Oni Wirikipai be Agu Abatungusipai Naima Nyaka Rogo Rengo Yo

Ani nabi agu awirina rogo dungurati naima nyaka rogo rengo yo na nyanyakipa yo. Aguyo aima digo nimangisunge fu Yekova ni ruruyo tipa dungu agarã. Agu akurayo gbia inohe nga ga tungusapai barambeda. Agi awirina re ima bi wai Yesu anungusa gu dungurati nga ga aKristano ti gi yangada arame re ni kiiso ko gu sunge nga ga tungusapai na sunge sa aboro ni abawiriki. (Mt. 28:19, 20) Gu sunge nga ga tungusapai ima sayo i gbia “gu bakere tandu susi” ka hi akpakara apai rogo raka yo. (2 Kor. 4:7) Badungu apai rengbe ani ka wirikaha be agi awirina re. Ho i agbia mamu ni, i na ngbarago ka yugo agu apai wiriki yo ho fu kura aboro. (Tam. 71:18) Sidu, ani gbata mamu tipa ka wirikapai beyo. Wai rengbe ani ka manga gipai re?

Gene Tungusapai Yo. Si naida aida i raba vovo abatungusipai na aguyo du gayo inohe kindi tooni tipa i tungusipai wenengai. I rengbe ka wirika dungu apai nibiyo wai agu abatungusipai naima nyaka rogo rengo yo atungusapai. (Oni bi gu kekeapai du rogo gu Ngbaõbambu Sinziri nga ga Wegebe 1, 2015 du riihe nga, “Oni Kakuti Gaoni Sunge Tungusapai Zaaza,” biata genewaraga tii gu umba riipai nga, “Oni Undo Vovo Abatungusipai.”) Wai gbia oni undo ti mangasunge na ngbatunga agi awirina re gene tungusapai yo?

Ya mo oni rengbe ka manga mbakadapai na gu batungusipai naima nyaka rogo rengo yo ka kura na ni? Ka si du nga gu batungusipai re nga kazakaza boro, oni ima rengba ka ndu ku kpuni yo na gu boro oni awirika Ziazia Kekeapai na ní ka wirikapai yo. Fuo nyasa oni wirikapai, oni sana gu batungusipai re ni pepa agu abangiriba bi ní he nga si naida oni mangi ariapai rogoho.

Oni di Regbo na Yo: Oni di regbo na agu abatungusipai naima nyaka rogo rengo yo tipa ka inido tironi na yo. Oni ima rengba ka yamba guni sa tipa gaoni irisombori nga ga aborokporo na ki sasana ní na asanahe. Ka si du nga gu batungusipai re nga kazakaza boro, oni ima rengba ka manga mbakadapai ka manga gu irisombori nga ga aborokporo kpuni yo. Oni sana ní tipa wai ní aye ku rogo rengo yo. Gini amaku gbia ní he? Gini sonakumbatayo ní nabihe rogo ganí dagbarago? Gini ngbarago gbia ní he rogo mangasunge fu Yekova?

Si aidanga oni berẽ gupai nga rengberengbe aboro nga yo te. Agu abatungusipai naima nyaka rogo rengo yo na gayo abirĩ tungusapai ni bakiakia wakina rani. (Rom. 12:6-8) Aguyo kinaho naima gbinza, si kini sa gupai nga ka i dinga regbo na ani gbe ya. Wa vura duhe wo, ani ima rengba ka wirika dungu apai beyo mbiko i ima mangasunge fu Yekova ni ruruyo tipa gbanga regbo.