Ani Mbakaditirani Tipa Ga Yekova Uru
“Si du oni mbákadi tironi a tie; bambiko Wiri boro naye ti gu saa oni aberã nga pa ha ya.”—MATAYO 24:44.
1. Tipagine si aida gupai ti ni nga ani naabakabangirani tipa ga Yekova uru?
GA Yekova uru angia uru vura, uru dingidingi imisiringbaduse, uru egira kpotose, uru bitimo na uru gbarasarago. Ga Yekova “bakere iiriwo rago” ayeaye nirengo sa gi gbegbere zegino re, a wa Ime Akangbii agbarasi gu zegino nadu ti rago Noa. Si ahenga ye te. Ono, wa vura duhe were, “agu . . . [aboro] dunduko ka kpara ti rimo Yekova i abáta abata.” (Yoere 2:30-32; Amosa 5:18-20) Sidu Mbori agbarasa avurako agbarasa ono ki batasi gako aboro. Nibipa wai gu nebi nangia Zefania abipa ipo ga Yekova uru, ko atakipandehe yaa: “Gu bakere rago nga ga Yekova . . . [si] mbembedi, si mbembedi ki niipisi tihe gbe.” (Zefania 1:14) Ono tie, gini regbo Mbori nika manga gi gako sarangbangaa re?
2, 3. Tipagine duhe ti ni ninyanyakipa pai ani mbakaditirani tipa ga Yekova uru?
2 Yesu ayaa: “Boro aina nga gu uru na gu saa wa sa te re, amaraika ngbangbaturũ a te, Wiri a te, ono kina Ba.” (Matayo 24:36) Wa duhe nga ani ainonga gu regbo nzunzu ngaha te, si nipatatamana ani moi agu afugo ku ngbaduraniyo du rogo agu averesi nga ga gu garã nga 2004, nga gu nayaa: ‘Oni naangera angera kindi na ki mbakaditironi.’—Matayo 24:42, 44.
3 Niyugo Yesu wai i ka dungura agu aboro nitunguotunguoho ima mbakadatiyo tipa gu uru re tipa ka banda yo na ki mbu aguyo ambakadanga tiyo ya, ko ayaa: “Ni gu rago re akumba adu ati yo ue; i ki di gu ni, ki he gu ni. Ade adu pati mbia ue nisa ahe; i ki di gu ni, ki he gu ni.” (Matayo 24:40, 41) Ginipai nika manga tipa rani rogo gu kere regbo re? Ya mo ani aima mbakadatirani watadu gu uru re nika tunguo rani atunguo? Si naru gbe riipa agu apai ani amangaha awere. Tipa ani rengbe ka mbakadatirani tipa ga Yekova uru, si naida ani ne gu kura sino berã moipai ti aboro areme, ni so ani vura kuti yukuro rogo toroyo, na ka mbu gu kura ngbatunga asino raka.
Ani Ne gu Sino Nga ga Sakparakpa
4. Gini sino berã aboro adu nani ti rago Noa?
4 Ani makianga pai tipa rago Noa. Ziazia Kekeapai nayaa: “Mbiko idapase Noa, ho Mbori ayugu pa agu apai ni fu ko i ata bi nga ya, ko . . . [a]gunde ti Mbori, ki mbakadi kurungba ki batasi kpuko.” (AEbere 11:7) Si adu nga, gu kurungba re nikangia guhe bibihe nika du kia na aboro nikaa bihe abi. Kurii gure, Noa angia “batungusi rurupai.” (2 Petero 2:5) Ga Noa sunge mbakada kurungba gbiati gako sunge tungusapai, asanga aboro i mangi ariapai rogo gayo sino raka te. Tipagine? Mbiko “i aniri he nimbiri he, nirogo ade nifuku ade sa roga yo.” Agu aboro Noa anatungusapai fuyo adingiso tiyo bakere gbe na kina gayo apai gbiati pa ngbarago, si ki kisi berãyo “ka i aina nga . . . [pa gu gberangbii naaye sa yo] ya daho ngirimo akangbi aye ni ki nirogo yo dunduko ku sa yo.”—Matayo 24:38, 39.
5. Gine nangia gu bipai nangia ga aboro Sodomo ti rago Roto?
5 Kina gu bangisapai re nadu ti rago Roto. Ziazia Kekeapai naya fu rani wee: “I ari riahe, ki mbiri he, i angbe he, i abagi he, i arũ he, i adudua ahe; ono ni gu rago Roto akuru Sodoma yo we ana ngbangbaturũ yo na ambia, si ki gbarasi yo dunduko.” (Ruka 17:28, 29) Fuo amaraika fura fu Roto tipa gu gbarasarago naambeda, ko afura na akumba-ku-awiriko tipa gupai naaye ka manga. Ono tie, si adu bangiriyo wa “ko nananga yo ananga.”—Bambata Pai 19:14.
6. Gini sino berã si aida ani nehe?
6 Yesu ayawee a wa si adu ti rago Noa na rago Roto, “[kinawo pa]ye Wiri boro nikadu.” (Matayo 24:39; Ruka 17:30) Ka pe rengo, gu sino berã moipai areme ti aboro nga gu sino nga ga sakparakpa. Sidu si naida ani banda tirani ngbatunga gu sino bipai re ka mera fuo rani. Irairapai ho ti ri wene riahe rengbe arengba na ka mbira buda rengbe arengba te. Teketeke wa kina gure a, rogatise nga gupai Mbori ambakadipai tipaha. Ono tie, ka ani sa agu apai re ninyanyakipa pai kisusi rogo gaani raka na ki mbu agu apai nga ga toro, ya mo gure yugu gupai nga, ani ima mbakadatirani tipa ye ga Yekova uru?
7. Gini nyanyakipa sanahe si aida ani sana tirani nani mbata fu ani guari ka mera gene pai yo, na tipagine?
7 Gu mokedi nangia Pauro ayaa: “Rago guru, . . . agu [aboro] du na adiayo i du wa ka i adu nga na adiayo ya.” (1 AKorindo 7:29-31) Kina guru regbo gbua nye fu rani tipa ani nyasi gu gaani sunge nga ga tungusapa Kindo Mbori afuhe fu rani. (Matayo 24:14) Pauro azungodi arogotise i zanga dia bakere regbo tipa kina agu apai nabiyo ki moi agu apai nga ga Kindo kurogo ue ba rogo gayo raka. Si tie ziazia nga, gu sino berã Pauro aatambua paha ya si ngba, si ni gupai dukia ti gu sino nga ga sakparakpa. Yesu ayaa: “Oni [ni]gbáta gako ngbi [ga Mbori Kindo] mbata, na gako rurupai.” (Matayo 6:33) Ho ani adiaberã ni tipa ka mangapai watadu ho ani aida ni ka mera gene kurapai yo, gu sanahe daada si aida ani sana tirani nani nga, ‘Ginipai gipai re nika mangaha na pa banda mi agu apai nga ga Kindo nibambatapai rogo gimi raka?’
8. Kangia ani sa agu apai nga ga raka ani amangaha na a’uru nibanguapai rogo gaani raka, ginipai si aida ani mangihe?
8 Ginipai ka ani mangi ka ani bi gupai nga, ani ima rimiso tirani kurogo agu apai nga ga raka ani amangaha na a’uru si ki da na ani ti gupai nga, ani ima basapa agu apai nga ga toro? Ya mo kina wiri tooni kparakparapai gbua duho dagba gaani sino raka na ga gaani amurakporo nga agu aboro adunga na ruru inohe beyo rogo Ziazia Kekeapai ya na angianga atakipande Kindo ya? Kangia wo duhe, si naida ani kparikpee tipaha. Yekova rengbe arengba ka undo rani ani du na ruru sino berã. (ARomo 15:5; AFiripoio 3:15) Ko rengbe arengba ka undo rani ani peresi agu apai nga ga Kindo mbata rogo gaani raka, tipa ani mangi gupai ruaru, na ka manga gupai ani akido pa mangaha fuko.—ARomo 12:2; 2 AKorindo 13:7.
Oni Sovura Kuti Yukuro Rogo Toroyo
9. Kuti Yugoti 16:14-16, tipagine duhe ti ni ninyanyakipa pai ani sovura kuti yukuro rogo toroyo?
9 Gu bangisa sangbanebi nafura tipa “gu vura nga ga gu bakere rago nga ga Mbori, nga gu ko du na tandu apai dũ,” nga gu vura nika manga ti rago Aramegido, nazahe a ya kura aboro adu kinaho nikaa ra ara tigayo. Gu Gbia nga Yesu Kristo ayaa: “Oni ngére, mi naye wa iradĩ. Boro maku nga gu ni nangera ki nibanda gani aremu, ka ni adu nga ni kundirini, i ki bi gani zee ya!” (Yugoti 16:14-16) Agu aremu gumba yo paha herẽ re nayugopa agu apai nayugo rani ni agu aKristano nga aDezire Yekova. Si nakoda gaani sunge ni atakipande Kindo gbiati gu gaani sino nga ga aKristano. Kangia nyomoro zi rani si kidu wa ani nara ara, si rengbe ka sa rani ani du nikundiri rani ka he adunga ho nayugo rani ni aKristano ya. Gupai re nga pazee na si nga kerepai. Si naida ani sovura ka he yukuro rogo toroyo watadu ka rungbura. Wai rengbe ani ka sovura kuti ngbatunga gupai re?
10. Tipagine pa geda Ziazia Kekeapai na a’uru dunduko aundo rani ti ni ani nye kaa ngera angera kindi rogo toroyo?
10 Ziazia Kekeapai nadogoda nyakasa gupai nga, si naida ani ta sungo kini ngere angera na kini rugutirani na pa apai. Nikpiapai, agu abuku nga ga Wene Pangbangaa natingida rani na agu apai nga: ‘Oni naangera angera kindi’ (Matayo 24:42; 25:13; Marako 13:35, 37); ‘oni mbakaditironi’ (Matayo 24:44); “oni bánda tironi abanda, oni ngére angera” (Marako 13:33); “oni mbakadi tironi” (Ruka 12:40). Fuo gu mokedi nangia Pauro gumba gupai nga, ga Yekova uru nika tunguo agu aboro atunguo du rogo gi zegino re zanga i inihe, ko angarasi akurako aidipase ki yaa: ‘Ka ani ranga wa gu kura aboro ara ya, ono ani nikparia rago kini rugu tirani na pa apai.’ (1 ATesaroniko 5:6) Rogo gu yangara buku nga ga Ziazia Kekeapai, Kristo Yesu anyakasi paye ko ya, fuo taasa yo pako, si nika du nitunguotunguoho. Ko ayaa: “Mi naye ni ipo.” (Yugoti 3:11; 22:7, 12, 20) Dungu agu anebi nangia aEbere aringbisipa ga Yekova bakerepa uru sapangbangaa na ki za aboro ya si aambeda. (Yesaya 2:12, 17; Yeremaya 30:7; Yoere 2:11; Zefania 3:8) Pa geda ani Fugo Mbori, nga Ziazia Kekeapai na a’uru dunduko na kini berẽkurii gupai ani agedaha, nga wene gene tipa mbu rani ani naangera angera rogo toroyo.
11. Tipagine du wisigo Ziazia Kekeapai nisase ti ni ninyanyakipa pai tipa boro nye kaa ngera angera rogo toroyo?
11 Nirengo, pa geda boro Ziazia Kekeapai nisani zanga manga nyomoro tingbaha, kini mangisunge na agu abuku du mburuhe rii Ziazia Kekeapai nga gu ‘ruru kangara moyambu’ akusaha, nangarasa boro ni nye kaa ngera angera kindi rogo toroyo! (Matayo 24:45-47) Ono tie, tipa wisigopai nisase rengbe ka undo boro, si naida gu wisigopai re naasona asona kina kumbatayo na ni kini mangihe zanga kpa ti mangaha. (AEbere 5:14–6:3) Si naida ani naari gu nyanyaki riahe nga ga toro dedede. Pa gbia ani regbo tipaha rogo agi a’uru re, nga kpakarakpakarapai. (AEfeso 5:15, 16) Berewe a, si adanga fu rani ani naageda Ziazia Kekeapai gbiati agu abuku du mburuhe rii Ziazia Kekeapai ti kina agu aregbo ngbaa rago tipa ka gedaha te. Pa manga ani wisigopai nisarani dedede ninyanyakipa pai ka ani aida ka nye “nzunzu rogo idapase yo” na ki nye kaa ngera angera.—Tito 1:13.
12. Wai agu adunguratise nga ga aKristano gbiati kikindigi adunguratise aundo rani ani sovura kuti yukuro rogo toroyo?
12 Agu adunguratise nga ga aKristano gbiati kikindigi adunguratise naundo rani ani sovura kuti yukuro rogo toroyo. Rogo gini gene? Be agu arugute ani agbiaha. Ya mo i naatingidanga rani dedede na pa mbeda ga Yekova uru ti regbo agi adunguratise re tee? Agu adunguratise nga ga aKristano ani naamangaha na aposo dunduko nafuka amamu fu rani ani ‘nyakasi akuarani kuti nyemuse na kuti manga weneapai.’ Ngbatunga gu ngarasa akurase re nafu undo fu rani ani nye kaa ngera angera rogo toroyo. Si airiwonga tirani te, si du i azinahe ti ni fu rani ani naadungura tirani dedede ‘wa bi ani he nga gu uru re si nambeda.’—AEbere 10:24, 25.
13. Wai gu sunge tungusapai nga ga aKristano aundo rani ani nye kaa ngera angera rogo toroyo?
13 Ho ani amanga gu ga aKristano sunge ni nga sunge tungusapai na ngbaduraniyo dunduko, si naundo rani a ani naangera angera rogo toroyo. Gini kura gene duho ngbaa gbe tipa ka banda agu apai kuri rani yo nayugopa agi aregbo re na gupai si ayugoho susi gu nga ka fura tipaha fu kura aboro? Ho ani abi agu aboro ni ani awisigo Ziazia Kekeapai na yo i kini sono kumbatayo rogo gayo wisigopai na kini tona manga agu apai i awirikaha, si nangarasa rani ani ipisi gaani sunge tungusapai. Gu mokedi nangia Petero ayaa: “Oni mbakadi gaoni aberã . . . ki du na rugatise, ki nimoi bangironi nyanyaki.” (1 Petero 1:13) ‘Padu ani nyanyakii zanga wo, kini mángi ga Gbia sunge zaaza dedede,’ nga wene gene ka do gu nyomoro nga ga toro kusayo tirani.—1 AKorindo 15:58.
Oni Ne agu Asino Raka Rengbe ka Gbarasapa Roni Rogo Toroyo
14. A wa ringbisi yo paha rogo Ruka 21:34-36, gini sino raka Yesu aza apefuo ko ti orafuoho?
14 Rogo ga Yesu iiriwo sangbanebi tipa gupai nika yugo padu ko ho na ome kindo beko, ko afu kura rugute ki yaa: “Oni bánda tironi, oni ka hisa kpotoroni yo na bakere riahe, na kpibuda, na berã pa gi unga re, gu rago ki da re ni ba sa wa kina gbina naza; bambiko wo si ka da fu agu aboro dunduko naraka auru kpotosende dunduko. Oni ngére dedede, ki nikpari, ya oni di be pai ka bata be agi apai nikamanga dunduko re, ki ru barangba Wiri boro [na diabese].” (Ruka 21:34-36) Yesu aringbisipa gu sino raka zukazuka badungu aboro naaora dedede fuoho: nga bakere ririahe, kpibuda, na gu sino raka naye na bakabangirise fu boro.
15. Tipagine si aida ani ne angbu tipa riahe gbiati kakaka mbira buda ti ni?
15 Bakere ririahe gbiati kakaka mbira buda na ngbanya dagbaha na agu arugute nga ga Ziazia Kekeapai adunga ngburungburu ya te, sidu, si kini idi aboro nehe. Ziazia Kekeapai nayaa: “Ka mo dú nga dagba [kakaka, NW] abambiri imekakue yo ya, watadu dagba airaangbu abari pasio a ya.” (Asanza 23:20) Anga boro nada mbata ni iraangbu watadu nikakaka bambiri buda si kini mo ka gbarasa pani rogo toroyo te. Si rengbe ka sa boro ni naayukuro na kini nyomoro rogo toroyo mbata fu si da na ni ni iraangbu. Gu sanza nga ga Ziazia Kekeapai nayaa: “Mbisimo iranyomoro nakpi nyemu ahe, ka ni abi nga ha wo ya.” (Asanza 13:4) Ngbatunga gu boro re rengbe kadu na nyemu ka manga gupai Mbori akpinyemuhe, ono gupai ni akpinyemuhe amanganga te mbiko gani nyomoro.
16. Wai rengbe ani ka ne gu fuda naye sa rani be bakabangirise tipa gaani aborokporo?
16 Gine nga agu abakabangirise nga ga raka Yesu azahe tipaha? Si nakoda gu ga boro apai ni abakabangirini tipaha nisani, ye boro na ahe fu gani aborokporo, na agu apai du wa ngbatunga gure. Nairiwo gu pamungo kangiaha ka ani mbu agi apai re si nifudi gaani aberã! Yesu asana agu aboro naadegatuyo kutiko ki yaa: “Da dagba roni ka moi bagiza be sa ku ri gani sona ti wisiga pa ha?” Ko angarasi yo ki yaa: “Ka oni wísigi nga pai ki ya, ‘Gine ani ka ri he?’ na, ‘Gine ani ka mbira ha?’ na, ‘Gini roko ani ka ukadi tirani na ni?’ ya? Bambiko aGendiria nagbata agi ahe re dunduko; bambiko Baroni du ngbangbaturũ yo ini he ya oni nara mbiko agi ahe re dũ.” Pa peresa ani agu apai nga ga Kindo mbata rogo gaani raka na kidu na kido ya Yekova angera angera fuo rani, si nika sa rani ani mbu bakabangirise, si ki ta du were, si kini undo rani ani naangera angera rogo toroyo.—Matayo 6:25-34.
17. Wai rengbe pa ora boro fuo aũzegino ka ye na bakabangirise funi?
17 Boro rengbe arengba ka ye na bakabangirise kuti ni nisani be otokafuo aũzegino. Nikpiapai, bete aboro namanga gayo raka si du nikpakarakpakaraha niraka yo gu raka kii genoho kisusi omeyo. I azomia kura aboro kurogo gu mbakadaapai du tipa gbia bakere mosoro niipo vuru guru regbo yo gbiati gu kura asunge-gbia-marã rengbe ka gburuwa taata. Tipa kura aboro, orafuo gu wirikapai nga ga sukuru tipa ka ruho ka gbia wene sunge-marã, nga kura gbina. Nirengo, si daada boro wirikipai sukuru yo ki da kuho rengbehe ni tipa ka gbia sunge. Ono tie, gupai namanga nga, wa aboro aorafuo bakere wirikapai nga gu nadia bakere regbo, beteyo abi gupai nga, i aima imisatiyo rogo toroyo. Nagbere agu apai du ani rogoho re wa ga Yekova uru ambeda! Ziazia Kekeapai nazahe niyaa: “Agu [aboro] nakpi nyemu ka kumuko i atiwa ku rogo asada na gbina na dungu mumungo gbegberẽ nyemuahe nga gu narindasi aboro ku rogo gbarasa yo yo na kpio.”—1 Timoteo 6:9.
18. Tipa ani rengbe ka ne gu sino raka nga ga orafuo aũzegino, gini birĩ si aida ani sonosihe?
18 Gupai rengbe ka undo boro ka ni merenga gene aũzegino yo ya nga ka sonosa gu tandu nga ga ino gu kparakparapai du dagba rurupai na irairapai ho ni amanga adiaberã ni. Ani nasonosa gi tandu re ni ri ani “nyanyaki riahe [nga gu du] tipa sosono aboro,” na ‘niraba ani gaani aome nga ga makiapai nimanga ani sunge nani.’ (AEbere 5:13, 14, NW) Pa ruga ani tirani “na pa agu apai duna nyanyakipaha gbe” ho ani aperesa agu apai ni si aida ani moihe mbata, naundo rani a ani he manga agu adiaberã arunga ya.—AFiripoio 1:10, NW.
19. Ka ani bi gupai nga, ani na kina wiri tooni regbo gbua berani tipa agu apai nga ga toro, ginipai si aida ani mangihe?
19 Gu sino raka nga ga orafuo aũzegino rengbe ka vurasi bangirani, ki mbu rani na kina wiri tooni regbo gbua watadu zanga mbu regbo kandara tooni tipa agu apai nga ga toro. Wai rengbe ani ka wisigo tirani na ki ne gu ngbatunga sino raka re? Si naida ani kparikpee tipa ka ino wai rengbe ani ka sa gaani raka si du taata. Soromo, nangia Bakindo agu aYisaraere nadu mbata ayaa: “Gu rame nga ga gu boro namangasunge, si nidodoromaha, ka gu riahe ni arihe vura du nitooni riahe watadu nibakerehe vurũ, ono gu dungu ahe du be irakumuko, si ambunga ni ni ra te.” (Batungusipai 5:12, NW) Ya mo rengo du ngaha nga, pa ngera boro fuo gu dungu ahe du beni nadia bakere regbo beni gbiati omeni? Padu ani na dungu ahe berani nafu bakere sunge fu rani wa ani angera fuoho, wa ani atumo marã tipaha fu gu basunge nga ga igo marã ka ngera fuoho, na ka bandaha. Ka ani bagi gu kura gaani ahe kusayo, si undonga rani ka sa gaani raka si du taata tee?
Nindikidi Parengo, Si Naida Ani Mbakaditirani
20, 21. (a) Gini kidohe gu mokedi nangia Petero afuhe fu rani tipa ga Yekova uru? (b) Gini apai si aida ani nye kuti mangaha kindi wa ani ayugo gupai nga, ani ima mbakadatirani tipa ga Yekova uru?
20 Regbo andu ki da nyasi kusayo be aboro gu zegino nadu ti rago Noa, na si anyasa anyasa a be agu aboro du rogo gi zegino du areme re. Fugo gu mokedi nangia Petero nakido rani niyaa: “Gu uru nga ga Gbia si ayé wa batuka. Rogo ho angbangbaturũ asusa ku sa yo na bakere woro ho, agu ahe du ngbangbaturũ yo si azaraga be bakere faarago, kpotosende ki gbi, na gu mangimangi ahe du rogo[ho].” Gu ngbangbaturũ narukuba gbegbere azogarago, gbiati gu kpotosende narukuba agu aboro nyaga tiyo kusayo ti Mbori, abatanga be gu faarago nga ga ga Mbori zinga nagbiagbi te. Nifura Petero ka yugo wai rengbe ani ka yugo gupai nga, ani ima mbakadatirani tipa gu uru re, ko apoi kuari ki yaa: “Wa du agi ahe re nikadu ni gbandakagbandaka ha oni ka du ni gini ngbatunga aboro tipa manga ziazia apai na sinombori [“Oni nika du nigini ngbatunga aboro nibipa gu sino nga ga ziazia mangaapai na ki kakuti manga sinombori,” NW]?”—2 Petero 3:10-12.
21 Padu ani pati agu adunguratise nga ga aKristano dedede na kini tungusi wene pangbangaa, si ni agu apai du dagba gi mangaapai re gbiati gu mangaapai nga ga kakuti sinombori. Ani manginga agi asunge re na ngbaduraniyo dunduko na ki kakuti sinombori wa ani apido ga Yekova bakerepa uru na zerangbaduse. Ani ‘fu tirani nyanyakii sa gipai re ya Mbori bi rani zanga wiri biriko he tirani barabangiriko na zanga sirõ a.’—2 Petero 3:14.
• Tipagine si aida ani mbakaditirani ti ni tipa ga Yekova uru?
• Ka si du nga agu apai aboro aorafuoho rogo raka da ni gupai ani abakabangirani tipaha, ginipai si aida ani mangihe?
• Gine nika undo rani ani sovura kuti yukuro rogo toroyo?
• Gini sino raka nagbarasapa boro si aida ani nehe, na wai rengbe ani ka nehe?
[Asanahe nga ga wisigopai]
[Gu kpiahe du ti kpewaraga 17]
Agu aboro nadu ti rago Noa aruganga tiyo na pa gu sarangbangaa naaye sa yo te, oni rugutironi na pa gu naye sa roni?