Gaani Bangiriba Nga ga Internet—Oni Mangisunge Nani Gene Tungusapai Yo
Oni Yugubara gu Gaani Bangiriba re fu Aboro: Gu kura aboro duadu na ndundu ka fura na ani watadu ka dia gaani awaraga ono i rengbe arengba ka wisigopai tipa aDezire Yekova rogo gu bangiriba nga ga Internet nga jw.org kpuyo yo. Sidu, oni takipande gu gaani bangiriba re ti gu ai regbo momu amanga.
Oni Karagapai Kuti Asanahe: Ti kura aregbo, gu boro oni nandu ka tungusapai funi, gu boro duna nyemu rengo, watadu gu boro oni naini ní, rengbe ka sanahe tipa aDezire Yekova watadu tipa gaani aida. Oni yugu karagapai funi nibasa nimanga oni sunge na gu kompiuta nga ga bee, terefuni, watadu bakere kompiuta. Si niwenepai gbe oni gedi agu averesi funi ke yó ho kina rogo Ziazia Kekeapai, angianga rogo Internet ya. Ka si du nga oni arengbanga ka rimo Internet ti gu regbo re te, oni sakipa wai funi rengbe ní ka mangasunge na jw.org tipa ka gbia karagapai kuti gani sanahe, ka si du nga ní ima ino mangasunge na Internet.—Oni ndu kurogo “Bible Teachings/Bible Questions Answered” watadu “About Us/Frequently Asked Questions.”
Oni Kedi Waraga Fu gu Boro Oni Naini Ní: Oni kedi gu PDF nga ga waraga oni nakusihe rogo Internet fu kura boro. Watadu oni kusi dede fugo waraga ki moihe kurogo CD. Ai gu regbo oni afu ngbatunga agu awaraga re fu gu boro aziongo bapatiza ya, si naida oni gedi paha ageda kurogo gaoni ripoti. Si aidanga boro kedi agu ahe du rogo gaani bangiriba re zanga i ini da du nakedaha te, na si aidanga boro kedihe nikpakutoho te. Si aidanga boro moihe kurogo kura bangiriba nga ga Internet a te.—Oni ndu kurogo “Awaraga.”
Oni Yugu gu Vovo Apangbanga Du Tipa ADezire Yekova: Gere nika undo aBawiriki Ziazia Kekeapai na kura aboro nga aguyo oni atungusapai fuyo i rugutiyo wenengai naapa gu sunge ani amangaha rogo zegino dũ gbiati wai du ani nikodikodi rani. (Tam. 133:1)—Oni ndu kurogo “News.”
[Diagram on page 5]
(For fully formatted text, see publication)
Mo Asadingo Ho
1 Tii “Awaraga,” mo gbata gu he mo aida ka kusaha, ki norõ he rii gu ngbatunga ha yo mo aida ka kusaha.
2 Mo norõ he rii gu bangirihe nga ga MP3 tipa si yugu tangaratangara rimo agu ahe du ho. Mo norõ he rii gu paparaha mo aida ka kusaha watadu rii ▸ tipa ka giaha.
3 Mo sia kura fugo dagba agere ka mo aida ka kusa waraga rogo kura fugo.