Zereda Tipa Agarã Kutu na Tifuoho!
“Mbori du adu mbata yo fu ahe dunduko.”—1 KOR. 15:28.
ONI RENGBE KA SAKAROGOYO?
Gini sangbanapai digisidigisi agi averesi re nikadu nani kurironi?
Mika 4:4
Yesaya 11:6-9
Yoane 5:28, 29
1. Gini maabangirise du gu “bakere rimbasa aboro” nani?
YA MO oni rengbe ka berãpa gu weneapai rengbe gu bazogo duna ruru sarangbanga gbiati nunga ka mangaha fu agu aboro ní azoga yó tipa agarã kutu? Si nga gupai napido gu “bakere rimbasa aboro” nga aguyo nika bata ti regbo gu “bakere gberãngbi” nga gu nika digiso gi gbegberẽ zegino ani araka rogoho re.—Yugo. 7:9, 14.
2. Ginipai mangi rikaaboro rogo agu agarã 6,000 susi kusayo re?
2 Rogo agu agarã 6,000 susi kusayo, aboro asadi ka zogatiyo nisayo. Ono gipai re ye na bakere igira gbiati rungo fu rikaaboro. Bakuru kusayo, Ziazia Kekeapai agumba gupai nga: ‘Boro nidu nigbia kurii kurani ka imisa ní.’ (Batu. 8:9) Ginipai ani abihe areme? Kupati agu apai duwa avura na asamungu, gu kura apai gu du kinaho wa rungo tipa aũzegino, akakaza, gbarasa rago, ariapai rogo sino rago gbiati gu kura dungu apai. Gu nyanyakipa aboro du rogo azogarago nazahe nga ka aboro amanganga bakere ariapai ya na ka i ambunga gbarasapa agu ahe du auru kpotosende ya, sangbanaha nika gberã nikerehe.
3. Ginipai nika manga ti regbo Zogarago Tipa Agarã Kutu?
3 Tii gu zogarago nga ga Yesu Kristo, ga Mbori Masiya, gbiati agu aboro nika zogarago naako du bangeyo nga 144,000, i nika dia gu gbegberẽ apai dunduko kusayo namanga aboro na kpotosende. Gu Zogarago Tipa Agarã Kutu re nika digiso gu mokido Yekova Mbori amangihe ki yaa: “Mi mangi vovo angbangbaturũ na vovo kpotosende a; i atíngida nga pa gu bambata apai te si ayé nga ku berãyo yo a te.” (Yes. 65:17) Gini iiriwo wenepai napido rani nga gu ani ata bingoho ya? Na gu undo nga ga gu Fugo Mbori nafura tipa apai kumbatayo, ani denga wiri mboimboi agu ahe “i abi nga ha ya” du kindi kumbatayo.—2 Kor. 4:18.
‘I ADÚDUA ABAMBU KI RŨKU BAKAKUE ATI YO’
4. Tipagine duhe ti ni areme nikpakarakpakaraha gbe tipa boro du na kporo beni?
4 Da aidanga kadu na kpuni ti ni, nga gu ba rengbe ní na gani aborokporo ka raka rogoho zanga gunde ya? Ono tie, rogo gi zegino ani araka rogoho areme re, si nikpakarakpakaraha gbe tipa boro du na kporo beni. Aboro nadunguratiyo nibadungu yó kurogo agbata. I naraka rogo kpatakpata abambu rogo bibiriko agbata. Pa dua bambu fuyo ni gu musumo kaa danga ti rengo ya.
5, 6. (a) Yesaya 65:21 gbiati Mika 4:4 nika digisotihe wai? (b) Wai gu rengbe ani ka gbia agu amaku re?
5 Tii gu zogarago nga ga Kindo, agu aboro dunduko naida kadu na akporo beyo nikadu nani bambiko Yesaya agumba gupai nisangbaanebi nga: “I adúdua abambu ki niraki rogo; i arũka bakakue aati yo ki niri zuzuhe.” (Yes. 65:21) Ono anga kina gupai sa nga boro du na kporo beni nika manga te. Badungu aboro areme duadu na wene kikindigi abambu beyo. Ono tie, i nabaka bangiriyo naʹauru dunduko nga i nika zanga gu bambu re azanga be zingo marã, watadu airadĩ nikaye ka dĩ ahe beyo. Ono apai nika du kia tii gu zogarago nga ga Kindo! Gu nebi nangia Mika ayaa: “Aboro ni ba sa sa asúnga kina tii gayo bakakue na tii gayo vurumo a, a nga boro sa nikagundesi yo te.”—Mika 4:4.
6 Na gu bawene maabangirise re rirani yo, ginipai si aida ani mangihe? Rengo ngaha nga ani dunduko nakpinyemu kadu na wene abambu berani. Wa vura duhe wo tie, kuba gupai nga ani sota asota awere gbe isoke, ki rimisi tirani kurogo bape tipa ka dua wene bambu, ya mo si adunga nipatatamana ka ani gbe berãrani awere gbe kuti ga Yekova mokido te? Oni tingidi gupai Yesu agumbaha tipa tiko ki yaa: “Anya nasunga rogo yaro, azire ari yo ki sungu rogo angua; ono ba adu nga be Wiri boro ka ko pi auru he wa sa te.” (Rk. 9:58) Yesu aduadu na rengba beko ka dua kpaya bambu. Ono tipagine ko aduanga ha ti ni ya? Si tie ziazia nga, Yesu aida ka ne agu apai dunduko nga gu narengbe ka gbe berãko ti maa Kindo mbata rogo gako raka yo. Ya mo oni rengbe ka pekafuo gako kpiapai na ki banda gaoni raka taata, zanga zio ti gu gbina nga ga berãpa aũzegino gbiati bakabangirise?—Mt. 6:33, 34.
“WARU NA WIRI KANDORO ARÍKA WA SA”
7. Gini rugute Yekova afuhe nibipa gu pagume du dagba aboro na anya?
7 Aboro Yekova akusi yó niyangaraha ho ko aakusa ahe ni. Ko agumba gupai fu gako Bangbasia Boro Sunge, nga bambata Wiriko nga: “Ani fú boro ni kpiarani, wa kina rani; i zógo atĩo baime, na azire ari, na agu anya nga zogozogo ra, na kpotosende dunduko na agu agbiro dunduko nagbe tira sande.” (Bam. P. 1:26) Rogo gi gene re, Adamu na Eva gbiati gu kura rikaaboro dunduko i akusi yó Yekova amoi yó i du na pagbia kurii anya.
8. Wai gu du ga anya mangaapai areme?
8 Ya mo si nitaatapai tipa aboro du na pagbia kurii ngbatunga anya dunduko na kini raki na ami rogo pazereda? Badungu aboro nakpinyemu gayo zogozogo anya wa agura nga apusu gbiati aango. Ono ginipai tigaha du tipa anya nvuo? Gu kura tingidapai sa agumba gupai nga: “Agu aboro-birĩ-inohe raki mbembedi na anya nvuo na ki wirikipai tipa ra bi gupai nga anya na angbatunga ra dunduko du na nunga tira.” Rengo ngaha nga, ami nazinga azinga ho boro agundesi ra ni watadu ho boro azubo ra ni, ono ya mo boro ami nzunzu na nunga tira? Gu tingidapai re agumba gupai berewe nga: “Ho ami asonosa awira ni nzunzu nga gu regbo ami ayugo bakere nunga.”
9. Nibipa anya, gini ariapai nika manga?
9 Sidu, si aidanga ngbarani zere ho ani ageda gupai ni rogo Ziazia Kekeapai nga zereda adu dagba aboro na anya te. (Oni gedi Yesaya 11:6-9; 65:25.) Tipagine? Oni tingidi gupai nga ho Noa na gako aborokporo akuru ni rogo kurungba tifuo Ime Akangbii, Yekova agumba gupai fuyo nga: “Gunde roni atí ati na iriwo roni ti anya sende no.” Gipai re adu wo tipa anya naabanda tira. (Bam. P. 9:2, 3) Ya mo Yekova arengbanga ka dia gu gunde re kusayo tipa aboro naaraka na anya kina wai ko aidi si du ti tonatonaha te? (Osea 2:18) Nairiwo gu wene momu napido agu aboro nika bata ka raka auru kpotosende ti gu regbo re!
“KO AWÉGA AUME TI BANGIRIYO KU SA YO DUNDUKO”
10. Tipagine du aume adu ti ni kindi rogo ga aboro raka yo?
10 Ho Soromo abi ‘agu arungosiro ni dunduko aboro amangaha tii uru no,’ ko agumba gupai nga: “Oni ngére, aume ki nigbadi bangiri agu yo yo i arungosi yo, boro adu nga ho sa ka ngarãsi yo te!” (Batu. 4:1) Kinawo du apai areme watadu si gberẽ areme kisusi gu nadu ti agu aregbo re. Da dagbarani naakparanga ni aume be pai ya? Rengo ngaha nga kura aregbo kinaho boro akpara be ngbarago. Ono dedede, aume nakura be kere egerã kpotoseyo.
11. Gini pangbanga rogo Ziazia Kekeapai nazio ngbaduroni yo gbe?
11 Oni tingidinga pa agu apai ani agedaha rogo Ziazia Kekeapai nga gu naba kina boro nunga tirani. Ho Sara akpi ni garãri kidu nga 127, “Abarayama ki rimi ku dimo yo, ki nikpari ni aume ki nita ngbaduko tipa Sara.” (Bam. P. 23:1, 2) Ho Naomi agumba gupai ni fu adekurugbo awiri nga i ga fuo agume yó, “i ki poi ku ari, ki nikpari ni aume,” na tifuo Naomi fura naayo berewe, “i ki poi ku ari, ki nikpari ni aume berewe.” (Ruta 1:9, 14) Ho Bakindo Izikiya aakaza ni nikerehe si kidu wa ko nika kpi akpi, ko akpari fu Mbori na “ki nikpari akpara gbe ni aume,” gipai re aima zio ngbadu Yekova yo. (2 Aba. 20:1-5) Na da gu pangbanga du tipa wai Petero atikango Yesu afõnga ngbaduni yo ya? Ho ko agi fugo bakondo ni u nikua, Petero “ki kuru, ki nikpari akpara gbe ni nunga”—Mt. 26:75.
12. Wai gu zogarago nga ga Kindo nikaye na ndikidi ba omese fu rikaaboro?
12 Bambiko gu badungu gbegberẽ apai namanga rani singia si nirukutuhe watadu si ni kikindigihe, ani naida na wasa gbiati gu he nika sa rani ani ba omerani. Gure nga kina boro gupai gu Zogarago nikadu Tipa Agarã Kutu nika mangaha fu aboro. Ziazia Kekeapai nagumba gupai nga: “[Mbori] awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te.” (Yugo. 21:4) Si nipa ngbarago ka ino gupai nga igira gbiati rungo adunga berewe te. Ono si nipa ngbarago kisusi ka ino gupai nga Mbori nika dia kpio kusayo. Wai gu gupai re nika manga?
‘AGUYO DUNDUKO DU ROGO AMURÃ YO AKURA’
13. Wai kpio nadu na maapai kurii aboro natona ti gu regbo Adamu aingipai?
13 Natona ti gu regbo Adamu amangi ingapai, kpio nazoga rikaaboro dunduko. Si nga gu kare ka boro asonga vura kutini kidu na diabese ya. Anga kpakpa boro ho rengbe ka zubo behe te, si ye na bakere rungo ku kpoto aboro yo. (Rom. 5:12, 14) Bambiko ‘gunde bekpio,’ badungu amirioni aboro “naara rogo ungayo niziziyo.”—Eb. 2:15.
14. Ginipai nika manga ho i nika nyasa ni riipa kpio?
14 Ziazia Kekeapai nafura tipa gu regbo ‘i nika gbarasa gu yangara vurarani nga kpio’ ti ni. (1 Kor. 15:26) Ariko ue nga ga aboro nika gbia undo be he. Tipa gu “bakere rimbasa aboro” naraka awere, i aduadu na momu beyo ka bata kurogo gu vovo zegino i nakido paha aboro nika raka rogoho nyenye kindi. Tipa agu aboro naima kpi, i nikadu adu na momu beyo tipa ka zinga bekpio. Ya mo oni rengbe ka berãpa gu ngbarago agu aboro nika bata zanga kpi nikadu nani tipa ka dia agu aboro kugume i nika zingisa yó bekpio? Wisigo ani bete agu azinga bekpio namangi nga gu du nikekehe rogo Ziazia Kekeapai rengbe ka undo rani ani inipa gu ngbarago aboro nikadu nani.—Oni gedi Marako 5:38-42; Ruka 7:11-17.
15. Oni naberãha nga oni adu wai ka oni duho ka bi aboro i nizingisi yó bekpio?
15 Oni berẽnga kurii agu afugo duwa, “si ki niiriwo airiwo ti yo bakere gbe” na ‘i kini taasi rimo Mbori.’ Ka oni adu yo ti agu aregbo re, isoke, kina gu bangisapai re ka oni agumbaha a. Ani nikadu na bakere ngbarago gbe ka bi agu aboro ani akpinyemu yó i nizingisi yó bekpio. Yesu aya wee: “Ragoho nada, ho agu yo ka gia fugoko ni dunduko du rogo amurã yo, ki kuru.” (Yo. 5:28, 29) Wa vura duhe nga boro ho dagbarani nabi ngbatungapai wa gure mbata te, nirengo, si adu nigu kere iiriwopai dagba agu ‘ahe yo i abingo ho ya’ ani nika bihe kumbatayo.
“MBORI DU ADU MBATA YO FU AHE DUNDUKO”
16. (a) Tipagine si aida ani naafura ti ni na bakere ngbarago tipa gu maabangirise du ani nani tipa agu ahe ani ata bingoho ya? (b) Ginipai Pauro agumbaha tipa ka ngarasa agu aKristano nangia aKorindo?
16 Bawene raka kumbatayo napido agu aboro nanye niruruyo awere fu Yekova rogo gi kere aregbo ani araka rogoho re! Wa vura duhe nga agu amaku re kindi ni agu ahe ka ani abingo ho awere ya, pa banda ani paha berãrani yo rengbe ka undo rani ani nimoi berãrani sa kina agu apai nyakipaha awere gbe na kini ne agu apai rengbe ka gbe berãrani rogo gi gbegberẽ zegino ani araka rogoho re. (Rk. 21:34; 1 Tim. 6:17-19) Ti aregbo gu wisigopai nga ga aborokporo watadu gu irisombori nga ga aborokporo, ho ani afura ni na akuarani aidipase, ho ani afura ni na agu aboro ani awisigo Ziazia Kekeapai naayo watadu aguyo du na nyemupai, si naida ani naafura na bakere ngbarago tipa gu maabangirise du ani nani. Manga ani he wo nika sa gupai nga gi maabangirise re nye berãrani yo na kpotorani yo niungaha. Gu mokedi nangia Pauro amangi kina boro gupai re ho ko angarasi akurako aKristano ni. Afugo ko aundo aboro tipa i berẽkurii agu apai nikadu ti digido ga Kristo Zogarago Tipa Agarã Kutu. Ani asadi ka berãnga kurii ndikidi rogo agu afugo Pauro yo du rogo 1 AKorindo 15:24, 25, 28.—Oni gedihe.
17, 18. (a) Wai gu Yekova “adu mbata yo fu ahe dunduko” ti tonatona ga aboro raka? (b) Ginipai Yesu nika mangaha tipa ka karaga zereda na wene pagume?
17 Gu kura gene ho ngba kisusi rengbe ani ngbaha ka fura tipa wai raka nikadu tifuo agarã kutu te, gu yangara wenepai rengbe ani ka gumbaha nga Mbori ‘adu mbata yo fu ahe dunduko.’ Ono rogo gipai re yo nga gine? Oni berẽnga kusayo Ati Edene yo, ti gu regbo Adamu na Eva angia papara gu ga Yekova aborokporo naaraka rogo zereda. Yekova nga gu ko du na pagbia beko rogo zegino dunduko aazogarago kurii agu ahe dunduko ko akusihe singia ngbangbaturũ yo watadu auru kpotosende ane. I arengbe arengba kaa fura na Yekova, kaa irisoko, na kini gbia maku beko. Ko “adu mbata yo fu ahe dunduko.”
18 Gu bawene pagume re akati ti gu regbo aboro asamungu kuti ga Yekova pagbia bambiko gu maapai nga ga Satana. Ono tie, natona rogo gu garã nangia 1914, gu Kindo nga ga Masiya aima digo nimangi apai tipa ka gasa gu pazereda re kubaha. (Ef. 1:9, 10) Ti regbo Zogarago Tipa Agarã Kutu, badungu agu apai ‘i abingo ho’ awere ya nika da nirengo. Fuo agi apai re dunduko, ‘digido zegino’ nika da nga gu nika kiso ga Kristo Zogarago Tipa Agarã Kutu. Ginipai tie nika manga tifuo gure? Wa vura duhe nga ‘i asia pa ahe fu Yesu dunduko ku ngbangbaturũ yo na ku sende no,’ boro gbangbati nga ko te. Ko na nyemu ka dia ngbiti ga Yekova pagbia te. Ko ‘nika fu ngbi fu Mbori nga kina Ba.’ Ko nika mangasunge na gu pagbia du ko nani “sa ga Mbori taarimo nga Ba.”—Mt. 28:18; Frp. 2:9-11.
19, 20. (a) Wai agu azogo nga ga Kindo yó nika yugo gupai nga i ima ida kuti ga Yekova bakere pagbia? (b) Gini weneapai napido rani?
19 Ti digido agi apai re dunduko, agu aboro naraka auru kpotosende nika da nirengberengbe yó. I nika pekafuo ga Yesu kpiapai. Bambiko gupai nga i na umbasitise, i nika ida kuti gupai na kpotoyo yo dunduko nga Yekova du na rengo beko ka zoga yó. I nika susa rogo gu yangara asada ka i yugu gupai rogo gayo mangaapai yo nga i naida Yekova zogo yó. (Yugo. 20:7-10) Fuo gure ngbutuko, asamungu naabayo singia aboro watadu amaraika i nika gbarasa yó kusayo nyeanye kindi. Nairiwo gu ngbarago aboro nikadu nani ti gu regbo re! Aboro rogo arago dunduko nika taasarimo Yekova nga gu ko nika ‘du mbata yo fu ahe dunduko.’—Oni gedi Atambuahe 99:1-3.
20 Ya mo gu wene ahe ga Mbori Kindo nikaye nani barambeda kumbatayo re afõngbadu roni yo sa manga kina gupai Yekova akpinyemuhe? Ya mo oni rengbe ka ne agu amaabangirise gbiati aũngbarago du rogo gi ga Satana zegino re tipa ka si nangingo roni ya? Ya mo oni anyakasa gaoni diaberã tipa ka songoda ga Yekova bakere pagbia? Gaoni mangaapai yugungo ho ayugo nga wo oni aida ka mangaha nyeanye kindi. Ka oni mangihe wo, oni aduadu na momu beroni ka raka rogo gu zereda nikadu tipa agarã kutu na tifuoho!
[Gu sura du ti kpewaraga 16]
Tifuo Yesu nyasi gako sunge ni Bakindo, ko nika gasa Kindo fu Bako