Mbakada Gaani Gene Tungusapai—Karagapai fu Agu Aboro Naida ka Za Rani ti Fugo

Ndu Gupai Duhe Ti Ni na Nyanyakipa Ha: Mo makianga gupai nga gu gberango naye be ome zegino ima mbeda ka manga. Ka aboro azubongo ku rogo gu ba du niwenehe ya, i nika kpi kindi. Mo kini guari kini ndu fuo gamo murakporo ki gumbaha funi, ono ní ki de fugo ade ngbaro, ki ya regbo beni te, ní namanga kura gani apai. Nirengo, mo ongonga aonga gbua wa kina gure ki mbuni te! Dungu aboro aidanga ka gia gupai ani atungusaha fuyo te, zanga ino gupai nga gu pangbanga re na nyanyakipa ha na si naye na bata. Si rengbe kadu nga ho ani andu ni fuyo, i na badungu apai tiyo. (Mt. 24:37-39) Watadu aboro aima peka kura apai fuyo tipa rani angianga rengo ya. (Mt. 11:18, 19) I rengbe ka berã gupai nga kparakparapai ho tirani na agu apambori namanga gbegberẽ apai te. (2 Pet. 2:1, 2) Ka irakporo adunga na nyemupai tiní tigu bambata regbo ani nandu fuo ní ya, si aidanga ani mbu ní nibasa te.

Wai Ka Mangaha:

Mbata fu oni tona tungusapai kporo na kporo, si naida oni di bete aminiti ka berãpa agu apai rengbe aboro ka gumbaha tipa ka za roni ti fugo, na ki berẽpa wai rengbe oni ka karagapai.
Ka irakporo atikango na gupai oni apehe, oni asadi ka ndu kindi ku mbatayo na fugo na ní ngba wene gene. Oni rengbe ka mangaha wo nitambua oni ní. Nikpiapai, ka ní ya gani pambori kina ti ni, oni rengbe ka ya, “Ani nidu na maabangirise ka gbia boro wa mo nga guni du na nyemu agu apai nga ga Mbori.” Ti kura regbo, pa ino oni agu apai du tipa irakporo rengbe ka undo roni oni ndu kindi ku mbatayo na manga dezirepai fu ní. Nikpiapai, ka ní ya regbo beni te, oni rengbe ka ya: “Ani ima inoho wo, ono mbata fu ani ndu, ani naida ka fu gi waraga re foro.” Kurapai berewe nga ka fu sanahe ka irakporo ya ní na nyemupai ti ní te. Oni rengbe ka ya, “Ya mo Ziazia Kekeapai du adunga mo na nyemuhe ya, watadu pambori?”
Oni du na rugatinapai. Si naida oni tingidi gupai nga Yekova aziongo aboro azio ngbaome i gi sangbako te. (Pa Rug. 30:19) Aboro dunduko nibasasa nika ringbisapa tiyo barabangiri Mbori. (Gara. 6:5) Ka irakporo aidanga na gaani pai ya, gupai ngba gbe nga ani mbu ní ki ndu. Ka ani yugu irisa tipa gani diaberã, gure nika sa gupai nga kura batungusipai mangi dezirepai berewe funi ku mbatayo.—1 Pet. 3:15.

Oni Asadi Gipai Re Rogo gi Diwi Re:

Ka si du nga irakporo gumba pai ka za roni ti fugo, fuo mbu oni ní, oni sakipa wai ka oni nikaragapai funi ngba wene gene na gu boro oni nakuru na ní.