Oni Bandaha
Oni Namangasunge na agi Aburosua Re?
The Bible—What Is Its Message?
I akehe gbe tipa agu aboro inipai gbua tooni tipa Ziazia Kekeapai, gbe agu aboro adunga rogo agu apambori nga ga aKristano ya
Wai ka fuhe fu boro: “Ani nakpinyemu ka ino gamo bipai tipa gipai gumbayo ho ane rogo gi ziazia kitabu re. [Oni gedi Atambuahe 37:11, nga gu furayo tipaha rogo gu 11 papara gi burosua re.] Mo naberãha nga kpotosende nikadu nigini ngbatunga ba ho gu sangbanebi re nika da ni ti rengo? [Oni mbu ní tipa ní karagapai.] Gere nga ngbatunga agu apai du rogo Ziazia Kekeapai nga gu aboro ngba arikayo na rogo dungu apambori narengbe ka gbia maabangirise mbikoho na wasa.” Oni gedi gu genewaraga du kuari ti kpewaraga 3, fuoho, oni ki fu gu burosua re funi.
Oni asadi gipai re: Ka oni awisigo Ziazia Kekeapai na boro rogo gu buku nga Bible Teach, nga gu boro du rogo gu pambori angianga ga aKristano ya, oni di wiri bete aminiti ti tonatona gaoni wirikapai watadu ti digidoho ti agu aregbo dunduko oni amangaha tipa ka wisigo papara gi burosua re sa tipa ka undo ní ní ini kura apai tipa Ziazia Kekeapai.
A Book for All People
I akehe gbe tipa agu abawirikipai inipai gbua tooni tipa Ziazia Kekeapai
Wai ka fuhe fu boro: Oni gedi 2 Timoteo 3:16, 17. Fuoho, oni ki yaa: “Ya mo mo idi kuti gupai nga Ziazia Kekeapai aye be Mbori a wa agi averesi re apehe? Watadu mo nabihe gbua nga kungbo wene buku du? [Oni mbu ní tipa ní karagapai.] Dungu aboro duna akaragapai beyo kuti gi sanahe re, ono ani bihe nga kina beteyo gbua wisigi Ziazia Kekeapai nitiyo. [Oni gedi gu pangbanga du ti kpewaraga 3.] Gi wene burosua re nafu gu nduapai si aida ti ni aboro ngba arikayo dunduko na rogo apambori dunduko wisigi agu apai du rogo Ziazia Kekeapai.”
Oni asadi gipai re: Ka gu boro re di gu burosua re beroni, oni ki yaa: “Ndupai sa dungu aboro aberã gupai ti ni nga Ziazia Kekeapai arengbanga ka undo aboro te nga, dungu apambori nayugo agu apai nga ziree tipa Ziazia Kekeapai. Ho mi nika ye ni berewe, mi nika yugo kpiapai ayugo foro sa tipa gipai mi agumbaha re.” Ho oni ka ndu ni berewe fuoni, oni ki wisigi bete agu apai du ti kpewaraga 4-5.
Gu Wene Pangbanga Naye be Mbori
I akehe gbe tipa agu aboro wirikipai gbua tooni watadu agedanga pai wenengai ya
Wai ka fuhe fu boro: “Ya mo mo naberãha nga ani rengbe arengba kadu ni abakurea Mbori? [Oni mbu ní tipa ní karagapai. Fuoho, oni ki gedi Yakoba 2:23.] I ake gi burosua re si undo rani ani du ni abakurea Mbori, watadu abadiangbako, a wa Abarayama adu.”
Oni asadi gipai re: Singia ti gu bambata regbo oni nabi boro watadu oni nakaraga tironi ka bi gu boro oni afura na ní, oni tona wisigo Ziazia Kekeapai na ní nisaka oni agu apai dunduko du rogo 1 wirikapai.
A Satisfying Life—How to Attain It
I akehe gbe tipa agu aboro adunga rogo agu apai nga ga pambori ya
Wai ka fuhe fu boro: “Ani ye ka biro mbiko gupai nga dungu aboro naida ka gbia ngbarago rogo raka yo. Ani dunduko nagbia tirani agbia na fudifudiapai nga gu nafu gberarago furani. Ono ho du ani ni rogo pai wa gure, ani nandu kina fuo gu gumerani watadu bakurearani rengbe ka fu arugute furani watadu ka wetekaapai rogo Internet. Wari mo abihe nga ani rengbe ka gbia wene arugute ni? [Oni mbu ní tipa ní karagapai.] Dungu aboro kina ngbayo nazere i nagbia wene arugute rogo Ziazia Kekeapai yo. Kpiapai gi du re. [Oni yugu kapita 2 funi, na ki gedi veresi sa dagba agu averesi keyo ho yo.] I ake gi burosua re ka saka wai furani rengbe ani ka raka wene raka ani kidu na ngbarago.”
Oni asadi gipai re: Ka gu boro re di burosua beroni, oni ki yaa: “Dungu aboro nayawee dungu apai du rogo Ziazia Kekeapai angianga rengo ya. Ho mi nika ye ni berewe, mi nika yugo kpiapai sa foro nga ga agu apai du rogo Ziazia Kekeapai nga gu aboro birĩ-inohe nabihe nga kina rengo du.” Ho oni ka ndu ni berewe fuoni, oni ki wisigi gu 4 genewaraga du ti kpewaraga 12.
The Origin of Life—Five Questions Worth Asking
I akehe gbe tipa gu paranga aboro nga aKristano nga aguyo i ayugo gupai fuyo sukuru yo nga ahe akuru nisaha, na gi burosua re ima ngba a tipa sakapai na agu aboro nayawee ahe akuru nisaha, agu aboro naya Mbori ti ni te, na agu aboro nayawee ani arengbanga ka ino singia Mbori ti ni watadu ko ti ni te te (I aakenga gi burosua re tipa tungusapai nitanga nani ti akporo te.)
Wai ka mangasunge nani ho oni afura ni na gu boro naya ahe akuru nisaha watadu gu boro naya Mbori ti ni te: “Dungu akitabu birĩ-inohe du areme nayugopai tipa gupai nga ahe akuru nisaha. Ya mo mo nabihe nga gu yugopai nga ahe akuru nisaha, si nga gu kungbo berãpai du aboro nani, watadu si nga gupai i naima wisigoho ki sigiraha nigupai nga rengo? [Oni mbu ní tipa ní karagapai.] Tipa ka diaberã ringbisihe kuti gupai nga rengo, mi nabihe nga mo nika ida aida ani wisigi gupai re wenengai ka ino gu nga rengo. Gi burosua re na agu agopai rogoho nga gu nasa dungu aboro i idi kuti gupai nga Mbori kinaho nakusi ahe.”
Oni asadi gipai re: Ka oni ndu ku sukuru yo, oni mbu gu burosua re rii gaoni mbisa nga ga kepai ka bihe singia bangiri agude nika ti ti ni si ki ngbatiyo.
Why Should We Worship God in Love and Truth?
I akehe gbe tipa aHindu
Wai ka fuhe fu boro: “Kpee aboro India naapehe gbe nga: ‘Mo kusi re rogo ziree ki ndu na mi sa rengo. Mo kusi re rogo bitimo ki ndu na mi sa imarago.’ Ya mo mo nabihe nga si ninyanyakipa pai ani irisi Mbori rogo nyemuse na rengo? [Oni mbu ní tipa ní karagapai.] Mo bingo gupai Yesu apehe tipa gipai re.” Oni gedi Yoane 4:24. Fuoho, oni ki gedi gu 4 genewaraga ti kpewaraga 3 na ki fu gu burosua re funi.
Oni asadi gipai re: Ka gu boro re di gu burosua re beroni, oni ki yaa: “Kura abarumbatayo nga ga aHindu yó naaya wee rengo niokõokõho ngbaduraniyo. Aguyo nayawee rengo gudu rogo ziazia kitabu yo. Gu ye mi nika ye berewe, mi nakpinyemu ani saki gu sanahe kusiyo ho ti digido gu 3 genewaraga ti kpewaraga 4, nga: ‘Where should we look to find divine truth? [Wari rengbe ani ka gbata rengo ni be Mbori?]’”
The Pathway to Peace and Happiness
I akehe gbe tipa aBuddhist
Wai ka fuhe fu gu Buddhist nga kuru boro: “Isoke mo nabaka bangiro abaka wakina re tipa gu vovo aberãpai nakura awere nga gu nagberesa awirani nikerehe. Mo naberãha nga ginipai du paranga aboro amanga wasiwasi apai ti ni awere nibakerehe gbe? [Oni mbu ní tipa ní karagapai.] Ya mo mo ini gupai nga i aima gumba gipai re rogo gu buku i atona kehe bakuruyo mbata fu tona agu apambori nga ga aKristano, ga aHindu, na ga aMasarami? [Oni gedi 2 Timoteo 3:1-3.] Mo bingo gupai nga agi apai re banga abanga kindi aboro ki vura kaa wirikapai kindi vurũ. [Oni gedi veresi 7.] Agu apai du rogo gi burosua re aundo re mi ini gu rengo dungu aboro ainongo ho ya. Mo nakpinyemu ka gedaha?”
Oni asadi gipai re: Ho oni ka ndu ni berewe fuoni fuo rimiso oni nyemu Ziazia Kekeapai ku rogoniyo, oni yugu gu sanahe funi du ti gu burosua re giihe yo, na ki yugu gu bangiriba napepa sanahe tipa gu buku nga Bible Teach. Oni ya funi wee oni niima ye na gu buku re tipa ka ní aida ka bihe. Oni yugu gu riiapai du rogo gu buku re, na ki wisigi genewaraga sa watadu ue nga ga gu kapita ní nasiaha.
Our Problems—Who Will Help Us Solve Them?
I akehe gbe tipa aHindu
Wai ka fuhe fu boro: “Dungu agu aboro ani nafura naayo du nifudifudiyo be gu gbegberẽ apai i abihe si nimangi rogo zegino. Ya mo mo naberãha nga regbo kinaho Mbori nika dia gbegberẽ apai dunduko kusayo rogo zegino? [Oni mbu ní tipa ní karagapai.] Gi sangbanebi re nafu maabangirise furani. [Oni gedi Atambuahe 37:11.] Gipai mi nagedihe re mi gedihe rogo Ziazia Kekeapai, nga gu kitabu kura aboro agianga rogoyo ngba ruru gene ya na kura aboro amangasunge nani ngba gbegberẽ gene. Anga Ziazia Kekeapai nga gu kitabu nga ga aboro Amerika watadu aboro Putu te; si afuranga a tipa gupai nga kura ringara du kurii kura aringara te, na si atumbasingo pa kura ngbatunga aboro kuari ti aguyo te. Si nafu gu maabangirise furani nga fuo regbo tooni, Mbori nika dia fudifudiapai dunduko kusayo. Si na agu arugute rogoho a rengbe ka undo rani awere na gu fudifudiapai du tirani. Gi burosua re nagumba dungu apai tipa agi apai re.”
Oni asadi gipai re: Ho oni ka ndu ni fuoni ti kura regbo kumbatayo, fuo rimiso oni nyemu Ziazia Kekeapai ku rogoniyo, oni ki yugu agu asura funi du ti kpewaraga 4-5 nga ga gu buku nga Bible Teach. Oni gedi veresi kandara sa rogo Ziazia Kekeapai dagba agu averesi keyo ho na ki fu gu buku re funi.
Will There Ever Be a World Without War?
I akehe gbe tipa aYudo
Wai ka fuhe fu boro: “Tona wa rago aenge, aboro aima rungo nikerehe mbiko vura. Mo naberãha nga ginipai du du avura ti ni si ki vura du vurũ nga aboro naya i naida zereda? [Oni mbu ní tipa ní karagapai.] Gi sangbanebi du rogo Yesaya re nafu maabangirise furani. [Oni gedi Yesaya 2:4.] Ono tie, gipai re nakusa asanahe akusa, nga: Ti gini regbo ga Yesaya sangbanebi nika da ti rengo na wai si nika manga? Tipagine si aida ani kido ti ni kuti sangba Ziazia Kekeapai kidu na maabangirise mbikoho? Gi burosua re nakaragapai sa agi asanahe re.”
Oni asadi gipai re: Ka gu boro re di gu burosua re beroni, oni ki ndu na ní kuti kpewaraga 16-17 na ki yaa: “Dungu aboro naberãkurii gu kereapai namanga, wa gu imo aYudo aboro Putu aimiyo ti regbo Ue Vura Nga ga Zegino, i kini sanahe nga, ‘Ka si du nga Mbori kina ti ni, tipagine ko ambu gbegberẽ apai ti ni si naamanga aboro?’ Mi nakpinyemu ani sakipai tipa gipai re ho mi nika ye ni berewe.”
The Guidance of God—Our Way to Paradise
I akehe gbe tipa agu aMasarami naraka rogo agu aba rengbeyo arengba rogoho ka wisigo Ziazia Kekeapai zanga boro fudiyo
Wai ka fuhe fu boro: “Mi ini gupai nga aMasarami idi kuti bangisa ndikidi Mbori na kuti anebi dunduko. Rengo du? [Oni mbu ní tipa ní karagapai.] Mi naida ka gumbapai foro tipa gupai nebi agumbaha bakuru kusayo tipa wai kpotosende nika sa tihe niparadizo. Mi naida ka geda gupai foro gu nebi re akehe. [Oni gedi Yesaya 11:6-9.] Dungu aboro nabakabangiriyo abaka naapa wai Mbori nika manga gu ariapai re auru kpotosende. Gi burosua nayugo agu apai anebi agumbaha tipa gipai re.”
Oni asadi gipai re: Ka gu boro re di gu burosua re beroni, oni ki yaa: “Gi kitabu nga ga Mbori re nagumba gupai furani nga, ti tonatonaha, aboro aaraka paradizo yo. Gu ye mi nika ye berewe ani fura, mi nakpinyemu ka karagapai kuti gi sanahe re, ‘Wai aboro abasa ga Mbori rugute ki zanga paradizo?’” Ho oni ka ndu ni berewe fuoni, oni ki saki gu paparaha na ní natona ti kpewaraga 6.
Real Faith—Your Key to a Happy Life
I akehe gbe tipa agu aMasarami naraka rogo agu aba rengbeyo arengba rogoho ka wisigo Ziazia Kekeapai zanga boro fudiyo
Wai ka fuhe fu boro: Oni yugu gu sura funi du ti kpewaraga 16-17 na ki yaa: “Agu apai ani abihe rogo gi sura re ima du kia bakere gbe ti agu apai ani abihe rogo zegino areme. Ya mo mo nabihe nga zegino rengbe ka da wa gere rogo kura uru sa? [Oni mbu ní tipa ní karagapai.] Mo bingo gupai gi kitabu nga ga Mbori re akidopaha. [Oni gedi veresi sa rogo gaoni Ziazia Kekeapai dagba agu averesi keyo ho.] Gi burosua re naundo rani ani duna ndikidi idapase kuti gupai nga agu apai kidoyo paha re nika manga amanga.”
Oni asadi gipai re: Ho oni ka digiso fugo ni ti gu bambata regbo fura oni na gu boro re, oni ki sana ní ní sia sanahe sa dagba agu du ti kpoto gu burosua re giihe yo. Fuoho, oni ki mangi mbakadapai tipa ka saka gu karagapai du tipa gu sanahe re ho oni ka ndu ni berewe fuoni.
Lasting Peace and Happiness—How to Find Them
I akehe gbe tipa aboro China
Wai ka fuhe fu boro: “Raka areme na dungu fudifudiapai rogoho nga gu nasa rani ka ani dunga na ngbarago ya. Ginipai ninaaundo ro mo du na ngbarago fudifudiapai ki vura du vurũ? [Oni mbu ní tipa ní karagapai.] Badungu aboro nagbia ngbarago mbiko nduyo kuti agu arugute du rogo Ziazia Kekeapai. [Oni gedi Atambuahe 119:1, 2.] Ono kura aboro nayawee Ziazia Kekeapai nga gu kitabu nga ga aboro Amerika watadu aboro Putu. Ono mo bingo gipai re. [Oni wisigi gu 16 genewaraga na ní ti kpewaraga 17.] Gi burosua re nasaka wai furani rengbe ani ka gbia nyenye zereda na ngbarago.”
Oni asadi gipai re: Ka gu boro re di gu burosua re beroni, oni ki gedi gu bambata agenefugo du biata rogo gu 18 genewaraga ti kpewaraga 17 na ki yaa: “Ho mi nika ye ni berewe, mi nakpinyemu ka yugo gupai foro Ziazia Kekeapai aya ani moibangirani tipaha kumbatayo.” Ho oni ka ndu ni berewe fuoni, oni ki saki memepai sa dagba gu memeapai du rogo gu 6 genewaraga ti kpewaraga 30.