Rurupai na Irairapai: Ani Ima Rengba ka Kido Kuti Gupai​—Baibiri Apehe

ANI NAIDA NA NGBEMBATAYO BE MBORI

Rogo Baibiri yo, Yekovaa Mbori ima saka gupai furani nga aboro naida na undo beko, na i arengbanga ka manga apai dunduko ni tiyo te. (Yeremaya 10:23) Si du nga ndu gupai ko nafu arugute ti ni furani rogo Baibiri yo. Ko ima kpinyemu aboro na ko aidanga ani mangi gbegberẽ adiaberã nga gu nika imisa rani na ki sa gaani raka si du ni kpakarakpakaraha te. (Pa Fu Rugute ni Ue he 5:29; 1 Yoane 4:8) Na kurigure, ko nga Bakusirani, ko na tatamana na inohe nga gu rengbe ko ka fuhe furani tipa ani raki wene raka. (Atambuahe 100:3; 104:24) Ono tie, Mbori asanga aboro ngbaome tipa i raki kuti gako arugute te.

Yekova afu guhe fu bambata kumba na dee nangia Adamu na Eva i aaidaha tipa kadu nzunzu na ngbarago. (Bambata Pai 1:28, 29; 2:8, 15) Na ko afu wiri taata rugute a fuyo nga gu ko aaida i mangipai kutini. Ono tie, ko ambuyo i mangi siapai tipa tiyo singia i amangapai kuti agu arugute re watadu i amanga nga pai kutini te. (Bambata Pai 2:9, 16, 17) Si nafu kina gberãrago nga, aAdamu na Eva asia ka raka kina kuti gupai nangba tiyo angianga kuti ga Mbori arugute ya. (Bambata Pai 3:6) Sangbanaha nga gine? Ya mo aboro nagbia ngbarago ho i amanga gupai ni i aberãha nga si du ni ruruhe? Oó. Vuru dungu agarã yo, ani ima wirika gupai nga zanga mangapai kuti ga Mbori arugute ayengo na nyenye zereda na ngbarago te.​—Batungusipai 8:9.

Baibiri nafu agu arugapai ani aidaha tipa ka manga wene adiaberã nga gu rengbe ka undo rani zanga bipa gu ba ani araka rogoho watadu gupai du tipa gaani aborokporo. (2 Timoteo 3:16, 17; mo bi gu sanduki nga “Gu Buku du Tipa Aboro dũ.”) Mo bingo wai Baibiri amanga gipai re.

Mo wiriki kura apai tipa gupai rẽ are ti ni i yambu Baibiri nga “ga Mbori pai.”​—1 ATesaroniko 2:13. Mo bi gu vidio nga Sangba Da du Rogo Ziazia Kekeapai? rogo jw.org.

BAIBIRI NAPE GUPAI FURANI MBORI AIDA ANI MANGIHE

Baibiri nape pa gu ngbanya furani naadu dagba aboro na Mbori ho zegino aenge ni. Agu apai du rogoyo naundo rani ani ini gupai Mbori abihe ni ruruhe na irairaha, gu naundo na gu aundongo ya. (Atambuahe 19:7, 11) Ani nawirika gu bangua arengo nga gu rengbe ka undo rani ani mangi agu adiaberã nga ga tatamana rogo gaani raka yo na a’uru dũ.

Ni kpiapai, mo bingo gu rugute du rogo Asanza 13:20: “Gu boro nata na boro tatamana ni adú ni iratatamana a, ono gu badiata nga ga mumungo aboro, ima azía yo wa sa.” Gu bangua rengo re na undo ti ni kina wai si adu bakuru kusayo. Baibiri ima hibe gu ngbatunga abangua arengo du na undo ti ni re.​—Oni bi gu sanduki nga “Gu Arugute Nga Ga Baibiri Na Kina Undo ti ni Kindi.”

Ono mo ima rengba ka bakabangiro nga, ‘Waigu rengbe agu arugute nga ga Baibiri ka undo re areme?’ Gu kekeapai ngbefuo gere nika sakapai tipa gu ndikidi akpiapai namangi amanga nzunzu.