Oni Gbia Undo ti Geda Ziazia Kekeapai

1-3. Gini aundo ani agbiaha be geda Ziazia Kekeapai na kini mangi agu apai si ayugoho?

“MI NAATAMBUA Yekova naʹawiso dunduko tipa wa ko aundo re mi nigirogo Ziazia Kekeapai yo.” Gu sosono wirinarani naape gipai re ri ima geda Ziazia Kekeapai bara 40, na ri ata mbunga gedaha te. Paranga wirinarani ape gupai nga geda Ziazia Kekeapai ima undo ri tipa ri ini Yekova niboro. Nisangbana gipai re, ri ima mbeda na gu Bari du ngbangbaturũ yo. Ri ayaa, “Rago aangbanga tire wo mbata te!”

² Gu mokedi nangia Petero angarasi aboro dunduko tipa i “nikpi nyemu gu mai nga ga toro adu nga na biriki ti ni ya.” (1 Pet. 2:2) Agu aboro naringbisa gi nyemupai re nigeda yó Ziazia Kekeapai na kini mangi gupai si ayugoho, i na gigiri sangbakpotoyo na i a na ndupai beyo tipa raka. Si naundo yó i duna wene bakure na agu akurayo nakpinyemuhe na kini irisi ndikidi Mbori. Gere nga gu nduapai nasarani ‘rago nangba tirani na ga Mbori rugute.’ (Rom. 7:22) Ono kura aundo kinaho susi gure. Bete agu aundo re nga gine?

³ A wa ani kaa wirikapai tipa Yekova na Wiriko, kinawo gaani nyemuse nikaa sona tipa yó na tipa kura aboro a. Du na ndikidi inohe rogo Ziazia Kekeapai naundo ro tipa mo bi wai Mbori nika batasa aboro giasangba rogo gi gbegberẽ sino raka re. Mo na wene pangbanga bero mo atungusaha fu aboro. Yekova nikaa fu maku afu foro wa mo ayugo gupai fu kura aboro mo awirikaha rogo Fugoko yo.

ONI GEDI ZIAZIA KEKEAPAI KINI BERẼKURIHE

4. Rogo gupai nga ka geda Ziazia Kekeapai na ‘fugose kusende’ nga gine?

⁴ Yekova aidanga gako amoyambu nioro aora ri geda Fugo te. Ko ape gupai fu Yosua nga: ‘Gi kitabu rugute re agúari nga ngbaro yo te, ono mo amákia pa ha [“mo duwa ka mo agedaha na woro fugoro kusende, NW”] uru na yuru.’ (Yos. 1:8; Tam. 1:2) Ya mo gipai re nayugo gupai nga boro pe agu apai dunduko ni agedaha na fugo ní kusende tona ti Bambata Pai ki dati Yugoti? Oó. Rogoyo nga ka gedapai kini di regbo ka berãkuriihe. Ho mo ageda Ziazia Kekeapai ni na ‘fugoro kusende,’ si naundo ro tipa mo moiberãro tipa agu apai rengbe ka undo ro na ki ngarasi ro tigu regbo re. Ho mo agbia ngbatunga agu veresi watadu gu pangbanga duwa gure, si naida mo gedihe yee watadu ka pe aworo afugoho. Gupai mo agedaha ima rengba ka zio ngbaduroyo ngba wene gene. Tipagine du gipai re ti ni na nyanyakipaha? Ho mo agiarogo gu rugute ni Mbori afuhe foro, si nika ngarasaro tipa mo moihe rogo mangapai yo.

5-7. Oni ringbisinga pa wai rengbe geda Ziazia Kekeapai na fugoroni kusende ka undo roni (a) oni ne wasiwasi mangaapai; (b) oni mangipai fu akuaroni na zerangbaduse na weneringise; (d) oni kido kuti Yekova zavura ti regbo kpakarapai.

⁵ Gedapai na fugoro kusende niwenehe ho mo ageda agu akitabu ni nga ga Ziazia Kekeapai mo ata ainidonga tiro nani wenengai ya. Nikpiapai, mo moingo agi akpiapai du biata re ku berãro yo. Nibambataha, mo moingo kpia gupai ku berãro yo nga wirina niparanga gedipai rogo gu sangbaanebi nga ga Osea. Rogo kapita 4 ko ru tooni tingbafuo geda ko veresi 11 kuti 13 na fugoko kusende. (Oni gedi Osea 4:11-13.) Tipagine? Agu averesi re zi ngbadukoyo bambiko ko nasovura kuti sosoda ko sa kodaba sukuru yo. Ko ongo tooni na ki berẽkurii gu veresi re ki yaa, ‘Yekova nabi gu gbegberẽ apai dunduko ani amangaha kodihe na gudu nigbuko. Mi aidanga ka ba gberarago tiko te.’ Gu wirina re diberã tipa ka nye gigirii ko rogo mangaapai yo bangiri Mbori.

⁶ Rogo gu kura ue kpiapai, wirinarani sa nageda ga Yoere sangbaanebi na ri da rogo kapita 2, veresi 13. (Oni gedi Yoere 2:13.) Wa ri ageda gu veresi re na fugori kusende, ri berẽkurii wai rengbe ri ka wirika Yekova nga gu boro “du na undahe na nunga aboro, du ni bayee ko tipa zinga, ki du na weneringise kpaima.” Ri diberã tipa ka mbu mangasunge na gu gbegberẽ afugo ri nagumbaha fu kumbaari na gu kura aboro a.

⁷ Biata kpiapai, mo moingo kpia gupai ku berãro yo nga Kristano nibaagude i nambu ko ti sunge nabakabangiriko tipa padu diako wenengai na awiriko. Rogo Nauma 1:7, ko gedipai na fugoko kusende nga Yekova “ini agu yo nakida kuti ko” na ko nabanda yó wa “nyanyaki gbata rago fudifudipai.” Agu aberãpai re ima fu wasa fuko. Ko bi wai Yekova akpinyemuko na ki mbu bakere bakabangirise. Fuani ko gedi veresi 15 na fugoko kusende. (Oni gedi Nauma 1:15.) Gu wirinarani re bi gupai nga ka ko aatungusa wene pangbanga ti regbo kpakarapai, ko niyugu gupai nga ko nabi Yekova ni nyanyaki bagbuko fuko. A wa gu wirina re agbata sunge marã, ko futiko nyanyaki tipa kaa ndu ku batungusapai yo bebere poso.

8. Oni furanga tipa gu wene apai oni na wirikihe ti regbo gaoni geda Ziazia Kekeapai.

⁸ Gi wene apai fura ani tipaha re rogo agu akitabu nga ga Ziazia Kekeapai bete aboro aberãha nga si ninyanyakihe tipa ka giarogoyo. A wa mo nika wisigo agu abuku nga Osea, Yoere, na Nauma na nyemu ka wirikapai behe, kinawo a mo nikadu na nyemu ka geda kura averesi na fugoro kusende. Mo berẽnga pa gu tatamana na wasa nasungudo ro rogo gu kekeapai nga ga agu anebi re! Na ginipai tigaha du tipa gu kura apapara Ziazia Kekeapai? Fugo Mbori wakina gu dahabu i na okoho kusende yo. Si naida mo gbataha wenengai! Ii, mo gedi Ziazia Kekeapai naabaha na gu sásá nga ka gbia gu wene apai na gu ngarasaro du rogoho.

ONI MANGI OME TIPA KA GIAROGOYO

9. Wai rengbe ani ka sonosa gaani giarogo Ziazia Kekeapai yo?

⁹ Wa vura duhe nga si ninyanyakipa pai ka geda Ziazia Kekeapai na aʹuru dunduko, si naida mo girogo gupai yo agia mo agedaha. Sidu tie, mo mangisunge wenengai na agu awaraga ga Yekova riigbu akusaha tipa ka inopai tipa agu aboro nakehe, gu ba i adu rogoho, na agu apai mo agedaha. Kangia mo nabakabangiro tipa wai ka mangasunge na gupai gedi mo ho rogo Ziazia Kekeapai rogo gamo raka yo, mo sana bakumba sa rogo dungurati watadu nyanyaki Kristano tipa ní undo ro. Tipa ka yugopa nyakapa sonosa giarogopai yo, ani kparianga gu kpiapai nga ga Kristano sa naadu rogo bambata sa kama agarã nga gu ko nanamangi ome ka manga gipai re. Rimoko angia Aporo.

10, 11. (a) Waigu i aundo Aporo ko dani niwene batungusi wene pangbanga? (b) Ginipai rengbe ani ka wirikaha be Aporo? (Oni bi gu sanduki nga “Ya Mo Gamo Yugopai Nandu Sa na gu Vovo Giarogopai Du Awere?”)

¹⁰ Aporo angia gu Kristano nangia Yudo, naako “aini pa Ziazia Kekeapai nyanyaki” na kidu zaaza rogo toro yo. Gu kitabu nga Amokedi nayaa wee: “Ko agumba agu apai ti ni re tipa Yesu ki niyugu he nzunzu, ko ini kina pa ga Yoane bapatiza.” Aporo anaayugo kuru yugopai tipa bapatiza zanga ko inihe. Fuo agu aKristano nga Puriseka na Akuira bi ko ko nisakipai Efesa yo, i asakipai fuko wenengai “ki yugu pa ga Mbori gene fu ko wenengaĩ.” (Amo. 18:24-26) Gini undo Aporo agbiaha be gipai re?

¹¹ Tingbafuo tungusapai Efesa yo, Aporo andu ku Akaya yo. “Ho ko aye ni, ko ki unda agu yo gbe naidi pai mbiko undahe, Bambiko ko amungosi aYudo ni tandu, ku bangiri aboro a, niyugu pai ti Ziazia Kekeapai ya Yesu nga Kristo.” (Amo. 18:27, 28) Ti gu regbo re, Aporo aima rengba ka sakapai wenengai tipa gu bapatiza nangia ga aKristano. Na gi gako inohe naima kio re, ko ‘aundo aguyo gbe’ naaye nivovo yó tipa i sono rogo ndikidi irisombori. Ginipai rengbe ani ka wirikaha be gipai re? Wakina Aporo, ani namanga ome tipa ka giarogo gupai ani agedaha rogo Ziazia Kekeapai yo. Ho gu wirinarani du na inohe aʹasada ni ka undo rani ani ini ka yugopai wenengai, si naida ani di gani undo na umbasitise na tambuahe. Ka ani mangihe wo, gaani birĩ yugopai nika sona kina kumbatayo.

MO MANGISUNGE NA GUPAI MO AWIRIKAHA TIPA KA UNDO KURA ABORO

12, 13. Oni yugunga wai rengbe wene mangasunge na Ziazia Kekeapai ka undo agu aboro nawirika Ziazia Kekeapai i sono kumbatayo.

¹² Ani ima rengba ka undo kura aboro wakina Puriseka, Akuira na Aporo. Ho gamo afugo ngarasaro aundo gu boro ni du na nyemu rengo tiní ní dibe kpakarapai ki sono kumbatayo rogo toro yo, mo nidu wai tigu regbo re? Kangia bakumba nga mo, mo nidu wai ho boro afu tambuahe ni foro tipa gu wene arugute mo afuhe rogo Ziazia Kekeapai yo funi nga gu naaundo ní ti regbo kpakarapai? Zanga kapa, mangasunge na Fugo Mbori tipa ka undo kura aboro i mbakadi gayo gene raka naye na ngbarago.a Mo bingo wai rengbe mo ka manga gipai re.

¹³ Nibipa ndikidi irisombori na irairaha, dungu aYisaraere ti rago Eriya anaasungo kina ngbagoro ndugu. Gu rugute Eriya afuhe fuyo ima rengba ka undo agu aboro nawirika Ziazia Kekeapai aidanga ka manga sona kumbatayo rogo toro yo ya. (Oni gedi 1 Abakindo 18:21.) Mo kparianga gu kurapai: Kangia gu boro na nawirika Ziazia Kekeapai nagunde be abakureani na agumeni, mo rengbe ka nyakasa ní tipa ní irisi Yekova nisaka mo pai funi tipa Yesaya 51:12, 13.—Oni gedihe.

14. Ginipai nika undo ro mo tingidipa averesi ti agu aregbo mo aidaha tipa ka undo kura aboro?

¹⁴ Nirengo, Ziazia Kekeapai na dungu apai rogoho nangarasa agu aboro nagedaha na kini rugu yó. Ono mo ima rengba ka sanahe nga, ‘Wai rengbe mi ka ino bara gu veresi ka mi aidaha?’ Mo nigedi Ziazia Kekeapai na kini berẽkurii afugo Mbori dedede. Ngba gi gene re, mo nika inido tiro wenengai na Ziazia Kekeapai, na Yekova rengbe ka undo ro na gako ziazia toro mo tingidi agu apai gedi moho.—Mk. 13:11; Oni gedi Yoane 14:26.b

15. Ginihe nika undo ro tipa mo girogo Fugo Mbori yo wenengai?

¹⁵ A wa Bakindo Soromo amangihe, mo kpari fu Yekova tipa tatamana tipa ka manga gako asunge. (2 Peka. 1:7-10) Agu anebi nadumbata ‘anaasanahe ki niwisigi’ Fugo Mbori nyanyaki tipa kadu na ndikidi inohe gbiati gupai Yekova akpinyemuhe. (1 Pet. 1:10-12) Gu mokedi nangia Pauro angarasi Timoteo ko rigi tiko na “gu pai nga ga idapase na gu wene yugopai.” (1 Tim. 4:6) Nimanga mo ho wo, mo rengbe arengba ka undo kura aboro wenengai rogo toro yo. Kurigure, mo nika nyakasa ga idapase anyakasa.

GEDA ZIAZIA KEKEAPAI NABANDA RANI

16. (a) Waigu ‘wisigo Ziazia Kekeapai na aʹuru’ dunduko aundo aboro Beroya? (b) Tipagine du geda Ziazia Kekeapai ti ni dedede na nyanyakipaha areme furani?

¹⁶ Agu aYudo naadu rogo gu bagbata naadu Makedonia yo nga Beroya aduna gu sino nga ga ‘wisigo Ziazia Kekeapai na aʹuru’ dunduko. Ho Pauro atungusi wene pangbanga ni fuyo, i atona ka wisigo afugoko na gu inohe i adu nani rogo Ziazia Kekeapai yo. Sangbanaha angia ginihe? Dunguyo aidi kuti gupai nga ko aayugo rengo na i “ki idi pa ha.” (Amo. 17:10-12) Gipai re nayugo gupai nga geda Ziazia Kekeapai dedede nasa boro ní du na nyanyaki idapase kuti Yekova. Ngbatunga gu idapase re “nga ndikidi he, du aboro na maabangirise mbiko ho,” si na nyanyakipaha ka ani aida ka rimo kurogo ga Mbori vovo zegino.—Eb. 11:1.

17, 18. (a) Wai nyanyaki idapase na nyemuse aundo Kristano ní banda kpotoniyo? (b) Wai maabangirise abanda rani ti manga gbegberẽpai?

¹⁷ Tipa wene nduapai, Pauro akepai ki yaa: “Wa du ani ni ga haha rago yo, ani rúgu tirani, niukadi gu marã ngbaduse nga idapase na nyemuse; maabangirise tipa bata ki du ni gaani kpakpari vura.” (1 Tesa. 5:8) Si niidi banzengere banda ngbaduni abanda be avurani. Wakina gure a, si naida ngbadu Kristano du nibandabandaha be gu ome nga ga ingapai. Ginipai rengbe ka manga ka ga Yekova moyambu du na nyanyaki idapase kuti ga Mbori akidohe na tipa Ko gbiati akurani? Ngbatunga gu moyambu re namaa gu nyanyaki marã ngbaduse nga ga toro ti ngbaduni si bandaha. Nirengo, ní arengbanga ka manga gupai rengbe ka gbarasa gani pagume na Yekova te.

¹⁸ Pauro afura tipa kpakpari vura nga “maabangirise tipa bata.” Ti gu regbo i aake Ziazia Kekeapai, banzengere aima rengba ka kpi ka si adunga ní abandanga rini te. Ho ní anivo wene kpakpari vura ni, ní anirengba ka bata be gu kere aro ka gbia ní ti rini ka i no ní. Ani nasonosa gaani maabangirise kuti Yekova niwisigo ani Fugoko. Nyanyaki idapase naundo rani ani “né kungba fura bau” nga ga abasamungu. (2 Tim. 2:16-19) Gaani maabangirise rengbe ka nyakasa rani ani ká fu agu aboro naida ka ndu na ani sa manga gupai Yekova asogaha.

GUHE NIKA UNDO RANI ANI BATI

19, 20. Tipagine ani abi Fugo Mbori ti ni na kikiipaha, na wai rengbe ani ka yugo gaani tambuahe tipaha? (Oni bi gu sanduki nga “Yekova Nafu Kina Guhe Fere Mi Aidaha.”)

¹⁹ Wa ani arimo dunguro kurogo gi yangada arame re, kinawo si aida ani kido nibakerehe kuti Fugo Yekova. Agu arugute ani agbiaha rogoho naundo rani ani mangi ariapai na kini ne mangapai kuti gaani nyemu manga ingapai. Mbiko wai si afu wasa na kini ngarasi rani, ani nasusa rogo agu aʹasada Satana na gako zegino aye nani kutirani. Mbiko gu bandahe Yekova afuhe furani rogo Fugoko, ani nanye kina ngbagene unga.

²⁰ Mo tingidi gupai nga Mbori “nakpi nyemu aboro bati dunduko.” Ga Yekova amoyambu kina dagba agu ‘aboro du dunduko’ re. Kinawo duhe tipa agu aboro ani aundoyo rogo gaani sunge tungusapai na yugopai. Ono agu aboro dunduko naida ka gbia bata si naida i “ye sa gu inahe nga ga rengo.” (1 Tim. 2:4) Sidu, tipa ka bata ti yangara arame, si naida ani kpinyemu geda Ziazia Kekeapai na kini mangi agu arugute ani agedaha rogoho. Ii, geda ani Ziazia Kekeapai dedede nayugo wai ani abi gu rengo du rogo Fugo Yekova yo na nyanyakipaha.—Yoane 17:17.