‘Toro Na Gu Dee Kumba Nika Dia Ri, I Nayaa,“Mo Yé”’ — GU BA AWARAGA DU ROGO INTERNET nga ga Ngbaõbambu Sinziri

‘Toro Na Gu Dee Kumba Nika Dia Ri, I Nayaa,“Mo Yé”’

‘Toro na gu dee kumba nika dia ri, i nayaa, “Mo yé.” Guni nagiaha ni ki ya a, “Mo yé.” Guni gomoro ime amanga ni, ni ye, guni idihe, ni di ime-unga gbua.’—YUGO. 22:17.

1, 2. Gini bangiriba si aida ani moi ga Mbori Kindo rogoho rogo gaani raka, na tipagine?

GINI ba moi oni ga Mbori Kindo rogoho rogo gaoni raka? Yesu azinahe fu apefuoko ‘i naagbata ga Mbori ngbii mbata,’ na ki kido yó ki yawee, ka i mangihe wo, Mbori ye aye na agu ahe du yó na azingoho. (Mt. 6:25-33) Ko aringbisi ga Mbori Kindo kuti wene ambia-fongo, nga gu babagiahe ‘abagi gani ahe dunduko tipa ka ngbe’ gu sa na marãha. (Mt. 13:45, 46) Ya mo ani arengbanga ka ringbisapa gi nyanyaki ambia-fongo re kuti gu sunge nga ga Kindo gbiati sunge sa aboro ni abawiriki tee?

² A wa ani awirikihe rogo gu kekeapai ye mbata fu gere, ani abi gupai yo nga pa fura ani zanga gunde na kini mangisunge na Fugo Mbori nibirĩ gene tungusapai yo nayugo gupai nga, ga Mbori toro nangbe furani kumbatayo. Ga Mbori toro namanga nyanyakipa sunge ho ani amangasunge tungusapai ni dedede. Ani wisigingo wai si amanga gu sunge re.

Gu Yambahe Du fu Aboro Dunduko!

3. Gini ngbatunga ime i ayamba aboro ‘i ye’ tipaha?

³ Ziazia toro nayamba aboro dunduko. (Oni gedi Yugoti 22:17.) Gu yambahe nga ‘oni ye,’ si tipa aboro ye ka mbira wene ime wa ka i di gu gomoro ime kusayo namanga yó. Anga kungbo ime gbua ani afura tipaha te, pa masaku du nga gi fugo re. Wa vura duhe nga ime nga gu nyanyakipahe naundo ga aboro raka, anga kina boro gu ime re paha adu ri Yesu yo ho ko aafura ni fu gu de boro Somorona ko agbia ri pati guga te, ono ko afura tipa gu kura ngbatunga ime kia. Ko ayaa: “Ono gu ni ka mbiri gu ime ka mi fu fu ni gomoro ime mangi nga ni berewe te; gu ime ka mi fu fu ni si du kpotoni yo ni gugaabi niguku ku ari sa nyenye unga.” (Yo. 4:14) Gu ime dukia i ayamba aboro tipa i ye ka mbiraha re, si nafu nyenye unga.

4. Gine nasa gupai nga aboro tona kpinyemu gu ime nga ga unga, na gu ime re narukuba gine?

⁴ Aboro atona ka ngera tipa gu ime nga ga unga re fuo Adamu na diako basasangba gu boro nakusi yó nga Yekova. (Bam. P. 2:16, 17; 3:1-6) I ado gu bambata arogotise re rogo gu bawene kpuyo nadu wa ati mbiko gupai nga ‘ka Adamu taingo beko ka dia he rogo ngua unga ki rihe, tipa ka nye niungako kindi ya.’ (Bam. P. 3:22) Nidu Adamu nitita aboro dunduko, ko aye na kpio kurii ngbatunga aboro dunduko. (Rom. 5:12) Gu gamunihe nga ga ime nayugopa gu gamahe Mbori nafuhe tipa ka dia ingapai na kpio rii ruru aboro kusayo, na ki fu nyenye unga fuyó rogo Paradizo kpotosende. Gi gamunihe re nga gu motumo tumorii nga ga Yesu Kristo.—Mt. 20:28; Yo. 3:16; 1 Yo. 4:9, 10.

5. Da nga gu boro nayamba aboro ‘i ye ka mbira ime-unga gbua?’ Oni sakingo rogoyo.

⁵ Da natona yamba aboro ‘i ye tipa ka mbira ime-unga gbua’? Ho agu agamunihe nga ga unga re nika manga ni naabaha dunduko ti regbo gu ga Yesu zogarago nikadu tipa agarã kutu, si narukuba gu ‘di nga ga ime-unga, du nikurẽkurẽhe.’ Gu di re “nagbada tii gu mbatabakindo yo nga ga Mbori na ga Wiri Kandoro.” (Yugo. 22:1) Wa duhe nga Yekova nga bafu unga, ko nga mburu gu ime nafu unga. (Tam. 36:9) Ko nga gu boro nasa gupai nga gu ime re du fu aboro vurube “Wiri Kandoro” nga Yesu Kristo. (Yo. 1:29) Gi ime re nga guhe nika sa gupai nga Yekova di gu gbegberẽ apai dunduko naaye kurii aboro mbiko gu basasangba nangia ga Adamu. Sidu, Yekova du nayamba aboro ‘i ye.’

6. Gini regbo gu ‘di nga ga ime-unga’ atona ka gbada ti ni?

⁶ Wa vura duhe nga gu ‘di nga ga ime-unga’ nika gbada naabaha dunduko ti regbo gu zogarago nga ga Kristo nikadu tipa agarã kutu, si aima tona ka gbada “ti rago Gbia,” nga gu natona naapa maa “Wiri Kandoro” rii mbatabakindo rogo gu garã nangia 1914. (Yugo. 1:10) Sidu, gu kura agamunihe nga ga unga atona ka da tingbafuo gu regbo re. Agu agamunihe re nakoda Fugo Mbori nga Ziazia Kekeapai, mbiko i nafura tipa gaha pangbanga ya si wa “ime.” (Ef. 5:26) Gu yambahe du tipa ‘dia gu ime-unga’ re, nga gu nakoda degatue kuti gu wene pangbanga nga ga Kindo, si nizakizakihe fu aboro dunduko. Ono da nga gu boro nayamba aboro tipa gu ime re ti rago Gbia areme?

‘Gu Dee Kumba Nika Dia Ri,’ I Nayaa, “Mo Yé”

7. Ada natona ka yambahe “ti rago Gbia” na gu yambahe nga “Mo yé”?

⁷ Awirina gu dee kumba nika dia ri nga mbedimbedi aKristano, na i nga gu bambata aboro nata gia gu yambahe re i kini ndu nani kumbatayo. Ada gu dee re ayambayo? Si ziazia nga, ri ayambanga kina ti ri te. Ri nape gipai re fu agu aboro duna maabangirise tipa ka gbia nyenye unga auru kpotosende tingbafuo “gu vura nga ga gu bakere rago nga ga Mbori, nga gu ko du na tandu apai dũ.”—Oni gedi Yugoti 16:14, 16.

8. Ginipai nayugo gupai nga, mbedimbedi aKristano aima digo nitangbayo na gu yambahe nga ga Yekova tona rogo gu garã nangia 1918?

⁸ Agu apefuo Kristo nga mbedimbedi aKristano, i aima tona ka yamba aboro rogo gu garã nangia 1918. Rogo gu garã re, gu gumbapai nadu tipa aboro dunduko riihe angia “Millions Now Living May Never Die [Badungu Amirioni Aboro Naaraka Awere Rengbe Arengba ka He Kpiko],” si afu maabangirise fu dungu aboro tipa nyenye unga rogo paradizo auru kpotosende nga gupai nika manga tingbafuo gu vura nga Aramegido. Gu gumbapai i amangihe rogo bakere dunguratise nga ga Abawiriki Ziazia Kekeapai rogo gu gbata nga Cedar Point, Ohio, Amerika yo, rogo gu garã nangia 1922, si azungadi agu aboro naadegatuyo sani i ‘takipande Bakindo na gako Kindo.’ Gi zungadihe re aundo mbedimbedi aKristano i tona ka tungusapai fu badungu aboro. Rogo gu garã nangia 1929, gu Ngbaõbambu Sinziri nangia ga Marungu 15 aduna kekepai rogoho riihe adu nga “Gracious Invitation [Yambahe Nga ga Nunga]” na i amangisunge na Yugoti 22:17 nigu veresi du ti riipai. Papara gu magazini re ayaa: “Gu riko nga ga yangara mbedimbedi aKristano, gbiati guko nga Bahe kisusi, i nayambahe ninunga niyaa, “Mo yé.” I natungusa gi pangbanga re fu agu aboro duna nyemu rurupai tiyó gbiati rengo. Si naida i tungusihe awere.” Ti agi aregbo re, gu riko nga ga gu dee kumba nika dia ri re, si nandu kindi kumbatayo na gu yambahe re.

‘Guni Nagiaha Ni Ki Ya A, “Mo Yé” ’

9, 10. Wai i angarasa agu aboro nagia yambahe i naayamba kura aboro a tigayo kini yaa, ‘Oni ye’?

⁹ Ginipai tigaha du tipa agu aboro i ayambayo nga ‘i ye’? I nayamba yó tipa i naayamba kura aboro a kini ya fuyó: ‘Oni ye.’ Nikpiapai, gu Ngbaõbambu Sinziri nangia ga Buza 1, 1932 asakipai ti kpewaraga 232 ki yaa: “Si naida mbedimbedi aKristano ngarasi agu aboro dunduko idi naapa gi yambahe re tipa i naatungusa gu wene pangbanga nga ga Kindo. Si aidanga i du mbata nga kina ga Gbia mbedimbedi aboro i nimo ka tungusa ga Gbia pangbanga te. Gupai nafu wasa fu aDezire Yekova nga pa ino yó gupai nga, i ima idaha fuyó tipa i fu gu ime nga ga unga fu agu aboro rengbe arengba ka kpiko ti regbo Aramegido tipa wa ka i gbia nyenye unga auru kpotosende.”

¹⁰ Gu Ngbaõbambu Sinziri nangia ga Buza 15, 1934, ti kpewaraga 249, anyakasipa gu tindiro du fu agu aboro nagia gu yambahe du tipa mbira ime re tipa i yambu akurayo wa ka ‘i ye’ ka mbiraha a tigayo. Si asakipai ki yaa: “Si naida gu riko nga ga Yonadaba koditiyo na agu aboro narukuba Yeu nga mbedimbedi aKristano kaa tungusa gu wene pangbanga nga ga Kindo wa avuranga du yó ni agu aDezire Yekova du nimbedimbediyo ya.” Rogo 1935, i aini agu aboro gumbayó payo rogo Yugoti 7:9-17 ni “bakere rimbasa aboro.” Gi bakere rimbasa aboro re du kiisi gu sunge nga ga yamba aboro re. Natona ti gu regbo re kada ku awere, gu bakere rimbasa nga ga ndikidi airisimbori bangeyo akio kina kumbatayo i ima susa amirioni saba. I ima karagapai kuti gu yambahe re. Fuo i gi gu pangbanga re, si asa yó i kpara gayó raka fu Mbori, ki zi bapatiza, ki koditiyo na gu riko nga ga gu dee kumba nika dia ri na kini yambu aboro ‘i ye ka mbira ime-unga gbua.’

“Toro” Nayaa, “Mo Yé”

11. Wai ziazia toro asongodi sunge tungusapai rogo bambata sa kama agarã F.B.K.?

¹¹ Ho Yesu aatungusapai ni rogo bambutiria Nazareta yo ti kura regbo sa, ko azaki gu kitabu nga Yesaya ki tona ka gedapai niyaa: “Ga Gbia Toro ti re, bambiko ko auka nzeme ku ri re mi tungusi wene pangbanga fu rungorungo aboro. Ko akedi re mi gumba pa kusa kisikisi aboro fu kina yo, na pa hahasa bangiri airavurari, ka kusa agu aboro du ni rungosirungosi yo, ki nitungusi pa garã ga Gbia inapai.” Fuo gure, ko ayawee gi sangbanebi re ima digo kutiko. Ko ayaa: “Areme da gi Ziazia Kekeapai re ti rengo ku turoni yo.” (Ruka 4:17-21) Mbata fu Yesu ga ku ngbangbaturũ yo, ko aya fu gako abawiriki wee: “Oni adía tandu ho Ziazia Toro ka ye ni ku ri roni. Oni adu ni adezirere, . . . [da ku] digida sende yo.” (Amo. 1:8) Rogo bambata sa kama agarã, ziazia toro asongodi sunge tungusapai bakere gbe.

12. Wai ziazia toro asongoda sunge yamba aboro tipa ime-unga ti gi gaani regbo re?

¹² Wai ziazia toro asongoda sunge yamba aboro tipa ime-unga? Yekova nga gu boro ziazia toro aenga tiní. Ko namangasunge na gako toro ka zaka ngbadu gu riko yo nga ga gu dee kumba nika dia ri i girogo Ziazia Kekeapai nga Fugoko. Ziazia toro nafõngbaduyo yo i naayamba aboro tipa i duna maabangirise ka raka nyeanye kindi auru kpotosende na si naundo yó a i naasakarogo Ziazia Kekeapai fuyó. Ginipai du tipa agu aboro idipa gu yambahe re na ki sa tiyo niga Yesu Kristo abawiriki na kini ndu kaa yamba kura aboro tipa i sa tiyo niga Yesu abawiriki? Toro naundo yó aundo a. Wa duhe nga i azi bapatiza ‘ti rimo ziazia toro,’ i namangapai kina kubani sa na gu toro re na kini kido kuti ni. (Mt. 28:19) Ani berẽnga berewe tipa gu pangbanga mbedimbedi aKristano gbiati bakere rimbasa aboro atungusaha. Gu pangbanga re rogo Ziazia Kekeapai, nga gu buku i akehe mbiko ga Mbori ziazia toro. Si du nga ndu gupai Ziazia Kekeapai aya ti ni wee ziazia toro du nayamba aboro. Ziazia toro nga guhe nayugo gene furani. Wa duhe tie were, bakio regbo wai si aida ani naadiaha kutingba gi sunge nga ga yamba aboro re?

‘I Nayaa, “Mo Yé” ’

13. Rogo gu fugoyo nga “toro na gu dee kumba nika dia ri, i nayambahe kindi niyaa: ‘Mo yé!’ ” nga gine?

¹³ “Toro na gu de kumba nikadia ri” ayanga aya gbua wee, ‘Mo yé’ te. Gu bambata fugo i ake gipai re rogoho, si nayugopa gupai namanga amanga kaa ndu kumbatayo kindi. Si du nga ndu gupai gu kura Ziazia Kekeapai sa asa gu fugo re ti ni wa gere: “Toro na gu dee kumba nika dia ri, i nayambahe kindi niyaa: ‘Mo yé!’ ” (New World Translation) Gu fugo re nayugo gupai nga, i namanga gu sunge re amanga kindi. Ginipai du tipa agu aboro nagiaha na kini idi na gu yambahe re? I a nayaa, ‘Oni ye.’ Ziazia Kekeapai nafura tipa gu bakere rimbasa aboro nga airisimbori ya “i namanga pa [Yekova] uru na yuru rogo gako yekaru.” (Yugo. 7:9, 15) Wai du i amanga gu sunge re nga ‘uru na yuru’? (Oni gedi Ruka 2:36, 37; Amokedi 20:31; 2 ATesaroniko 3:8.) Gu kpiapai du tipa gu sosono de-nebi nangia Ana na gu du tipa gu mokedi nangia Pauro, nga i anaamangasunge ‘uru na yuru,’ si nayugopa nye boro kuti mangasunge kakaka. Anga si nga boro namangasunge sasasa watadu pitipiti te.

14, 15. Wai Daniere ayugupa wai nyakipa irisombori zanga piriga ti ni?

¹⁴ Gupai a nadu tipa gu nebi nangia Daniere nayugo wai nyakipa irisombori zanga piriga ti ni. (Oni gedi Daniere 6:4-10, 16.) Ho bakindo arũndiko ni ya ka boro kparingo fu gani mbori ya, Daniere aambunga gu gako mangaapai nga ga toro te, nangia kparakpee fu Mbori “wa bara biata na uru . . . a wa ko anamanga ha mbata.” Ko aambunga mangaha tipa diwi kandara sa te, wa pa mangako ho wo avura du nga i nika ba ko aba kurogo sima abahu vurũ. Ko aima yugo gupai fu aboro na gu gako mangaapai re nga, anga pai ho nyakipaha kisusi iriso Yekova te!—Mt. 5:16.

¹⁵ Fuo dia Daniere yuru naabaha ku sima abahu yo, kina boro bakindo nitiko nandu koyo wiso ki poi kuari ki yaa: “Ako Daniere, nga moyambu unga Mbori, ga Mbori nga gu ko mo namanga pa ko kindi, ko rengbe na batasa ro be abahu?” Daniere akaragapai niipo ki yaa: “Ako bakindo, mo nyé ni unga ro kindi! Gi Mbori nikedi gako maraika ko kisi ngba abahu, ami amanga nga re te, bambiko mi zanga gbegberẽpai kubangiriko. Ako bakindo, na ku bangiro a mi amanga nga irairapai te.” Yekova abatasi Daniere mbiko ko ‘anaamanga pa gako Mbori kindi.’—Dan. 6:19-22.

16. Gini asanahe gu kpiapai nga ga Daniere asa rani ani sana tirani nani nibipa tungusapai?

¹⁶ Daniere aduna nyemu ka kpi ti gu nga ka mbu gako irisombori. Ginipai du tipa rani tigaani? Gini apai mbu ani paha tipa kaa takapande gu wene pangbanga du tipa ga Mbori Kindo, watadu gini apai du ani na nyemu ka mbuhe tipaha? Si aidanga ani mbu diwi u susi ani ki he fura tipa Yekova te. Ka si du nga gene kinaho, tipagine ka ani atungusanga pai ti ni rogo aposo dunduko ya? Ka si vura du nga kpotorani ambunga gene furani te, ani rengbe arengba ka tungusapai rogo diwi sa tipa kina kandara aminiti 15, si naida ani fuhe afu nigaani ripoti. Tipagine si aida ani fuhe ti ni? Bambiko ani gbiati toro na gu dee kumba nika dia ri, ani naida kaa yamba aboro kindi niyaa: ‘Oni ye.’ Sidu, ani naida ka manga agu apai dunduko rengbe omerani nani kaa takapande Kindo dedede.

17. Gini amomu Yekova nafuhe furani nga gu si aidanga ani zangaha ya?

¹⁷ Si naida ani naagbata amomu tipa ka pepa gu yambahe fu aboro Yekova ayamba yó nani, angianga ti kina agu aregbo ani akparaha tipa tungusapai sa ya. Nangbaa gu momu du berani nga ani naayamba agu aboro duna gomoro ime ti kura aregbo, wa ho ani angbeka ahe ni, ho du ani ni ngba nunguro, ho du ani ni rogo ongoda, ti regbo sunge, watadu sukuru yo tipa ‘i ye ka mbira ime-unga gbua’! Ka si vura du nga abazogo nazahe ti gaani sunge tungusapai, ani nasusa kumbatayo kindi na gi sunge re nibirĩ, isoke, niguka ani rii akporo wa ani atangara akporo na wene pangbanga watadu kaa manga dezirepai angianga kuti asino mangaha ya.

Oni Naayambahe Kindi Niyaa, “Mo Yé”

18, 19. Wai oni ayugo gupai nga oni nabi gu momu du beroni nga ga mangasunge na Mbori na kikiipaha?

¹⁸ Toro na gu dee kumba nika dia ri aima digo niyambu agu aboro duna gomoro ime ‘i ye’ ka mbira ime-unga gbua. Ya mo oni gi gi yambahe re? Kangia oni ima giaha, i nangarasa roni oni naayamba kura aboro a.

¹⁹ Ani ainongo bagizo regbo wai nye koyo Yekova ki mbu yamba aboro te, ono pa ida ani naapa gu yambahe re na kini yambu kura aboro nga, ‘Oni ye’ nasa rani ani du niga Mbori abadiasunge. (1 Kor. 3:6, 9) Nangbaa gu momu du berani re! Ani naayugungo gupai ayugo nga ani nabi gu momu re na kikiipaha na kini “tumo ni motumo tambuahe fu Mbori” nga kaa tungusapai dedede. (Eb. 13:15) Si naida ani kodi berani na gu riko nga ga gu dee kumba nika dia ri kaa yamba aboro niyaa, ‘Oni ye.’ Na gu kura dungu aboro ‘mbiringa gi ime-unga re ambira gbua’!