Sanduki Sanahe

◼ Ti gini aregbo si aida natungusipai vo ũdadarii ho du ri ni na batungusipai?

Ho duhe ni nga natungusipai ndu na batungusipai fuo gu boro ri naawirika Ziazia Kekeapai awirika na ní mbataano, si naida ri vo ũdadarii avo. (1 Kor. 11:3-10) Bambiko si nga gu mbakadapai nga ga yugopai i aima mangaha, gu boro namangaha, ní du nanungusaha. Si nga papara gu mbakadapai nga ga dungurati. Ka si du nga dee du nanungusa ngbatunga gu wirikapai re ho du batungusipai ni kinaho, si naida ri vo ũdadarii avo. Ka si vura du vurũ nga gu batungusipai re ataziongo bapatiza te. Singia i namanga gu wirikapai re kporo, ngbagene, watadu rogo gu kura ba, ri duwa ka ri vo ũdadarii.

Ono ti kura aregbo, si rengbe kadu nga gu wirina nga dee gbia gu boro si aida i wirikipai na ní kina rogo gu ba ka i asungongo asungo sande ya, ti ngbatunga agu aregbo re, ka si du nga i ata sigiranga gu wirikapai re wenengai te, si aidanga dee vo ũdadarii te, ka si vura du vurũ nga i ndu na gu batungusipai nga kumba ka yugokpia wai ani naawisigo Ziazia Kekeapai na aboro. Rogo gu ngbatunga apai du wa gure, si naida abatungusipai mangisunge na rugatinapai ka ino gu regbo si aida i vo ũdadarii ti ni.