Oni Ngere Kumbatayo Tipa gu Bakporo Nika Nyeanye Kindi

1. Ginipai Yesu apehe nga si nika manga tipa Yerusarema?

BETE aˈuru mbata fu Yesu Kristo kpi, ko agumba sangbaanebi fu apefuoko. Gi sangbanebi re adigisitihe ni bambataha ho i agbarasi Yerusarema ni na gaha yekaru. Ko afu zahe nga rogo kura uru sa, i nika ke gu bakporo nangia Yerusarema “kirikiri na aboro vura.” (Rk. 21:20) Yesu ape gupai fu apefuoko nga ho i nika bi agu abanzengere re ni, si nika ida i kuru Yuda yo nibasa. Afugo Yesu aima da ti rengo. Agu abanzengere nangia ga aRomo yo aima ke Yerusarema.​—Rk. 21:21, 22.

2. Gini rugute gu mokedi nangia Pauro afuhe fu agu aKristano nangia aEbere naaraka Yuda yo na Yerusarema yo?

² Fuo bete agarã gbua mbata fu agu abanzengere nangia ga aRomo yo ke Yerusarema, gu mokedi nangia Pauro ake gu waraga nadu na ome ti ni nga gu ani nainihe areme nga gu kitabu nga ga AEbere. Rogo gu waraga re, Pauro afu nyanyakipa rugute fu agu aKristano nadu Yuda yo na Yerusarema yo nga gu naundo yo i mbakadi tiyo tipa gupai nadu fuyo kumbatayo. Ginipai du naandu ka manga? I aandu ka gbarasa Yerusarema. Agu aKristano re arengbe ka bata sa kina gu ka i ambu akpuyo na gayo sunge bagaahe. Sidu, nibipa gu bakporo nangia Yerusarema, Pauro ake gupai nga: “Bambiko nyenye bakporo be rani etere.” Tifuoho, ko agbia kurapai kutini nga: “Ono ani nangera tipa gu bakporo nikaye.”​—Eb. 13:14.

3. Ginihe nga “gu bakporo du na nyanyaki mburuhe ti ni,” na tipagine si aida ani naangera kumbatayo ti ni tipaha?

³ Ho aKristano adiberã ni ka mbu Yerusarema na Yuda, si nawiraha wa badungu aboro aima yamba yo nga airamungo na kini mamu yo, ono gu diaberã re aima batasa raka yo. Areme, aboro ima rengba ka ya ani nga airamungo bambiko ani akidongo kuti marã te, na ani akidongo kuti wiri aboro tipa i mbakadi agu akpakarapai nga ga zegino te. Sidu, tipagine ani amanga gu siapai re ti ni? Ani ima ino gupai nga barambeda ga Mbori Kindo nika gbarasa gi gbegberẽ zegino re. Ani nanye kaa sungudo ga Mbori Kindo bambiko ani ima inoho nga, si nga “gu bakporo du na nyanyaki mburuhe ti ni.”a (Eb. 11:10; Mt. 6:33) Ariiapai rogo gi kekeapai re ni basasa nika sakapai tipa: (1) wai ga Pauro rugute aundo aKristano i nye kaa sungudo ga Mbori Kindo, (2) wai Pauro ambakadi yo tipa agu apai naaye ka manga kumbatayo, na (3) wai gako rugute aundo rani areme.

ONI KIDO KUTI GU BORO KAA MBUNGA RONI YA

4. Tipagine Yerusarema adu na nyanyakipa ha ti ni fu aKristano?

⁴ Yerusarema aima du na nyanyakipa ha fu aKristano. I asigira gu bambata dungurati nga ga aKristano rogo gu bakporo re rogo gu garã nangia 33 Fuo Batikayo Kristo. Agu awirina nadu rogo riigbu bipasunge aaraka kina yo a. Kurii gure, dungu aKristano nadu na akpuyo yo na kidu na dungu ahe rogo gu bakporo re. Wa si avura duwo, Yesu afu zahe fu apefuoko nga, si nika ida i kuru kusayo Yerusarema yo na zavura Yuda yo a.​—Mt. 24:16.

5. Waigu Pauro ambakadi aKristano tipa gupai naaye ka manga?

⁵ Tipa ka mbakada aKristano tipa gupai naaye ka manga, Pauro aundo yo tipa i gbeberã yo kuti wai Yekova aabi gu bakporo nangia Yerusarema. Pauro atingidi yo na gupai nga, Yekova aaidanga berewe na agu aboromotumo nadu yekaru yo te watadu ko aaidanga na agu amotumo i aafuhe yo te. (Eb. 8:13) Badungu agu aboro naaraka rogo gu bakporo re aima ká Masiya. Si aaidanga aboro naandu berewe ku Yerusarema yo kaa iriso Yekova te. Kuba gure, si adu nga i nika gbarasa Yerusarema na yekaru.​—Rk. 13:34, 35.

6. Tipagine aKristano aaida ti ni na gu rugute Pauro afuhe fuyo rogo AEbere 13:5, 6?

⁶ Ho Pauro ake waraga ni fu aEbere, badungu aboro naaraka na ngbarago Yerusarema yo watadu nanaandu kaa bihe. Kura ga aRomo bakeapai sa ti gu regbo re ayambu Yerusarema nga “gu bakporo aboro ainipai tipaha rogo gu papara zegino re.” AYudo rogo dungu aringara anaandu koyo na agarã dunduko kaa manga apumbo yo. I anaamangasunge na marã ni bakerehe rogo gu bakporo re. Mbiko gipai re, si nawiraha wa kura aKristano aima manga bakere marã a. Isoke, si du nga ndu gupai Pauro ape gupai ti ni fuyo nga: “Ka oni dú nga ni akanga fu nyemu marã ya; agu ahe du be roni si ki rengbe bangironi.” Fuo gure, ko adipai rogo Ziazia Kekeapai yo nga gu nadu na ga Yekova nyanyakipa kidohe rogoho fu gako amoyambu ni basasa nga: “Mi ahe nga unda ro wa sa te, mi ambú nga ro a wa sa te.” (Oni gedi AEbere 13:5, 6; Pa Rug. 31:6; Tam. 118:6) Kusa, si aaida aKristano tingidipa gi kidohe re. Tipagine? Bambiko ngbutuko tifuo i gbia gi waraga re, si aaida i mbu akpuyo, gayo sunge bagaahe, na badungu gayo ahe. Fuoho, si ki idi i tona vovo raka rogo kura ba.

7. Tipagine si aida ani nyakasi gaani kido ti ni kuti Yekova awere?

⁷ Gupai ani awirikaha: Ginipai nika manga barambeda? “Bakere gberãngbi” nika tona na i nika gbarasa gi gbegberẽ zegino re. (Mt. 24:21) Wakina agu aKristano nadu Yerusarema yo, si naida ani nye ni ruru rani awere na ki mbakaditirani tipa gu regbo re. (Rk. 21:34-36) Ti regbo bakere gberãngbi, ani ima rengba ka zanga akpurani, na kura gaani ahe dunduko. Ti gu regbo, si nika ida ani du na gu kido nga Yekova ambunga rani wa sa te. Zavura awere mbata fu gu bakere gberãngbi re tona, ani ima rengba ka yugo bakio wai ani akido kuti Yekova. Mo sananga tiro nga, ‘Ya mo gimi adiaberã na agu apai mi aberãpa mangaha kumbatayo nayugoho nga mi akidongo kuti marã te ono kina kuti Yekova nga ko nika ngera angera fuo re?’ (1 Tim. 6:17) Gu kpiapai nga ga agu aKristano nadu mbata kusayo ima rengba ka undo rani ani nye ni ruru rani ti regbo “bakere gberãngbi.” Ono tie, “bakere gberãngbi” nika du ni kere kpakarakpakaraha kisusi ai gupai aKristano agbiatiyo na ni. Sidu, waigu ani nika ino gupai nzunzu si nika ida ani mangihe ho gu gberãngbi re nika tona ni?

ONI GISANGBA AGU ABORO NANGBE FU RONI KUMBATAYO ROGO APAI YO

8. Gini arugapai Yesu afuhe fu gako abawiriki?

⁸ Bete agarã tifuo agu aKristano naadu Ebere yo gbia ga Pauro waraga, i abi agu abanzengere nangia ga aRomo yo i nake gu bakporo nangia Yerusarema. Ho gupai re amangi ni, aKristano aima ino gupai nga gure nangia regbo fuyo i zubo kusayo Yerusarema yo na Yuda yo. I aandu ka gbarasa gu bakporo nangia Yerusarema barambeda. (Mt. 24:3; Rk. 21:20, 24) Ono wari gu si aaida i ndu kuo ni? Yesu ape gupai gbua nga: “Agu aboro ka du Yuda yo i ki oro ku abaagangara yo.” (Rk. 21:21) Dungu abaagangara nadu rogo gu rago re. Sidu, waigu i arengbe ka ino pa agu abaagangara si aaida i oro kuriihe yo?

9. Tipagine aKristano aima rengba kaa bakabangiriyo ti ni tipa gu bagangara i nika ora kuriihe yo? (Oni bi gbakigbaki kpiarago a.)

⁹ Oni bingo bete agu abaagangara aKristano aima rengba ka ora ku pati ni yo: agu abaagangara nadu Somorona yo, agu abaagangara nadu Gariraya yo, Bagangara Erumona na agu abaagangara nadu Rebanona yo, gbiati agu abaagangara nadu mbiti Yaradene yo. (Oni bi gbakigbaki kpiarago.) Rogo agu arago naadu na abaagangara rogoho re, kura abaakporo kinaho dagbaha aboro aberẽhe nga si nangia bawene ba ka raka rogoho. Ni kpiapai, gu bakporo nangia Gamla adu rii baa sosono bagangara yo na si aima du ni kere kpakarakpakaraha tipa kada yo. Kura aYudo aabi gi bakporo re nga si nzunzu nangia wene bagbuko fuyo ka raka rogoho. Ono tie, aRomo azubo gu gbata re na ki gbarasihe na dungu agu aboro naaraka yo nakpiki.b

10-11. (a) Waigu si awiraha wa Yekova aangbembatayo fu aKristano? (AEbere 13:7, 17) (b) Waigu aKristano agbia undo ti giasangba agu aboro naangbembatayo? (Oni bi sura a.)

¹⁰ Ani nabi gupai nga Yekova angbembatayo fu agu aKristano re vurube agu aboro naangbembatayo rogo dungurati. Bawirikipai sa tipa Baibiri du rimoko nga Eusebius ake gupai kusa nga: “Mbori ayugu gupai fu kura awirina Yerusarema yo nga si naida aKristano guari Yerusarema yo na ki ndu ku Pera yo nga gu bakporo nadu Perea yo.” Gu bakporo nangia Pera du nangia gu wene ba si aaida aKristano ndu ku rogoho. Si aaturongo na Yerusarema te, sidu, si aadunga ni kere kpakarakpakaraha ka ndu koyo te. Berewe a, badungu agu aboro nadu Pera yo angianga aYudo te, sidu, i anaˈasadanga ka sovura kuti aRomo te.​—Oni bi gbakigbaki kpiarago.

¹¹ Agu aKristano ‘nagisangba agu aboro naangbembatayo’ rogo dungurati aoro kurii agu abaagangara nadu Pera yo. (Oni gedi AEbere 13:7, 17.) Sidu, i abati mbiko gupai nga i agisangba. Apangbanga ima yugo gupai nga Mbori aambunga agu aboro ‘nangere tipa gu bakporo du na nyanyaki mburuhe ti ni’​—nga ga Mbori Kindo te.​—Eb. 11:10.

12-13. Waigu Yekova nangbe kumbatayo fu gako aboro ti kere kpakarakpakara aregbo?

¹² Gupai ani awirikaha: Yekova namangasunge na agu aboro nangbembatayo rogo apai tipa ka fu kparakpara rugapai. Dungu akpiapai duho rogo Baibiri yo nga gu nayugopa wai Yekova amangisunge na ruru akumba tipa i ngbembatayo fu gako aboro ti kere kpakarakpakara aregbo. (Pa Rug. 31:23; Tam. 77:20) Na areme, ani ima bi gupai a ziazia nga Yekova namangasunge na agu aboro nangbembatayo rogo apai yo tipa ka ngbe fu gako aboro kumbatayo.

¹³ Ni kpiapai, ho gu ririkaza nga Korona atona ni, “agu awirina . . . naangbembatayo rogo apai yo” afu rugapai fu adungurati. Agi awirina re arugu abaakumba tipa wai agu awirina du rogo adungurati nikaa gbiatiyo na kaa ndu kindi kumbatayo kaa iriso Yekova. Tifuo bete adiwi gbua fuo gi ririkaza re tona, ani amangi bakere adunguratise rogo afugo nga 500. Awirinarani arengbe ka bi gu mbakadapai re rogo Internet, terevizioni, watadu arengbe ka degatuyo kuti ni rogo radio. Ngbatunga gu bakere dunguratise re amanganga mbata te. Ti regbo ririkaza, ani aandu kumbatayo kindi kaa gbia gu rugapai ani aaidaha be Yekova. Ni sangbanaha, ani anye ni kodikodi rani. Ani ima rengba kadu na gu kido nga ka ani vura gbiatirani na kina gini aˈasada kumbatayo vurũ, Yekova nika ndu kumbatayo kindi kaa undo agu aboro nangbembatayo rogo apai yo i mangi agu adiaberã nga ga tatamana. Tipa ka mbakada tirani tipa bakere gberãngbi na ka mangapai na tatamana ti gu kere kpakarakpakara regbo re, si naida ani kido kuti Yekova na kini gisangba agu aboro nangbembatayo rogo apai yo. Gini kura asino si aidaha tirani?

ONI KPINYEMU AKUARONI NA KINI DI ABORO KUGUME

14. Ringbisihe kuti AEbere 13:1-3, gini asino si aaida aKristano yuguhe mbata fu i gbarasi Yerusarema?

¹⁴ Ho bakere gberãngbi nika tona ni, si nika ida ani yugu nyemuse fu akuarani kisusi gu nidu mbata. Ti gu regbo re, si nika ida ani pekefuo gu kpiapai nga ga agu aKristano naaraka Yerusarema yo na Yuda yo. I aima digo niyugu nyemuse dagbatiyo ti aregbo dunduko. (Eb. 10:32-34) Ono rogo gu yangara bete agarã naanye koyo mbata fu i gbarasi Yerusarema, si aaida i yugu “nyemu awirina” gbiati gu sino nga ga ‘dia aboro kugume’ ni bakerehe.c (Oni gedi AEbere 13:1-3.) Si nika ida a ani yugu gaani nyemuse ni bakerehe fu awirinarani ti regbo bakere gberãngbi.

15. Tipagine si aaida agu aKristano nangia aEbere yugu gu nyemuse nga ga awirina ti ni na gu sino nga ga dia aboro kugume tifuo i zubo kusayo Yerusarema yo?

¹⁵ Agu abanzengere nangia ga aRomo yo ake Yerusarema na ki guari pati gu bakporo re ni kina ipo. Ni sangbanaha, aKristano aima rengba ka kura rogo gu bakporo re. Ono i arengbe ka dia kina bete ahe gbua na yo. (Mt. 24:17, 18) Si aaida i niundo tiyo dagbatiyo wa i aandu kurii abaagangara yo. Na ho i ada ni Pera yo, si aaida i undo akurayo i tona vovo raka. Dungu awirina naaida na riahe, roko, na ba tipa ka raka rogoho. Agu aKristano re arengbe ka yugo gayo bakere nyemuse fu akurayo na ni dia yo kugume.​—Tito 3:14.

16. Waigu rengbe ani ka yugo nyemuse fu awirinarani airisimbori nga aguyo naida na gaani undo? (Oni bi sura a.)

¹⁶ Gupai ani awirikaha: Nyemuse nafõ rani tipa ani undo awirinarani ho i aida na gaani undo ni. Ni kpiapai, dungu aboro ima fu tiyo ni nyemuhe ka undo awirina nga aguyo ga ku rogo kura arago mbiko avura na gu gberãngo naye be gu mangaapai nga ga ome zegino. I ima fu agu ahe fu agi ayeaye re i aaidaha ka raka, na ki ima undo yo, gbiati ki ngarasi yo tipa i naandu kumbatayo kindi kaa iriso Yekova. Wirina ni dee nga boro Ukraine nga gu ri nazubo ki mbu kpuri be vura ape gupai nga: “Ani ima bi be Yekova ko ni ngbe kumbatayo furani na kini undo rani vurube awirina. I aima dia rani kugume na ki ima undo rani wenengai Ukraine yo, Hungary yo, na Germani yo.” Ani namangasunge kina sa na Yekova ho ani adia awirinarani ni kugume na kini ngerefuo gayo azingo.​—Snz. 19:17; 2 Kor. 1:3, 4.

17. Tipagine duhe ti ni ni nyanyakipa pai tipa ani wiriki gu sino nga ga dia aboro kugume kina awere?

¹⁷ Ti regbo bakere gberãngbi, si nika ida ani undo akuarani zavura kisusi wai ani amangaha awere. (Abak. 3:16-18) Yekova naraba rani tipa ani sonosi nyemuse tipa awirinarani na gu sino nga ga dia aboro kugume nga agu asino nika du na nyanyakipa ha ti gu regbo re.

GINIPAI NIKA MANGA KUMBATAYO

18. Waigu rengbe ani ka wirika agu aKristano nazubo kusayo Yerusarema yo?

¹⁸ Agu aKristano nagisangba na ki zubo kurii abaagangara yo abati ho i agbarasi Yerusarema ni. Wa vura duhe nga si aaida i sa ahe dunduko ni giiyo, Yekova aima ngerafuo yo, ko aambunga yo te. Ginipai rengbe ani ka wirikaha ti gayo kpiapai? Ani ainongo agu apai dunduko nika manga kumbatayo te. Ono Yesu afu zahe furani tipa ani du regerege ka giasangba. (Rk. 12:40) Ani ima rengba a ka berãkurii gu rugute Pauro akehe fu aEbere na ki mangipai kutini. Na Yekova nitiko nakido rani ni basasa nga ko ahe nga undo rani wa sa te, ko ambú nga rani a wa sa te. (Eb. 13:5, 6) Ani nye nga tie kaa sungudo ga Mbori Kindo nga gu bakporo nika nyeanye kindi, na fuoho, ani nika gbia ngbarago ti wene amaku nyeanye kindi.​—Mt. 25:34.