Si Naida Ani Naangera Awere Kakaka Susi Gu Nidu Mbata
‘Oni naangera angera kindi tie, bambiko oni ainonga nigu uru gaoni Gbia ka ye te.’—Matayo 24:42.
1, 2. Gine nayugo gupai nga, ani naraka rogo digido gi zegino re?
GU BAKEKE abuku du rimoko nga Bill Emmott nayaa: “Gu banguapai mangi rogo gu ue bawe kama agarã susi, si nga vura nga gu aria sino mangaapai.” Wa ko avura ida kuti gupai nga, vura gbiati zuũ niima du dagba aboro wa i naaraka, ko agbia gupai kuti ni nga: “Gu ue bawe kama agarã adu a wa kina gu kura agarã nibipa so avura, ono si adu tigaha kia nibipa kio ome agu avura so yo ho rogoho. Si nangia gu bambata kama agarã i asovura rogoho rogo zegino dunduko. . . . Na anga kina vura sa nga ga zegino gbua i asoho te, ono i asoho ue.”
2 Yesu Kristo afura tipa gu vura nika du dagba ‘rikaaboro na gu kura rikaaboro, ngbii kuti gu ngbii.’ Ono tie, si gbua nga pai sa dagba gu yuguyuguapai ‘nayugo padu Kristo ho na ome kindo beko na pa digido gi zegino re.’ Rogo gi gako nyanyakipa sangbanebi re, Yesu afura a tipa angbongi, riri akaza, na abazigizo. (Matayo 24:3, 7, 8; Ruka 21:6, 7, 10, 11) Rogo dungu agene, ngbatunga agu agberangbii re ima kio na ki ima egera kisusi gu nanamanga mbata. Gu gbegbereapai aboro amangaha ima kio, a wa ani abihe rogo gayo sino mangaapai koyo du Mbori ni na tipa akurayo aboro. Pa gburuwa ruru mangaapai na gu kuondiko moipai gbiati zuũ nga ago gipai re. Aboro satiyo nikina akpinyemu marã kuba kpinyemu Mbori, ki dingiso tiyo na kina pa gbia ngbarago. Agi apai dunduko re nayugo gupai nga, ani naraka rogo ‘gbegbere aregbo.’—2 Timoteo 3:1-5.
3. Ginipai si aida “agu apai i aina pai ti ni tipa arago” mangi rani nani?
3 Wai oni abi gu sino apai nagbera dagba aboro? Dungu aboro amaanga bangiriyo fuo gu gbegbere mangimangiapai aboro amangaha areme te, si da a bangiriyo gbua tautau. Agu abarumbatayo nga ga zegino yo gbiati wene abawirikipai aruganga tiyo na pa “agu apai i aina pai ti ni tipa arago [te]”; na agu abarumbatayo nga ga pambori yo afunga wene arugute fu aboro tipa gipai re a te. (Matayo 16:1-3) Ono Yesu arugu apefuo ko ki yaa: “Oni ngére tie, bambiko oni aina nga ni gu uru gaoni Gbia ka ye te.” (Matayo 24:42) Anga Yesu nangarasa rani herẽ tipa ani ngere kina ngera gbua te, ono ko nangarasa rani ani ‘nye kuti ngera kindi.’ Tipa ani nye kaa ngera angera kindi, si naida ka bangirani ya gonga wagu tooni ya, ono ani ta sungo kini ngere angera. Na si naida ani mangi kura apai kupati ino ani gupai nga, ani naraka rogo yangara arame, na ka manga gupai susi kina ino gupai gbua nga agi aregbo ani araka rogoho re nikpakarakpakaraha. Si naida ani du na nyanyaki ida zanga kapa nga, “digida apai dunduko nambeda.” (1 Petero 4:7) Kina fuo du ani na gu ida nga, digido zegino ima mbeda, si ka sa rani ani naangera awere susi gu nidu mbata. Sidu, si naida ani berẽkurii gu sanahe nga: ‘Gine rengbe ka undo rani ani nyakasi gu gaani ida du ani nani nga digido gi zegino re ima mbeda?’
4, 5. (a) Gine nika nyakasa gu ida du ani nani nga digido gi zegino re ima mbeda ka da, na tipagine mbedihe ka digo ti ni? (b) Ginipai sa duho ti gi regbo du Wiri boro na ome kindo beko re nga gupai nawiratihe na gu nadu ti rago Noa?
4 Oni kparianga pa agu apai namoipai rogo ga aboro raka ti rago Noa bakuru kusayo mbata fu gu kparakparapai namangi, nangia Ngirimo Akangbii. Sino aboro agbere ki da ti gupai nga, “rago gbere ti Yekova.” Ko ayaa: “Mi aba tungayo auru kpotosende, nga agu aboro mi afu yo.” (Bambata Pai 6:6, 7, oni ringbisingaha na NW.) Kina boro gupai re nzunzu ko amangihe. Niringbisa Yesu gupai namangi ti gu regbo re na gu namanga awere, ko yaa: “[A] wa si adu rago Noa, wo pa ye Wiri boro nikadu.”—Matayo 24:37.
5 Daha ada ani moi gu berã kuri rani yo nga, Yekova naberã aberã tipa gu zegino du awere wa kinagu ko aberẽ tipa gu zegino nadu mbata fu Ime Akangbii. Wa duhe nga ko aima digiso gu zegino nazanga sinombori nadu ti rago Noa re, ko agburuwa gu gbegbere zegino agburuwa berewe du awere re nirengo. Si naida gupai nga, gu ziazia giarogopai du ani nani tipa gu wiratise du dagba agu apai namanga areme na gu nadu ti gu regbo kusayo re nyakasi gu ida du ani nani nga, digido gi zegino re ima mbeda. Gini apai tie nga gu nawiratihe re? Si ho kandara bisue. Bambataha nga, i nafu zahe fu aboro rogo zukazuka gene na rogo ziazia afugo tipa gu gbarasa zegino nika manga.
Zahe Adu Tipa “agu Apai . . . [I A]bi Nga Ya”
6. Gini zahe nawira Yekova aima za aboro nani mbata ti rago Noa?
6 Ti rago Noa, Yekova ayaa: “Torore aso nga vura na aboro kindi te, bambiko kina borose nga yo a, ono garãyo nikadu nga 120.” (Bambata Pai 6:3) Pa rũ Mbori gi ndiko re rogo 2490 Mbata fu Gaani Regbo ayugupa tonatona digido gu gbegbere zegino re. Oni berẽnga tipa nyakapa gu ndiko Mbori arũhe re fu agu aboro naaraka ti gu regbo re! Agarã anye koyo gbua 120 Yekova ki ye na “ime akangbi ku auru kpotosende, ka ba tunga unga ahe dunduko nga gu du na onga unga rogo ho yo, tii ngbangbaturũ yo; agu ahe du auru kpotosende dunduko si akpika akpika.”—Bambata Pai 6:17.
7. (a) Gine nangia ga Noa mangaapai kuti gu zahe Mbori aza aboro nani tipa Ime Akangbii? (b) Wai si aida ani karagapai kuti gu zahe i aza rani nani tipa digido gi zegino re?
7 Mbata fu dungu agarã, i aima gumbapa gu gberangbii fu Noa si adu nga si nika manga na ko ki mangisunge na gu regbo re nitatamana ka mbakada tiko tipa ka bata. Gu mokedi nangia Pauro ayaa: “Ho Mbori ayugu pa agu apai ni fu [Noa] i ata bi nga ya, ko . . . [a]gunde ti Mbori, ki mbakadi kurungba ki batasi kpuko.” (AEbere 11:7) Ginipai tigaha tipa rani? Agarã wa 90 ima susa awere tona rogo gu garã nangia 1914 nga gu regbo digido gi zegino re atona. Ani nirengo rogo ‘digido regbo.’ (Daniere 12:4) Wai si aida ani karagapai sa agu azahe za yo rani nani re? Ziazia Kekeapai nayaa: “Gu . . . [boro] ka amanga gu pai Mbori akpi nyemu he ni [a]nye anye kindi.” (1 Yoane 2:17) Awere tie nga gu regbo du tipa manga ani gupai niipiipihe Yekova akpinyemuhe.
8, 9. Gini azahe Mbori afuhe ti gi gaani regbo re, na wai gako amoyambu atakapandehe?
8 Mbiko gu kekeapai ga Mbori toro adu kugiipa kehe, kakaka awisigi Ziazia Kekeapai ti gi gaani regbo re ini gupai nga, Mbori aima sarangbangaa gi zegino re tipa ka gbarasaha. Ani idi kuti gipai re? Oni kparia gupai Yesu Kristo agumbaha ziazia ki yaa: “Bakere gberãngbi nikadu, wa zegino aenge da awere si adu nga wo te, oó, si adú nga wo berewe a te.” (Matayo 24:21) Yesu aya berewe wee ko nika ye nigu basapungbangaa Mbori nasia ko na ki tona ka kparaka aboro ti akurayo wa gu babanda avusende naakpara avusende ti ameme. Agu aboro ko ka bi yo nga i arẽnga tipa ka raka te, i ‘aguari kusayo rogo zegino, ono ruru yo ki gbia nyenye unga.’—Matayo 25:31-33, 46, NW.
9 Yekova ima gbeberã gako aboro kuti gi zahe re nitingida ko yo nani ti wene regbo rogo gu riahe nga ga toro ‘ruru kangara moyambu’ afuhe fuyo. (Matayo 24:45-47) Kurii gure, i nazinahe fu arikaaboro dunduko, na angbatunga aboro, na afugo yo nibasasa, na aboro, i “gúnde ti Mbori, ki taasi rimoko; bambiko rago gako sapangbanga [ima] da.” (Yugoti 14:6, 7) Gu memepai du rogo gu pangbangaa nga ga Kindo aDezire Yekova atungusaha rogo zegino dunduko nga gu zahe nga, bambeda kumbatayo, ga Mbori Kindo nika dia agu azogarago nga ga aboro kusayo. (Daniere 2:44) Si aidanga ani bipa gi zahe re taata te. Gu Mbori duna Tanduapai dũ naabanda gako akidohe abanda ti aregbo dunduko. (Yesaya 55:10, 11) Ko aima manga gu gako akidohe ko agumbaha ti rago Noa, na gu ko agumbapaha ti gi gaani regbo re, ko amangaha amanga a wo.—2 Petero 3:3-7.
Wasiwasi Kodaba Ima Maapai
10. Ginipai rengbe ani ka gumbaha tipa gu wasiwasi kodaba nadu ti rago Noa?
10 Gi gaani regbo re nawira rago Noa rogo kurapai ni uehe. Yekova azinahe fu bambata kumba na dee i “hisi kpotosende” na awiriyo, kini mangisunge na gu tandu nga ga kodaba ngba iriiri gene nga gu Mbori a’asia paha fuyo tipa kina agu aboro rogotiyo naamangaha. (Bambata Pai 1:28) Ti rago Noa, agu amaraika nabasasangba Mbori abirikosi ngbatunga aboro na gu sino kodaba Mbori a’asianga pai tipaha ya. Agi amaraika re aguari kusayo ngbangbaturũ yo ki zoro ku auru kpotosende, ki di kpoto aboro kutiyo, na ki kodiba na wene adee, kini batika kpurakpura agude nga aguyo nadukia ti aboro na gayo raka kidu bangbanda ga aboro na ga adaimona, na kingia diangbadiangba aboro. (Bambata Pai 6:2, 4) I naringbisapa gu ingapai nangia ga agi amaraika re kuti gu gbegbere sangisangi mangaapai nangia ga aboro Sodomo na Amora. (Yuda 6, 7) Fuo du apai were, si asa wasiwasi kodaba si moipai rogo agu a’uru re auru kpotosende.
11. Gini sino mangaapai nasa gi gaani regbo re si du wa ga Noa?
11 Ginipai tigaha tipa gu sino mangaapai du areme? Rogo gi yangara areme re, dungu aboro naraka na kina pa kodaba bangiriyo. Pauro aringbisipa ngbatunga agu aboro re ya ‘fuo i bitikpa kusayo ti ino ruru sino mangaapai’; dunguyo nambutiyo “fu wasiro ka manga [ngbatunga] birikobiriko apai dunduko ni gbangbati.” (AEfeso 4:19) Yugokpia kundiri aboro, kodaba mbata fu rogatise, kodaba na agude, kodaba dagba kumba na kurani, ni agu apai rengbe na arago dunduko areme. Gu kura aboro ima gbia ‘gu mosoro rengbe na gayo ingaapai,’ wa agu akaza aboro adiaha be kodaba, gburuwa ramukporo, na gu kura kereapai.—ARomo 1:26, 27.
12. Tipagine si aida ani sogo gbegbereapai ti ni?
12 Ti rago Noa, Yekova asa bakere Ime Akangbii si imi agu aboro narätä fuo pa kodaba. Si aidanga bangirani go ti gu rengo nga, gi regbo ani araka awere rogoho re si nirengo wa kina gu regbo nadu ti rago Noa te. Gu “bakere gberãngbi” du kumbatayo naye, si nika giriso kpotosende be “airameteka, na airisikpiahe, na airabari, na azapu tiyo na akumba.” (Matayo 24:21; 1 AKorindo 6:9, 10; Yugoti 21:8) Nairiwo wai si aida ani sogo gbegbereapai niipo na ki ne mbeda na gupai rengbe ka ndu na ani sa manga wasiwasi kodaba!—Atambuahe 97:10; 1 AKorindo 6:18.
“Kpotosende . . . [A]hi be Bakere Zuu”
13. Tipagine ‘kpotosende ahi ti ni be zuũ’ ti rago Noa?
13 Ziazia Kekeapai nafura berewe tipa gu kura biatapai nadu ti rago Noa, niyaa: “Kpotosende ki gbere agbera bangiri Mbori, kpotosende ki hi be bakere zuu.” (Bambata Pai 6:11) Nirengo, zuũ angianga vovopai te. Mbiko mbata fu gu regbo re, gu wiri Adamu nangia Kaina aima imo wirinako nangia ruru kumba. (Bambata Pai 4:8) Nifura Remeke tipa gu zuũ nadu ti ragoko, ko agumba wene afugo rekangose ya ko aimi gu paranga kumba nazuboko na kpata tipa ka banda tiko beko. (Bambata Pai 4:23, 24) Gupai nadu nivovoho rago Noa angia bakio gu zuũ aboro aamangaha. Fuo agu awiri Mbori nangia agu amaraika nangia abasasangbaa rogodi adee auru kpotosende ni adiayo na ki batika kpurakpura agude nangia diangbadiangba aboro, zuũ amoipai be agi aboro re susi gu nadu mbata. Gu Ziazia Kekeapai nga (NW), si nafura tipa gu fugo i anayamba gi ngburunga akumba re nani ya rogoyo angia “aBafu aboro,” watadu “agu aboro nabafa akurayo kusande.” (Bambata Pai 6:4) Nisangbana gi mangaapai re, ‘kpotosende ahi be zuũ.’ (Bambata Pai 6:13) Oni moinga kpia gupai ku berã roni yo Noa avura gbia tiko nani wa ko aasonosa awiriko dagba ngbatunga gu mangimangiapai re! Wa apai avura du wa gere pati Noa, ko ayugu gupai nga, ko angia ‘ruru boro barabangiri Yekova dagba gu rika ngbatunga aboro re.’—Bambata Pai 7:1.
14. Wai gu zegino du areme ‘nahi be zuũ’?
14 Aboro aima digo nimangi zuũ ti regbo gayo raka naabaha dunduko. Ono a wa si adu ti rago Noa, kinawo si amanga ti gi gaani regbo re na gu bakioho naamanganga mbata ya. Dedede, ani naagia pa taka aboro akpata kporo, pa gu vura nga ga abamoi, gu tua aboro aguari sani tipa ka runosi tunga akurayo, imo dungu aboro na bundu zanga nzunzu nduhe. Na kurii agi apai re dunduko, ani naagia pa agu avura badungu aboro akpi tingbaha. Kpotosende ima hi berewe be zuũ. Tipagine mangihe ti ni wo? Gine nasa gupai nga vura moipai? Gu karagapai du tipa agu asanahe re, nayugopa gu kurapai nawiratihe na gupai nadu ti rago Noa.
15. (a) Gine nasa gupai nga zuũ moipai rogo gi yangara arame re? (b) Gini sangbanaha rengbe ani kadu na kido tipaha?
15 Ho i asigira gu ga Mbori Kindo nga ga Masiya ni ngbangbaturũ yo rogo 1914, gu Bakindo nga Yesu Kristo i asungusi ko rii mbatabakindo, aguari ka manga nyanyakipa pai. Ko aba Satana Bakitingbanga gbiati gako adaimona kusayo ngbangbaturũ yo i ki tiwi ku auru kpotosende no. (Yugoti 12:9-12) Mbata fu Ime Akangbii, agu amaraika nabasasangba Mbori, ataino aino kini mbu gayo aba nisayo ngbangbaturũ yo ka zora kusende no; ono tie, ti gi gaani regbo re, i ado yo ado yo ngbaome. Kurii gure, i na tandu berewe beyo tipa ka dia kpoto aboro kutiyo tipa ka zeresa gu nyemu apai nga ga borose du tiyo arunga fuyo re ya te. Sidu, fuo du apai wa gere fuyo, i na bakere gberarago tiyo, kidu na imisiringbaduse, gbiati gunde gu sarangbangaa naye sa yo, si kini sa yo i naamaapai kurii aboro na kurii ariigbu i naakuondiko na kini mangi zuũ nibakerehe susi gu nadu ti rago Noa. Yekova agburuwa gu zegino nadu mbata fu Ime Akangbii si ki go kusayo tingbafuo hiso gbegbere sino amaraika ha na gbegbere mangimangiapai, nga agu amaraika nangia abasasangbaa gbiati awiriyo. Ka oni kpanga ti giarogo gipai re ya, kina gu bangisapai Mbori amangihe ti rago Noa re, kinaha ko ka mangaha ti gi gaani regbo re a! (Atambuahe 37:10) Ono tie, agu aboro nasungo areme kini ngere angera, i ima ino gupai nga, pa batasa yo ima mbeda.
I Atungusi Pangbangaa Gbarasa gu Zegino Re
16, 17. Gine nga gu biamapai nadu ti rago Noa nawira gu du areme ti gi gaani regbo re?
16 Gu biamapai namangi mbata fu Ime Akangbii na nawira gu namanga areme, si nga gu sunge i afuhe fu Noa ko mangihe. Noa ambakadi bakere kurungba nadu wa sanduki. Ko angia “batungusi rurupai” a. (2 Petero 2:5) Gini pangbangaa ko anatungusaha? Si nawiraha nga, gupai Noa anatungusaha akodi zinahe fu aboro i sa gayo aberã na kini za yo na pa gu gbarasa zegino Mbori apepaha ya si nika manga. Yesu ayawee agu aboro nadu ti rago Noa “aina nga . . . [gupai nga Mbori nika gbarasa zegino te] daho ngirimo akangbi aye ni ki nirogo yo dunduko ku sa yo.”—Matayo 24:38, 39.
17 Teketeke wa kina gure a, wa aDezire Yekova amanga gayo sunge tungusapai zanga nyomoro, i natakapande Kindo rogo gu pangbangaa i atungusaha rogo zegino dunduko. Si mbembedii wa aboro rogo apapara kpotosende dunduko rengbe arengba ka gia gu pangbangaa nga ga Kindo watadu ka gedaha rogo afugo yo. Gu magazini nga Ngbaõbambu Sinziri, natakapande ga Yekova Kindo, bange kusikusihe rogo adiwi nibasasa nga 25,000,000, na i nakusaha rogo afugo susi 140. Nirengo, gu wene pangbangaa nga ga ga Mbori Kindo, i natungusaha “rogo agu arago dunduko aboro araka rogoho auru kpotosende nidezirepai fu arikaaboro dunduko.” Ho gu sunge re nika nyasa ni kuho Mbori aidaha kuho ni, digido zegino ayeaye nirengo.—Matayo 24:14, NW.
18. Wai du gu karagapai nga ga dungu aboro kuti gu pangbangaa ani atungusaha wa kina gu nadu ti rago Noa?
18 Wa ani abi gu zingo nyemu agu apai nga ga toro gbiati zingo manga ruruapai nadu ti agu aboro nadu mbata fu Ime Akangbii, anga si nikpakarakpakarapai fu rani ka bi wai Noa na gako aborokporo angia ngua-mongo fuyo na i kini senge yo na kini sawia yo te. Ono tie, wa si avura du wo, digido gu zegino re aima ye. Teketeke wa kina gure a, “airasawia” ima nge rogo gi yangara areme re. Ono, wa vura duhe wo, Ziazia Kekeapai nayawee ‘ga Yekova uru ayeaye wa batuka.’ (2 Petero 3:3, 4, 10) Si ayeaye nirengo ti ga Mbori ringbisiringbisi regbo. Si akeesanga te. (Abakuka 2:3) Nga gu patatamana ngaha fu rani tipa ani sungu kini ngere angera!
Kina Bete Aboro Nabati
19, 20. Gini wiratise duho rengbe ani ka bihe dagba gu gbarasa zegino namangi be Ime Akangbii na gu gbarasa zegino nika manga ti gi gaani regbo re?
19 Agu apai namangi ti rago Noa nga gu nawiratihe na gu du areme adigonga kina kuti gu gbegbereapai nga ga aboro na pa gbarasa yo te. A wa aboro abati be Ime Akangbii, kinawo a duhe tipa gi regbo re, aboro kinaho nika bata ti digido gi zegino re. Agu aboro nabati be Ime Akangbii angia bayee aboro nga agu aboro naarakanga wa gu kura aboro aaraka ya. I airisi ga Mbori arugute na ki kparatiyo kusayo ti gu gbegbere sino aboro nadu rogo gu zegino re. Ziazia Kekeapai nayaa: “Noa abi undahe be Yekova. . . . Noa adu ni ruru boro, ki du ziazia dagba arika ngbatungako.” (Bambata Pai 6:8, 9) Dagba ngbatunga aboro dunduko, aboro bangisa kporo nangia “bete aboro . . . [gbua muambe, nabati be] ime.” (1 Petero 3:20) Fuo gure, Yekova azinahe fuyo ki yaa: “Oni zuga ki ninge ange, ki hiisi kpotosende.”—Bambata Pai 9:1.
20 Fugo Mbori nanyakasa gupai fu rani nirengo nga, “bakere rimbasa aboro” nika ‘kura akura rogo bakere gberangbii.’ (Yugoti 7:9, 14) Gine nikangia bange gu bakere rimbasa aboro re? Yesu nitiko ayaa: “Gu ngbadimo na gu gene nangbe koyo du unga ni, si du ni pangipangi he, ni fitikiri he, [bange agu] aboro . . . [nandu ngbaha] ni kina umba yo.” (Matayo 7:13, 14) Ringbisihe kuti agu abirioni aboro naraka areme auru kpotosende, bange agu aboro nika bata adu gbua tooni. Ono si nawira i aduadu na mamu beyo teketeke wa gu nadu be agu aboro nabati be Ime Akangbii. I avura idaha fu agu aboro nika bata re i batika agude tipa bete regbo i du nipapara gu riko nga ga agu aboro nika du rogo vovo zegino.—Yesaya 65:23.
‘Oni Naangera Angera Kindi’
21, 22. (a) Wai gi wisigopai tipa gu Ime Akangbii namangi ti rago Noa re naundo roni? (b) Gine nga gu veresi nga ga gu garã nga 2004, na tipagine si aida ti ni ani irisi agu arugute si afuhe?
21 Wa vura duhe nga, bakuru kusayo gbe nangia gu regbo Ime Akangbii agbarasirago, paha nafu agu arugute fu rani si aidanga ani basapaha ya. (ARomo 15:4) Si naida gu wiratise nadu dagba agu apai namangi ti rago Noa na gu namanga areme sa rani ani rugutirani na pa nyakapa agu apai namanga re na ki sa rani ani moibangirani tipa gu regbo Yesu ka ye wa iradii ka sapangbangaa kuti gbegbere aboro.
22 Areme, Yesu Kristo narugapa bakere sunge nga ga toro apefuo ko amangaha. Paradiso nga ga toro gu duho du wa gu kurungba nangia ga Noa tipa ka banda ndikidi airisimbori rogoho. (2 AKorindo 12:3, 4) Tipa i rengbe ka banda rani ti regbo gu bakere gberangbii naye, si naida ani nye kina rogo gu paradiso re. Gu zegino nga ga Satana ke kirikiri pati gu paradiso nga ga toro, ima mbakada tihe ka gbe gu boro kurogoho nayukuro rogo toroyo. Si ninyanyakipa pai ani ‘naangera angera kindi’ na ki mbakadi tirani tipa ga Yekova uru.—Matayo 24:42, 44.
• Gini rugute Yesu afuhe nibipa ye ko?
• Gini ngbatunga regbo Yesu aringbisi padu ko na ome kindo beko kuti ni?
• Rogo gini agene gaani a’uru awira agu a’uru nadu ti rago Noa?
• Wai si aida pa wisigo ani agu awiratise du dagba agu apai nadu ti rago Noa na gu namanga ti gi gaani regbo re sa rani ani bipa manga gaani sunge niipiipihe?
[Asanahe nga ga wisigopai]
[Gu tingidapai du ti kpewaraga 14]
Gu veresi nga ga gu garã nga 2004, nikangia: ‘Oni naangera angera kindi na ki mbakadi tironi.’ —Matayo 24:42, 44.