Oni Mangisunge na jw.org Rogo Gaoni Sunge Tungusapai

Gaani bangiriba nga ga Internet nga gu wene ũsunge naundo rani ani gbandaka wene pangbanga si da “digida sende yo.” (Amo. 1:8) Dungu agu aboro ani atungusapai fuyo ainongo pa gu gaani bangiriba nga jw.org ya. Ono i naye ka inopaha kinaho batungusipai ayugopaha ni fuyo.

Babi adungurati sa akusi gu vidio nga Why Study the Bible?Gupai Si Aida Mo Wiriki Ziazia Kekeapai Ti Ni ku rogo gako terefuni na kini yuguhe fu aboro ho momu amanga ni. Ni kpiapai, ho ko atungusapai ni nitanga ti akporo, ko naya: “Mi nata fuo aboro tipa wiri guru regbo tipa ka undo yo i gbia akaragapai sa nyanyakipa asanahe biata, nga: Tipagine du badungu fudifudiapai ti ni rogo zegino? Wai Mbori nika mbakada agi apai re? Wai rengbe ani ka hipai awere daho Mbori nika mbakada apai ni? Gi wiri guru vidio re nakaragapai sa agu asanahe re.” Ko nazakaha nibasa fu boro ní bihe. Dungu aboro ninaadianga bangiriyo ti gu vidio re te daho si nika digo ni. Fuoho, gu babi adungurati re ki ya: “Mo ima gia gupai rogo gi vidio re nga mo rengbe arengba ka sanahe rogo Internet tipa boro ye oni wisigi Ziazia Kekeapai na ní. Wadu he nga mi ima ye, ani wisigingo ho tooni awere.” Ka gu boro re idihe, ko ki wisigi wiripai na ní rogo gu burosua nga Wene Pangbanga. Ka si du nga gu irakporo re na regbo beni te, ko namanga mbakadapai na ní tipa ka ye berewe. Ho ko asungo ni ka ongoda ka ri wiri he, ko nagumbapai wa kina ngbatunga gure fu gu boro kadu mbembedi na ko tifuo ko fura na ní mbata rogo wene gene. Ya mo oni namangasunge na jw.org rogo gaoni sunge tungusapai?