Oni Undo Aboro I Degetuyo fu Mbori
1. Gini aburosua i akusihe ti regbo gu bakere dunguratise riihe angia “Ga Mbori Ngbi Ye!” na gine nasaha si du niwene aũsunge?
1 Ti regbo gu bakere dunguratise nga ga aˈuru biata riihe adu nga “Ga Mbori Ngbi Ye!” i akusi vovo aburosua ue nga, Oni Degeturoni fu Mbori Tipa ka Raka Nyeanye Kindi na gu aakpuraha nga Oni Degeturoni fu Mbori. Wa duhe nga si na gaha kekeapai nitoonihe, i ima rengba ka saha niipo kurogo kura afugo. Ho i akusi gu burosua ni nga Oni Degeturoni fu Mbori Tipa ka Raka Nyeanye Kindi rogo pa-Ngirisi, i aima ida paha ho i saha kurogo afugo 431.
2. Ada nzunzu rengbe ka gbia undo be agi aburosua re?
2 Ada nzunzu rengbe ka gbia undo be agi aburosua re? Oni bingo agi apai ninaamanga dedede rogo zegino dunduko re:
• Batungusipai nasakapai na irakporo, singia ti gu bambata regbo ní nandu fuoni watadu ue regbo du, ono gu batungusipai re ki bi gupai nga gu boro re agedanga pai te watadu ní ainongo gedapai wenengai te.
• Batungusipai natungusapai fu agu aboro nape gu fugo ani nasa gaani awaraga kurogoho gbua tooni watadu ani atasanga waraga kurogoho ya. Watadu dungu agu aboro du rogo gani dagbarago ainongo ka gedapai rogo gu fugo i apehe wenengai te.
• Batungusipai namangasunge na fugo nibee ka tungusapai fu agu airangbiängä du rogo gani dagbarago.
• Boro naida ka yugo rengo fu gu tooni wirini atainongo gedapai ya.
3. Wai i ambakadi gu burosua nga Oni Degeturoni fu Mbori?
3 Wai I Ambakadihe: Gu burosua nga Oni Degeturoni fu Mbori si na kina wiri bete kekeapai rogoho gbua, na i akehe na taata afugo na guruguru agenefugo gbiati averesi bandu waraga yo nga gu nanyakasa memeapai. Tipagine i akehe wo ti ni? Ka boro fu burosua foro nga gu i akehe rogo gu fugo mo agedanga ha ya, watadu na gu bangiri kekeapai mo ainongo ya, ya mo nyemuhe du tiro? Dungu aboro ka nyemuhe adunga tiyo ya, ka si vura du na bawene asura rogoho vurũ. Wakina gure a, agu aboro arengbanga ka gedapai ya i nagunde agunde ho i abi gu waraga ni duna kekeapai rogoho. Sidu tie, akpewaraga dunduko nga ga gu burosua re duna wene asura rogoho, aguanza ki duho nga gu nayugo ginigu si aida i sakihe tifuo gu.
4. Wai i ambakadi gu burosua nga Oni Degeturoni fu Mbori Tipa ka Raka Nyeanye Kindi?
4 Oni Degeturoni fu Mbori Tipa ka Raka Nyeanye Kindi na kina gu bangisa asura rogoho du rogo Oni Degeturoni fu Mbori. I ambakadihe wirikapai na agu aboro nagedapai ageda tooni watadu aguyo nawirika gedapai. Batungusipai rengbe arengba a ka mangasunge nani ho ní awirikapai ni na boro rogo gu nga Oni Degeturoni fu Mbori. Barii kpewaraga yo, keke sanahe duho nga gu i akaragapai sani rogo akpewaraga ue. Kekeapai kina pati asura a gbiati averesi. Ti digido dungu akpewaraga, kura kekeapai kinaho gbiati veresi nga gu rengbe oni arengba ka sakapai tipaha, ringbisihe kuti ome gu boro re.
5. Ti gini aregbo rengbe ani ka mangasunge na agu aburosua re na wai rengbe ani ka mangasunge nani?
5 Wai ka Mangasunge Nani: Oni rengbe ka fu ai burosua dagba agu du ue re ho bi oni he ni nga si ngba angba oni fuhe, zavura ho adunga ha ni nga ani fu agu aburosua re rogo gu diwi re ya. (Oni bi gu sanduki nga “Wai ka Fuhe fu Boro.”) Oni rengbe arengba ka fuhe fu boro ho oni akaraga tironi ni ka bi ní. Oni rengbe ka ya funi he gudu ho oni aida ka fuhe funi na oni ki yugu gu burosua re funi.
6. Wai ani kaa nungusa wisigo Ziazia Kekeapai na boro na agi aburosua re?
6 Wa duhe nga gu burosua nga Oni Degeturoni fu Mbori si na asanahe rogoho nikekehe te, wirikapai na boro rogoho adunga wa gu ani naamangaha na gu buku nga Ziazia Kekeapai Ayugoho te. Dungu aboro duna nyemu kaa gia agu apangbanga namangi mbata kusayo. Sidu, oni mangisunge na agu asura du rogoho tipa ka gumba agu apangbanga du rogo Ziazia Kekeapai. Oni sakirogo agu apai i nake sura tipaha. Oni fura zaaza. Oni sana bawiriki Ziazia Kekeapai nigumba gani bipai. Oni gedi agu averesi du bandu waraga yo, na ki sakipai na ní riihe. Oni sana ní na asanahe tipa ní fura na tipa ka ino singia ní girogo pai yo. Ka ní amangasunge na gu nga Oni Degeturoni fu Mbori Tipa ka Raka Nyeanye Kindi, oni gedi gu kekeapai du pati asura gbiati averesi ho oni asakapai ni tipa sura.
7. Wai rengbe ani ka undo gaani bawiriki Ziazia Kekeapai ní sono?
7 Oni Undo Bawiriki Ziazia Kekeapai Ní Sono: Gaoni sakapai rengbe arengba ka zingisa nyemu wirika gedapai rogo gaoni bawiriki Ziazia Kekeapai yo tipa si undo ní ní nigbia inohe nitini tipa Yekova. (Mt. 5:3, NW; Yo. 17:3) Ka si du nga sakapai namanga rogo Oni Degeturoni fu Mbori, oni rengbe arengba ka pepa yugo gedapai funi ho wene regbo nika da ni, na oni ki gbisi na sakapai kurogo gu burosua nga Oni Degeturoni fu Mbori Tipa ka Raka Nyeanye Kindi. Singia oni na wirikapai na boro rogo gu burosua nga Oni Degeturoni fu Mbori watadu gu nga Oni Degeturoni fu Mbori Tipa ka Raka Nyeanye Kindi, gu boro re arengbanga ka rẽ tipa bapatiza fuo nyasa ní he te. Si naida oni gbisi na wirikapai kurogo gu buku nga Ziazia Kekeapai Ayugoho watadu gu kura waraga nga gu nika undo ní tipa ní girogo Ziazia Kekeapai berewe wenengai.
8. Tipagine du oni ti ni na tambuahe tipa gi vovo aũsunge re?
8 Aboro duwa ka i degetuyo fu Bakindo zegino dunduko ka si du nga i naida ka raka nyeanye kindi. (Yes. 55:3) Na Yekova nakpinyemu gupai nga ‘aboro dunduko,’ kodihe na agu aboro ainongo gedapai ya, wiriki wai ka degatuyo fuko. (1 Tim. 2:3, 4) Nairiwo gu tambuahe du ani nani tipa gi bawene vovo aũsunge re nga gu rengbe ani ka mangasunge nani ka yugopai fu aboro i degetuyo fu Mbori!
[Box on page 3]
Wai ka Fuhe fu Boro
Oni yugu kpewaraga 2-3 fu boro, na ki yaa: “Ya mo mo nakpinyemu ka raka rogo zegino wa gere? [Oni mbu ní tipa ní karagapai.] Ziazia Kekeapai nakidohe nga Mbori nika sa gi zegino re barambeda nibawene ba nga gu nikadu na zereda rogoho, rungo na kaza ki go kusayo. Mo bingo gupai rengbe ani ka mangaha tipa ka raka rogo gu zegino re. [Oni gedi Yesaya 55:3, nga gu keyo ho barii waraga yo ti kpewaraga 3.] Gu veresi re naya furani ani ‘ye koyo’ du Mbori ni na ki ‘degeturani’ fuko. Ono wai rengbe ani ka degaturani fu Mbori?” Oni zara gu burosua re kuti kpewaraga 4-5, na ki saki karagapai na ní. Ka regbo adunga beni ya, oni ki mbu gu burosua re na ní na ki mangi mbakadapai tipa ka ye berewe fuoni ka saka gu karagapai re.