‘Ga Ngbi Yé’

Yekova kidohe nga: ‘Kpee adunga berewe te, aima, akaza, watadu kpio a te. Mi awega aume ti bangiriyo kusayo dunduko. Gu gbegberẽ apai dunduko naadu mbata ago kusayo.’

Yekova amoi Adamu na Eva ati Edene yo i raki rogo zereda na ngbarago. Si adu nga i nika iriso gu Bayo du ngbangbaturũ yo na ki hiisi kpotosende na awiriyo. Adamu na Eva abasasangba Yekova, ono ga Yekova ringbisapai aˈarianga tihe te. Rogo gi buku re, ani ima bi gupai nga, agu apai dunduko Mbori nakido ho nada nirengo. Gako Kindo nika ye na bakere amaku kurii kpotosende, kina wai ko akido Abarayama.

Barambeda, Satana na gako adaimona gbiati gbegberẽ aboro dunduko nika go kusayo. Agu aboro dunduko nika du ni ungayo i nikaa iriso Yekova. Ani awokanga watadu ka kpi te. Kuba gure, awiso dunduko ani nikaa zinga rame yo na ome tirani na kidu na ngbarago tipa kaa raka. Kpotosende nika da ni paradizo. Aboro dunduko nika du na wene riahe na wene akporo. Aboro nika du na wene asino, i adunga ni zingizingi yo watadu ni amangi gbegberẽ apai te. Anyanvuo agundenga be rani te, na ani agundenga bera a te.

Si nika du ni pa ngbarago gbe ho Yekova ni ka tona ka zingisa aboro ni. Ani nika dia agu aboro naadu mbata kugume wa Ebere, Noa, Abarayama, Sara, Moize, Ruta, Esetere, gbiati Davide. I nika kodatiyo na ani tipa ani sa Zegino dunduko ni paradizo. Dungu wene asunge nika du ho tipa mangaha.

Yekova naida mo du kina yo. Mo nika ye ka ino Yekova rogo gu gene nga gu mo aaberãnga paha mbata ya. Ani mbedinga ambeda na Yekova na aˈauru dunduko, tona awere na nyeanye kindi!