Oni Mbedi Na Mbori

‘Mo Akpinyemu Guhe Bero Amangi’

SI NIKEREPAI kisusi ka bi gamo boro ní nirungo na ki kpi. Ani dunduko ninaarungo arungo gbe ho gaani boro akpi ni. Ono ani nagbia bete wasa mbiko ino ani gupai nga, Bakusirani nga Yekova Mbori ima rugatiko naapa gaani rungo. Na kurigure, ko na nyemu ka zingisa kpikpi aboro i du niungayo berewe. Oni bingo gu maabangirise fugo Eyobo afuhe furani, nga gudu nikekehe rogo Eyobo 14:13-15.

Oni bingo gupai namangi. Eyobo nangia gu kumba nadu na idapase gbe agbiatiko na dungu aʹasada. Pa gako aũkumuko agberẽ, awiriko ki kpiki dunduko, na kere kaza ki ziko. Ho ko aduni rogo kere rungo, ko akpari kuari fu Mbori ki yaa: “Ako, ka mo oko re ku Baatoro kpikpi aboro yo [nga muro]!” (Veresi 13) Eyobo abihe nga muro nga wene baongoda fuko. Yo ka ko azeredi ni be fudifudiapai na igira, si kidu wa Mbori oko ko kurogo wene ba.a

Ya mo Eyobo nika nyeanye ku muro yo? Ko aidi kuti gupai nga, ko ayenga koyo te. Ko andu kumbatayo na gako kpee ki yaa: “Ako, ka mo . . . ringbisi ringbisiringbisi rago fere, ki tingidi pa re!” Eyobo adu na gu maabangirise nga, ko nikadu muro yo tipa kina bete regbo, na bangiri Yekova agonga tiko te. Ko aringbisi gu regbo ko nikadu muro yo ti ni kuti agu “arame mangaapai” si aida boro nyasihe. Si aidi ko pi muro yo da ti gini regbo? Daho ‘pa kusako nika da ni.’ (Veresi 14) Gu kusako re nga kusako muro yo, watadu zingisako bekpio!

Eyobo awiri pa ino wai nga i nika kusako akusa muro yo? Ko ainihe wo mbiko ko aima ino wai Bakusirani aberãpa agu airisiko kpii. Eyobo ayaa: ‘Mo ayambahe, mi ki karagapai foro; mo akpinyemu guhe bero amangi.’ (Veresi 15) Eyobo aima ino nga be Mbori namangi ko. Bafu-Unga nga Yekova nasa gupai nga nako duna vuse, ko rengbe arengba ka zingisako bekpio.​—Eyobo 10:8, 9; 31:15.

Fugo Eyobo nayugopa ga Yekova bakere nunga furani: Yekova nakpinyemu agu aboro akpi gbe nafutiyo kubeko wa Eyobo, ki mbuko ko sa sinoyo i duni agu aboro ngbaa tiko. (Yesaya 64:8) Yekova nabi ruru airisiko na nyanyakipayo gbe. Ko na bakere ‘nyemu’ ka zingisa gu gako ruru aboro kpiki. Wene bawiriki Ziazia Kekeapai sa ayawee gu fugo Ebere i asaha nga Yekova ‘nakpinyemu guhe beko amangihe,’ si nga gu nyanyaki fugo rengbeyó ka gumbapa gupai nani du boro na bakere nyemu ka mangaha. Sidu, Yekova atingidanga kina kungbo tingidapa agu airisiko kpiki te, ono ko a na bakere nyemu ka zingisayo i du niungayo berewe.

Rogo gu kitabu nga Eyobo, nga gu kitabu du dagba agu akitabu nga ga Ziazia Kekeapai i akehe mbata, Yekova ayugu gupai furani nga ko nika zingisa kpikpi aboro azingisa bekpio.b Ko naida oni bi tironi abi berewe na agu abadiangbaroni kpiki. Gipai re rengbe ka fu wasa furani ho gaani boro nakpi ni. Si ngbaangba oni wiriki kura apai tipa Mbori nyemuse na ki ini wai rengbe oni ka mbu tironi kubeko ko sa roni nigu ngbatunga boro nika biko ko nizingisi aboro bekpio.

[Gu rukutu kekepai du bandu waraga yos]