ka Fu Kpuroni Tipa I Naamanga Dunguratise Nga ga Tungusapai Rogoho?”
5. Wa vura duhe nga i aima mbu gu Wisigo Buku Nga ga Dungurati, gini kido rengbe ani kadu nani?
5 Wa vura duhe nga i aima mbu gu Wisigo Buku Nga ga Dungurati, Yekova nandu kindi kumbatayo kaa fu agu ahe furani dunduko ani aidaha tipa ka manga gupai ko akpinyemuhe. (Eb. 13:20, 21) Wa duhe nga Yekova du nangerafuo rani, he ho ani azingo tipaha te. (Tam. 23:1) Badungu amaku rengbe ani ka gbiaha vurube gu gaani badona nga ga gu dunguratise nga ga tungusapai. Ka ani mangi bambata diandue na ki ‘mi tunga gbe, ani ke he a gbe.’—2 Kor. 9:6.
[Box on page 6]
Ya Mo Oni Rengbe ka Fu Kpuroni Tipa I Naamanga Dunguratise Nga ga Tungusapai Rogoho?
Gu kura adungurati naakoda agu abadona nga ga tungusapai kurogo ba sa tipa gu dunguratise nga ga tungusapai ti digido aposo mbiko gupai nga ba ho ka i mangihe rogoho nibakiakia te. Agu adunguratise nga ga tungusapai nga papara gu dunguratise nga ga dungurati, sidu, pa mangayo ngbatunga agu adunguratise re kpurani nga bakere momu gbe. Ya mo oni rengbe ka fu kpuroni? Ka oni mbunga pa fu kpuroni mbiko gupai nga oni naberãha nga kpuroni angbanga te ya. Abaakumba nika makiapai tipa gu ba du kpuroni rogoho gbiati gu kura apai a wakina gu i anaamakiaha tipa gu wisigo buku nangia ga dungurati. Ka oni aida ka fu kpuroni tipa gu dunguratise nga ga tungusapai, oni gumbaha fu gaoni babi badona.