Ginipai Rengbe ka Undo Rani Ani Gbia Wene Raka Kumbatayo?

A wa saki yo ho rogo gu kekeapai ye mbata fu gere, aboro naida ka gbia wene raka kumbatayo ni maa yo gayo kido kuti mamu, wirikapai, aũkumuko, gbiati manga weneapai fu kura aboro. Ono tie, manga ngbatunga agi apai re, wakina gu ka boro aida ka mangasunge na gu gbakigbaki kpiarago adunga wenengai ya tipa si undo ni nindu kurogo gu rago ni andu ku rogoho. Ya mo gere nayugo gupai nga he ho rengbe ka undo rani tipa agu apai du kumbatayo te? Oó!

ARUGAPAI BE WENE BAFURUGUTE

Dedede, ho ani amanga diaberã ni ani nasana gu boro nyaki tirani na kidu ni iratatamana. Wakina gure a, ani rengbe ka gbia wene arugute tipa gaani raka kumbatayo be gu Boro nyaki tirani na ki ngia iratatamana kisusi rani. Ani rengbe ka geda gi Gako arugute re rogo gu gako buku i atona kehe agarã wa 3,500 kusayo. Gu buku re nga Baibiri.

Tipagine si aida mo kido tini kuti Baibiri? Bambiko Bakehe nga gu boro naima raka tipa gbanga regbo na kidu na tatamana rogo zegino dũ. I nafura tipa ko nga gu “Bakuru Ko du ho kindi,” na duho “mbata rago nikaenga nye anye kindi.” (Daniere 7:9; Atambuahe 90:2) “Ko namangi angbangbaturũ (ko nga Mbori!), nambakadi kpotosende ki mangi he.” (Yesaya 45:18) Ko nape gupai furani nga rimoko nga Yekova.—Atambuahe 83:18.

Mbiko wadu he nga Baibiri aye be guko nakusi aboro dunduko, si angbenga na kina ngbatunga kura aboro te. Gaha arugute namangasunge ti aregbo dunduko na si aima undo aboro rogo aringara duduko. I ima saha rogo dungu afugo, na ima kparakaha rogo zegino dunduko susi kura abuku.a Gere nayugo gupai nga aboro rogo zegino dunduko ima rengba ka gedaha na ki gbia undo behe. Na gere nandu sa na gupai Baibiri agumbaha:

“Mbori akpara nga aboro te; ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.” —AMOKEDI 10:34, 35.

Wakina agu avunguagude nakpinyemu awiriyo na kini undo yo, Yekova Mbori naundo rani vurube Fugoko nga Baibiri. (2 Timoteo 3:16) Mo ima rengba ka kido kuti ko nga ko nambakadi rani na ko ima ino gupai du ni wenehe tipa gaani raka.

Ginipai si aida mo mangihe tipa ka gbia gi wene apai du kumbatayo re? Mo bingo gu kekeapai naye fuo gere.