Oni Ngere Koyo du Yekova ni Tipa Wasa

1. Waigu apai adu fu agu aYudo naaraka ni zizi yo Babera yo?

AYUDO abasasangba Yekova tipa dungu agarã. Ni sangbanaha, ko ambu aBabero tipa i gbarasi gayo ringara na ki di yo ni zizi aboro ku Babera yo. Waigu raka adu yo fuyo? (2 Peka 36:15, 16, 20, 21) Si nirengo nga, ranirii aduadu beyo tipa kaa manga agu apai nga ga raka. (Yere. 29:4-7) Ono tie, raka aadunga taata te, na anga si nga gu gene raka ka i aidi ka sia ha te. Gayo bipai angia gine tipa gupai i adu rogoho re? Gere nga gupai boro sa dagbayo yo apehe nga: “Pavuru adi Babera yo, yo ani asungu ni sande ki nikpari ni aume, ho ani atingidi pa Siona ni.” (Tam. 137:1) Agu aYudo re aaida aida nzunzu na wasa, ono da narengbe ka fuhe fuyo?

2-3. (a) Ginipai Yekova amangihe fu agu aYudo naadu ni zizi yo? (b) Ginipai ani nika sakapai tipaha rogo gi kekeapai re?

² Yekova “nga Mbori wasa dunduko.” (2 Kor. 1:3) Yekova ima kpinyemu gako aboro na ko naida ka fu wasa fuyo. Yekova aima ino gupai nga ho i adu ni Babera yo, gu kura aYudo nika duadu na gberãrago nga i abasasangba ko na i nika irisoko airiso ngba wene gene. (Yes. 59:20) Sidu, Yekova afu pangbanga fu Yesaya ko pehe fu agu aYudo re agarã naima susa 100 kusayo mbata fu i di yo ku Babera yo. Si nga gu buku nga ga Yesaya. Waigu gu buku nga ga Yesaya arengbe ka undo yo? Yesaya aya: “Ya gaoni Mbori wẽ, ‘Oni ngárãsi gimi aboro, oni ngárãsi yo.’” (Yes. 40:1) Rogo gu buku nga ga Yesaya, Yekova afu gu wasa nga gu agu aYudo i aga na yo ni zizi yo aaidaha.

³ Wakina agu aYudo naadu ni zizi yo, ani a ninaaida aida na wasa ti kura aregbo. Rogo gi kekeapai re, ani nika sakapai tipa agene biata nga gu Yekova afu wasa ngbaha fu agu aYudo naadu ni zizi yo: (1) Ko akidohe tipa ka mbupai fu agu aboro nasa gayo berã, (2) ko afu maabangirise fu gako aboro, na (3) ko aundo yo ka i dunga na gunde ya. Ani nika sakapai a tipa wai Yekova afu wasa furani ngba kina agu agene re areme a.

YEKOVA NAMBUPAI FURANI

4. Waigu Yekova ayugu gupai nga ko nga boro inapai? (Yesaya 55:7)

⁴ Yekova nga “Ba inaapai.” (2 Kor. 1:3) Ko ayugu gu sino re ho ko akidohe ni ka mbupai fu agu aYudo naadu ni zizi yo nasa gayo berã. (Oni gedi Yesaya 55:7.) Ko aya: “Mi aína pai foro na nyenye weneringise.” (Yes. 54:8) Waigu Yekova arengbe ka yugo gako inapai? Wa si avura du vurũ nga aYudo aima rungo mbiko gayo sangbana mangaapai, Yekova akidohe nga i anyenga Babera yo nyeanye kindi te. Si adu nga i ni ka nye ni ziziaboro tipa bete regbo. (Yes. 40:2) Gi pai re aima du ni pa wasa gbe fu agu aYudo nasa gayo berã na kini idi ka sa ngbarago ti Yekova!

5. Tipagine rengbe ani kadu na bakere kido ti ni kisusi gu aYudo adu na ni nga Yekova nambupai ambu furani?

⁵ Ginipai ani awirikaha? Yekova na nyemu ka mbupai fu gako amoyambu ngba bakere gene. Areme, ani ima rengba kadu na bakere kido kisusi agu aYudo naadu ni zizi yo Babera yo nga, Yekova nambupai ambu furani. Waigu duhe wo? Bambiko ani ima ino gupai Yekova namangihe tipa ka mbupai furani ti gaani aingapai. Dungu kama agarã fuo Yesaya gumba sangbanebi, Yekova akedi Wiriko ko naima kpinyemu ko gbe ko ye ku auru kpotosende tipa ka fu gako raka ni motumo tipa agu aboro ingaapai dunduko sa gayo berã. Mbiko Yesu akpi tipa rani, Yekova “gbandaka”​—gaani aingapai dunduko kusayo. (Amo. 3:19; Yes. 1:18; Ef. 1:7) Ni rengo, Yekova nga Mbori inapai!

6. Tipagine duhe ti ni nipa wasa ka berãkurii ga Yekova mbupai? (Oni bi sura a.)

⁶ Gupai Yekova apehe fu aYudo rogo Yesaya 55:7 ima rengba ka undo rani a ka si du nga ani na gberãrago tipa agu aingahe ani amangihe kusayo si ki vura du vurũ nga ani aima saberã. Ani ima rengba kaa ndu kumbatayo kindi kaa du na gberãrago ka si du nga ani nambu be sangbana gaani aingahe. Ono tie, ka ani kusi pa gaani aingapai na ki mbu manga gupai du ni irairaha, ani ima rengba kadu na gu kido nga Yekova ima mbupai furani. Na ho Yekova ambupai ni furani, ko nadiaberã ka zanga berãpa gaani ingapai berewe. (Oni ringbisinga ha na Yeremaya 31:34.) Sidu, ka si du nga Yekova anyenga kaa berãkurii gaani aingapai te, si aidanga ani nye kaa berãkurii he a te. Gupai nyakipaha fu Yekova nga gupai ani amangaha awere, angianga agu aingahe ani amangihe kusayo ya. (Yeze. 33:14-16) Na barambeda rogo vovo zegino, Barani nga boro inapai nika dia ai gupai ani ambu behe mbiko gaani aingahe.

7. Ginipai rengbe ka undo rani ani gbata undo ka si du nga ani aima digo ni õko kere ingapai?

⁷ Ginipai si aida ani mangihe ka si dunga sangbakpotoraniyo nafuda rani ni kerehe mbiko ani naõka kere ingapai? Baibiri nape gupai furani nga ani sana abaakumba tipa undo. (Yak. 5:14, 15) Ono tie, si ima rengba ka kpakara furani ani pe gupai fuyo ani amangihe. Ono si naida ani tingidi gupai nga, Yekova namangasunge na agi akumba re tipa ka undo rani na i nika mangapai na ani rogo nyemuse na inapai, kina wai du Yekova. Ka ani tingidi gipai re na ka ani mangi saberã, ani nika duadu na nyemu ka fura na abaakumba. Oni bingo wai ga Yekova inapai afu wasa fu gu wirina du rimoko nga Arthur,a sangbakpotokoyo aambusa ko ni kerehe. Arthur aya, “Tipa he wa garã sa, mi anaabi agu ahe nazingisa nyemu kodaba ti boro. Ono tifuo mi gi gu gumbapai naadu tipa sangbakpotoseyo, mi akusipa gimi ingapai fu diare na fu abaakumba. Mi agbia zereda tingbafuo mi mangihe wo, ono mi adu kindi na bakere gberãrago tipa gupai mi amangihe re. Abaakumba atingidi re na gupai nga Yekova naida kindi kadu ni bakureami. Ko nafu rugute furani mbiko ko ima kpinyemu rani. Gayo wene afugo aima fu kido fere na ki undo re mi naabi tire wa gu Yekova abi re.” Areme, Arthur namangasunge ni bazakigene na ni moundo abaakumba. Nairiwo wai duhe ni pa wasa ka ino gupai nga Yekova nayugo inapai furani ka ani mangi saberã!

YEKOVA NAFU MAABANGIRISE FURANI

8. (a) Gini maabangirise Yekova afuhe fu agu aYudo naadu ni zizi yo? (b) Ringbisihe kuti Yesaya 40:29-31, waigu agu aYudo nasa gayo berã adu mbiko gu maabangirise Yekova afuhe fuyo?

⁸ AYudo aima rengba ka berã gupai nga i adunga berewe na rengba ka karagatiyo ku rogo gayo ringara te. ABabero anaambunga gayo ziziaboro i karagatiyo ku rogo gayo ringara te. (Yes. 14:17) Ono tie, Yekova aima fu maabangirise fu gako aboro. Ko aima kidohe ka kusa gako aboro tii sunge zio, na pai ho narengbe ka ká na ko ti ni te. (Yes. 44:26; 55:12) Bangiri Yekova, Babera adu zanga ome ti ni wakina kungbo nvutu. (Yes. 40:15) Ho mo avudo wege ni kuti nvutu, si nago kusayo. Wo du si adu taata fu Yekova tipa ko kusi gako aboro Babera yo. Waigu gi maabangirise re arengbe ka undo aYudo? Si aima rengba ka fu wasa fuyo. Ono si aima rengba ka manga kura bakerepai berewe. Yesaya ake gupai nga: “Agu yo nakida kuti Yekova i aúngasi omeyo.” (Oni gedi Yesaya 40:29-31.) I nika gu wa adingimo naagu na apupora mbiko gayo maabangirise nika fu vovo ome fuyo.

9. Gini nduapai naadu be aYudo tipa kadu na gu kido nga ga Yekova akidohe nika da ada ti rengo?

⁹ Yekova aima fu kura nduapai a fu aYudo nga gupai ko nakido paha si du wa ka si da ti rengo. Gini nduapai ko afuhe? Oni berẽnga kurii agu asangbanebi naima digisotihe. Ni kpiapai, i aima ino gupai nga kina wai Yekova aima pehe, aSuro aima zio gu papara kindo nga ga aYisaraere naadu ku nodiyo yo na i ki di agu aboro naadu yo ni ziziaboro. (Yes. 8:4) I aima bi aBabero i ni gbarasi Yerusarema na kini ga na agu aboro naadu yo ni ziziaboro ku Babera yo. (Yes. 39:5-7) I aima ino gupai nga gu bakindo nangia ga Babera ko aimi bangiri Bakindo Sedekiya na ki ga na ko ku Babera yo. (Yere. 39:7; Yeze. 12:12, 13) Agu apai dunduko Yekova aima gumbaha aima da ti rengo. (Yes. 42:9; 46:10) Agi apai re dunduko aima nyakasa gayo idapase kuti gupai nga, gu ga Yekova kidohe naadu tipa kusa yo tii sunge zio, si nika da ada ti rengo!

10. Ginipai rengbe ka undo rani ani banda gaani maabangirise ni nyanyakihe ti gi yangara arame re?

¹⁰ Ginipai ani awirikaha? Ho du ani ni na gberãrago, mabangirise ima rengba ka fu wasa furani na ki undo rani ani gbia ome berewe. Ani naraka ti kere kpakarakpakara aregbo na ani nagbiatirani na agu avurarani du na bakere ome tiyo. Ono si aidanga ani du na gberãrago te. Yekova ima kido rani nga ani nika raka nyeanye kindi rogo Paradizo. Ani nika raka rogo zereda na ngbabase. Si naida ani naandu kindi kumbatayo kaa maaberã rani kurii gu maabangirise re. Ka si aadunga wo ya, gaani maabangirise ima rengba kadu wakina bi wene rago nga gu angeranga wenengai ya mbiko ani nabihe ti bibiriko bangiri bambu. Waigu rengbe ani ka “giriso bangiri bambu,” naida ka ya ka banda gaani maabangirise ni nyanyakihe? Ani ima rengba kaa dia regbo dedede kaa berãkuriipa wai gaani raka nika du ni bawenehe rogo vovo zegino. Ani ima rengba ka geda gu kekeapai, ka bi agu avidio, na ka gia agu abia nafura tipa gaani maabangirise. Na ani ima rengba ka pe agu apai dunduko fu Yekova rogo kparakpee yo ani angera kumbatayo tipaha rogo Paradizo.

11. Ginipai naundo kura wirina sa nadu na kere kpakarapai nga ga kaza kpotose ri gbia ome berewe?

¹¹ Oni bingo wai maabangirise gbiati wasa nanyakasi gu wirina du rimori nga Joy, du na kere akpakarapai nga ga kaza kpotose. Ri aya: “Ho gimi akpakarapai ninaasa re ni mi du na bakere gberãrago, mi naape pa wai dunduko fu Yekova du mi na mi ima ino gupai nga ko ima rugatiko na mi. Ti agu aregbo re dunduko, Yekova ninaafu ‘bakere tandu susi’ watadu ome fere.”(2 Kor. 4:7) Joy ninaabi tiri a rogo vovo zegino, yo ‘boro kporo sa nikaa ayánga ni, ‘Mi nawoka’ ya.’’ (Yes. 33:24) Ka ani uka kpotorani yo fu Yekova na ki moiberãrani kuti gaani maabangirise, ani ima rengba ka gbia gaani ome berewe.

12. Gini andu apai du berani tipa ka kido kuti ga Yekova akidohe? (Oni bi sura a.)

¹² Kina wai Yekova afu nduapai fu agu aYudo naadu Babera yo tipa i du na kido kuti gako akidohe, ko namanga kina gu bangisapai re furani areme. Ani berẽnga kuriipa agu asangbanebi ani abihe si nidigisi tihe. Ni kpiapai, ani ima bi gu ringara du na bakere ome kisusi rogo zegino, nga gu du “na bete ome, ni mburumburu he.” (Dan. 2:42, 43) Ani nagia pa ‘abazigizo a rogo agu arago,’ na ani natungusapai “fu arikaaboro dũ.” (Mt. 24:7, 14) Mbiko gupai nga ani nabi agi asangbanebi re si ni digisitihe gbiati dungu agu akuraha, si nafu gu kido furani nga gu weneapai dunduko Yekova nakido pa ha nika da ada ti rengo.

YEKOVA NAUNDO RANI KA ANI DU NGA NA GUNDE YA

13. (a) Gini akpakarapai si adu nga aYudo nika gbiatiyo na ni ho regbo nika da ni i mbu yo tii sunge zio? (b) Wa gu i nasakipai tipaha rogo Yesaya 41:10-13, waigu Yekova afu wasa fu agu aYudo naadu ni zizi yo?

¹³ Yekova afu gu bawene maabangirise fu agu aYudo naaraka Babera yo nga i nika kura tii sunge zio, na ko aima ino gupai nga si nika kpakara akpakara fuyo ho regbo nikaa mbeda ni. Ko aima pe gupai nga gu bakindo nadu na bakere ome tiko nika zubo agu aringara du kirikiri pati Babera na kini ngere kuriihe na ko kini ruho ka zubo Babera. (Yes. 41:2-5) Ya mo si aaida agu aYudo re du na gunde? Dungu agarã kusayo mbata fu gipai re mangi, Yekova aima fu wasa fu gako aboro. Ko aya: “Ka mo gúnde nga ya, mbiko mi du na mo, ka mo kío nga ya, mbiko mi nga ga Mbori.” (Oni gedi Yesaya 41:10-13.) Ginipai ko aaida ka pehe ho ko aya ni wẽ “mi nga ga Mbori”? Anga gupai ko aamangaha nga ka tingida aYudo na gupai nga i irisi ko te, mbiko i aima ino gupai nga si naida aida i irisiko. Ono tie, ko aatingida yo na gupai nga ko adu na kina yo na ko nika undo yo aundo.​—Tam. 118:6.

14. Gini kurapai Yekova amangihe tipa ka undo aYudo ka i dunga na gunde ya?

¹⁴ Yekova asa aYudo a ka i dunga na gunde ya ni tingida ko yo na pa gako ome adunga digidoho ti ni ya gbia ti inohe. Ko asana yo i ngere kuari yo ka bi akerekuru. Ko ape gupai fuyo nga anga gupai sa ko amangihe nga ka kusa agu akerekuru re te, ono ko ima ino ra ti arimo ra dunduko. (Yes. 40:25-28) Ka si du nga Yekova ima ino rimo akerekuru ni basasa, gure nayugo gupai nga ko ima ino rimo gako amoyambu ni basasa dunduko! Na ka si dunga ome adu kina ti Yekova ka kusa akerekuru, gure nga ome kina tiko ka undo gako aboro. Ni rengo, ndupai aadunga be agu aYudo naadu ni zizi yo tipa i du na bakabangirise watadu gunde te.

15. Waigu Mbori ambakadi agu aYudo naadu ni zizi yo tipa gupai naadu kumbatayo?

¹⁵ Yekova aima mbakada gako aboro a tipa gupai naadu kumbatayo. Ti tonatona gu buku nga ga Yesaya, Mbori ape gupai fu gako aboro nga: “Oni rími ku rogo gaoni abambu, ki kisi gaoni angbadimo fuo roni, oni óko tironi ngbutuko toni daho pa imisiri ngbaduse ka susa ni.” (Yes. 26:20) Si nawiraha wa aYudo aima mangapai kuti gi rugapai re ho Bakindo Kurese azubo Babera ni. Bakeke kuru apangbanga tipa gu ringara aGiriki naadu mbata ape gupai nga, ho Kurese arimi ni ku Babera yo, ko “afu zinahe fu [gako abanzengere] nga i imi ai gu boro i nika bi ni zagi.” Mo berẽnga pa wai agu aboro naadu Babera yo adu na gunde! Ono si nawiraha wa i aaimongo aYudo te mbiko i amangipai kuti ga Yekova arugapai.

16. Tipagine si aidanga ani du ti ni na bakere gunde tipa agu apai nika manga kumbatayo ya? (Oni bi sura a.)

¹⁶ Ginipai ani awirikaha? Barambeda, ani nika gbiatirani na gu bakere gberãngbi naamanganga mbata rogo gu raka nga ga aboro ya. Ho si nika tona ni, aboro rogo zegino dunduko nikaa inongo gupai ka i mangihe ya na i nika du na bakere gunde. Ono ga Yekova aboro adunga wo te. Ani ima ino gupai nga Yekova nga gaani Mbori. Ani nika du na wingbaduse ni ino ani gupai nga “rago [batasa rani] nambeda.” (Rk. 21:28) Zavura ho dunguradungura arikaaboro nika zubo rani ni, ani nika ru nyanyaki. Yekova nika mangasunge na amaraika i banda rani, na ko nika fu arugapai furani nga gu nika batasa ungarani. Waigu ko nika fu agu arugapai re furani? Ani ainongo ho kindi te. Ono tie, si nawira gupai nga ani nika gbia ngbatunga agu arugapai re rogo gaani adungurati. Ka pepai ngba kura gene, adungurati ima rengba kadu wa gaani “abambu,” nga gu ba ani nika du rogoho ni bandabanda rani. Waigu rengbe ani ka mbakada tirani tipa agu apai du kumbatayo? Si nika ida ani du mbembedi na awirinarani, kidu na nyemu ka mangapai kuti agu arugapai nga ga siokrasia, na kidu na gu kido nga Yekova du nangbembatayo rogo gaani riigbu.​—Eb. 10:24, 25; 13:17.

17. Waigu rengbe mo ka ngera koyo du Yekova ni tipa wasa?

¹⁷ Wa vura duhe nga raka aadunga taata fu agu aYudo naadu ni zizi yo te, Yekova aima fu gu wasa fuyo i aaidaha. Ko nika manga kina gu bangisapai re furani. Ka kina ginipai vura manga vurũ rogo gaoni raka yo kumbatayo, oni naandu kumbatayo kindi kaa ngera koyo du Yekova ni tipa wasa. Ni rengo, oni du na kido kuti gako bakere inapai. Oni sa gaoni maabangirise si du nyanyaki. Oni naatingida gupai nga, nidu Yekova nga gaoni Mbori, pai ho si aida oni gunde behe te.