Oni Wiriki gu Kpiapai Nga ga Anebi—Abakuka
1. Ginipai rengbe ka sarani ani du wa gu nebi nangia Abakuka?
1 Wa gbegberẽ apai asona kina kumbatayo rogo gi zegino re, ani ima rengba ka du na kina gu bangisa bipai Abakuka adu na ni, ko asana Yekova nga: “Tipagine mangi mo re ti ni mi bi irairapai ki ningere ku ri fudifudipai?” (Abak. 1:3; 2 Tim. 3:1, 13) Berãkurii afugo Abakuka gbiati gako wene kpiapai ima rengba ka undo rani wa ani asungudo ga Yekova uru Sapangbanga.—2 Pet. 3:7.
2. Waigu rengbe ani ka yugo gupai nga ani naraka mbiko idapase areme?
2 Oni Raki Mbiko Idapase: Kuba gupai nga Abakuka mbu gbegberẽ apai si fu riko, ko anye zaaza kindi rogo toro yo. (Abak. 2:1) Yekova agumba gupai fu gu nebi re nga Gako pai nika digiso tihe adigiso ti ndikidi regboho na “ruru boro aráka mbiko gani idapase.” (Abak. 2:2-4) Rogo gupai re yo nga gine fu agu aKristano naraka ti gi digido regbo re? Pa zanga ino ani gu regbo digido gi rago re nika da ti ni rengbe ka sarani ani idi gupai nga si nika ye aye nirengo. Idapase rengbe ka sarani ani nangera angera kindi na kini moi sunge tungusapai ni bambatapai rogo gaani raka.—Eb. 10:38, 39.
3. Tipagine si aida ti ni ani banda gaani ngbarago rogo mangasunge fu Yekova?
3 Oni Ngi Rogo Yekova Yo: Ho Gogo nga ga Magogo nika zubo ga Yekova aboro ni, gaani idapase nika du ni asadiasadihe. (Yeze. 38:2, 10-12) Zavura agu aboro duadu na diabese rogo raka, i nagbiatiyo agbia na kpakaraapai mbiko agu apai du wa avura. Zingo riahe ima rengba ka du, aboro ima rengba ka zanga gayo ahe, na raka ima rengba ka satihe. Ginipai rengbe ani ka mangaha ho akparakapai wa gure akura ni? Abakuka aima ino gupai nga akparakapai ima rengba ka gbiako, sidu, ko adiberã ka banda gako ngbarago rogo mangasunge fu Yekova. (Abak. 3:16-19) “Ga Yekova ngbarago” nika undo rani a ani hi gu fudifudiapai nika ye kumbatayo.—Nem. 8:10; Eb. 12:2.
4. Gini ngbarago rengbe ani kadu na ni awere na kumbatayo?
4 Agu aboro Yekova nika batasa yo ti regbo gako sapangbanga, i nikaa yugopai kindi fuyo tipa Mbori. (Abak. 2:14) Agu aboro i nika zingisayo nika wirikapai awirika a tipa Yekova. Zavura kina awere, ani mangingo sunge amanga na agu amamu dunduko ani agbiaha tipa ka fura tipa Yekova gbiati gako iiriwo mangaapai!—Tam. 34:1; 71:17.