Fugo Mbori Rengbe Tipa Yugopai

1. Rii gu bakere dunguratise nga ga aʹuru ue nga ga gu garã nga ga sunge nga 2014 nga gine, na gini sanahe i nika karagapai kutini?

¹ Gu gaani bakere “Bayugupai” nga Yekova, ko nga yangara bawene bayugupai rogo zegino dunduko. (Yes. 30:20, 21) Ono, waigu Yekova ayugopai furani? Ko afu Ziazia Kekeapai furani, nga gu buku naima susa kura abuku dunduko. Wai rengbe gu yugopai ani agbiaha be Mbori ka undo rani ti kpotorani, berãrani yo, na rogo gaani pagume yo na Yekova? Gu karagapai du kuti gi sanahe re, i nika sakapai tipaha ti regbo gu ringbisapai du tipa bakere dunguratise nga ga aʹuru ue nga ga gu garã nga ga sunge nga 2014. Rii gu bakere dunguratise re nika ngia, “Fugo Mbori Rengbe Tipa Yugopai.” Mburuhe rii 2 Timoteo 3:16.

2. Akaragapai kuti gini asanahe nika yugo gu memeapai nika du rogo gu bakere dunguratise re?

² Oni Moiberã Roni Tipa gi Memeapai Re: Akaragapai kuti agu asanahe du kusende re nika yugo gu memeapai nga ga gu bakere dunguratise re:

• Gini ariapai gu yugopai ani agbiaha be Mbori amangaha rogo gaani raka yo? (Yes. 48:17, 18)

• Ginihe rengbe ani kadu na kido nga si duwa ka si mangi furani, ka ani gbatagene ka manga ariapai rogo gaani raka yo tipa ka mangasunge Kindo ti aregbo dũ? (Mara. 3:10)

• Ginipai si aida ani mangihe ka ani gbiatirani na gu ‘ngbatunga yugopai du kia’? (Eb. 13:9)

• Wai rengbe ani ka wirika ‘ga Yesu yugopai’? (Mt. 7:28, 29)

• Agu aboro nayugopai rogo dungurati, tipagine si aida aida ti ni a i naayugopai fu tiyo? (Rom. 2:21)

• Fugo Mbori rengbe tipa ginihe? (2 Tim. 3:16)

• Ginipai namanga aboro mbiko pa “zigizo” yó arikaaboro dunduko? (Agai 2:6, 7)

• Gini kido du Yekova na ni kuti rani? (Ef. 5:1)

• Tipagine si aida ani mangi asadatise amanga ti ni nyanyakii tipa ka nye rogo ga Yekova yugopai yo? (Rk. 13:24)

3. Tipagine si aida aida ti ni ani du pati gu bakere dunguratise re na ki degeturani?

³ Mbata fu gu mokedi nangia Pauro gumba gupai du rogo 2 Timoteo kapita 3 nga gu i nadi rii gaani bakere dunguratise rogoho, ko afura tipa agu apai nika manga rogo yangara areme. Ko aya: “Gbegberẽ aboro agberã kisusi na airanangahe a, kini nangi aboro, aboro kini nangi yó a.” (2 Tim. 3:13) Tipa ka boro nangingo rani ya, si ni nyanyakipa pai ani degeturani kuti gu yugopai nga ga Mbori na kini mangipai kutini. Sidu tie, ani dinga berã adia kadu pati gu bakere dunguratise re na ki degeturani wenengai.