Agu Adunguratise Du Tipa Sunge Tungusapai na Bakere Undo Ti Ni
1. Ndu manga agu adunguratise du tipa sunge tungusapai nga gine?
1 Ti kura regbo sa, aYesu na gako abawiriki 70 adunguratiyo mbata fu i ndu ka tungusapai. (Rk. 10:1-11) Ko afu ngarasaro fuyo na ki tingidiyo na gupai nga i adunga ni sayo te, na “Gbia ati,” nga Yekova nika nungusayo. Ko aima fu arugute fuyo a nga gu naundo yo i mangisunge wenengai, na ko akedi yo ni “ba ue ue.” Areme a, agu adunguratise ani naamangaha mbata fu ani ndu gene tungusapai yo na wene nduhe ti ni—si tipa ka ngarasa rani, ka undo rani ani ini wai ka tungusapai wenengai, na ka mbakada rani tipa sunge tungusapai.
2. Si naida gu dunguratise du tipa sunge tungusapai di regbo wai?
2 Gu dunguratise du tipa sunge tungusapai ani naamangaha nga gu nakoda mbakada abadona, fu dagbarago fu aboro, gbiati kparakpee nidu tipa aminiti 10 kuti 15. Ariapai ima mangaha awere nibipa gu dunguratise re. Tona rogo Zerekpe, gu dunguratise du tipa sunge tungusapai nikaa manga tipa aminiti bisue kuti saba. Ono tie, ka si du nga i namangaha tifuo gu dunguratise nga ga dungurati, si naida si du ni wiri guruhe, bambiko agu aboro du pati ni niima gia badungu weneapai nga ga toro mbata. Manga agu adunguratise du tipa sunge tungusapai ni wiri guruhe nika sa aboro dunduko i di bakere regbo kuti tungusapai. Kurigure, ka i mangihe ni guruhe, si dinga bakere regbo be agu abazakigene watadu abatungusipai nga aguyo niima tona gayo sunge tungusapai mbata fu gu dunguratise re te.
3. Wai du si aida i mbakadi gu dunguratise du tipa sunge tungusapai tipa abatungusipai gbia bakere undo ti ni?
3 Si naida i mbakadi gu dunguratise du tipa sunge tungusapai tipa abatungusipai gbia bakerehe undo ti ni. Rogo dungu adungurati, si ni wenepai agu abadona nga ga agu adunguratise du tipa tungusapai ni gbiatihe rogo aba ni basasa kuba gupai nga kaa dunguratihe ku rogo bangisa ba sa. Gere rengbe ka saha taata fu abatungusipai tipa i naandu tipa gu dunguratise du tipa sunge tungusapai na ki ndu ku rogo gayo dagbarago a. Abatungusipai ima rengba ka mbakadatiyo ni ipo, na si nika du taata fu agu ababiapai nga ga abadona i moi berãyo wenengai fuo abatungusipai tipa ka ino gu gene si aida i undo yo ngbaha. Gu gbuu nga ga abaakumba ima rengba ka bi wai du apai rogo gayo dagbarago na ki diberã ka manga gupai rengbe ka ye na bakere undo. Mbata fu i nyasi gu dunguratise re na guru kparakpee, si naida aboro dunduko ini agu aboro i andu na yo na ki ini gu ba i andu ka tungusapai rogoho.
4. Tipagine si aidanga ti ni ani naabi agu adunguratise du tipa sunge tungusapai na paha kusende ti kura adunguratise ya?
4 Paha Kusende ti Kura Adunguratise Nga ga Dungurati Te: Bambiko gupai nga i naamanga agu adunguratise du tipa sunge tungusapai tipa si undo agu aboro nandu gene tungusapai yo, aboro rogo dungurati dunduko arengbanga ka du pati ni te. Ono tie, gure ayugongo gupai nga ani naabi agu adunguratise re na paha kusende ti kura adunguratise nga ga dungurati te. Awa kina kura gaani adunguratise, agu adunguratise du tipa sunge tungusapai nga gamahe be Yekova nga gu naundo rani tipa ani nyakasi akuarani kuti nyemuse na wene mangaapai. (Eb. 10:24, 25) Sidu, si naida gu boro nanungusa gu dunguratise re mbakadi tiní wenengai tipa gupai i nika sakaha ye na taarimo kuti rimo Yekova na agu aboro du pati ni ki gbia undo ti ni. Ka si du nga si rẽarẽ, si naida agu abatungusipai dunduko nandu tipa tungusapai mangi ome kadu pati gu dunguratise re.
5. (a) Gini asunge du ku be gu babiapai nga ga sunge tungusapai ko? (b) Wai du si aida gu wirina nga dee nungusi gu dunguratise du tipa sunge tungusapai? (Oni bi gu sanduki du ti kpewaraga 6.)
5 Agu Agene Si Aida Banungusi gu Dunguratise Re Mbakadi Tiní Ngbaha: Tipa boro mbakadi tiní wenengai ka manga papara dunguratise, si naida ni ima gbia gupai ni nika mangaha mbu regbo koyo kindi. Kina gu bangisapai re du tipa agu adunguratise du tipa sunge tungusapai a. Rengo ngaha nga, ho agu abadona nga ga agu adunguratise du tipa tungusapai adungura tihe ni ku rogo abaha ni basasa, agu ababiapai nga ga abadona watadu gayo amoundo du nanungusa gu dunguratise nga ga gayo badona. Ono tie, ho dungurati nikaa manga gu dunguratise du tipa sunge tungusapai ni rogo ba sa, gu babiapai nga ga sunge tungusapai ko nika sia boro ni nungusihe. Kura ababiapai nga ga sunge tungusapai ninaafu ringbisapai nga ga nungusa gu dunguratise re fu agu aboro dunduko ni naanungusa ha na ki diko wirinaha ti gu kpakakpaka ngua i naadiko atingidapai ti vuroho. Si naida gu babiapai nga ga sunge tungusapai ko mangisunge na tatamana ho ko asia aboro ni i nungusi gu dunguratise re, na ko moi gupai ku berãko yo nga padu gu dunguratise re ni wenehe naru kurii gu gene yugopai gbiati mangapai nga ga gu boro nanungusaha. Ka bakumba, moundo abaakumba watadu gu wirina rẽarẽ nga guni naima zio bapatiza adunga ho rogo kura aʹuru tipa i sia ni ni nungusi gu dunguratise re ya, gu babiapai nga ga sunge tungusapai ko ima rengba ka sia gu wirina nidee rẽarẽ nga gu ri naima zio bapatiza tipa ri nungusihe.—Oni bi gu kekeapai nga “Gu Regbo Si Aida gu Wirina Nga Dee Nungusihe.”
6. Tipagine si aida gu boro i nafu sunge nungusa gu dunguratise du tipa sunge tungusapai funi mbakadihe ti ni wenengai?
6 Ho ani agbia sunge ni rogo Gu Sukuru Nga ga Siokrasia watadu Gu Dunguratise Nga ga Sunge, si naida ani bihe na nyanyakipa ha na ki mbakadihe wenengai. Kura aboro nasungudo kina regbo gu dunguratise nga ga sunge tungusapai kini tona berãpa gupai i nika pehe. Ho i afu sunge ni furani nga ga manga gu dunguratise du tipa sunge tungusapai si naida ani bihe na nyanyaki paha kina wai ani naabi pa kura adunguratise. Awere, gu dunguratise du tipa sunge tungusapai nikaa dia regbo ni guruhe, si naida wene mbakadatise tipa ka saha si du ni wenehe na ki nyasi ti kina regbo. Wene mbakadatise a nakoda gbia gaani adagbarago nga ga tungusapai mbata fu regbo.
7. Gini bete apai si aida gu boro nanungusa gu dunguratise du tipa sunge tungusapai sakihe ti regbo gu dunguratise re? (Oni bi gu sanduki du ti kpewaraga 6.)
7 Agu Apai Si Aida I Sakihe: Wa adunga apai rogo adagbarago kina sa ya, ruru kangara moyambu akusanga waraga gumbapai nga gu si aida i naamangaha ti regbo gu dunguratise du tipa tungusapai te. Gu sanduki nga “Ti Regbo gu Dunguratise Du Tipa Sunge Tungusapai, Oni Rengbe ka Saka Agi Apai Re” na apai rogoho nga gu rengbe oni ka sakaha. Ti aregbo du, si naida i naamanga gu dunguratise du tipa sunge tungusapai ni sakapai. Ti kura aregbo, i rengbe ka manga wene mangimangi kpiapai ti regbo gu dunguratise re watadu vidio nga gu du rogo gaani bangiriba nga ga Internet. Ho gu boro nika nungusa gu dunguratise du tipa sunge tungusapai ambakada tiní ni tipaha, si naida ni berẽ pa gupai nika nyakasa agu aboro nandu ka tungusapai ni gu uru re na ki undo yo i tungusipai wenengai.
8. Gini apai rengbe yo ka sakaha gbe ti regbo agu adunguratise du tipa sunge tungusapai Rago Nzengu na Rago Poso?
8 Ni kpiapai, Rago Nzengu, badungu abatungusipai ni naakparaka Ngbaõbambu Sinziri gbiati Awake! Badungu agu aboro ni naatungusapai Rago Nzengu ni naakuranga bebere poso te, sidu, si ima rengba ka mbu fuyo i tingidi agu akpia wai ka tungusapai i amangihe ti regbo gayo Irisombori Nga ga Aborokporo. Sidu, si ima rengba ka du ni wenepai ka gu wirina nanungusa gu dunguratise du tipa sunge tungusapai fugu agu akpia wai ka tungusapai du rogo Gaani Sunge Nga ga Kindo. Gu kura apai rengbe ani ka fura tipaha nga gu vovo apangbanga du rogo gaani dagbarago, gu kurapai naamangi, watadu pa auru ongoda ho ani akparaka amagazini ni fu aboro, na gupai rengbe ani ka mbuyo na ni tipa ka ye berewe fuoyo ka sakaha ka sidu nga i ima dia magazini berani. Ka si du nga aboro kinaho pati gu dunguratise re nga aguyo naima tona kparaka agu amagazini i akparakaha ni gu diwi re, gu boro nanungusaha i ima rengba ka sanayo i peke bete aberãpai tipa wai ka kparakaha watadu i pekepa gu weneapai naamangi fuyo. Rago Poso, gu boro nanungusa gu dunguratise re ima rengba ka manga kina gu bangisa pai re nibipa agu awaraga i akparakaha rogo gu diwi re. Ani ima rengba ka kparaka agu awaraga ani naawirikapai na aboro rogoho, wa agu aburosua nga Wene Pangbanga na Oni Degeturoni fu Mbori gbiati gu buku nga Ziazia Kekeapai Ayugoho rogo ai uru, sidu, gu wirina nanungusa gu dunguratise du tipa sunge tungusapai ima rengba ka sakapa wai rengbe ani kafu agi awaraga re fu aboro.
9. Ginipai rengbe yo ka sakaha ti digido poso ho ani amanga kparakpara tua ni?
9 Ka si du nga dungurati namanga kparakpara tua ti digido poso, gu wirina nanungusa gu dunguratise du tipa sunge tungusapai ima rengba ka sakapai tipa wai rengbe ani ka kparaka vovo amagazini wa sa na gu waraga yambahe i akparakaha watadu trakte, watadu ko ima rengba ka saka gupai rengbe ani ka mangaha ka boro yugu nyemupai. Kurapai rengbe ko ka sakaha nga wenewene apangbanga nga gu nayugo wai nyakipa gu ngbatunga atua re.
10, 11. Tipagine si aida abatungusipai mbakadi tiyo ti ni tipa ka sa gu dunguratise du tipa sunge tungusapai wenengai?
10 Agu Agene Si Aida Abatungusipai Mbakaditiyo Ngbaha: Si naida aida a abatungusipai sa gu dunguratise du tipa sunge tungusapai si du ni bawenehe. Kai mbakaditiyo mbu regbo koyo kindi tipa sunge tungusapai, watadu ti regbo gu irisombori nga ga aborokporo, apai duadu ho beyo i fura tipaha na kura abatungusipai. Wene mbakadatise a nakoda rogoda gaani amagazini gbiati agu awaraga ani nika kparakaha mbata fu ani da ba gu dunguratise yo du tipa tungusapai tipa gu pai nga aboro dunduko guari ka ndu ku rogo gayo dagbarago zanga keesa.
11 Si ni nyanyakipa pai a ani naada ba gu dunguratise yo du tipa tungusapai mbata fu si tona. Rengo ngaha nga, ani naamanga asadatise ka da ba agu adunguratise yo dunduko nga ga dungurati ti regbo. Ono tie, ye tipa gu dunguratise du tipa tungusapai kusa ima rengba ka ga na apai kusayo. Wai rengbehe ka du wo? Gu wirina nanungusa gu dunguratise re ni naadia berã tipa dungu apai mbata fu ko kparaka aboro. Ka abatungusipai ye ni umbayo, ko ima rengba ka keda yo dunduko ku rogo gu ba i ata tungusanga pai rogoho ni bakerehe ya. Ka si du nga kura awirina ye ni nduyo tipa gu dunguratise re, na gu dagbarago i andu ka tungusapai rogoho ni tuturũ he, gu wirina na nungusaha ima rengba ka kusayo na agu awirina du na aũnduge beyo. Ka si du nga dagbarago nga ga tungusapai rogo gu ba du na amangi gbegberẽ apai rogoho ni kerehe, ko ima rengba ka keda agu awirina nga akumba i ndu ka tungusapai sa na agu awirina nga adee, watadu i tungusipai mbembedi na yo. Ko ima rengba ka kusa agu abatungusipai duni sosono yo watadu ni terengeterenge yo i ndu ngba agu agene duni wenehe. Ko ima rengba ka kusa vovo abatungusipai na agu abatungusipai naima du na inohe gbe. Ono ka abatungusipai da kusa, gu wirina nanungusa gu dunguratise re nika ru berewe ka manga kura mbakadapai watadu ka fugo agu ambakadapai i niima mangaha tipa ka kusa agu awirina ye kusa re na aguyo niima ye mbata. Rengo ngaha nga, kura aregbo kinaho rengbe ani kaa da kusa na wene nduhe. Ono tie, ka si du nga sino rani du nga da kusa dedede, si naida ani sana tirani ka ino si ngia ani nada kusa mbiko gupai nga ani na zanga tambuahe tipa agu adunguratise du tipa sunge tungusapai watadu ani ambakadanga gaani apai ti genehe mbu regbo koyo kindi te.
12. Ka si du nga oni naamanga mbakadapai nga ga kura dedede nitironi, ginipai si aida oni berẽpa mangaha?
12 Abatungusipai ima rengba ka manga mbakadapai nitiyo nga ga kura mbata fu gu dunguratise du tipa sunge tungusapai tona watadu gu wirina nanungusaha du rengbe ka kparaka yo. Ka si du nga oni ninaamanga gaoni mbakadapai nitironi nga ga kura dedede mbata fu gu dunguratise du tipa sunge tungusapai, ya mo oni rengbe ka za ‘ngbaduroni’ yo ni ndu oni gene tungusapai yo na kura awirina ni basasa kuba gupai nga kaa ndu dedede na kina agu aboro nga abakurearoni? (2 Kor. 6:11-13) Ya mo oni rengbe kaa manga mbakadapai dedede tipa kaa kura na vovo batungusipai tipa ka undo ni ni sonosi gani biri yugopai? (1 Kor. 10:24; 1 Tim. 4:13, 15) Oni degeturoni wenengai kuti agu arugute ka i fuhe furoni, nga gu nakoda rugute nibipa gu ba i niya oni tona sunge tungusapai rogoho. Ho gu dunguratise re anyasa ni, si aidanga oni aria agu ambakadapai i niima mangaha te, si naida oni ndu nibasa tipa tungusapai.
13. Ka ani dunduko mbakaditirani wenengai tipa agu adunguratise du tipa sunge tungusapai, waigu si nika undo rani?
13 Agu aboro 70 Yesu akusiyo gene tungusapai ‘ayego na ngbarago.’ (Rk. 10:17) Zanga kapa, gu dunguratise Yesu amangihe na yo mbata fu i kuru gene tungusapai yo aima undo yo i du na diabese rogo gayo sunge tungusapai. Areme a, agu adunguratise du tipa sunge tungusapai ima rengba ka undo abatungusipai i du na diabese rogo gayo sunge tungusapai. Ka ani dunduko mbakaditirani wenengai tipa gu dunguratise re ni manga ani agu apai bi ani he re, si nika ngarasa rani, ki undo rani ani ini wai ka tungusapai wenengai, na ki mbakadi rani tipa ani, ‘tungusipai fu arikaaboro dũ.’—Mt. 24:14.
[Gu sura du ti kpewaraga 4]
Si Aidanga ani naabi agu adunguratise du tipa sunge tungusapai taata watadu na paha kusende ti agu adunguratise nga ga dungurati te
[Gu sura du ti kpewaraga 5]
Ho boro ambakada tini tipa nungusa gu dunguratise du tipa sunge tungusapai, si naida ni berẽpa agu apai nika ngarasa agu aboro nika kura gene tungusapai yo na ki undo yo i ini wai ka tungusipai wenengai
[Gu sanduki du ti kpewaraga 6]
Gu Regbo Si Aida gu Wirina Nga Dee Nungusihe
Si naida gu wirina nga dee vo ũdadarii na si naida ri sungu asungo ho ri anungusa gu dunguratise ni du tipa sunge tungusapai. Gupai ri nika sia ka sakaha, si du teketeke wakina gu ka gu wirina nga kumba nisakihe. Ka ri furanga wa ka i ya ri nayugopai ayugo fu agu aboro du pati gu dunguratise re ya, si naida ri mangihe ni sakapai. Ka si du nga ri nasia kura wirina ni dee nga gu ri naima zio bapatiza ri mangi kparakpee, si naida gu wirina re vo ũdadarii avo a. Ka wirina ni kumba ye kupati gu dunguratise re si naima tona, si naida gu wirina nga dee re mbuhe fuko ko nyasi nungusaha. Si naida gu babiapai nga ga sunge tungusapai ko ima ino agu apai rengbe ka manga ku mbatayo na ki fu arugute tipa wai rengbe yo ka mangapai kuti ni tipa ka si ayengo na vunduvunduapai ya. Ni kpiapai, tooni paranga wirina nga guko naima zio bapatiza ima rengba ka du pati gu dunguratise re ti gu regbo wirina nidee anungusaha, ono abaakumba ki bihe nga ko arẽnga ka nungusaha te. Ti ngbatunga aregbo wa gure, gu babiapai nga ga sunge tungusapai ko ima rengba ka pehe mbu regbo koyo kindi nga gu wirina i nisia ri du nika nungusa gu dunguratise re, ono gu paranga wirina re ki mangi kparakpee ka abaakumba bihe nga ko rẽarẽ ka mangaha. Watadu Nyanyaki wirina ima rengba ka duho nga gu ko si aidanga ko nungusi gu dunguratise re watadu ko mangi kparakpee ya mbiko gu ndupai kina abaakumba na inihe. Ti ngbatunga aregbo wa gure, si naida abaakumba ima pehe fu agu awirina nga adee nga aguyo i nasia yo i nungusi gu dunguratise re nga si naida kina yo nungusihe ki mangi kparakpee ka ko vura duadu ho vurũ, ono si aidanga abaakumba pe ndu gupai fuyo ko arẽnga ti niya te. Si naida a abaakumba ima pepa agu auru agu awirina nga adee nika nungusa gu dunguratise re fu gu wirina re.
[Gu sanduki du ti kpewaraga 6]
Ti Regbo gu Dunguratise Du Tipa Sunge Tungusapai, Oni Rengbe ka Saka Agi Apai Re:
• Kpia wai ka tungusapai nga gu du rogo Gaani Sunge Nga ga Kindo.
• Vidio tipa tungusapai nga gu du rogo gaani bangiriba nga ga Internet nga jw.org.
• Gu kura papara wene gene fugo na boro, wa gu nga tona fugo na boro, gumba gupai ani ka ndu berewe tipaha fuo boro, watadu pepa gu mbakadapai nga ga fu gamahe ho boro adia waraga ni berani.
• Wene veresi nga gu rengbe ka ngarasa aboro rogo sunge tungusapai.
• Pangbanga nga ga tungusapai nga gu du rogo gaoni dagbarago watadu gu du ni kekehe rogo gaani awaraga.
• Kurapai nga gu du rogo kekeapai rogo Gaani Sunge Nga ga Kindo.
• Kurapai rogo Gu Dunguratise Nga ga Sunge nga gu i amangihe bara mbeda kusayo.
• Kurapai nga gu nabipa sunge tungusapai nga gu du rogo Ngbaõbambu Sinziri.
• Kurapai nga gu nabipa sunge tungusapai nga gu du rogo gaani abuku wa agu nga Ministry School gbiati “Come Be My Follower.”
• Papara gaani bangiriba nga Internet nga gu rengbe ani ka mangasunge na ni gene tungusapai yo.
• Papara Agu Apai Fugo Mbori Afura Tipaha watadu Mounda Tipa Wisigo Fugo Mbori nga gu rengbe ani ka mangasunge na ni gene tungusapai yo.
• Wai ka tona fugo na gu boro rengbe ani ka gbia ni rogo gaani dagbarago, wa gu boro naya Mbori ti ni te, gu boro idi kuti gupai nga ahe akuru nisaha, gu boro du rogo gu pambori nga ga aHindu, watadu boro gu pambori nga ga Buda.
• Wai ka karagapai fu gu irakporo gumbapai ka za rani ti fugo.
• Wai ka undo gu boro oni nakuru na ni gene tungusapai yo ni ini wai ka tungusapai wenengai.
• Wai ka karagapai ho ani agbia gu boro ni nape kura fugo.
• Wai ka manga angbatunga dezirepai, wa agu nga sunge gbata aboro, manga dezirepai rogo terefuni, manga dezirepai gbaiga, karagatise ka bi agu aboro ani aafura nayo, watadu wirika Ziazia Kekeapai na boro.
• Tingidapai tipa bandatise, fura wenengai, mangapai rogo pa irisa, du na ruru bipai, watadu kura ngbatunga agi apai re.