Waigu Yekova Nika ‘Nyakasa Roni’?

1. Waigu Yekova anyakasi gako ruru akumba bakuru kusayo?

FUGO MBORI ninaasakapai dedede tipa gu ruru akumba naadu mbata nga i adu nyanyaki. Ono i anaabingo tiyo ti aregbo dunduko nga i ni nyanyaki yo te. Ni kpiapai, ti gu kura aregbo, Bakindo Davide anaabi tiko nga ko nyanyaki wakina “nyanyaki bagangara,” ono ti kura aregbo, ko anidu rurungbura kidu ‘ni fudifudi ko.’ (Tam. 30:7) Ga Mbori toro afu bakere ome fu Samusona, ono Samusona aima ino gupai nga, zanga na gu ome naye be Mbori, ko rengbe ka “rungbura arungbura ki du wa kina kura aboro.” (Abasa. 14:5, 6; 16:17) Gi ruru akumba re adu nyanyaki mbiko gupai nga Yekova du naafu ome fuyo.

2. Tipagine gu mokedi nangia Pauro ape gupai ti ni nga ko adu rurungbura na kidu nyanyaki? (2 AKorindo 12:9, 10)

² Gu mokedi nangia Pauro aima ino gupai nga ko aaida aida na ome be Yekova. (Oni gedi 2 AKorindo 12:9, 10.) Wakina dungu rani, Pauro adu na akpakarapai nga ga kaza kpotose. (Gara. 4:13, 14) Ti kura aregbo, si aima kpakara fuko ka manga gupai du ni ruruhe. (Rom. 7:18, 19) Na ti kura aregbo, ko anidu adu na gunde tipa gupai narengbe ka manga ko. (2 Kor. 1:8, 9) Ono tie, ho Pauro adu ni rurungbura, ko adu nyanyaki. Ngba gini gene? Yekova afu gu ome fu Pauro naadunga ti ko ya. Ko asa Pauro ko du nyanyaki.

3. Gini asanahe ani nika karagapai kuti ni rogo gi kekeapai re?

³ Yekova ima kidohe tipa ka fu gu ome furani ani aidaha tipa ka hipai. (1 Pet. 5:10) Ono ani arengbanga ka gbia gako ome zanga ani mangi asadatise te. Tipa ka yugoho na kpiapai, ka si du nga riahe rogo he, si naida mo zogo bero azoga ku rogoho tipa ka kpa ha ka rihe tipa ka gbia ngbarago ti ni. Gipai re nika undo ro tipa mo gbia undo ti gu riahe re. Wakina gure a, Yekova regerege tipa ka fu gu ome furani ani aidaha, ono si naida ani mangi adiandue amanga tipa ka gbia undo ti ni. Ginihe Yekova nafuhe tipa si nyakasi rani? Na ginipai si aida ani mangihe tipa ka gbia gu ome re? Ani nika gbia akaragapai kuti agu asanahe re ni wisigo ani pai tipa wai Yekova anyakasi gu nebi nangia Yona, Maria navungu Yesu, gbiati gu mokedi nangia Pauro. Ani nika bi wai a Yekova andu kindi kumbatayo kaa nyakasa gako amoyambu areme ngba agene wakina gure.

KPARAKPEE GBIATI WISIGOPAI IMA RENGBA KA FU OME FURONI ONI HIPAI

4. Waigu rengbe ani ka gbia ome be Yekova?

⁴ Gene sa dagba agu akuraha yo rengbe ani ka gbia ome be Yekova ngbaha nga ni manga ani kparakpee fuko. Yekova nika karagapai kuti gaani akparakpee nifu ko “gu bakere tandu susi” furani. (2 Kor. 4:7) Ani ima rengba ka gbia ome nigeda ani Fugoko na kini berẽkuriihe. (Tam. 86:11) Gu ga Yekova pangbanga du furani rogo Baibiri yo “na tandu” ti ni. (Eb. 4:12) Ho mo amanga kparakpee ni fu Yekova na kini gedi Fugoko, mo nika gbia gu ome mo aidaha tipa ka hipai, ka banda gamo ngbarago, watadu ka manga kpakarakpakara sunge. Ani bingo wai Yekova anyakasi gu nebi nangia Yona.

5. Tipagine gu nebi nangia Yona aaida na nyakasaro ti ni?

⁵ Gu nebi nangia Yona aaida na nyakasaro. Ko aima du na gunde ka ndu ku rogo gu ba Yekova akedi ko ko ndu ku rogoho, sidu, ko abiti bakurungba ki ndu ku rogo kura ba kia. Mbiko gipai re, ko gbiati agu aboro naadu kurungba yo ambedi ka kpi. Ho abasikisi kurungba aba ko ni ku baime yo, bakiki tĩo ambiri ko, Yona adu rogo iiriwo ba vuru tĩo yo. Mo naberãha nga wai du Yona adu? Ti tonatonaha, ko aima rengba ka berã gupai nga ko nika kpi akpi. Na ko aima rengba ka berã gupai nga Yekova ima mbuko. Si nawiraha wa Yona aima du na bakere bakabangirise.

6. Ringbisihe kuti Yona 2:1, 2, 7, ginipai nanyakasi Yona ho ko adu ni vuru tĩo yo?

⁶ Ginipai Yona amangihe tipa ka gbia ome ho ko adu ni vuru tĩo yo? Ko amangi kparakpee fu Yekova. (Oni gedi Yona 2:1, 2, 7.) Wa vura duhe nga Yona aima basasangba Yekova, ko amangi kparakpee na kidu na gu kido nga Yekova nika degatuko adega kuti gako kparakpee. Yona aberẽ wenengai a kurii agu averesi ko agedihe bakuru kusayo. Tipagine rengbe ani ka pehe ti ni wo? Ani naino gipai re mbiko rogo gu gako kparakpee yo du rogo Yona kapita 2, ko mangisunge na kina gu bangisa afugo du rogo Atambuahe. (Ni kpiapai, oni ringbisinga Yona 2:2, 5 na Atambuahe 69:1; 86:7.) Si ziazia nga, Yona aima ino agu averesi re wenengai. Agu averesi re afu gu kido fu Yona nga Yekova nika undo ko aundo. Yekova abatasi Yona na kusa, Yona adu regerege tipa ka ndu ka manga gu sunge Yekova aya fuko ko mangihe.—Yona 2:10–3:4.

7-8. Waigu kura wirina sa Taiwan yo agbia ome ti regbo gako aˈasada?

⁷ Ga Yona kpiapai ima rengba ka undo rani ho ani asusa ni rogo aˈasada ni bakiakia. Ni kpiapai, wirina du rimoko nga, Zhiming,b du rogo gu ringara nga Taiwan, nambu be agu akpakarapai nga ga kere kaza kpotose. Na berewe, gu kura gako aborokporo namanga ko gbegberẽ mbiko gako idapase kuti Yekova. Ko naagbia ome be Yekova vurube kparakpee na wisigopai. Ko aya, “Ti kura aregbo, ho akpakarapai ninaakura ni, mi nidu na bakere bakabangirise si ki sa gupai nga ka mi dunga zezeredi ka manga gimi wisigopai nisase ya.” Ono ko naakido kindi kuti Yekova tipa undo. Ko aya, “Gu bambatapai mi naamangaha nga ka manga kparakpee fu Yekova. Fuo gure, mi ki moi gimi hu gia abia tureyo na kini gi agu abia nga ga Kindo. Ti kura aregbo, mi naabi abia na fugore zezeredi daho mi nika gbia zereda ni. Fuo gure, mi ki tona wisigopai.”

⁸ Zhiming ninaagbia ome ka hi gako akpakarapai mbiko agu apai ko naawirikaha ti regbo gako wisigopai nisase. Ni kpiapai, ho i agba ko ni ko kini kaa hu behe, gu boro ninaangera fuo aborokaza ape gupai fuko nga, mbiko gupai nga gako zamba kure tooni, si nika ida i fu kure kutii kpotoko yo. Gu yuru naadu mbata fu i gba Zhiming, ko agedipai tipa gu wirina i agba ri wakina gure. Gari zamba kure aima umba kisusi gako; ono ri aaidanga i fu kure kutii kpotoriyo te na ri aima du na rengba ka hu. Gu kpiapai re aima nyakasa Zhiming ko nye ni ruruko.

9. Ka si du nga mo nabakabangiro tipa gu asada mo andu rogoho, ginipai rengbe mo ka mangaha? (Oni bi asura a.)

⁹ Ti gu regbo du mo rogo asada, ya mo mo nidu na bakabangirise tipa ka manga kparakpee fu Yekova? Watadu ya mo mo naabihe nga mo ima du na mbugo na gene bero tipa ka manga wisigopai te? Mo tingidi gupai nga, Yekova ima rugatiko na gupai du tipa ro wenengai. Sidu, ka mo vura manga kina taata kparakpee fu Yekova, mo ima rengba kadu na gu kido nga ko nika fu kina boro guhe foro nzunzu du mo na zingoho. (Ef. 3:20) Ka si du nga si ni mbumbuhe foro tipa mo naagedapai na kini mangi wisigopai mbiko mo nawoka awoka, mo na mbugo, watadu mo na bakere bakabangirise, mo ima rengba ka degaturo kuti dede-fugo Baibiri watadu kuti fugo gaani awaraga. Mo ima rengba a ka degaturo kuti kura gaani abia watadu ka bi vidio rogo jw.org. Nimanga mo kparakpee fu Yekova na kini ngere tipa karagapai kuti gu kparakpee re rogo agu ahe yo nga ga toro ko nafuhe, gure nga mo nambu ko ko nyakasi ro.

AWIRINARONI IMA RENGBA KA NYAKASA RONI

10. Waigu agu awirinarani nga aKristano anyakasa rani?

¹⁰ Yekova ima rengba ka mangasunge na agu awirinarani nga aKristano tipa i nyakasi rani. I ima rengba kadu ni mburu bakere ‘ngarãsa ro’ furani ho ani agbiatirani ni na asada watadu ho duhe ni ni kpakarakpakaraha furani ani mangi gu sunge i nafuhe furani. (Koro. 4:10, 11) Ani naida aida na abakure gbe ti “rago gberãngbi.” (Snz. 17:17) Ho ani abihe ni nga ani rurungbura, awirinarani airisimbori ima rengba ka undo rani rogo borose yo na rogo toro yo. Ani bingo wai Maria navungu Yesu agbia ome be kura aboro.

11. Tipagine Maria aaida na nyakasaro ti ni?

¹¹ Maria aaida na nyakasaro tipa ka manga gupai Yekova akpinyemuhe. Oni berẽnga pa wai Maria adu na bakabangirise ho ri agbia bakere sunge ni be gu maraika nangia Gaburere. Ko ape gupai furi nga, ri nika du na vuse si ki vura du vurũ nga ri aamanganga rogatise te. Ri aainongo wai ka sonosa agude nitiri te, ono si adu nga ri nika ngerafuo gu gude si adunga ko nika da ni Masiya. Ri aamanganga kodaba rogo gari raka yo te, ono si aaida ri pe gupai fu Yosefa nga ri na vuse, gipai re aima du ni kere kpakarakpakaraha tipa ka mangaha.—Rk. 1:26-33.

12. Ringbisihe kuti Ruka 1:39-45, waigu Maria agbia gu ome ri aaidaha?

¹² Waigu Maria agbia ome tipa ka digiso gu kparakpara sunge naadu na ni kpakarakpakaraha re? Ri agbata undo be kura aboro. Ni kpiapai, ri asana gu maraika nangia Gaburere re ko peke dungu apai tipa gi sunge re. (Rk. 1:34) Ngbutuko tifuo gure, ri andu gbanga nunguro ku “ngbi bagangara yo” naadu Yuda yo tipa ka bi gu gumeri nangia Erizabeta. Wene nunguro du naadu. Erizabeta atambua Maria na ga Yekova toro kidu kugii ri ri pe afugo ngarasaro ni sangbanebi tipa gu gude si adu nga Maria nika vunga ru. (Oni gedi Ruka 1:39-45.) Maria ape gupai tipa Yekova nga, “ko yugu ome ni beko.” (Rk. 1:46-51) Yekova anyakasi Maria vurube gu maraika nangia Gaburere gbiati Erizabeta.

13. Waigu wirina Bolivia yo agbia nyakasaro ho ri asanahe ni tipa undo be akurari airisimbori?

¹³ Wakina Maria, mo ima rengba ka gbia nyakasaro a be akuaro airisimbori. Dasuri, nga wirina rogo gu ringara nga Bolivia, aaida na ngbatunga gu nyakasaro re. Bari aawoka nikerehe na ka husa adunga ho tipa gako kaza ya, ho ko adu ni bambungua yo, ri aaida kadu kina pati ko ti aregbo dunduko. (1 Tim. 5:4) Gipai re aadunga taata te. Ri aya, “Dedede, mi anaabi tire nga ome re ima nyasa pai ho ka mi mangihe berewe te.” Ya mo ri asanahe tipa undo? Ti tonatonaha, ri aasananga kura aboro tipa undo te. Ri aya, “Mi aaidanga ka mbusa awirina te. ‘Gupai mi aberẽhe nga Yekova du nika fu gu undo fere mi aidaha.’ Ono mi aye ka rugatire kusa na gupai nga, pa kpara mi tire kusayo ti aboro, gure nga mi aˈasada ka mangapai kuti gimi akpakarapai nisare.” (Snz. 18:1) Dasuri adiberã ka kepai fu bete anakureari na ki sakipa gupai fuyo ri adu rogoho. Ri aya, “Mi aima gbia bakere nyakasaro be awirinina aKristano. I aye na ariahe fere ku bambungua yo na ki gedi agu averesi fere nafu wasa. Si ima du ni bawenepai kisusi ka ino gupai nga ani nisarani te. Ani nga papara ga Yekova aborokporo du ni kikiihe—na awirinarani na nyemu ka undo rani, ka ngerafuo gaani azingo, ka kpara na ani ho du ani ni na rungo, na ka ngarasa rani ani naandu kindi kumbatayo kaa iriso Yekova.”

14. Tipagine si aida ani di undo kugume ti ni be abaakumba?

¹⁴ Gu kura gene sa dagba agu akuraha yo Yekova anyakasa rani ngbaha nga vurube abaakumba. I nga agu agamahe Yekova amangasunge na ni tipa ka nyakasi rani na ka fu wasa furani. (Yes. 32:1, 2) Sidu, ka si du nga mo na bakabangirise, mo pepa agu apai nasa ro mo du na bakabangirise fu abaakumba. Ho i nika fu undo ni, mo dihe kugume na tambuahe. Yekova ima rengba ka nyakasaro vurube yo.

GAONI MAABANGIRISE TIPA KUMBATAYO IMA RENGBA KA NYAKASA RONI

15. Gini maabangirise aKristano dunduko abihe na nyanyakipaha?

¹⁵ Agu akidohe du rogo Baibiri yo ima rengba ka fu maabangirise furani na ki fu ome furani ani naandu kumbatayo kindi kaa iriso Yekova. (Rom. 4:3, 18-20) Gu kura aKristano na maabangirise tipa ka raka nyeanye kindi ngbangbaturũ yo, na agu akurayo na maabangirise tipa ka raka nyeanye kindi rogo bawene paradizo auru kpotosende. Gi gaani maabangirise re nanyakasa rani ani hi aˈasada, ani tungusi wene pangbanga, na ani undo awirinarani rogo dungurati. (1 Tesa. 1:3) Gu bangisa maabangirise re aima nyakasa gu mokedi nangia Pauro.

16. Tipagine gu mokedi nangia Pauro aaida na nyakasaro ti ni?

¹⁶ Pauro aaida na nyakasaro. Rogo gu gako awaraga yo ko akehe fu aKorindo, ko aringbisi tiko kuti agu ahe i amekehe rogo sende yo. I ‘agbisi ko,’ ‘pai ki gasi ko,’ i ‘ki rungosi ko,’ na ‘ki ba ko.’ Na zavura ti kura aregbo, gako raka anidu ngba kerepai. (2 Kor. 4:8-10) Pauro ake agu afugo re ti gu regbo ko aandu gako nunguro nga ga amokedi ni biataha. Na zavura tifuo ko pe agu afugo re, ko agbiatiko na kere akpakarapai kisusi. Ti regbo gako yangara tua, aboro zuu azubo ko, i azi ko, ko ambedi ka rindo na bakurungba ku baime yo, na i ki moiko ku bambukiso yo.

17. Ringbisihe kuti 2 AKorindo 4:16-18, ginipai nanyakasi Pauro ko hi aˈasada?

¹⁷ Pauro agbia ome tipa ka hipai ni maa ko berãko kuti gako maabangirise. (Oni gedi 2 AKorindo 4:16-18.) Ko ape gupai fu aKorindo nga ka gu kpotoko du ku zegi yo vura “zirã,” ko ambunga gipai re si ba gberãrago tiko te. Pauro amoiberãko tipa gako raka kumbatayo. Gako maabangirise tipa ka raka ngbangbaturũ yo adu ni ‘rõrõi taarimo fuko susi bakere gbe,’ kisusi ai agu agberãngo ko asusi rogoho. Pauro aberẽkurii gu maabangirise re, na ni sangbanaha, ko abi tiko nga ‘i nambakada ko waragoagira.’

18. Waigu maabangirise anyakasi Tihomir na gako aborokporo?

¹⁸ Gu maabangirise du tipa kumbatayo ima nyakasa gu wirina nga Tihomir, du rogo gu ringara nga Bulgaria. Bete agarã kusayo, tooni tameko nangia Zdravko, akpi be béno. Nisangbana ha, Tihomir asota na bakere gberãrago. Tipa ka diabe gi gberãrago re, ko na gako aborokporo aberẽpa wai zingabekpio nika du. Ko aya: “Ni kpiapai, ani asakipai tipa gu ba ani nika gbia Zdravko rogoho, gini riahe ani nika pasa ha fuko, ada ani nika yamba yo tipa sungo ho ko nika zinga ni, na ginipai ani nika pehe fuko tipa yangara arame.” Tihomir ape gupai nga, pa maa ko bangiriko gbiati gako aborokporo kuti gu gayo maabangirise re anyakasi yo i naahipai kindi na i naasungudo gu regbo kindi Yekova nika zingisa tameko ti ni.

19. Ginipai rengbe mo ka mangaha tipa ka nyakasa gamo maabangirise? (Oni bi sura a.)

¹⁹ Waigu rengbe mo ka nyakasa gamo maabangirise? Ni kpiapai, ka si du nga gamo maabangirise nga ka raka nyeanye kindi auru kpotosende, mo gedipai tipa wai Baibiri nasakipai tipa Paradizo na ki berẽkuriihe. (Yes. 25:8; 32:16-18) Mo berẽkuriipa wai raka nika du rogo vovo zegino. Mo berẽnga pa tiro rogo vovo zegino. Da mo abi ni? Gini woro ahe mo agiaha? Waigu du mo? Tipa ka undo ro mo berẽpa wai Paradizo nika du, mo bi agu asura du rogo gaani awaraga nga gu nayugopa wai Paradizo nika du watadu ka bi agu avidio nga ga manzigo, wa ngbatunga gu nga Gu Vovo Zegino Naye, Just Around the Corner, watadu Wene Regbo Naye. Ka si du nga ani nadia regbo dedede kaa berãkurii pa gu gaani maabangirise nga ga vovo zegino, gaani akpakarapai nika du “ni aakpura ha nga gu nanye ngbutuko.” (2 Kor. 4:17) Gu maabangirise Yekova nafuhe furoni ima rengba ka undo roni oni hi aˈasada.

20. Zavura ho ani abihe ni nga ani rurungbura, waigu rengbe ani ka gbia ome?

²⁰ Ka ani vura kaa bi tirani vurũ nga ani nirurungbura rani, “ani amánga pai ni ngarã wa du Mbori na ani.” (Tam. 108:13) Yekova ima fu agu ahe furoni oni aidaha tipa ka gbia ome beko. Sidu, ka oni aaida undo tipa ka digiso gu sunge i nafuhe furoni, ka hi asada, watadu ka banda gaoni ngbarago, oni kpari fu Yekova na ki mangi wisigopai nisase. Oni di ngarasaro kugume be awirinaroni aKristano. Oni naadia regbo dedede kaa berãkurii gaoni maabangirise tipa raka kumbatayo. Sidu, oni nika “nyáka na tandu dũ, ku sangba gu ome yo du ti ga [Mbori] taarimo, dati zera dũ na gbanga hipai ni ngbarago.”—Koro. 1:11.