Mbakada Gaani Gene Tungusapai—Fu gu Buku Nga Ziazia Kekeapai Ayugoho fu Boro

Ndu Gupai Duhe Ti Ni na Nyanyakipaha: Gu buku nga Ziazia Kekeapai Ayugoho nga nyanyakipa ũsunge rogo gaani sanduki-aũsunge yo. Ono tie, ani du wa ka ani fuhe fu boro mbata fu ani wisigihe na ni. Sidu, ani dunduko si aida ani asadi ka ino wai ka fu gu buku nga Ziazia Kekeapai Ayugoho fu boro gene tungusapai yo. (Snz. 22:29) Badungu aberãpai duho, na si naida abatungusipai mangisunge na gu du na wene sangbaha gbe fuyo.

Wai Rengbe Boro ka Mangaha:

Mo fu gu sanahe nika ba nyemupai ti irakporo nga gu mo nika mangasunge na ni ka ndu na ni ku rogo gu kapita nakaragapai kuti ni rogo gu buku re. Mo ima rengba ka sia sanahe sa dagba agu du ti tonatona akapita. Fuo irakporo fu gani karagapai, mo gedi gu veresi funi rẽarẽ na ki yugu gu genewaraga nafura tipa gupai re, na ka rengba du oni ki sakihe na ni ni wiri guruhe.
Mo ima rengba ka mangasunge na agu apai du ti agu akpewaraga du ti tonatonaha yo ka ba nyemupai ti irakporo na ki yugu wari Ziazia Kekeapai akaragapai kuti gupai re ni rogo gu buku re. Ni kpiapai, mo ima rengba ka fura tipa gu kerepai mangi barambeda nga gu i nafura tipaha rogo apangbanga na ki saki gupai fu ni nga dungu aboro nabakabangiriyo na pa agu akaragapai du kuti agu asanahe du ti kpewaraga 3. Watadu mo rengbe ka ya, mo nata kaa bi gamo amurakporo tipa ka pepa gu wene apai nika manga ku mbatayo. Mo ki yugu agu asura funi du ti kpewaraga 4-5 na ki sana ni nga, “Gini akidohe dagba agi duku re mo aida ka bihe si nadigisitihe?” Gu kurapai rengbe mo ka pehe nga mo nata kaa bi aboro ni wiri guruhe ka undo yo i gbia akaragapai kuti agu asanahe nyakipaha gbe. Mo ki yugu agu asanahe du kusende ti kpewaraga 6 fu irakporo, na ki sana ni ni pepa gu ngba tini gbe.
Mo tona wisigo Ziazia Kekeapai na boro ti kina gu bambata regbo mo nagbia ni. Mo rengbe ka ya: “Ani nayugo gu buku rengbe ka undo boro ni wisigi Ziazia Kekeapai fu gaani amurakporo. Ya mo mo abingoho mbata? [Oni mbu ni tipa ní karagapai.] Ka wiri bete aminiti du bero, mi naida ka yugu wai rengbe mo ka mangasunge na ni na gamo Ziazia Kekeapai.”

Oni Asadi Gipai Re Rogo gi Diwi Re:

Oni wiriki wai ka mangaha ti regbo gaoni irisombori nga ga aborokporo.
Ho du oni ni gene tungusapai yo, oni pe gupai oni aberãpa pehe fu gu batungusipai du oni na ni. (Snz. 27:17) Ka mo bi gupai nga gu gene mo afu gu buku re ngbaha ayengo na wene sangbanaha te, mo ki gbata kura gene.