AGU APAI NANDU NA GUPAI DU TI KPOTOHO | YESU NABATASA ABORO—BE GINE?
Ndu Gupai Ani Aida I Batasirani Ti Ni
“Gu boro de avungu ni gani arame ni kina guru he gbua, ki hi ahi be fudifudipai. Ni kuru wa mbumbuda, ki nyokora; ni naora wa kina nzereme, ka ni aima nga ya.”—Eyobo 14:1, 2.
Natona bakuru kusayo, aboro aima digo ni berẽkurii wai ka si ngba boro raki berewe ni paranga ni na wene kpotoni nyeanye kindi. Ono tie, gu gbere agbera gbe nga: Ani nga agu aboro nakpi akpi. Agi afugo Eyobo du kuari ko apehe agarã wa biata kutu kusayo re, si kindi nga rengo areme.
Aboro rogo zegino dunduko du na bakere nyemu ka raka nyeanye kindi. Ziazia Kekeapai nape gupai furani nga Mbori aima maa nyemu nyenye unga ku kpotoraniyo na ki sarani ani inihe. (Batungusipai 3:11) Kangia wo duhe, ya mo si rẽarẽ ani ya gu Mbori du na nyemuse rengbe ka maa gu nyemupai ku kpotoraniyo arengbanga ka ringbisatihe ya? Kangia gamo karagapai nga oó, gapai nga rengo. Fugo Mbori nayamba kpio nga vura na si nakidohe nga “i nikagbarasa ha” agbarasa.—1 AKorindo 15:26.
Kango ti ni te nga, kpio nga vura aboro. Ruru boro ho rengbe ka kpinyemuhe te. Ho kerepai ambeda ni na ani, ani nanekaha, naigo tirani, watadu ki oro. Ho ani awoka ni, ani nagbata gene tipa ka husa tirani. Ani namanga bakere ome ka ne agu ahe dunduko rengbe ka sarani ani kpi.
Ya mo ndupai ho tipa ka ida kuti gupai nga i nika gbarasa gi kuru vurarani re kusayo? Ii, si kinaho. Yekova Mbori nga Bakusiahe, ko aamanganga aboro i raki tipa kina bete agarã na ki kpi te. Gu kpio aboro akpihe aadunga rogo gako mbakadapai te. Ko aaida aboro raki nyeanye kindi auru kpotosende, na gupai ko aida ka mangaha, ko du wa ka ko mangihe.—Yesaya 55:11.
Wai du tie i nika gbarasa kpio? Apangbanga nayugoho nga aboro aima manga bakere ome tipa ka nyasariipa kpio, ono zanga du na diabese. Zavura ti gi gaani regbo re, i namanga ome kindi. Aboro-birĩ-inohe ima kusa angua nga gu nadia adiabe gu kura akaza. I ima asada ka ino wai nzunzu i ambakadi rakiraki ahe. Rogo gu dungu aringara, aboro naraka ni gbangaha areme kisusi wai i anaaraka kama agarã kusayo. Ono wa vura duhe wo, kpio anyasanga te. A wa Ziazia Kekeapai agumbaha, rakiraki ahe “nandu dunduko berewe ku nvutu yo.”—Batungusipai 3:20.
Gu wene pangbanga duho nga si aidanga ani kido kuti gu ome aboro amangaha tipa ka nyasariipa gi bangabanga pai re te. Yekova Mbori ima manga mbakadapai tipa ka batasarani be kpio, na gu nyanyakipa boro nika manga gupai re nga Yesu Kristo.