Oni Wiriki Wai Ka Ino Mangasunge Na “Gu Basape Nga Ga Toro”
‘Oni di gu basape nga ga toro, nga sangba Mbori.’—EF. 6:17.
1, 2. Ginipai si aida ani mangihe kuti gu zingo duho tipa kura atakipande Kindo?
FUO Yesu bi gu zingo nga ga toro nadu ti rimbasa aboro, ko aya fu gako abawiriki wee: “Zuzuhe ni bakere he ni rengo, ono abamangisunge ni kina umba yo. Oni kpári tie fu gu Gbia du zuzuhe ni gako, ko kedi abamangisunge ku rogo gako ati zuzuhe.” Anga kina gupai re Yesu agumbaha ki nye kuho te. Fuo ko gumba agu apai re, ko ‘ayambu gu gako abawiriki naanidu bawe-na-ue fuoko,’ ki kedi yó i ndu sa gu tua nga ga tungusapai watadu ka ndu ka ‘ke aũati.’ (Mt. 9:35-38; 10:1, 5) Kusa, Yesu ‘asia akurayo 70, ki kedi yo niba-ue-ue’ i ndu ka manga kina gu bangisa sunge re.—Ruka 10:1, 2.
2 Bakere zingo duho areme a tipa atakipande Kindo. Bange agu aboro rogo zegino dunduko naye kupati Tingida Pakpio Yesu rogo gu garã sunge nga 2009 adu nga 18,168,539. Gu namba re asusi bange aDezire Yekova na amirioni susi 10. Aũati ima zama tipa i kehe nirengo! (Yo. 4:34, 35) Sidu tie, si naida ani naakpara tipa Mbori kedi kura abamangisunge. Ono wai rengbe ani ka mangapai na ngbanya kuti gu gaani sanahe re? Ani rengbe ka mangaha nisa ani tirani niwene abamangisunge kini tungusipa Kindo na kini sa aboro ni abawiriki.—Mt. 28:19, 20; Mk. 13:10.
3. Wai ga Mbori toro aundo rani ani du niwene abatungusipai?
3 Gu kekeapai ye mbata fu gere fura tipa wai pa mbu ani ga Mbori toro si naayugo gene furani aundo rani ani ‘naapeka ga Mbori pai zukazuka.’ (Amo. 4:31) Gu toro re rengbe arengba ka undo rani ani ini birĩ tungusapai. Gene sa dagba agu akuraha rengbe ani ngbaha ka mbakada sino gaani sunge tungusapai nga ka mangasunge na gu ũsunge Yekova nafuhe furani nga Ziazia Kekeapai. Gi buku re aye be ga Mbori toro. (2 Tim. 3:16) Gu pangbanga du rogoho, si aye be ga Mbori toro. Sidu, ho ani asakarogo Ziazia Kekeapai ni tingba gaani sunge tungusapai, gure nga ziazia toro naruga rani nani. Mbata fu ani fura tipa wai rengbe ani ka mangaha, ani bingo bakio gu ome du ti fugo Mbori.
‘Fugo Mbori na Tandu’
4. Gini ariapai rengbe gu pangbanga du rogo Ziazia Kekeapai ka mangaha rogo ga boro raka?
4 Nairiwo gu ome du ti fugo Mbori! (Eb. 4:12) Ka pepai nimasaku, gu pangbanga du rogo Ziazia Kekeapai, si tii kisusi gu basape duna arindihe ue na si narũ boro ki da ti ngbazunga ní na nzeme meme ní. Gu rengo du rogo Ziazia Kekeapai, si narimo kurogo ga boro berã na ku ngbaduniyo na ki yugu gu boro nga ní nzunzu wa du ní ku kpotoniyo. Gu ome du ti rengo, si naye na ariapai rogo ga boro raka. (Oni gedi AKorosaio 3:10.) Nirengo, fugo Mbori nasa aboro asa i mangi ariapai rogo gayó raka!
5. Rogo gini agene rengbe Ziazia Kekeapai ka yugo gene furani, na sangbanaha rengbe kadu na gine?
5 Kurigure, Ziazia Kekeapai na gu tatamana rogoho adunga rogo kura abuku ya. Si na agu atingidapai rogoho rengbe ka undo rani tipa wai ka raka rogo gi zegino hi be fudifudiapai re. Fugo Mbori nahasa rago furani barabangirani na kumbatayo a. (Tam. 119:105) Si naundo rani bakere gbe ho ani amangapai ni kuti gu fudifudipai du ani rogoho watadu ho ani aida ka manga diaberã ni nibipa agu aboro ani aida ka zio bakure naayó, nibipa agu aũwasa ani aidaha, na nibipa gu sunge-marã ani aida ka zioho, na agu akuraha. (Tam. 37:25; Snz. 13:20; Yo. 15:14; 1 Tim. 2:9) Pa manga ani agu arugute du rogo fugo Mbori nasaha furani taata ani mangipai na akuarani ngba wene gene. (Mt. 7:12; Frp. 2:3, 4) Ka ani mbu Fugo Mbori si naahasa rago furani ngba gaani gene, ani ini wai aino rengbe gaani adiaberã kadu na sangbanaha furani kumbatayo. (1 Tim. 6:9) Ziazia Kekeapai nagumbapa ga Mbori ringbisapai kumbatayo nga gu naundo rani ani mangipai ringbisihe kuti gu gako ringbisapai re. (Mt. 6:33; 1 Yo. 2:17, 18) Nairiwo gu ngbarago nga ka raka gu raka duna maabangirise ka ani mbu fugo Mbori si naangbe furani kumbatayo!
6. Wai nyakipa gu ũvura nga Ziazia Kekeapai rogo gu vura nga ga toro?
6 Oni berẽnga pa wai gu nyanyaki ũvura nga Ziazia Kekeapai aundo rani ani so gu vura nga ga toro. Pauro ayambu Fugo Mbori nga “gu basape nga ga Toro.” (Oni gedi AEfeso 6:12, 17.) Ho ani agumba sangba Ziazia Kekeapai ni ngba wene gene, si nasa gupai nga aboro kuru kusayo be Satana. Si nga gu basape nabatasa aboro angianga ka gbarasa yó ya. Ya mo si aidanga ani mangi asadatise tipa ka mangasunge nani rogo tatamana yo te?
Ani Mangisunge na Fugo Mbori
7. Wai nyakipa wirika mangasunge wenengai na “gu basape nga ga Toro”?
7 Banzengere rengbe ka mangasunge na gaani aũvura ngba wene gene kinagu ka singia ní ima wirika mangasunge nani wenengai. Kina gu bangisapai re a du tipa mangasunge na “gu basape nga ga Toro” rogo so gu vura nga ga toro. Pauro akepai ki yaa: “Mo ké na mbakada pa tiro bangiri Mbori, ko idi pa ro wa gu mangisunge adu nga na zee ya, niyugu ga rengo pai nzunzu.”—2 Tim. 2:15.
8, 9. Gine nika undo rani ani girogo gupai Ziazia Kekeapai agumbaha? Oni funga kpiapai tipaha.
8 Ginipai rengbe ka undo rani ani ‘niyugu rengo nzunzu’ gene tungusapai yo? Mbata fu ani tungusihe fu aboro, si naida ani rugutirani wenengai na gupai ani andu ka gumbaha. Si naida ani moiberã rani wenengai fuo gupai du rogo gu veresi ani agedaha watadu gu waraga ani atungusapai nani. Buku sa nasakarogo afugoyo nayawee “tiiworo fugo nakoda agu afugo ye mbata fu gu fugo ani afura tipaha na gu ye tingbafuoho na si kini undo rani ani ini rogo gu fugoyo re wenengai.”
9 Tipa ani girogo gu veresi watadu averesi nga ga Ziazia Kekeapai wenengai, si naida ani makia agu apai du pati gu veresi re. Gupai Pauro akehe du rogo AGaratio 5:13, si nayugo rengo gupai re. Ko ayaa: “Oni, awirina, i ayambu roni sa raniri; ono ka oni sá nga gaoni raniri sa peka pa borose ya; kina manga pa akuaroni dagba roni mbiko nyemuse.” Gini ngbatunga ranirii Pauro afura tipaha herẽ? Ya mo ko afura tipa ranirii be ingapai na kpio watadu kura kusayo be sunge kanga nga ga zire ida watadu kurapai kia? Gupai Pauro afura tipaha nga gu ranirii boro agbiaha mbiko i ‘tumo rini be gu motiwa nga ga rugute.’ (Gara. 3:13, 19-24; 4:1-5) Gu ranirii nga ga aKristano ko afura tipaha. Agu aboro nadu na tambuahe tipa gu ranirii re anaandusunge akurayó mbiko nyemuse. Aguyo naaidanga ha ya anaagumbarimo akurayó na kini tona apapaya naayo.—Gara. 5:15.
10. Tipa ani rengbe ka giarogo veresi yo watadu rogo averesi yo wenengai, gini kura apai si aida ani wisigihe, na wai ani agbiaha?
10 Tipa ani rengbe ka giarogo veresi yo watadu averesi wenengai, si naida ani inipai tipa gu boro nake gu kitabu nga ga Ziazia Kekeapai re, gu regbo ní akehe ti ni na gupai naamanga ti gu regbo re. Si daada a ani ini ndu gupai i ake gu kitabu re ti ni, na ka inopai tipa gu sino mangaapai aboro aamangaha ti gu regbo re, gbiati agu apambori aboro adu rogoho.a
11. Ginipai si aida ani moiberã rani fuoho ho ani asakarogo Ziazia Kekeapai ni fu aboro?
11 Pa ‘yugo ani rengo nzunzu’ nakoda gu kura apai kupati gu nga sakarogo Ziazia Kekeapai nzunzu. Si naida ani bandatirani ki zanga mangasunge na Ziazia Kekeapai ka ba gunde ti aboro. Wa vura duhe nga ani namangasunge na Ziazia Kekeapai tipa ka rugusapai bangiri aboro tipa rengo wa gu Yesu amangisunge nani ho bakitingbanga aʹasadiko ni, si aidanga ani mangisunge nani ka ba zee ti aboro watadu ka gundesi yó te. (Pa Rug. 6:16; 8:3; 10:20; Mt. 4:4, 7, 10) Si naida ani irisi agu arugute gu mokedi nangia Petero agumbaha nga: “Oni kpára Kristo kpotoroni yo ni gaoni Gbia. Oni ki mbakadi tironi dedede tipa karaga pai fu agu yo dunduko ka sana roni tipa gu pai du maabangirise ti roni mbiko ho, ono ni zera na irisa.”—1 Pet. 3:15.
12, 13. Gini “nyanyaki agbata” gu rengo du rogo Fugo Mbori narengbe ka bafaha? Oni funga kpiapai.
12 Ginipai rengbe gu rengo du rogo Ziazia Kekeapai ka mangaha ka ani mangisunge nani wenengai? (Oni gedi 2 AKorindo 10:4, 5.) Gu rengo du rogo Ziazia Kekeapai rengbe ka “bafa nyanyaki agbata.” Gu nyanyaki agbata re nga agu aida nga ga zire pambori, gu mangaapai naye na kaza fu boro, na gu wisigopai dudunguroo tipa raka kpakpa aboro amangaha. Ani rengbe ka mangasunge na Ziazia Kekeapai ka karawa agu apai kusayo dunduko aboro “nakiisa ha kuti gu inahe nga ga Mbori.” Ani rengbe arengba ka mangasunge na agu apai Ziazia Kekeapai ayugoho ka sa aboro i sa gayó berã si naandu kina sa na gu rengo du rogo Ziazia Kekeapai.
13 Ani dinga gu kpiapai du tipa gu sosono nagbia naraka India yo du garãri 93. I atona ka yugo gupai furi mbu ri kindi nifogo gude nga, fuo kpio boro, i nabatika ní berewe na kura kpotose. Wiiri naaraka rogo kura ringara atona kaa wisigo Ziazia Kekeapai na ri nikeka ko awaraga furi. Ri aidi kuti gupai ri aawirikaha tipa Yekova na tipa gako akidohe nikina ipo. Ono mbiko gu gari mbaku ida ri adu nani tipa gupai nga ga batika boro berewe na vovo kpotoni, ri aaidanga kuti gupai Ziazia Kekeapai agumbaha tipa kpikpi aboro te. Ri ayaa: “Mi aruganga tire naapa gu rengo du rogo gaoni Ziazia Kekeapai te. Apambori dunduko nayugo gupai ngawee hee gudu rogo rani yo akpingo ya. Gupai mi naidi kuti ni nga kpoto boro nakpi, fuo gure, gu papara boro ka i abingo ho ya nandu i batikaha berewe rogo kura kpotose na i nabatika boro berewe ngba gi gene re wa bara 8,400,000. Wai gipai re arengbanga kadu ti ni nga rengo ya? Ya mo gi dungu apambori re, runga ha tee?” Ya mo gu basape nga ga toro, si rengbe ka de gi nyanyaki ida re kusayo? Fuo i saki kura apai tipa gipai re, ri ake waraga fuko fuo bete adiwi ki yaa: “Mi tona ka rugatire tie awere na gu rengo nzunzu du tipa kpio. Mi awere na bakere ngbarago ka rugatire na gupai nga, ho Mbori nika zingisa aboro ni, mi nika gbia agu abadiangbare agbia naakpiki. Mi naida ga Mbori Kindo ye tie niipo.”
Oni Zungodi Aboro Nani
14. Gine nga ka zungodi boro?
14 Anga pa manga boro sunge wenengai na Ziazia Kekeapai gene sunge tungusapai yo nga ino rogoda kina apai rogoho sa te. Pauro ‘anaazungodi aboro azungodi,’ sidu, si naida ani naamanga kina gu bangisapai re. (Oni gedi Amokedi 19:8, 9; 28:23.) Ka ‘zungodi’ boro nga ‘ka sa ní ní idi kutipai.’ Ho i azungodi boro ni, ní naida kuti gupai i azungodi ní kuti ni re mbiko gupai re ima ru bangirini. Ho ani azungodi boro ni ní idi kutipai rogo Ziazia Kekeapai, gure nga ani sa ní ní kido kuti gupai re. Tipa ani rengbe ka manga gipai re, si naida ani rugusipai bangiri agu aboro ani afura fuyó i ini rengo gupai ani agumbaha. Ani rengbe ka manga gipai re ngba gi gene re.
15. Wai rengbe ani ka gbeberã aboro kuti Ziazia Kekeapai ngba gu gene nika sa yó i du na irisa tipaha?
15 Oni gbeberã aboro kuti Fugo Mbori ngba gu gene nika sa yó i du na irisa tipaha. Ho oni afura ni tipa veresi fu boro, si naida oni gbeberã ní ní ini wai nyakipa ino ga Mbori bipai tipa pai. Fuo oni sana boro na ki gi gani karagapai, oni rengbe ka gumbapai wa ngbatunga gere, ‘Ani bingo ga Mbori bipai tipa gipai re.’ Watadu oni rengbe ka sana ní ki yaa, ‘Ginipai Mbori agumbaha tipa gipai re?’ Pa fura ani wa gere fu boro nayugo gupai nga, Ziazia Kekeapai aye be Mbori na si nasa boro ní du na irisa tipa Ziazia Kekeapai. Pa manga ani he wo na nyanyakipaha ho ani amanga dezirepai ni fu gu boro idi kuti Mbori ono aruganga tiní na gupai Ziazia Kekeapai ayugoho ya.—Tam. 19:7-10.
16. Gine rengbe ka undo roni oni sakirogo Ziazia Kekeapai wenengai?
16 Oni tageda Ziazia Kekeapai kini sakirogoyo. Sino Pauro angia ‘sakarogo agu apai ko anaayugoho na kini yugubaraha.’ (Amo. 17:3, NW ) Veresi watadu averesi nidu dedede na dungu memeapai rogoho, sidu, si naida oni ini gu banguapai du rogoho nga gu oni asakapai tipaha. Oni rengbe ka manga gipai re nifura oni tipa gu memepai re watadu ka sana gu boro oni afura nani na gu sanahe nika sa ní ní ini gu memepai re. Fuo gure, oni sakirogo gu papara veresi re. Fuo manga oni gupai re, oni undo ní ní bi wai si aida ní mangi sangba gu veresi re rogo gani raka yo.
17. Wai rengbe oni ka sakapai na boro rogo Ziazia Kekeapai ngba gu gene nika rugusapai bangirini?
17 Oni sakipai na boro rogo Ziazia Kekeapai ngba gu gene nika rugusapai bangirini. Pauro atazungodi aboro kini gumbapai fuyó ngba ruru gene na kini ‘sakipai naayó rogo Ziazia Kekeapai.’ (Amo. 17:2, 4) Si naida ani mangi asadatise ka rimisopai ku ngbadu aboro yo wakinagu ko anaamangaha re. Oni ‘kusi’ agu apai du ngbadu boro yo nimanga oni sunge na wene asanahe nga agu asanahe nasa ní ní ini gupai nga nyemu ní kina tironi. (Snz. 20:5) Oni ne gu sino nga ga sakparakpa. Oni naarugusapai bangiri aboro ngba ruru gene na si kidu ziazia. Si naida oni yugu gu wene gopai duho tipaha. Si naida mburu agu apai oni ayugoho re du rii Fugo Mbori. Si niwenepai ani gedi veresi sa ki sakirogoyo wenengai ti gu nga ka geda dungu averesi ka regbo adunga berani ka sakarogoyo ya. Pa manga ani sunge na kura agopai nasa gupai nga ‘ngbarani zomia’ aboro. (Snz. 16:23) Ti kura aregbo, si rengbe ka ida gupai berani nga ani wetekeapai tipa ka gbia kura apai. Gu sosono nagbia ani nifura tipa ri du garãri 93, ri aaida ka ino ndu gupai gu yugopai du tipa mbisimo (watadu toro boro) ya si niguhe zanga kpio namoipai ti ni rogo arago dũ. Pa ruga ri tiri naapa gu ba gupai re aenge rogoho na ki rimi kurogo dungu apambori rogo zegino angia gupai si aaida i zomia ri nani tipa ri idi kuti gupai Ziazia Kekeapai ayugoho tipa gipai re.b
Oni Naamangasunge Nani Kindi na Birĩ
18, 19. Tipagine si aida ti ni ani naamangasunge kindi na “gu basape nga ga Toro”?
18 Ziazia Kekeapai nayaa: “Gi zegino re nago ago.” Sino gbegberẽ aboro nagberã kina kumbatayo. (1 Kor. 7:31; 2 Tim. 3:13) Si ninyanyakipa pai ani bafu “nyanyaki agbata,” nimanga ani sunge na “gu basape nga ga Toro, nga sangba Mbori.”
19 Nairiwo gu ngbarago du ani nani mbiko ani na Ziazia Kekeapai berani nga Fugo Mbori, na ka mangasunge nani ka dia zire yugopai kusayo na ka rimiso rengo ku ngbadu ruru aboro yo! Hee ho nyakipaha kisusi gu pangbanga re te. Sidu tie, ani mangi bakere asadatise ka ino wai ka mangasunge na ‘gi basape nga ga toro’ re wenengai tingba gu sunge Mbori afuhe furani nga ga takapande gako Kindo.
[Gu rukutu kekeapai du bandu kpewaraga yo]
a Agu abuku rengbe ka undo rani ani ini kura apai tipa agu akitabu du rogo Ziazia Kekeapai nga “All Scripture Is Inspired of God and Beneficial,” Insight on the Scriptures, na ngbatunga gu kekeapai du riihe nga ‘Fugo Yekova Niungaha,’ du rogo aNgbaõbambu Sinziri.
b Oni bi gu burosua nga Ginipai Ninamanga Rani Ho Ani Akpiko Ni? ti kpewaraga 5-16.
[Gu kpiahe du ti kpewaraga 21]
Gu Gene Rengbe Ani Ngbaha ka Mangasunge na Ziazia Kekeapai
[Gu kpiahe du ti kpewaraga 21]
▪ Oni zungodi aboro i du na irisa tipaha
▪ Oni sakirogo averesi yo
▪ Oni sakirogopai yo wenengai tipa ka rimisopai ku ngbadu aboro yo
[Gu kpiahe du ti kpewaraga 20]
Si naida ani ini wai ka mangasunge na “gu basape nga ga Toro”
[Gu kpiahe du ti kpewaraga 22]
Ginipai Wiriki Oni He?
• Wai nyaki fugo Mbori?
• Wai rengbe ani ka ‘yugo rengo nzunzu’?
• Gine rengbe gu pangbanga du rogo Ziazia Kekeapai ka mangaha nibipa “nyanyaki agbata”?
• Wai rengbe oni ka ino zungodi aboro?