Yugopai na gu Burosua nga Wene Pangbanga
1. Gini gene i mbakadi gu burosua nga Wene Pangbanga ngbaha?
1 A wa ani asakihe rogo gu Gaani Sunge Nga ga Kindo nangia ga Bamburu, gu burosua nga Gu Wene Pangbanga Naye be Mbori du dagba gu nyanyakipa aũsunge du rogo gaani sanduki-aũsunge nga ga yugopai. Badungu agu averesi du rogoho i akenga sangba ya, mbiko si naida irakporo wirikipai kina boro rogo Ziazia Kekeapai. Wa vura duhe nga, dungu gaani awaraga i akehe ngba gu gene rengbe boro arengba ka wirikaha nisani, i ambakadi gi waraga re boro wirikihe na bayugupai. Sidu, ho ani afuhe ni fu boro, si naida ani asadi ka yugo wai funi ani naawisigoho tipa ni rengbe ka bi wai ngba wirika wene pangbanga rogo Ziazia Kekeapai.—Mt. 13:44.
2. Wai rengbe ani ka mangasunge na gu burosua nga Wene Pangbanga ti gu bambata regbo ani nabi boro?
2 Gu Bambata Regbo Ani Nabi Boro: Mo rengbe ka ya: “Mi ane mbiko aboro nabakabangiriyo na pa wai gi raka re nika digo. Ya mo mo nabihe nga apai angba ku mbatayo? [Mo mbu ni tipa ni karagapai.] Ziazia Kekeapai na gu wene pangbanga rogoho nga gu rengbe ka fu maabangirise furani. Bete agu asanahe Ziazia Kekeapai akaragapai kutini gere.” Mo fu gu burosua re fu gu irakporo re, na ki ya funi ni sia sanahe sa giihe yo. Oni ki wisigi genewaraga sa tii gu wirikapai sia ni he tipa ka yugo wai funi ani naawisigoho. Gu kurapai rengbe mo ka mangaha nga ka sana irakporo na gu sanahe du mburuhe rii gu wirikapai mo nasiaha, na mo ki yugu wai funi rengbe gu burosua re ka undo ni ni gbia karagapai rogo Ziazia Kekeapai. Ka si du nga vidio kina rogo gu gaani bangiriba nga ga Internet jw.org nandu sa na gu wirikapai re, kura abatungusipai namaa ha fu boro.
3. Oni sakingo wai rengbe ani ka wisigopai na boro rogo gu burosua nga Wene Pangbanga.
3 Wai ka Wisigoho na Boro: (1) Mo gedi gu sanahe du ni bibiri he tipa ka gbeberã irakporo kuti memepai. (2) Mo gedi gu genewaraga ngbefuoho. (3) Mo gedi agu averesi du na gu kekepai nga “mo gedi,” na ki mangisunge na agu asanahe nika undo irakporo ni bi wai Ziazia Kekeapai akaragapai kuti gu sanahe du ni bibiri he re. (4) Ka si du nga kura genewaraga kinaho tii gu sanahe re, mo ki mangi kina gu bangisapai du kuari rogo 2 na 3 re. Ka si du nga vidio ho nandu sa na gu sanahe re, nga gu mo ata maanga ha fu gu irakporo re ya, mo ima rengba ka maaha ti regbo gaoni sakapai. (5) Ni yangaraha, mo sana irakporo ni fu karagapai kuti gu sanahe re tipa ka ino gupai nga ni ima giarogoyo.
4. Ginipai nika undo rani ani ini mangasunge na gi nyanyakipa ũsunge re?
4 Oni inidi tironi na gi nyanyakipa ũsunge re. Oni mangisunge na ni wenengai ho oni agbia momu ni. Mbata fu tona oni wisigopai na boro, oni berẽpa ni na gu wene gene rengbe oni ka undo ni ni berẽkurii agu averesi du rogo gu wirikapai oni amangaha. (Snz. 15:28; Amo. 17:2, 3) Wa oni kaa mangasunge na gi burosua re, oni nika bi gupai nga si du dagba gu wene aũsunge ngba mangasunge na ni ka yugo rengo fu aboro.