Ya mo Mo “Ini pa” wai ka du na Rengbabepai?

1. Rogo gupai yo nga kadu na rengbabepai nga gine, na ginipai du si ayugongo ho ya?

YA MO mo naarengba kina be agu ahe du bero? Gu boro narengba kina be agu ahe du beni nagbia ngbarago na zereda ni gbe ni berãni kurii agu amaku du beni. Ni adunga na gberãrago watadu zinga bambiko gupai nga kura ahe kinaho adunga be ni ya te. Ono tie, zavura ho du ani adu ni na agu ahe berani ani aidaha rogo gaani raka yo, gure ayugungo gupai nga si aidanga ani berẽ berewe kuriipa wai ani araka te. Sidu, si agberẽnga furani tipa ani idi ka manga dungu apai ti ngba gaani sunge fu Yekova te. (Rom. 12:1; 1 Tim. 3:1) Ono ho du ani ni na rengbabepai, ka si vura du nga ani agbianga gu sunge nga gu ani aaidaha te, ani azanganga gaani ngbarago te.

2. Gini gbegberẽ apai rengbe ka manga ka ani adunga na rengbabepai ya?

² Ka ani arengbanga kina be agu ahe du berani ya, ani ima rengba ka tona manga gbegberẽ adiaberã. Ni kpiapai, agu aboro nga aguyo arengbanga kina be agu ahe du beyo ya namangasunge kugii regbo yo tipa ka ngbe agu ahe adunga yo na zingoho ya. Si ni pa gberãrago nga, bete gu kura aKristano ima dĩ marã na gu kura ahe i akpinyemuhe. I ima rengba ka berã gupai nga, ‘si naida gire du ni gimi’, ‘Mi naidaha awere,’ ‘watadu ‘Mi ima rengba ka dia gi marã re awere na ki karagaha kusa.’ Ono tie, ai ngbatunga dĩ naba gberãrago ti Yekova na ki gbarasi rimoko. (Snz. 30:9) Gu kura aboro ima du na bakere gberãrago bambiko i agbianga gu momu sunge i aidaha te na si ki sa gupai nga i mbu iriso Yekova. (Gara. 6:9) Tipagine rengbe ga Yekova moyambu ka berãpa manga ngbatunga pai wa gure ti ni? Si ima rengba kadu wo mbiko gupai nga gu boro re ima rugusa sonosa gu sino nga ga rengbabepai.

3. Ginipai rengbe ani ka wirikaha nga gu du ni pa ngarasaro rogo AFiripoio 4:11, 12?

³ Ani dunduko naima rengba ka sonosa gu sino nga ga rengbabepai. Gu mokedi nangia Pauro ake gupai nga ko ‘aima ina pa sunga zezeredi rogo gu pai [ko] adu rogoho.’ (Oni gedi AFiripoio 4:11, 12.) Ko ake agu afugo re ti gu regbo ko adu bambukiso yo. Wa si avura duwo, ko aazanganga gako ngbarago te. Ko aima ‘wirika gu gbugbupai’ du tipa rengbabepai. Ka si du nga ani naˈasada tirani kadu na rengbabepai, afugo Pauro na gupai namangi ko ima rengba ka fu gu kido furani nga ani ima rengba ka sonosa gu sino nga ga rengbabepai. Si aidanga ani berẽ gupai nga si taata ka rengba kina be agu ahe du berani te. Ono tie, si naida ani wiriki wai kadu na rengbabepai. Ngba gini agene? Ani sakingo pai tipa agu asino nika undo rani ani wiriki gu gbugbuapai du tipa du na rengbabepai.

MO ASADI KADU NA TAMBUAHE TIPA GUHE DU BERO

4. Waigu pa du ani na gu toro nga ga tambuahe aundo rani tipa ani du na rengbabepai? (1 ATesaroniko 5:18)

⁴ Gu boro du na tambuahe ima rengba kadu na rengbabepai. (Oni gedi 1 ATesaroniko 5:18.) Ka ani du na tambuahe nga ani na guhe berani ani aidaha, si nawiraha wa ani abakanga bangirani nikerehe tipa agu ahe ani aidaha na gu adunga berani ya te. Ho du ani ni na tambuahe fu Yekova tipa agu agene ani airisoko ngbaha awere, gure nika undo rani tipa ani ini wai rengba ani ka manga gupai ngba gbe rogo gu sunge du berani awere kuba gupai nga kaa berã tipa wai rengbe ani ka gbia gu kura sunge kia nga gu ani aidaha. Yekova ima ino gupai nga si ni nyanyakipa pai furani ani du na tambuahe, na gure nga gu ndupai sa ko ape gupai furani ti ni rogo Baibiri yo nga si naida ani tambua ko ho ani akpara ni fuko! Du na gu toro nga ga tambuahe naundo rani tipa ani gbia gu “zereda nga ga Mbori nagasi rugatinapai dunduko.”​—Frp. 4:6, 7.

5. Gini nduapai si aaida aYisaraere du ti ni na tambuahe? (Oni bi sura a.)

⁵ Mo berẽnga kuriipa gupai namangi aYisaraere. Bara dunguhe, i akpakanahe fu Yekova bambiko i aaida ka ri gu riahe nga gu i anaarihe Ezipeta yo. (Geda 11:4-6) Si ni rengo nga raka ngbakungbo yo aadunga taata te. Ginipai narengbe ka undo yo i rengbe kina be agu ahe nadu beyo? Si aaida i berẽkurii pa agu apai dunduko Yekova amangihe fuyo na i ki du na tambuahe tipaha. Si aaida i tingidi gupai nga ho i adu ni ni akanga na i ki ni mangi fuyo gbegberẽ Ezipeta yo, Yekova aye na ambusa bawe kurii aEzipeto na ki batasi aYisaraere. Ho aYisaraere aguari ni Ezipeta yo, Yekova aundo yo tipa i di badungu afeda, dahabu, na aroko be aEzipeto. (Gate 12:35, 36) Ho i aado aYisaraere ni kuti ngba Zamba Baime, Yekova amangi iiriwopai ki kparaka gu ime re tipa i si ku mbitiyo. Na wa i aandu nunguro rogo ngbakungbo, ko aariga yo na auru dunduko na manu. Sidu, tipagine awiri aYisaraere aakpakanahe tipa riahe ti ni? Wa vura duhe nga Yekova afu riahe fuyo i rihe, i aadunga na tambuahe tipa guhe ko aafuhe fuyo te.

6. Gini bete agene duho nga gu rengbe ani ka sonosa gu sino nga ga du na tambuahe ngbaha?

⁶ Ginipai rengbe ka undo ro mo du na tambuahe? Ni bambataha, mo moi regbo rogo auru ni basasa dunduko tipa ka berãkurii gu wene apai mo agbia ngbarago ti ni. Mo ima rengba ka ke apai ue watadu biata nga gu du mo na tambuahe tipaha. (Kpe 3:22, 23) Ni uehe, si naida mo fu tambuahe fu aboro tipa gupai i amangaha foro na gu nyakipaha gbe nga, mo fu tambuahe fu Yekova na aˈuru dũ. (Tam. 75:1) Ni biataha, mo sia agu abakure nga aguyo du na tambuahe. Ka si du nga abakurearani nga kina agu aboro adunga na tambuahe watadu nakpakanahe dedede, ani ima rengba kadu a wakina yo. Ono ka abakurearani du ni agu aboro nafu tambuahe, i ima rengba kadu na maapai kurii rani tipa ani du a ni agu aboro nafu tambuahe. (Pa Rug. 1:26-28; 2 Tim. 3:1, 2, 5) Ka ani angera tipa amomu ka fu tambuahe, ani adunga na gberãrago tipa agu akpakarapai du ani rogoyo te, na ani adunga a na gberãrago tipa agu ahe nga gu ani aidaha ono ka si adunga berani ya te.

7. Ginipai naundo Aci ri du na rengbabepai?

⁷ Mo berẽnga kurii gupai namangi Aci, nga gu rii naraka Indonesia yo. Rii ape gupai nga: “ti regbo gu ririkaza nangia korona, Mi atona kaa ringbisa agu apai nadu tipa re na ga gu kura awirinami aidipase. Ni sangbanaha, mi aarengbanga be agu ahe nadu bere te.” (Gara. 6:4) Ginipai naundo ri tipa ri mangi ariapai rogo gari berã? Aci ape gupai nga: “Mi atona ka berãkurii pa agu amaku mi aagbiaha rogo aˈuru ni basasa na ka berãkuriipa gu wene ahe mi agbiaha mbiko pa du mi ni papara ga Mbori riigbu. Fuoho, mi atambua Yekova tipa agi apai re dunduko. Gure aundo re tipa mi du na rengbabepai.” Ka si du nga mo na gberãrago bambiko agu apai du tipa ro, ya mo mo rengbe ka manga agu apai Aci amangihe tipa kadu na tambuahe?

MO DU NA UMBASITISE

8. Ginipai namangi Baruka?

⁸ Gu ga Yeremaya bakeapai nangia Baruka, adu na gberãrago ti kura regbo sa tipa agu apai naamanga ko rogo raka yo. Baruka adu na gu sunge beko naima kpakara. Si aaida gupai nga ko undo Yeremaya ka pe gupai naandu ka manga agu aYisaraere naadunga na tambuahe re ya bambiko i abasa sangba Yekova. Ti kura regbo sa, Baruka aadunga na umbasitise te. Kuba gupai nga ka gbe berãko kurii gupai Yekova aaida ko mangihe, ko atona kaa berã gbe kina tipa tiko na gupai ko aaida ka mangaha. Vurube Yeremaya, Yekova aya fu Baruka we: “Mo nagbata bakere apai tipa tiro? Ka mo gbáta nga ha ya.” (Yere. 45:3-5) Ngba kura gene, ko aape gupai nga: “Mo rengbe kina be agu ahe du bero.” Baruka agisangba Yekova na ki nye ni mbembedi bakureako.

9. Waigu 1 AKorindo 4:6, 7 aundo rani ani du na ruru bipai tipa asunge? (Oni bi asura a.)

⁹ Ti kura aregbo, ga Yekova moyambu ima rengba ka tona berã gupai nga si naida i fu gu kura sunge fu ni. Ni ima rengba ka du na gu bipai re bambiko ni ima du na dungu abirĩ, ki ni mangisunge nyanyaki, watadu ni ima iriso Yekova tipa dungu agarã. Ono tie, kura aboro ima rengba ka gbia kina boro gu sunge nga gu ni aidaha re. Ginipai rengbe ka undo gu boro re tipa ka ni dunga na gberãrago ya? Ni ima rengba ka berãkurii agu afugo Pauro akehe rogo 1 AKorindo 4:6, 7. (Oni gedihe.) Agu asunge dunduko ani agbiaha na gu inohe du ani na ni naye be Yekova. Yekova afunga agu ahe re furani bambiko parani ima nyaka kisusi gu kura aboro te. Kuba gure, Yekova nafu agi ahe re furani bambiko ko ima kpinyemu rani na ko na weneringise kpaima.​—Rom. 12:3, 6; Ef. 2:8, 9.

10. Waigu rengbe ani ka sonosa gu sino nga umbasitise?

¹⁰ Ani ima rengba ka sonosa umbasitise ni berã ani dudunguro kurii gu kpiapai Yesu amoihe furani. Mo berẽnga kurii gupai namangi rogo gu yuru Yesu azundu kpendu gako amokedi. Gu mokedi nangia Yoane ake gupai nga: “Yesu ki niini [1] ya Bako afu ahe ku beko dunduko, [2] ko aye yo du Mbori ni, [3] wa ko nandu koyo du Mbori ni a, . . . ki tona zunda kpendu abawiriki.” (Yo. 13:3-5) Yesu aima rengba ka bihe nga si naida gako abawiriki zundu kpete nduko. Ono Yesu aabingo ho kandara tooni nga wa ko angia wiri Mbori, si aaida ko du na wene kporo, bakere marã, watadu fiõfiõ raka te. (Rk. 9:58) Yesu adu na umbasitise; ko adu a na rengbabepai. Ko amoi bawene kpiapai furani.​—Yo. 13:15.

11. Gini apai naundo Dennis tipa ko du na rengbabepai?

¹¹ Wirina du rimoko nga Dennis naraka Netherlands yo ape gupai nga, ko naamanga asadatise nyanyaki ka du na umbasitise wa kina Yesu, ono si naadunga taata te. Ko ape gupai nga: “Ho kura boro agbia gu sunge ni nga gu mi aidaha, mi naadu na gberãrago ti kura aregbo bambiko mi naaberã gupai nga mi du ka gbia gu sunge gu boro re nagbiaha re. Ho gipai re amanga ni, mi naawisigopai tipa gu sino nga umbasitise. Rogo JW Library^® app, mi ima gba he ti gu kura averesi du tipa umbasitise wa ka mi du na rengba ka gbiaha ni kina boro ipo na ki gedihe berewe. Mi ima zoga gu kura avidio a ku rogo gimi terefuni nga gu du tipa umbasitise, na mi naadega ture kutini dedede.a Mi ima wirika gupai nga agu apai dunduko mi amangaha fu Yekova si aida si fu taarimo fu ko, angianga ka gbeberã aboro kuti re ya. Yekova ima fu sunge furani wadu ani ni basasa dunduko tipa ani mangihe, ono ko du nasa gu sunge re si du na diabese.” Ka si du nga mo ima tona kadu na gberãrago bambiko mo amanganga gu sunge mo aidaha te, mo mangisunge nyanyaki tipa kadu na umbasitise gbe. Gipai re nika nyakasa gamo pabakure na Yekova na ki undo ro mo du na rengbabepai.​—Yak. 4:6, 8.

MO BERẼKURIIPA GA YEKOVA AKIDOHE

12. Gini maabangirise du furani kumbatayo nga gu naundo rani ani du na rengbabepai? (Yesaya 65:21-25)

¹² Ani naye kadu na rengbabepai gbe ho ani aberã ni kuriipa ga Yekova akidohe du furani kumbatayo. Rogo gu buku nga ga Yesaya, Yekova nape gupai furani yo nga ko ima rugatiko na pa gu dungu akpakarapai du ani rogoyo. Ono ko ima kidohe a nga ko nika dia agi akpakarapai re dunduko kusayo. (Oni gedi Yesaya 65:21-25.) Ani nika raka rogo bawene fiõfiõ akporo. Ani nika manga agu asunge nga gu ani agbia ngbarago ti ni, na ani nika du na bakere wene ariahe berani tipa ka rihe. Ani abakanga bangirani nga gbegberẽpai nika manga rani watadu awirani te. (Yes. 32:17, 18; Yeze. 34:25) Ani ima rengba ka du na gu kido nga, gu wene akidohe du furani kumbatayo re dunduko nika da ada ti rengo.

13. Gini akpakarapai ani agbia tirani na ni, na waigu pa berã ani kurii gaani maabangirise tipa kumbatayo aundo rani?

¹³ Si naida ani gbe berãrani awere kurii gaani maabangirise kisusi gu ni du mbata. Tipagine? Bambiko gupai nga ani naraka rogo ‘yangara arame’ na ani dunduko nagbia tirani na akpakarapai nga gu duhe “nikpakarakpakaraha ka mangapai sani.” (2 Tim. 3:1) Yekova naundo rani ani hipai na aˈuru dunduko ni fuko rugute furani, ome, gbiati gu undo ani aida na ni. (Tam. 145:14) Kurii gure, gaani maabangirise nga gu du furani kumbatayo naundo rani ti kpakarakpakara aregbo. Isoke, mo nasota nikerehe ka ngerafuo agu azingo nga ga gamo aborokporo. Ya mo gure nayugu gupai nga mo nikaa sota na aˈuru dunduko tipa ka raka? Anga wo duhe te! Yekova ima kidohe ka fu guhe foro mo aidaha​—na badungu agu akuraha​—rogo paradizo. (Tam. 9:18; 72:12-14) Isoke, mo naigirã na aˈuru dunduko, ki du na gberãrago, watadu gu kura kere kaza. Ono ya mo mo nika nye kaa rungo wa gure nyeanye kindi na ka mo agbianga ziga ya? Wagusa te. Kaza na kpio nika go kusayo rogo ga Mbori vovo zegino. (Yugo. 21:3, 4) Gi maabangirise re naundo rani tipa ka ani dunga na gberãrago watadu zinga tipa gupai namanga rani awere ya. Ani ima rengba kadu na ngbarago watadu zereda ka si vura du vurũ nga boro mangi rani gbegberẽ, ani zanga boro rogo kpio yo, watadu gu kura gbegberẽpai mangi rogo gaani raka yo. Tipagine? Bambiko ani ima ino gupai nga gaani “gberãngbi nanye ngbutuko” na ani arungongo berewe rogo vovo zegino te.​—2 Kor. 4:17, 18.

14. Waigu rengbe ani ka nyakasa gaani maabangirise?

¹⁴ Mbiko gupai nga gaani maabangirise tipa kumbatayo naundo rani ani du na rengbabepai, ginipai rengbe ka undo rani tipa ani du na gu kido nga ga Yekova akidohe nika da ada ti rengo? Kina wai si aida boro vo nandara tipa ka bi agu ahe du tuturũ wenengai, si naida ani mangi gu kura adiandue amanga tipa ka nyakasa gaani kido tipa gupai nga ani bi gu paradizo du kumbatayo ziazia. Ni kpiapai, ho ani abakabangirani ni nikerehe bambiko gupai nga si ima kpakara ka gbia marã, ani ima rengba ka berãpa gu regbo ani nikaa idanga na marã ya na ka boro arungongo ya. Ka rago agbera tirani mbiko gupai nga kura sunge kinaho ani ata gbianga ha ya, ani ima rengba ka berãpa wai ngbatunga gu bakabangirise re nikaa dunga na nyanyakipaha ya ho ani nika da ni ni rengberengbe rani na ki ima iriso Yekova tipa agarã sa kutu. (1 Tim. 6:19) Ani nabakabangirani awere tipa dungu apai na si ima rengba ka saha furani ni kpakarakpakaraha tipa ani berẽpa agi akidohe du furani kumbatayo re. Ono ho ani aberã ni gbe kurii gu wene raka Yekova nakido paha furani kumbatayo, si nika du furani taata ani berẽkurii gu kidohe re kuba gupai nga kaa bera kina kurii gaani akpakarapai.

15. Ginipai mo nawirikihe ti afugo Christa?

¹⁵ Oni bingo wai maabangirise naundo Christa nga dia Dennis nga gu ko i nifura tipa ko kusayo. Rii ape gupai nga: “Kaza gu du ho namanga re nga gu nasa agbaga re si ni rungbura. Mi arengbanga ka ndu ngba ndure te na mi namangasunge na kina ngbagida gbarĩgbarĩ aboro, na si naida mi naapi dedede kina ri ba tipa gbanga regbo. Mi rogo igirã na aˈuru dũ. Gi munganga aya fere we mi ahunga te. Ono mi aberẽ gupai nibasa nga, ‘Ko abingo agu apai du kumbatayo wagu mi abihe te.’ Mi namaa berãre kuti gimi maabangirise, nga gu nafu zereda nga ga berãse yo fere. Areme, mi nahi dungu akpakarapai, ono mi nika gbia ngbarago ti bawene raka rogo vovo zegino!”

“ZINGO AHE AMANGA NGA AGU YO NAGUNDE TI KO TE”

16. Tipagine Davide arengbe ka ke gupai ti ni nga “zingo ahe amanga nga” agu yo nagunde ti Yekova te?

¹⁶ Ka si vura du nga ani na rengbabepai, ani nika du adu na akpakarapai. Mo berẽnga pa Bakindo Davide. Awiriko biata aima kpiko. Gu kura aboro akiti gbangako tipa gu gbegberẽ apai nga gu ko aamanganga ha ya, abakureako ambuko, na bakindo sa aˈasadi ka imoko na kini gbata ko tipa dungu agarã. Wa agi akpakarapai avura ka du, Davide adu na rengbabepai. Ko ape gupai tipa Yekova nga: “zingo ahe amanga nga agu yo nagunde ti ko te!” (Tam. 34:9, 10) Tipagine ko arengbe ka pe gupai re ti ni? Bambiko ko aima ino gupai nga wa vura duhe nga Yekova nambugene fu agu akpakarapai namanga rogo raka yo, Yekova aima rengba ka fu agu ahe dunduko Davide aaidaha. (Tam. 145:16) Na wakina Davide, ani ima rengba ka du na gu kido nga Yekova nika undo rani ani nye ni ruru rani rogo gaani aˈasada yo dũ. Ani ima rengba ka gbia zereda na ngbarago ka kina gini apai vura du tipa rani vurũ.

17. Tipagine mo aida kadu ti ni na rengbabepai?

¹⁷ Yekova naida mo du na rengbabepai. (Tam. 131:1, 2) Sidu mo mangi agu apai dunduko rengbe mo ka mangaha tipa kadu na rengbabepai. Ka mo mangi ome nyanyaki kadu na tambuahe, ki du na umbasitise, na ka nyakasa gamo maabangirise, mo nika rengba kina be agu ahe du bero.