Wai ka Mangasunge na Ada Namanga Gupai Yekova Akpinyemuhe Areme?
Gu Burosua I Akusihe Tipa Undo Abawiriki Ziazia Kekeapai I Ye Kurogo ga Yekova Riigbu
1. Gini nduapai biata i akusi gu burosua ti ni nga Gupai Yekova Akpinyemuhe?
1 Ya mo mo tona mangasunge na gu vovo burosua nga Ada Namanga Gupai Yekova Akpinyemuhe Areme? I akusihe tipa (1) ka undo abawiriki Ziazia Kekeapai i rugutiyo wenengai na parani nga aDezire Yekova, (2) ka undoyo i inipa gaani sunge, na (3) ka yugo wai fuyo gaani riigbu amangaapai. Gu burosua nga Gupai Yekova Akpinyemuhe na agu awirikapai rogoho nadia kpakpu waraga sa nga gu rengbe ani ka wisigoho na boro vuru aminiti bisue kuti bawe tifuo wirika ani pai na boro.
2. Oni sakingo pa wai i ambakadi gi burosua re na agu apaparaha du ti ni.
2 Wai I Ambakadihe: Gu burosua re na apaparaha biata nga gu nafura tipa apai nibakiakia tipa ga Yekova riigbu, a wa gumbayo ho kuari re. I ake agu abangua riiapai du 28 ni asanahe, na gaha akaragapai gudu rogo agu aumba riiapai ngbefuoho nga gu keyo ho nibibirihe. I ade asura rogo aringara susi 50 nga gu du rogo gu burosua re tona ti tonatonaha ki da ti digidoho na si nayugopa wai ani amanga gaani sunge rogo zegino dunduko. Dungu awirikapai du gu sanduki rogoho nga “Mo Asadi ka Ino Kura Apai,” nga gu duna agu aberãpai rogoho rengbe mo ka ngarasa gamo bawiriki Ziazia Kekeapai ní mangipai sani.
3. Wai rengbe ani ka mangasunge na gu burosua nga Gupai Yekova Akpinyemuhe?
3 Wai Rengbe Mo ka Mangasunge Nani: Mo tonaha niyugo mo gu sanahe nga riipai. Fuoho, wa oni kaa geda gupai du tiihe sa, mo nyakasi gu umba riiapai keyo ho nibibirihe. Niyangaraha, mo ki sana agu asanahe nga ga fugöpai du bandu waraga yo. Oni rengbe arengba ka geda agenewaraga dunduko bara sa watadu kaa gedaha nibetehe kini sakihe. Mo mangisunge na gamo rugatinapai ka ino agu averesi si aida oni gedihe. Ka bangiro gonga ti fura tipa asura gbiati gu sanduki nga “Mo Asadi ka Ino Kura Apai” ya. Si naida gupai gbe nga kaa sakapai ti genehe. Ono wa vura duhe wo, oni rengbe arengba ka gu kuti kura riipai nga gu gu boro re aida ka inopai sani niipo. Nikpiapai, ka si du nga bakere dunguratise nambeda, oni rengbe arengba ka gu kuti gu riipai nga ga 11.
4. Tipagine du mo ti ni na ngbarago tipa gi vovo ũsunge re?
4 Ho ani awisigo Ziazia Kekeapai ni na boro, ani naundo ní ní ini gu Barani du ngbangbaturũ yo. Ono tie, si naida aida a ani yugupai funi tipa ga Yekova riigbu. (Snz. 6:20) Nairiwo gu ngbarago du ani nani kadu na gi vovo ũsunge re berani nga gu nasaha taata tipa ka mangaha wo!