Ani Mbu Ga Yekova Arugute Si Me Rani

1, 2. (a) Gini apai duna nyanyakipaha tipa wene pagume na Yekova? (b) Wai rengbe ani ka gbia undo ti wisigo ani agu apangbanga du rogo Ziazia Kekeapai tipa wai aboro akaragapai kuti ga Yekova arugute?

“SI NI wene he fere ka mbeda na Mbori; mi moi Gbia nga Mbori ni gi bagbuko.” (Tam. 73:28) Bake papara Atambuahe aapepa gu kido ko adu nani kuti Mbori. Gini apai nasako ko pe gipai re? Ho ko abi gu zereda ni du gbegberẽ aboro nani, rago agberẽ tiko nikerehe. Ko ki ayaa: “Mi vura girisa kpotore yo vurũ, ki zundu bere wa du mi nga boro wenesa.” (Tam. 73:2, 3, 13, 21) Ono tie, ho ko arimi ni “ku rogo ga Mbori kparakpara ziazia ba,” si aundoko ko rugu gako berãpai na ko bandapa gako pagume na Mbori. (Tam. 73:16-18) Gipai re ayugu nyanyakipa pai fuko nga: Du dagba ga Mbori aboro, dia gako arugute kugume, gbiati mangaha rogo gako raka yo angia nyanyakipa pai tipa gako wene pagume na Yekova.—Tam. 73:24.

² Ani naida kina gu bangisa pagume re du dagbarani na Mbori. Tipa gu pagume re du dagbarani, si ninyanyakipa pai nga ani mbu gako arugute si me rani wa ka ani da ni agu aboro nafu ngbarago fuko! Mbata kusayo, Mbori ayugu inopai fu aboro nibasasa na badona ngbatunga aboro nifuko momu fuyo i nidegetuyo sa gako arugute. Gu pangbanga du rogo Ziazia Kekeapai yo, si ‘tipa ani wirikipai’ ti ni na “tipa za rani, nga agu [rani] ye digida rago ku auru” rani. (Rom. 15:4; 1 Kor. 10:11) Ka ani wisigi gi pangbanga re sirisiri, si nika fu dudungurobipai furani tipa asino Yekova na ki yugu wai rengbe ani ka gbia undo ti me ko rani.

GU OME DU BAME BERE NANI KURII PERE

3. Rogo Yesaya 64:8 na Yeremaya 18:1-6, waigu yuguyo gu pagbia du Yekova nani kurii aboro? (Oni bi gu sura du ti tonatona ha)

³ Yesaya 64:8 nasaka gu pagbia du Yekova nani kurii aboro na ngbatungayo dunduko niyaa: “Ako Yekova, ono mo nga Barani; ani du wa pere, mo du wa bamerani; ani dunduko nga gu sunge nga ga bero.” Bamepere na ome beni tipa ka me gu ngbatunga pere ní aidaha. Pere arengbanga ka ya si naida i mehe were te. Kina gu bangisapai re du tipa boro na Mbori. Boro arengbanga ka tikango na Mbori te kina wai pere arengbanga ka tikango na gu boro na mehe ya.—Oni gedi Yeremaya 18:1-6.

4. Ya mo Mbori namanga aboro ngbaome tipa ka me yó watadu ngbatunga rikaaboro? Oni sakingo rogoyo.

⁴ Yekova ayugupa gu pagbia ko adu nani kurii aYisaraere kina wai bamepere nidu nani kurii pere. Ono kparakparapai kina tiko na ndikidi bamepere. Bamepere na gene beni tipa ka me ai gu ngbatunga pere ní aida ka mehe rogo pere yo. Ya mo Yekova name kura aboro niwene yó na kini me aguyo nigbegberẽ yo watadu gu kura ngbatunga rikaaboro? Ziazia Kekeapai naya, oó. Yekova aima fu wene gamahe fu aboro nga ranirii. Ko amanganga sunge na gako pagbia ka sa aboro ngbaome i gisangbako te. Aboro duwa ka i sia Bakusiahe nga Yekova ko me yó.—Oni gedi Yeremaya 18:7-10.

5. Ka aboro aidanga Yekova me yó ya, ko namangasunge na gako pagbia kuriyo wai?

⁵ Ono ginipai rengbe ka manga ka si du nga aboro aidanga Bakere Bamepere me yó te? Wai tie ko amangasunge na gako pagbia? Oni berẽnga tipa gupai ninaamanga ka pere nyaga watadu ka si angbanga ya. Bamehe ima rengba ka putaha ka me kura pere rogoho watadu ka baha kusayo. Ka pere kuru nigbegberẽhe, ingahe naye be bamehe. Anga wo duhe tipa Bame rani te. (Pa Rug. 32:4) Ho boro adeganga tuni ni sa ga Yekova arugute ya, dedede, ní du nga ingahe. Yekova namangasunge na gako pagbia kurii aboro niruga ko yó ringbisihe kuti wai i akaragapai kuti gako mehe. Agu aboro namangasunge wenengai na gako arugute i nagbia undo. Nikpiapai, mbedimbedi aKristano wakina gu ‘meme pere du sa irisa.’ Ono tipa aguyo nasoga ko, i wakina gu pere “du fu zinga i amangi he sa gbarasa ha.”—Rom. 9:19-23.

6, 7. Wai aBakindo Davide na Saura adu nikparakpara yó rogo gayo karagapai kuti ga Yekova rugute?

⁶ Gene sa dagba agu agene Yekova ame aboro ngbaha nga rogo arugute yo. Ani rengbe ka bi wai ko amangisunge na gako pagbia ti agu aboro ue ko ame yó nangia abakindo Saura na Davide. Ho Bakindo Davide amangi bäri ni na Bataseba, surungba gako mangapai aimisi ko gbiati kura aboro. Wa ko avurangia bakindo, Yekova aahenga fu nyanyaki arugute fuko te. Yekova akedi gako nebi nangia Natana ko fu nyanyaki arugute fuko. (2 Sam. 12:1-12) Gako karagapai adu wai? Ko aduna rungo kpotokoyo na ki saberã ko. Mbori ki inipai fuko.—Oni gedi 2 Samuere 12:13.

⁷ Ono tipa Bakindo Saura tigako, ko aakaraganga pai wenengai ho i aruguko ni te. Yekova azinahe fu Saura vurube gu nebi nangia Samuere ki yaa: Mo imi gu rakiraki ahe dunduko du rogo gu gbata nga ga aMareko. Saura agianga gi ga Mbori zinahe re te. Ko abatasi Agaga nangia gayo bakindo gbiati gu wenewene anyaa naadu yo. Tipagine? Tipa ka fu taarimo fu tiko. (1 Sam. 15:1-3, 7-9, 12) Ho Samuere aruguko ni, si aida ko umbasi tiko na ki mbu Bakere Bamepere ko rugu ko. Kuba gure, Saura aidanga i me ko te. Ko abihe nga ko aamanganga gbegberẽpai te. Ko abihe nga ko mangi rurupai mbiko agu anyaa ko aye na ami re, i rengbe arengba ka fura nimotumo, na ko abi ga Samuere rugute naapaha kusende. Yekova asogo Saura nibakindo, na gako pagume na Yekova akaraganga tihe berewe kubaha te.—Oni gedi 1 Samuere 15:13-15, 20-23.

MBORI AKPARANGA ABORO TE

8. Ginipai rengbe ani ka wirikaha ti gu gene aYisaraere akaragapai kuti ga Yekova mehe ngbaha?

⁸ Anga Yekova nafu gi momu re fu kina aboro nibasasa tipa i idi ko me yó te, ono fu rikaaboro dunduko a. Rogo 1513 M.B.K., Mbori akusi aYisaraere be sunge kanga Ezipeta yo na ki mangi mozunga naayo. AYisaraere angia gako siasia rikaaboro na i aduna momu tipa kadu na Bakere Bamepere ko nime yó. Ono tie, i aamanganga gupai naangba bangiri Yekova te, na i atona ka irisa agu ambori nga ga agu aboro naadu patiyo. Dedede, Yekova anaakeda anebi tipa i nirugu yó ono ka i aidanga ka degatuyo ya. (Yere. 35:12-15) Mbiko gayo nyakarii, Mbori afu nyanyaki mbusa fuyo. Gu kindo naadu ku nodiyo na angbatunga bawe rogoho, si ada wakina gu pere du tipa gbarasaha mbiko aAsuro azihe, na kina gu bangisapai re aBabero amangihe na agu angbatunga ue naadu na kindo beyo ku sudiyo yo. Nairiwo gu nyanyakipai ani awirikaha ti gipai re! Ani rengbe ka gbia undo tiga Yekova mehe kina gu ka ani degeturani wenengai fuko!

9, 10. Ginipai aboro Nineve amangihe tipa ga Mbori zahe?

⁹ Yekova afu momu a fu agu aboro naadu rogo gu ga aAsuro gbata nangia Nineve i karagapai kuti gako zahe. Ko aya fu Yona wee: “Mo gúari, ki ndu ku Nineve yo, nga gu bakere bakporo re, ki kpari kuti ni; bambiko gaha gbegberẽpai da ku bara bangire.” Nineve aima rẽ tipa i gbarasihe.—Yona 1:1, 2; 3:1-4.

¹⁰ Ono tie, ho Yona atungusi gi pangbanga re ni fuyo, “aboro Nineve ki idi pa Mbori; i ki taki pande pa gina riahe, ki nivo mbuzaroko, tona ti bakikindigi yo ki da ti umba pa yo.” Gayo bakindo “ki guari auru gako mbatabakindo, ki uru gako gbanga baukadi, ki vo mbuzaroko, ki nisungu kuke yo.” Aboro Nineve aima degatuyo kuti ga Yekova mehe na ki sa gayo berã. Nisangbana gipai re, Yekova agbarasanga yó te.—Yona 3:5-10.

11. Gini sino Yekova ani abihe rogo gako mangapai na aYisaraere gbiati aboro Nineve?

¹¹ Padu aYisaraere niga Yekova siasia aboro aabandanga yó ti mbusa te. Ono aboro Nineve aadunga rogo mozunga na Mbori te. Ono wa si avura duwo, Yekova akedi gako nebi ko ndu ka pepa gu gbarasahe ko aaye nani kuriyo na Yekova ainipai fuyo ho i aduni niwene pere beko yo. Nairiwo wai gi wene akpiapai re ayugo gupai nga gu gaani Mbori nga Yekova ko akparanga aboro te!—Pa Rug. 10:17.

YEKOVA NA RUGATINAPAI NA KO ANYENGA KUTI BANGISAPAI TE

12, 13. (a) Tipagine Mbori aʹaria berãko ti ni ho boro aida ni ko me ní? (b) Ginipai ka pa birõ Yekova tiko arengbe kadu fu Saura na tipa aboro Nineve?

¹² Gu gene Mbori ame rani ngbaha nayugo gupai nga ko na rugatinapai na ko anyenga kina kuti bangisapai te. Ani nabi gipai re ho Yekova adiaberã ni riimburu gu sinoko nga ruru sarangbanga tipa aboro ono ko kini ru berewe ka birõ tiko mbiko sayo gayo berã. Ziazia Kekeapai nape gupai nga, Yekova ‘abirĩ tiko wa ko amoi Saura nibakindo.’ (1 Sam. 15:11) Si nafura a tipa aboro Nineve ho i asaberã yó ni ki mbu gbegberẽ mangapai niyaa: “Ho Mbori abi gu pai ni i amangi he, Mbori ki sa tiko ti manga gu gbigbitapai, nga gu ko aya ko amanga yo na ni; ka ko amanga nga ha ya.”—Yona 3:10.

¹³ Yekova aʹaria berãko ti Saura du nibakindo na ki sogoko. Anga gi ariapai re amangi mbiko Yekova amangi gbegberẽ siapai te, ono mbiko Saura amangipai zanga idapase na ki basasangba ko. Ndikidi Mbori abirĩ tiko tipa aboro Nineve, nga ko aʹaria gako bipai tipa yó. Nangba ino gupai nga Yekova nga Bame rani ko na rugatinapai na ko anyenga kuti bangisapai te, ko nga boro weneringise na inapai, na ko na nyemu ka sa tiko ka si du nga gu boro ingipai niima sa gani berã!

KA ANI SOGONGA GA YEKOVA RUGUTE YA

14. (a) Waigu Yekova ame rani areme? (b) Waigu si aida ani karagapai kuti ga Yekova mehe?

¹⁴ Gu bambata he Yekova ame rani rogoho nga Fugoko nga Ziazia Kekeapai, gbiati gako riigbu. (2 Tim. 3:16, 17) Ya mo si aidanga ani di agu arugute ani agbia vurube he kugume te? Ka si vura du nga agarã rani wai kurogo rengo, watadu ani na gini ngbatunga amomu berani, si naida ani ndu kumbatayo kindi nidia ani ga Yekova arugute kugume, na ki mbuko ko me rani wagu pere du sa irisa.

15, 16. (a) Gini gbegberẽ bipai rengbe ka ye sa boro ka si du nga ní zanga gani amomu? Oni funga kpiapai tipa gipai re. (b) Ginihe rengbe ka undo rani tipa ani sovura kuti gu gbegberẽ bipai du boro nani ho i afu rugute ni funi?

¹⁵ Yekova ima rengba kafu gu kura arugute furani rogo yugopai yo. Ono wa vura duhe wo, kura aregbo kinaho ani aida na rugute mbiko ani amanganga gupai du niruruhe te. Ngbatunga gu rugute re rengbe kadu nga i di gaani amomu berani kusayo. Ani bingo gu kpiapai du tipa Dannisa namangisunge mbata nibakumba. Ko ati kurogo gbegberẽ mangapai mbiko iraira diaberã tipa sunge bagaahe, na ki zanga gako amomu. Dannis abi tiko wai rogo gu yuru i ape gupai fu dungurati nga ko berewe nibakumba te? Sangbako nga: “Mi abi tire nga sunge tire te. Vuru agu agarã 30 susi, mi aduna dungu amomu bere. Mi angia bazakigene, boro Betere, moundo abaakumba, na ni bakumba. Na mi mangi gimi bambata gumbapai barambeda rogo bakere dunguratise nga ga aʹuru biata. Agi apai re guari dũ tire wakina mabangirise. Kurii gu pazee mi adu nani, mi aberẽhe nga ba ho berewe tipa re rogo riigbu te.”

¹⁶ Nirengo, si aida Dannis aria gako gene raka, na ki mbakadi gu gbegberẽpai ko amangihe re. Ono ginihe naundo ko ko sovura kuti gu bipai ko adu nani re? Ko ayaa: “Mi adiberã tipa ka manga agu apai nga ga toro dedede. Na gu kura nyanyakipahe naundo re nga gu undo mi agbiaha be awirina na be gaani awaraga. Mi agedipai rogo Ngbaõbambu Sinziri nakuru rogo Banzinga 15, 2009 rogo pa-Ingirisi naafura tipa agu aboro namangisunge ni abaakumba mbata singia i rengbe ka mangaha berewe, na si adu fere wa Mbori karagapai kuti gimi kpee. Gu rugute naangba tire gbe rogoyo angia, ‘Wadu he nga atindiro bero awere rogo dungurati te, mo mangi ome tipa ka nyakasa tiro rogo toro yo.’” Waigu Dannis agbia undo be gi rugute re? Fuo bete agarã kusa, ko ayaa: “Yekova ima fu gu momu berewe fere nga mi mangisunge nimoundo abaakumba.”

17. Pa kusayo boro rogo dungurati naundo ní na gine? Oni funga kpiapai tipa gipai re.

¹⁷ Gu kura ngbatunga rugute Yekova afuhe furani nga kusa boro kusayo rogo dungurati. Si nabanda dungurati be gbegberẽpai na kini undo gu boro ingipai ní mbakadi gani sino raka. (1 Kor. 5:6, 7, 11) I akusi Robert kusayo rogo dungurati agarã ki mangi 16, na gu regbo re, avunguko, na awirinako, ara nigoyo fu gu ga Mbori arugute naya ka aboro kodinga tiyo watadu ka fu sene fu gu boro namanga gbegberẽpai ya. Bete agarã ima susa wa i nakaraga Robert, na ko nasona wenengai rogo toro yo. Ho i asanako ni tipa guhe naundoko ko karaga tiko fuo Yekova na fuo gako aboro fuo gi dungu agarã re, ko aya gu diaberã nangia ga gako aborokporo aima duna ome kuriko. “Ka avungure akoditiyo nami kandara tooni, wagu nga ka ye ka ngera tire, ka si afu wiri ngbarago afu fere, na si nawira wa, anga pa zanga mi koda tire naayo kangia gupai ka sa re mi karaga tire fuo Mbori te.”

18. Si naida ani du ni gini ngbatunga pere kube Bakere Bamepere yo?

¹⁸ Si rengbe kadu nga anga kina gu bangisa rugute re ani aidaha te, ono gini ngbatunga pere nikangia ani fu Bakere Bamepere? Gaani karagapai nikangia gine ka i rugu rani? Ya mo ani aduwa Davide watadu ani nikadu wa Saura? Bakere Bamepere nga Barani. Ka bangirani gonga ti gupai nga, “Yekova naruga gu ni ko nakpi nyemu ni, wa kina bagude na gu wirini ngba ti ni.” Sidu, ‘ka ani gindiga nga pa gu rugapai nga ga Yekova ya, watadu ka ani mbunga be gako zapai a ya.’—Snz. 3:11, 12.