Wai ka Mangasunge na Gu Wene Pangbanga Naye be Mbori
Gu Vovo Burosua I Ambakadihe Tipa Karagatise fuo Aboro na Tona Wisigo Ziazia Kekeapai na Aboro
1. Gini vovo burosua i akusihe ti regbo gu bakere dunguratise nga “Mo Nibánda Kpotoro Yo!” nga gu i ambakadihe tipa si undo rani rogo sunge karagatise fuo aboro na tona wisigo Ziazia Kekeapai na aboro?
1 Ti regbo gu Bakere Dunguratise Nga ga Aʹuru Biata riihe angia “Mo Nibánda Kpotoro Yo!” ani aduna ngbarago ka gbia vovo burosua nga gu i ambakadihe si undo rani rogo karagatise fuo aboro na tona wisigo Ziazia Kekeapai na aboro. Gu Wene Pangbanga Naye be Mbori si wakina gu burosua nga Gine Mbori Akpinyemuhe rogo gu gene nga si nafura niguruguruhe na ngba gu taata gene boro agia rogoyo agia niipo, na i kusi gi vovoho re si du kuba gu ngaha re. Si naundo rani ani tona wisigo Ziazia Kekeapai na boro ti kina gu bambata regbo ani nabi ní. Ono tie, baraho Gine Mbori Akpinyemuhe asakipai ni tipa agu apai si aidaha be aKristano, nga gu rengbe arengba kadu nikpakarapai fu vovo abawiriki Ziazia Kekeapai i idi nani, gi vovo burosua re tigaha nafura gbe tipa gu wene pangbanga du rogo Ziazia Kekeapai.—Amo. 15:35.
2. Tipagine i akusi gu burosua ti ni nga Wene Pangbanga?
2 Tipagine i akusihe ti ni? Awirina rogo zegino dunduko aima digo nisanahe tipa gu taata waraga rengbe ka sa nyemu rengo ti aboro na ki ndu naayo kurogo gu buku nga Ziazia Kekeapai Ayugoho, nga gu bangua buku ani awisigo Ziazia Kekeapai na aboro nani. Agu aboro ninaagunde agunde ka wisigo Ziazia Kekeapai nimanga ní sunge na buku, i nidu adu na nyemu ka wisigoho na burosua. Na kurigure, si taata ka sa burosua kurogo dungu afugo.
3. Wai du gi burosua re kia ti kura awaraga ani naawisigoho na aboro?
3 Wai I Ambakadihe: Dungu gu gaani awaraga ani naawisigo Ziazia Kekeapai na aboro nani i akehe tipa boro gedihe ní ki rengbe arengba ka ino rengo nitini, ka boro avuranga undo ní aundo ya. Gi vovo burosua re tigaha kia. I akehe tipa boro wirikihe na bayugupai, angianga nisani ya. Sidu tie, ho oni afuhe ni fu boro, si adu niwenepai ka oni saki genewaraga sa watadu ue na ní. Agenewaraga niguruguruhe, sidu, oni rengbe arengba a ka sakaha na boro ngbadimo kpuni watadu ba gani sunge yo. Wa vura duhe nga si niwenepai ka tonaha na boro ti bambata wirikapai, ani rengbe arengba ka tona wisigoho na boro rogo ai paparaha.
4. Wai gu burosua re aundo rani ani yugupai kina rogo Ziazia Kekeapai yo?
4 Rogo dungu gaani awaraga, boro rengbe ka gbia akaragapai rogo agenewaraga sa agu asanahe du nikekehe. Ono rogo gi burosua re tigaha, boro rengbe ka gbia akaragapai gbe rogo Ziazia Kekeapai yo. Dungu aboro nakpinyemu ka wirikapai rogo Ziazia Kekeapai angianga rogo gaani waraga ya. Si du duhe ti ni nga, veresi ho dagba agu averesi keyo ho i nake sangbaha rogo gu burosua re te. Si naida i gedi sangbaha kina rogo Ziazia Kekeapai yo. Gere naundo aboro i ini ya gupai i awirikaha si naye be Mbori.—Yes. 54:13.
5. Tipagine duhe ti ni fu bayugupai ní mbakadi tiní wenengai ho ní andu ni fuo bawirikipai?
5 Gu burosua re asakanga rogo agu averesi dunduko keyo ho rogoho te. Tipagine? I akehe wo tipa si sa bawirikipai ní sana asanahe na si sa bayugupai i mangisunge na gani tandu yugopai. Si du duhe ti ni ninyanyakipa pai ka mbakadatise wenengai ti ai gu regbo ani andu fuo boro. Oni rugutironi na gupai nga: Ka oni furanga gbe ya. Ani na nyemu ka saka rogo Ziazia Kekeapai yo. Ono si ngba angba gbe ka sana bawirikipai ní pe gupai ní aberãha nga si nga rogo gu veresi yo oni nagedihe. Ka ani amangasunge na asanahe nitatamana, ani undo ní berẽkuriipai ki girogoyo.—Amo. 17:2.
6. Wai rengbe ani ka mangasunge na gu burosua re (a) rogo agu arago aboro akapa akapa kuti Mbori na Ziazia Kekeapai? (b) ho ani atungusapai ni nitanga nani ti akporo? (d) ho ani aida ka tona wisigo Ziazia Kekeapai na boro ti kina gu bambata regbo ani nagbia ní? (e) ho ani karagatirani ni fuo aboro?
6 Wakina gu kura gaani awaraga ani naawirikapai rogoho na aboro, ani rengbe ka fu gi burosua re fu boro ti ai regbo, ka si vura du nga rimoho dagba agu awaraga si aida ani fuhe fu aboro rogo gu diwi re te. Badungu abatungusipai nika gbia ngbarago agbia mbiko wisigo yo Ziazia Kekeapai na aboro nani ti kina gu bambata regbo i nagbiayo. Kurigure, a wa i agumbaha ti regbo bakere dunguratise, mangasunge nani ho ani akaraga tirani ni fuo agu aboro naadu na nyemupai ‘rengbe ka sa sunge karagatise fuo aboro si du niwenehe!’—Oni bi agu asanduki du ti kpewaraga 5-7.
7. Wai rengbe oni ka wirikapai na boro rogo gu burosua re?
7 Wai ka Wisigoho na Boro: Oni rengbe ka tona sakapai nigeda oni agu asanahe keyo ho nibibirihe na anambaha ti ni. Fuo gure, oni ki gedi genewaraga na gu veresi watadu averesi keyo ho nipigipigihe. Oni mangisunge na wene asanahe tipa ka undo irakporo ní girogo averesi yo. Fuoho, mbata fu oni gbisi kuti kura paparaha, oni sana irakporo ní karagapai kuti gu sanahe keyo ho nibibirihe, na oni ini gupai nga ní ima giarogoyo. Ho oni ka tona nduge atona ni fuo gu boro re, si rengbe arengba ka ngba ka oni sakipai tipa sanahe gbua sa rogo uru sa. Fuo bete regbo, oni ki gizosihe kaa wisigo agu asanahe dunduko du tipa bangisa wirikapai.
8. Wai si aida ani pepa agu averesi ani agedaha, na tipagine?
8 Agu averesi keyo gupai mbata fuhe nga “mo gedi,” si nga agu nakaragapai nzunzu kuti agu asanahe keyo ho nibibirihe. Ho ani apepa geda veresi ni, si angbanga gbe ani yawee, “Gu mokedi nangia Pauro ake gupai nga” watadu, “Mo bingo gupai Yeremaya apehe” te. Gu irakporo re rengbe ka berã gupai nga ani nageda kungbo fugo aboro. Si angba gbe ka ani ape agu afugo duwa, “Fugo Mbori nayaa” watadu, “Mo bingo gupai Ziazia Kekeapai apehe kumbatayo.”
9. Ya mo si naida ani gedi agu averesi dunduko keyo ho ti regbo wirikapai?
9 Ya mo si naida ani gedi agu averesi dunduko keyo ho watadu kina agu keyo pai pati ni nga “mo gedi”? Gure nabipa agu apai du tipa gu boro re. Veresi ho i nakehe gbua tipa ka yugo wari du pai ni rogo Ziazia Kekeapai te. Agu averesi re dunduko rẽarẽ tipa sakaha. Ono ti kura aregbo, ka regbo adunga be irakporo ya, ka ní adunga na nyemupai gbe ya, watadu ka ní ainongo gedapai gbe ya, ani rengbe ka geda kina agu averesi keyo pai pati ni nga “mo gedi.”
10. Gini regbo rengbe ani ka ga na wirikapai kurogo gu buku nga Ziazia Kekeapai Ayugoho?
10 Gu Regbo Si Aida Ani ga Kurogo gu Buku Nga Ziazia Kekeapai Ayugoho: Fuo wisigo ani pai bara dunguhe na boro rogo gu burosua re na ani kini mangihe dedede, ani rengbe arengba ka ga kurogo gu buku nga Ziazia Kekeapai Ayugoho watadu kaa ndu nani kumbatayo na kina gu burosua nga Wene Pangbanga re daho ani ka nyasaha ni. Si naida abatungusipai mangisunge na gayo rugatinapai tipa ka ino gu regbo si aida i ga kurogo gu buku re. Fuo ga ani kurogo gu buku nga Ziazia Kekeapai Ayugoho, ya mo ani duwa ka ani tonaha ti kina tonatonaha? Arugute ho tipa gere te. Aboro nibakiakia. Ono tie, dungu abawiriki Ziazia Kekeapai rengbe ka gbia undo mbiko wirikayo gupai i aima wirikaha mbata rogo gu buku nga Ziazia Kekeapai Ayugoho.
11. Tipagine si aida ani mangisunge ti ni wenengai na gi vovo burosua re?
11 Rogo gu zegino angenga wene apangbanga rogoho ya, ani na bakere momu berani nga ga tungusa gu pangbanga ngba kisusi, nga gu pangbanga nga ga Mbori Kindo nazogarago awere na si ima mbeda ka ye na vovo zegino nga gu ruruapai nika nye rogoho! (Mt. 24:14; 2 Pet. 3:13) Ani naa kido nga, dungu agu aboro nika gia gu wene pangbanga re nika pe gu fugo Ziazia Kekeapai ape nga: “Na ngba ndu gu ko naye na wene pangbanga ri abaagangara yo, nga gu ni nataka pande pa zereda, naye na wene pangbanga wene ahe, nataka pande pa bata a, naya fu Siona, ‘Ga Mbori nazoga arago.’” (Yes. 52:7) Ani manginga sunge amanga na gi vovo burosua re ka ye na wene pangbanga be Mbori fu agu aboro duna gomoro ime rogo gaani dagbarago!
[Box on page 5]
Rogo agu Arago Aboro Akapa Akapa Kuti Mbori na Ziazia Kekeapai:
● Rogo kura arago, abatungusipai rengbe ka bi gupai nga ka i fura tipa “Mbori” na “Ziazia Kekeapai,” si nika sa gupai nga ka aboro idinga ka gia gupai i agumbaha ya. Ho duhe ni wa gure, ti bambata nduge fuo boro, si adu niwenehe ka oni fura tipa kina agu apai aboro aberãpaha rogo gaoni rago, wa agu nga zingo wene zogarago, wari rengbeyo ka gbia wene aundo ni tipa gayo aborokporo, na agu apai nika manga kumbatayo. Isoke oni rengbe ka yugo gu burosua funi nga Wene Pangbanga oni naima dogoda fuoni mbata ki sakipai tipa wai ani aino ya Mbori kina ti ni na Ziazia Kekeapai rẽarẽ ani kido kuti ni.
[Box on page 5]
Ho Ani Atungusapai Ni Nitanga Nani ti Akporo:
● “Mi ye fuoro ka yugo wai duhe taata ka ino gupai du berã Mbori yo tipa aboro kumbatayo. Ya mo mo abakingo bangiro na gupai nga ya mo Mbori abatasa rani be arungo? [Mo mbu ní tipa ní karagapai.] Gi burosua re nayugo wari du karagapai ni kuti gu sanahe re rogo Ziazia Kekeapai. [Mo fu gu burosua re funi, na ki gedi gu bambata genewaraga nga ga bambata wirikapai, na gu veresi nga Yeremaya 29:11.] Nibi gipai re, ya mo mo nabihe nga Mbori nakpinyemu ani raki bawene raka kumbatayo? [Mo mbu ni tipa ní karagapai.] Ka mo idihe, mo rengbe arengba ka nye na gi burosua re. Ho mi nikaye ni berewe, ani nika wisigo gu ue genewaraga tipa ka gbia karagapai sa gu sanahe nga, ‘Wai Mbori nika batasa aboro be agu apai naye na rungo?’” Ka si du nga irakporo gu duadu na regbo beni ti gu bambata regbo oni nandu fuoni, oni rengbe arengba ka geda gu ue genewaraga na ki sakihe gbiati agu averesi du biata ya yó i gedihe. Oni ki mangi mbakadapai tipa ka ye berewe ka sakapai tipa gu ue sanahe nga ga gu bambata wirikapai re.
● “Dungu aboro nidu na nyemu kpara fu Mbori, gbe ho du yó ni rogo kpakarapai. Ya mo mo naakpara fu Mbori ti kura aregbo? [Mo mbu ni tipa ní karagapai.] Ya mo mo naberãha nga Mbori nagia akpee dunduko, watadu kura ngbatunga akpee kinaho angbanga tiko ya? [Mo mbu ní tipa ní karagapai.] Burosua gudu ane bere nga gu nayugo wai ka gbia gu karagapai Ziazia Kekeapai afuhe sa agu asanahe re. [Mo fu gu burosua re funi, ki wisigi gu bambata genewaraga na ní nga ga 12 wirikapai, na agu averesi keyo pai pati ni nga “mo gedi.”] Ati si niʹiiriwopai ka ino gupai nga Mbori nagia gaani akpee agia? Ono tipa ani gbia undo wenengai ti kparakpee, si naida ani ini Mbori aino wenengai. [Oni ba kpewaraga kuti 2 wirikapai ki yugu gu umba ariipai du rogoho.] Ka mo idihe, mi rengbe arengba ka mbu gi burosua re foro, na ti kura regbo berewe, mi ki ye ani gedi agu akaragapai Ziazia Kekeapai afuhe sa agi asanahe re.”
● “Mi ye fuoro mbiko gupai nga aboro nabakabangiriyo abaka naapa wari gi zegino re andu kuhoni. Ya mo mo naberãha nga apai angba rogo zegino? [Mo mbu ní tipa ní karagapai.] Badungu aboro ainongo gupai nga Ziazia Kekeapai na gu wene pangbanga rogoho nga gu rengbe ka fu maabangirise furani te. Bete agu asanahe Ziazia Kekeapai akaragapai sani gi du re.” Mo fu gu burosua re funi, na ki sana ní ní sia sanahe sa dagba agu asanahe du giihe yo nga gu ní aida ka ino karagapai sani. Fuoho, oni ki ndu koyo i nasakipai ni sani rogo gu burosua re, na ki wisigihe na ní. Oni mangi mbakadapai tipa ka ndu berewe fuoni tipa ka wisigo gu ue sanahe.
[Box on page 6]
Ti Kina gu Bambata Regbo Oni Nandu Fuo Boro:
● “Mi kuru fuoro ane tipa ka pepa vovo korosi duho nga ga wirika Ziazia Kekeapai. Gi burosua re na apaparaha 15 nga gu nayugo wari rengbe mo ka gbia akaragapai ni rogo Ziazia Kekeapai kuti nyanyakipa asanahe. [Mo yugu kpoto gu burosua re funi bani na bani.] Ya mo mo aʹasadingo ka giarogo Ziazia Kekeapai yo? [Mo mbu ní tipa ní karagapai.] Mo ru mi yugungo wai foro duhe taata. [Oni saki gu bambata genewaraga nga ga gu biata sanahe du rogo 3 wirikapai, na ki gedi Yugoti 21:4, 5. Ka si daada, oni ki wisigi gu genewaraga ngbefuo gure na ki gedi agu averesi ya yó i gedihe.] Ka mo idihe, mi rengbe arengba ka mbu gi burosua re foro. Na ani nazungodi ro mo asadingo ka wisigo Ziazia Kekeapai na ani tipa bete regbo. Ka si ngba tiro, mo ki ndu nani kumbatayo. Gu nikadu berewe, ani nika saka gu bambata wirikapai. Si ti kpakpu waraga sa gbua.”
[Box on page 6]
Ho Oni Akaraga Tironi ni Fuo Boro:
● Ho ani akaraga tirani ni fuo gu boro nadu na nyemupai, ani rengbe ka yaa: “Si niwenepai ka biro berewe. Mi ye na gi burosua re foro nga gu nayugo agu akaragapai Ziazia Kekeapai afuhe sa nyanyakipa asanahe. [Mo fu gu burosua re funi, na ki sana ní ní bi agu apai du ti kpotoho giihe yo.] Ginipai mo aida ka inopai tipaha gbe dagba agere? [Mo mbu ní tipa ní karagapai. Fuoho oni ki ndu koyo du gupai ni ní nasiaha.] Mo ru mi yugu wai foro rengbe ani ka mangasunge na gi burosua re ka gbia gu karagapai Ziazia Kekeapai afuhe sa gu sanahe re.” Oni wisigi genewaraga sa watadu ue na ní na ki gedi agu averesi ya yó i gedihe. Gure nga mo ima tona wisigo Ziazia Kekeapai na boro! Mo mbu gu burosua re funi na ki mangi mbakadapai tipa ka ye berewe fuoni. Fuo nyasa oni na wirikapai sa, oni rengbe ka gbiso kuti gu kuraha gu boro re nasiaha watadu ka tonaha ti tonatona burosua.