Fugo Mbori Du na Tandu
1. Rii gu bakere dunguratise nga ga uru sa nga ga gu garã nga ga sunge nga 2014 nga gine?
1 Wa duhe nga Ziazia Kekeapai nga Fugo Mbori angianga fugo kpakpa aboro ya, si na ome ti ni ka aria gaani raka na ki sa gaani aberã gbiati gaani gene mangaapai si ringbisitihe na gupai Mbori akpinyemuhe. Fugo Mbori na tandu ti ni ka manga gine? Wai rengbe ani ka mangasunge na gu tandu re rogo gaani raka? Wai rengbe ani ka mangasunge na ni wenengai ka undo kura aboro? Ani na gu kido nga ani dunduko nika gbia nyakasaro tipa ka nyakasa gaani pagume na Yekova wa ani kaa wisigo agi apai re ti regbo gu bakere dunguratise nga ga uru sa nga ga gu garã nga ga sunge nga 2014. Riihe nga “Fugo Mbori Du na Tandu,” du mburuhe rii AEbere 4:12.
2. Si nika ida ani gbe berã rani tipa akaragapai kuti gini asanahe?
2 Oni Nika Gbia Akaragapai Kuti agi Asanahe Re: Wa oni kaa gia agu apai nika du yo, oni gbe berã roni tipa akaragapai kuti agi asanahe du kusende re.
• Tipagine si aida ani du ti ni na kido kuti Fugo Yekova? (Tam. 29:4)
• Wai rengbe ani ka gbia undo ti gu tandu nga ga Fugo Mbori rogo gaani raka? (Tam. 34:8)
• Wai rengbe mo ka mangasunge na gu tandu nga ga Fugo Mbori gene tungusapai yo? (2 Tim. 3:16, 17)
• Wai rengbe ani ka bandatirani ti gu nangahe nga ga gi gbegberẽ zegino nga ga Satana re? (1 Yo. 5:19)
• Wai rengbe paranga boro ka sonosa wene pagume na Yekova? (Yere. 17:7)
• Wai rengbe ani kadu nyanyaki zavura ho du ani ni rurungbura? (2 Kor. 12:10)
• Ginihe rengbe ka undo rani ani naamanga ariapai kindi rogo gaani raka, ka si vura du vurũ nga kura gbegberẽ apai kinaho naima inido rani? (Ef. 4:23)
3. Gini kura mamu berewe ani nika du na ni kodihe kuti gia agu apai nika du ti regbo bakere dunguratise?
3 Ani nika gbia undo agbia gbe ti gia ani akaragapai kuti gi nyanyakipa asanahe re. Kuri gure, ti regbo gu bakere dunguratise re, ani nika duadu na mamu berani ka kodatirani na kura awirina nga aguyo du rogo kura adungurati wakina gu si nidu a ti regbo gu bakere adunguratise nga ga aʹuru ue na ga aʹuru biata. (Tam. 133:1-3; 2 Kor. 6:11-13) Sidu, oni di regbo ka kodatironi na abakurearoni na ki gbia vovo abakure. Ka si du nga babi rimbasa adungurati du i nakedi ní tipa gaoni bakere dunguratise, watadu wirina Betere yo, oni rengbe arengba a ka dia ní kugume na diani. Nirengo, ani na badungu nduapai berani tipa ka sungudo gu bakere dunguratise nga ga uru sa du kumbatayo re!