GU BA AWARAGA DU ROGO INTERNET nga ga Ngbaõbambu Sinziri
Ngbaõbambu Sinziri
GU BA AWARAGA DU ROGO INTERNET
Zande
ã
  • ã
  • ẽ
  • ũ
  • á
  • ö
  • ò
  • ĩ
  • ä
  • BAIBIRI
  • AWARAGA
  • ADUNGURATISE
  • mwbr18 Mbirinvuo kpe. 1-8
  • Awetekapai Tipa Waraga Dunguratise Nga ga Gaani Raka na Sunge—Mbirinvuo 2018

Vidio ho tipa gipai mo nasiaha re te.

Akoo, wiri ingahe ima manga ho gu vidio re naambakada tihe ka tona ni.

  • Awetekapai Tipa Waraga Dunguratise Nga ga Gaani Raka na Sunge—Mbirinvuo 2018
  • Awetekapai Tipa Waraga Dunguratise Nga ga Gaani Raka na Sunge—2018
  • Umbariiapai
  • MBIRINVUO 3-9
  • MBIRINVUO 10-16
  • MBIRINVUO 17-23
  • MBIRINVUO 24-30
Awetekapai Tipa Waraga Dunguratise Nga ga Gaani Raka na Sunge—2018
mwbr18 Mbirinvuo kpe. 1-8

Awetekapai Tipa Waraga Dunguratise Nga ga Gaani Raka na Sunge

MBIRINVUO 3-9

AŨKUMUKO ROGO FUGO MBORI YO | YOANE 1-2

“Yesu Amangi Gako Bambata Iˈiriwopai”

(Yoane 2:1-3)

w15 6/1 kpe. 9 genewa. 3

Kristo Nga ga Mbori Tandu

3 Ti regbo gu pumbo rogatise namangi Kana Gariraya yo, Yesu amangi gako bambata iˈiriwopai. Si nawira wa agu aboro naaye sa pumbo aima nge kisusi. Ka si vurangia kina ginipai namangi, imekakue aima nyasa beyo. Maria na Yesu adu kina dagba agu aboro naaye sa gu pumbo re. Tipa dungu agarã, ri aima berãkurii gu sangbaanebi naakido he tipa pa wiiri, ri aima inoho nga gu gude re nika ngia “Wiri Mbori nga Bahe.” (Rk. 1:30-32; 2:52) Ya mo ri aima du na ida nga tandu kina rogoko yo ko ata manganga sunge na ni ya? Gupai ini ani he nga, Kana yo, Maria na Yesu adu na nunga gu vovo arogotise re na ki idi ka undoyo ti gu gberãrago ka ziyo. Yesu aima inoho nga gamahe nga gupai si aida boro mangihe amanga. Sidu, ko amangi iˈiriwopai ki sa ime nga aritere 380 ku rogo wene “imekakue.” (Oni gedi Yoane 2:3, 6-11.) Ya mo Yesu adu ni zizi ko tipa ka manga gi iˈiriwopai re? Oó. Gupai naasa ko ko mangihe nga ko adu na nyemu agu aboro re na ko aˈasada ka wirika gu sino Bako nga ga gamahe.

(Yoane 2:4-11)

jy-E kpe. 41 genewa. 6

Ga Yesu Bambata Manga Iˈiriwopai

Gere angia gu bambata iˈiriwopai Yesu amangihe. Ho gako vovo abawiriki abi gi iˈiriwopai re ni, si anyakasi gayo idapase kuti ko. Tingbafuoho, Yesu, na nako, gbiati awirinako andu ku rogo gu gbata nga Kaparanauma du pati Baime Gariraya bangbanda nodiyo na dioyo.

Gbata gu Nyanyakipa Ahe Nga ga Toro

(Yoane 1:1)

nwtsty kekeapai tipa wisigopai tipa Yo 1:1

Pai: Watadu “Fura.” Gu pa-Giriki nga ho loˈgos, i mangisunge na ni ane ni rimo nga ga sunge, kinaha a i namangisunge na ni rogo Yo 1:14 na rogo Yugo 19:13. Yoane ayugupa gu boro du gu rimore kurini nga Yesu. Gi rimo re adu kurii Yesu ti gu regbo ko adu ngbangbaturũ yo ni toro mbata fu ko ye ku auru kpotosende ni boro, ti regbo gako tungusapai auru kpotosende ane ni ruru boro, na fuo gbiako pagbia ngbangbaturũ yo. Yesu angia gu Pai Mbori anaamangasunge na ni tipa ka fura, watadu gu boro Nafura Kuba Boro, tipa ka pe arugapai fu agu awiri Mbori nga atoro gbiati aboro. Sidu, si rẽarẽ tie ka berã gupai nga mbata fu Yesu ye ku auru kpotosende ane, Yekova aafura na aboro vurube Pai, nga gu Gako maraika nafura kuba ko.—Bam. P. 16:7-11; 22:11; 31:11; Gate 3:2-5; Abasa 2:1-4; 6:11, 12; 13:3.

na: Du rogoyo nga ka du “mbembedi.” Rogo gi bangiriba re, gu pa-Giriki nga pros nayugo padu boro mbembedi na kurani watadu pagume. Si a nayugopa du aboro ni bakiakia, nibipa gipai re, Pai gbiati bangisa ndikidi Mbori.

Pai adu ni Mbori: Watadu “Pai adu wa mbori.” Gi fugo Yoane re nayugopa gu sino du ti “Pai” nga Yesu Kristo (Gu pa-Giriki nga ho loˈgos; mo bi kekeapai tipa wisigopai tipa Pai rogo gi veresi re). Gu bangiriba Pai adu rogoho nga ka du ni bambata Wiri Mbori nga guko Mbori akusi gu kura ahe dunduko rogokoyo nga ndu gupai i ayamba ko ti ni nga “mbori; gu boro du wa mbori.” Badungu abasafugo idi kaa mangasunge na gu nga “Pai adu ni Mbori,” kaa ringbisa ko na gu Mbori Du na Tanduapai Dũ. Ono tie, wene nduapai kinaho ka pe gupai nga Yoane aapenga gupai nga “Pai” adu kina sa na gu Mbori Du na Tanduapai Dũ te. Bambatapai nga, gu fugo du mbata na gu ngbefuoho nayugo gupai ziazia nga “Pai” adu ‘na Mbori.’ Berewe a, gu pa-Giriki nga the·osˈ, si kuru bara biata rogo veresi 1 na 2. Rogo gu bambata ba du the·osˈ rogoho na gu biataha, i mangisunge na gu pa-Giriki nayugo na ni wa ko angia Mbori; ono si rogo gu uehe te. Dungu wene abawirikipai idi kuti gupai nga nyanyaki ndupai kinaho adunga gu kekepai re ti ni pati the·osˈ ya rogo gu uehe. Nduhe nga ho i amangasunge ni na ni, the·osˈ narukuba gu Mbori Du na Tanduapai Dũ. Kuba gure, pa zanga gu kekepai re pati the·osˈ nasaha si sakipai tipa sino “Pai.” Sidu, dungu sasa afugo nga ga Bibiri rogo pa-Ngirisi, Faransée, na pa-Germani mangisunge na gi fugo re kina wai duhe rogo New World Translation, nga gu nafu gu berãpai nga “Pai” aangianga Mbori te ono “gu boro du wa Mbori.” Gu kuru sasa gu Kitabu Wene Pangbanga Nga ga Yoane du rogo pa aboro Sahidic na Bohairic naadu Ezipeta yo, si awira wa si akuru rogo biama kama agarã Fuo Batikayo Kristo, mangisunge na the·osˈ rogo Yo 1:1 kia ti gu uehe. Wai i nafura tipaha nayugo sino “Pai,” nga gako mangapai adu wa ga Mbori, ono si ayanga ko adu wa Bako nga Mbori Tanduapai Dũ te. Na ngbanya kuti gi veresi re, Koro 2:9 nafura tipa Yesu nga ko na “gu hibepai du ti Mbori.” Na ringbisihe kuti 2Pet 1:4, zavura agu aboro nika zogarago na Yesu i nika “vunga yo ku rogo sino Mbori.” Kurigure, rogo gu sasa fugo nga ga Septuagint, gu pa-Giriki nga the·osˈ si sa na gu pa-Ebere nga “Mbori,” ʼel na ʼelo·himˈ, nga gu du rogoyo nga “gu Boro du na Tanduapai; gu Boro du na Ome ti ni.” Agu apa-Ebere re i mangisunge na ni ka fura tipa gu Mbori Du na Tanduapai Dũ, kura ambori, gbiati aboro. (Mo bi kekeapai tipa wisigopai tipa Yo 10:34.) Ka yamba Pai nga “mbori,” watadu “gu boro du na tanduapai,” rengbe ka du sa na gu sangbanebi du rogo Yes 9:6 rogo New World Translation of the Holy Scriptures, nga gu nape gupai nga i nika yamba Masiya nga “Mbori Tanduapai” (angianga “gu Mbori Du na Tanduapai Dũ ya”) na ko nika du ni “Nyenye Ba” fu agu aboro dunduko du na momu ka raka tii gako zogarago. Gu kenapai nga ga Bako, “Yekova nga ga arimbasa ko,” nika manga gipai re.—Yes 9:7.

(Yoane 1:29)

nwtsty kekeapai tipa wisigopai tipa Yo 1:29

gu Wiri kandoro nga ga Mbori ru: Fuo Yesu zi bapatiza na ki karaga tiko yo Bakitingbanga aasadi ko ni, Yoane Bafu Bapatiza ayambu ko nga “gu Wiri kandoro nga ga Mbori ru.” I mangisunge na gi fugo re kina herẽ sa na rogo Yo 1:36. (Mo bi gu wiri tooni buku nga Mounda Tipa Wisigo Fugo Mbori ti kpewaraga 18 tii gu riipai nga, Gu Bakereapai Namangi ti Regbo ga Yesu Raka Auru Kpotosende.) Si rẽarẽ i ringbisi Yesu kuti wiri Kandoro. Ti gu regbo i ake Ziazia Kekeapai ti ni, i anaatumo ni akandoro tipa ka dada ingapai na ka mbakada pagume na Mbori. Si aayugopa gu motumo si adu nga Yesu nika mangaha ho ko afu rengberengbe ungako ni tipa aboro. Gu fugo nga “gu Wiri kandoro nga ga Mbori ru” ima rengba ka fura tipa dungu kekeapai rogo Ziazia Kekeapai yo. Wa duhe nga Yoane bafu Bapatiza aima rugatiko wenengai na Kuru Ndika, si ima rengba ka du nga ko aafura tipa pai sa watadu dungu apai dagba agi du kusende re: gu bakandoro Abarayama atumo na u kuba wiriko nga Yisaka (Bam. P. 22:13), gu wiri kandoro i ayere gorõ ru Ezipeta yo tipa ka batasa aYisaraere be sunge akanga (Gate 12:1-13), watadu gu wiri kandoro nga gu ru i anaafu ru ni motumo rii ga Mbori bamotumo Yerusarema yo na aˈuru dunduko wiso na nyemu (Gate 29:38-42). Si ima rengba ka du a nga ga Yesaya sangbanebi naadu ri Yoane yo, nga gu nafura tipa guni Yekova ayamba ni nga “gi moyambu” nga i aye na ni “wa wiri kandoro i andu na u sa imo ru.” (Yes 52:13; 53:5, 7, 11) Ho gu mokedi nangia Pauro ake gako bambata waraga ni fu AKorindo, ko aya tipa Yesu we “gaani kandoro susiri.” (1Kor 5:7) Gu mokedi nangia Petero aafura tipa ga Kristo “kikipa kure, wa gu wiri kandoro zerenge kpotoru azerenga.” (1Pet 1:19) I fura susi bara 25 rogo gu buku nga Yugoti tipa Yesu nga “Wiri Kandoro.”—Bete akpiapai nga: Yugo 5:8; 6:1; 7:9; 12:11; 13:8; 14:1; 15:3; 17:14; 19:7; 21:9; 22:1.

Geda Ziazia Kekeapai

(Yoane 1:1-18)

MBIRINVUO 10-16

AŨKUMUKO ROGO FUGO MBORI YO | YOANE 3-4

“Yesu Atungusipai fu Dee Somorona”

(Yoane 4:6, 7)

nwtsty kekeapai tipa wisigopai tipa Yo 4:6

ki ta mbu ambu: Gere nga yangara ba rogo Ziazia Kekeapai i nafura tipa Yesu nga ko “ambu.” Si adu wa sa 12:00 bebere uru, na rogo gu wiso re Yesu aguari rogo gu ngboongboorago nga ga Yaradene ka ndu ku Sukara yo du Somorona yo, nga gu tumbatumba rago du bagizoho nga ametere 900 watadu ki susihe.—Yo 4:3-5; mo bi gu wiri tooni buku nga Mounda Tipa Wisigo Fugo Mbori ti kpewaraga 18 tii gu riipai nga, Gu Bakereapai Namangi ti Regbo ga Yesu Raka Auru Kpotosende.

(Yoane 4:21-24)

(Yoane 4:39-41)

Gbata gu Nyanyakipa Ahe Nga ga Toro

(Yoane 3:29)

nwtsty kekeapai tipa wisigopai tipa Yo 3:29

badia kumbari: Ti agu aregbo i aakeka Ziazia Kekeapai ti ni, mbembedi bakurea badidee nanaaru kubani na ni nanaamanga gu banguapai du tipa mbakadapa rogatise. I anaabi ni wa ni nga gu boro kpamia badidee na nadikumba. Rogo uru pumbo rogatise, arogotise anaandu kua badidee yo watadu kua bako yo, yo du pumbo rogatise ani rengbe ka manga ni. Ti regbo gu pumbo re, bakurea badidee anidu na ngbarago ho ni anigi fugo badidee ni wa ko afura na diako, mbiko ko anaabihe nga ko ima du na diabese rogo gu sunge i afuhe fuko. Yoane Bafu Bapatiza aringbisi tiko kuti “badia kumbari” watadu bakurea badidee. Rogo gi bangiriba re, Yesu nangia badidee na gako abawiriki kini rukuba nadikumba. Ni mbakada ko gene fu Masiya, Yoane Bafu Bapatiza ayugu gu bambata aboro naadu ni “pazuapazua de” fu Yesu Kristo. (Yo 1:29, 35; 2Kor 11:2; Ef 5:22-27; Yugo 21:2, 9) “Badia kumbari” watadu bakurea badidee aima manga gako sunge na diabese ni yugoko abawiriki fu Yesu; ko aadunga berewe na nyanyakipa ko te. Wakina gure a, Yoane ape gupai tipa tiko na Yesu nga: “Pako ka kia, ono pare ka paya.”—Yoane 3:30.

(Yoane 4:10)

nwtsty kekeapai tipa wisigopai Yo 4:10

unga ime: Gi pa-Giriki re rogoyo nga gu ime nafuafu, gu ime nagbada sende yo, watadu gu gigiri ime nakura guga yo. Gi ime re kia ti gu ime naru aru rogo bangisa baha biiri yo. Rogo Pa Mot 14:5, gu pa-Giriki du tipa “fufu ime” nga “unga ime.” Rogo Yer 2:13 na 17:13, i fura tipa Yekova nga ko nga “gugaabi nga ga unga aime,” nga gu narukuba gu ime nafu unga. Ho Yesu aafura ni na dee Somorona, ko amangisunge na gu fugo nga “unga ime” rogo masaku yo, ono si nangera wa gu dee re aberẽ gupai nga Yesu nafura kina boro tipa nzunzu ime.—Yo 4:11; oni bi kekeapai tipa wisigopai tipa Yo 4:14.

Geda Ziazia Kekeapai

(Yoane 4:1-15)

MBIRINVUO 17-23

AŨKUMUKO ROGO FUGO MBORI YO | YOANE 5-6

“Oni Pekefuo Yesu na Ruru Bipai”

(Yoane 6:9-11)

nwtsty kekeapai tipa wisigopai tipa Yo 6:10

Akumba ki nimo ka susunga, i adu wa ka i du 5,000: Kina gu buku nga ga Matayo nagbia kurapai kuti ni nga “gbia kuti ade na agude” ho si afura ni tipa gi iiriwopai re. (Mt 14:21) Si rengbe ka du nga agu aboro dunduko i arigi yo ngba iiriwo gene bangeyo aima susa 15,000.

(Yoane 6:14)

(Yoane 6:24)

nwtsty kekeapai tipa wisigopai tipa Yo 6:14

nebi: Dungu aYudo rogo bambata sa kama agarã F.B.K. aangera tipa gu nebi du wa Mose, pe yo pani rogo Pa Rug 18:15, 18, nga ni nika ngia Masiya. Rogo gi bangiriba re, si rengbe ka du nga gu fugo nga naye ku zegino nafura tipa kura Masiya. Kina Yoane sa nake agu apai du rogo gi veresi re.

(Yoane 6:25-27)

(Yoane 6:54)

(Yoane 6:60)

(Yoane 6:66-69)

nwtsty kekeapai tipa wisigopai tipa Yo 6:27, 54

gu riahe nago ago . . . gu riahe nye anye sa gu nyenye unga: Yesu aima rugatiko na gupai nga kura aboro aakodatiyo na ko gbiati gako abawiriki mbiko gu undo nga ga borose i aagbiaha. Wa duhe nga riahe naundo aboro na aˈuru dunduko, gu “riahe” du rogo Fugo Mbori yo nika saha taata fu aboro i raki nyeanye kindi. Yesu azinahe fu gu ndurumo aboro re i mángi sunge . . . tipa “gu riahe nye anye sa gu nyenye unga,” nga ka manga ome tipa ka mbisa gu nyemuhe nga ga toro na ka yugo idapase kuti gupai i awirikaha.—Mt 4:4; 5:3; Yo 6:28-39.

ka ri pasiore ki mbiri kurere: Ka pepai ngba kura gene, gipai re nayugo gupai nga aguyo nari pasioko kini mbiri kureko namangaha wo ni yugoyo idapase kuti Yesu Kristo. (Yo 6:35, 40) Yesu agumba gipai re rogo 32 F.B.K., sidu, ko aafuranga tipa Ga Gbia Riahe te, nga gu si adu nga ko nika sigiraha rogo gu garã nangbefuo ho. Ko agumba gipai re mbata fu gu “susiri, nga ga aYudo” (Yo 6:4), sidu, si nawira wa si aima tingida agu aboro naadegatuyo fuko na pa gu pumbo susiri naambeda na pa nyakapa kure gu wiri kandoro naabatasi unga ni gu yuru aYisaraere akuru Ezipeta yo (Gate 12:24-27). Yesu aanyakasapa gupai nga kureko nika saha taata fu gako abawiriki tipa i gbia nyenye unga.

w05 9/1 kpe. 31 genewa. 13-14

Ani Nikaa Ta Nirimo Yekova Gaani Mbori

13 Wa si avura du wo, rimbasa aboro adiberã nyanyakii tipa ka pefuo Yesu, na i ki bi ko “mbiti baime yo” a wa Yoane apehe. Tipagine i apefuoko ti ni baraho ko aima soga gayo bakere asadatise ni tipa ka maa ko ni bakindo? Dungu aboro adu na kina gu bipai nga ga borose, na i kini fura tipa kina agu ambakadapai nga ga riahe Yekova amangihe ngbakungba yo rogo agu aˈuru nangia ga Mose. Gipai re aayugo gupai nga, si aida Yesu nindu kumbatayo kindi na gu mbakadapai nga ga fu riahe fuyo. Fuo Yesu rugu tiko na gayo bipai nga gu nadu ni gbegberẽhe, ko atona ka yugo arengo nga ga toro fuyo nga gu narengbe ka undo yo tipa i mbakadi gayo aberã. (Yoane 6:17, 24, 25, 30, 31, 35-40) Nikaragapai tie sa gipai re, bete aguyo akpakanako, bakere gbe, ho ko afura ni fuyo rogo gi yugopai na kpiapai re kini ya: “Mi nagumba ha fu roni, nirengo, nirengo, ka oni ari nga pasio Wiri boro ki mbiri kureko ya, unga du nga kpotoroni yo te. Gu ni ka ri pasiore ki mbiri kurere nyenye unga du adu be ni; mi azíngisa ni azingisa ti yangara rame.”—Yoane 6:53, 54..

14 Dedede, ga Yesu yugopai na kpiapai anaasa aboro i yugu agu apai nadu ngbaduyo yo singia i aida nirengo kaa ta na Mbori. Gi yugopai na kpiapai re adunga kia ti akuraha te. Si awo ti gupai nga aboro berẽ nyanyaki aberã. Ani nageda gupai nga: “Ho dungu gako abawiriki agi gi ni re, i ki nimo ka ya, ‘Nyanyaki pai nga gere; da ka gi he?’” Yesu aandu kindi kumbatayo kaa sakarogopai fuyo ya si aida i wisigi afugo ko tipa gu rogoyo nga ga toro. Ko aya: “Si nga toro nafu unga; borose amanga nga he wa sa te; agu apai gumba mi fu roni si nga toro, na unga.” Wa si avura du wo, dungu aboro adeganga tuyo te, na pangbanga ha naya: “Dungu gako abawiriki ki karaga tiyo be gere, ka i ata nga na ko berewe ya.”—Yoane 6:60, 63, 66.

Gbata gu Nyanyakipa Ahe Nga ga Toro

(Yoane 6:44)

nwtsty kekeapai tipa wisigopai tipa Yo 6:44

ka gbe ni: Wa vura duhe nga gu pa-Giriki duti tipa gu fugo nga “ka gbe” i mangisunge na ni tipa gbe pio atĩo (Yo 21:6, 11), si apenga gupai nga Mbori nagbe aboro ngbaome te. Gi fugo re ima rengba ka yugo gupai nga ka “ba nyemupai,” na fugo Yesu ima rengba kaa fura tipa Yer 31:3, yo Yekova aya ni fu gu gako aboro naadu mbata: ‘Mi anigbe roni ti ni ni weneringise.’ (Septuagint namangasunge na kina gi bangisa pa-Giriki re herẽ.) Yo 12:32 nayugo gupai nga, Yesu nagbe aboro rogo angbatungayo dunduko koyo du ko ni. Ziazia Kekeapai nayugo gupai nga Yekova ima fu ranirii fu aboro. Ai boro du na rengo beni ka siapai ho daha ni ti iriso Ko. (Pa Rug 30:19, 20) Yekova nagbe kina agu aboro i aima ringbisa yo sa nyenye unga. (Tam 11:5; Snz 21:2; Amo 13:48) Yekova namanga gipai re vurube gu pangbanga nga ga Ziazia Kekeapai gbiati gako ziazia toro. Gu sangbanebi du rogo Yes 54:13, ke yo afugoho rogo Yo 6:45, nafura tipa agu aboro Ba agbeyo.—Mo ringbisihe na Yo 6:65.

(Yoane 6:64)

nwtsty kekeapai tipa wisigopai tipa Yo 6:64

Yesu aima ina . . . gu ni nikakusa ko: Yesu aafura tipa Yuda Keriota. Yesu amangi kparakpee fu Bako yuru sasasa tipa ka sia gu gako amokedi naadu 12. (Rk 6:12-16) Sidu, Yuda aduadu mbata ni ruruko. Ono tie, Yesu aima ino gupai rogo gu sangbanebi nga ga Kuru Ndiko nga mbembedi bakureako nika ora rimoko. (Tam 41:9; 109:8; Yo 13:18, 19) Ho Yuda atona ka da ni ni gbegberẽ boro, Yesu nga gu boro niima rengba ka ino gupai du berã boro yo aima ino gipai re. (Mt 9:4) Mbori aima inoho nga mbembedi bakurea Yesu nika da ni basamungu, ni mangako sunge na gu rengba du beko ka ino agu apai du kumbatayo. Ono si andunga sa na ga Mbori asino na wai ko amangipai na agu aboro naadu mbata ka berã gupai nga Yuda du nga gu boro nika samungu te, si ki du wa ka i ya i aima ringbisaha wo te.

mbata: Gi fugo re afuranga tipa pa vunga Yuda watadu pa siako ni mokedi te, nga gu namangi fuo manga Yesu kparakpee sasasa. (Rk 6:12-16) Kuba gure, si nafura tipa wai Yuda atona kaa mangapai na biriki, nga gu Yesu aima inopai tipaha ni wiri ipo. (Yo 2:24, 25; Yugo 1:1; 2:23; mo bi kekeapai tipa wisigopai tipa Yo 6:70; 13:11.) Gere nayugo gupai a nga ga Yuda mangapai angia gupai ko aima berãkuriihe wenengai, angianga si angia sangbana gupai nga ngbadukoyo aˈaria tihe ni wiri ipo ya. Rogo gu fugoyo nga “mbata” (Pa-Giriki, ar·kheʹ) rogo Vovo Ndika yo ni bakiakia, nibipa gupai si afura tipaha. Ni kpiapai, rogo 2Pet 3:4, “tona” watadu mbata nafura tipa tonatona kusaahe. Ono i namangasunge na ni dedede tipa kina bete apai. Ni kpiapai, Petero aya ziazia toro azoro kurii aGendiria “wa kina rani ho si aenge ni.” (Amo 11:15) Petero aafuranga tipa pa vungako watadu pa yamba ko ko du ni mokedi te. Kuba gure, ko aafura tipa gu uru nangia ga Pendekote rogo gu garã nangia 33 F.B.K., nangia gu regbo uka ziazia toro tipa kparakpara sunge “aenge” ti ni (Amo 2:1-4) Kura akpiapai tipa wai gupai i afura tipaha narengbe ka du na maapai kuri gu fugo nga “mbata” gu du rogo Rk 1:2; Yo 15:27; 1Yo 2:7.

Geda Ziazia Kekeapai

(Yoane 6:41-59)

MBIRINVUO 24-30

AŨKUMUKO ROGO FUGO MBORI YO | YOANE 7-8

“Yesu Afu Taarimo fu Bako”

(Yoane 7:15-18)

cf-E kpe. 100-101 genewa. 5-6

‘Si ni Keke He’

5 Yesu aaida gupai nga aboro ini wari du gako pangbanga aaye ni. Ko aya: “Gi yugopai nga gimi te, ono si nga ga gu ko nakedi re.” (Yoane 7:16) Ti gu kura regbo, ko aya: “Mi amanga nga pai ni tire a wa sa te, kina gu Buba ayugu fere, si mi agumba.” (Yoane 8:28) Kurigure, ko aya: “Agu apai mi agumba fu roni mi agumba nga ha ni tire te; kina Buba nye rogo re yo namanga gako apai.” (Yoane 14:10) Gene sa Yesu ayuguhe ngbaha nga agu apai ko aagumbaha angia rengo angia ko anaadia apai rogo Fugo Mbori yo dedede.

6 Wisigopai tipa agu afugo Yesu du ni kekehe nayugo gupai nga ko adianga apai watadu ka fura tipa agu apai du rogo agu abuku nga ga Kuru Ndika dunduko te. Ti tonatonaha, si arengbanga ka iriwo tiro te. Mo ima rengba ka bakabangiro nga, Yesu atungusipai kini yugupai tipa agarã biata na beberehe, tipagine ko aadianga apai watadu ka fura tipa agu apai dunduko naadu rogo agu abuku naadu ho ti ni ya. Nirengo, ko aima rengba ka mangaha wo. Mo tingidi gupai nga, kina bete agu apai Yesu apehe na agu ko amangihe du ni kekehe. (Yoane 21:25) Nirengo, mo ima rengba ka geda agu afugo Yesu dunduko du ni kekehe kina vuru bete asa yo gbua. Awere tie, mo berẽnga pa fura tipa Mbori na gako Kindo tipa bete asa na kini ka mangasunge na agu apai du rogo Kuru Ndiko yo susi beberehe! Kurigure, ti dungu aregbo Yesu anaadunga na kaĩkaĩ awaraga beko te. Ho Yesu aatungusapai ni rii bagangara yo, ko arogodi apai na kini fura tipa apai rogo Kuru Ndiko yo kina ngbariko!

(Yoane 7:28, 29)

(Yoane 8:29)

w11 3/1 kpe. 13 genewa. 19

Oni Di Gu Toro Nga Ga Mbori, Angianga Ga Zegino Ya

19 Oni gisangba Yekova na ngbaduroniyo dunduko. Yesu anaamanga kina agu apai nanaaye na ngbarago fu Bako. Regbo adu kinaho sa ga Yesu bipai adu tooni kia ti ga Bako. Ono wa si avura duwo, Yesu aya fu Bako wee: “Ka si du nga wa mi akpi nyemu he ya, ono wa kina mo akpi nyemu he.” (Ruka 22:42) Oni sananga tironi nga, ‘Ya mo mi naairiso Mbori zavura ho adunga ha ni taata ya?’ Giasangba Mbori nga gu bangua pai si aidaha tipa ka raka. Si naida ani gisangba Mbori rogo apai yo dunduko mbiko ko nakusi rani, ko nga baenge gaani raka na kina ko a nabandaha. (Tam. 95:6, 7) Gu kurapai ho ka ani mangihe kuba giasangbako te. Mbori arengbenga ka ida na ani ka ani adunga na giasangba ya te.

Gbata gu Nyanyakipa Ahe Nga ga Toro

(Yoane 7:8-10)

w07 2/1 kpe. 5 genewa. 4

Tipagine Si Aida ti Ni Ani Naape Kina Rengo Kindi?

Gini kpiapai Yesu Kristo amoihe nibi gipai re? Ti kura regbo sa, Yesu aafura na agu aboro naaidanga kutiko ya ono nadu na nyemu ino apai tipa gu gako anunguro ko asogimaha. I aya fuko: “Mo gúari erẽ ki ndu ku Yuda yo.” Gine nangia gako karagapai? Ko aya: “Oni ndú sa pumbo [ku Yerusarema yo]; mi ata ndu nga sa gi pumbo te re; bambiko ragore ata da nga te.” Ngbutuko fuo gure, Yesu aima ndu nirengo tipa pumbo ku Yerusarema yo. Tipagine ko akaragapai ti ni wa gure tie? Ko akaragapai wo fuyo bambiko i aadunga na rengo beyo ka ino agu arago dunduko ko ata ku rogoho te. Sidu, Yesu aagumbanga ziree fuyo te, gupai ko amangihe nga ko aakaraganga pai fuyo naabaha dunduko te tipa ka i arengbanga ka manga ko na gbegberẽpai ya watadu gako abawiriki. Anga ziree nangiaha ko agumbaha te, bambiko gu mokedi nangia Petero akepai tipa ko ki ya: ‘Ko amanganga gbegberẽpai te, i abinga biriki ngbako yo te.’—Yoane 7:1-13; 1 Petero 2:22.

(Yoane 8:58)

nwtsty kekeapai tipa wisigopai tipa Yo 8:58

mi adu kina ho: Agu aYudo naasoga Yesu aaida ka sopoda ko na mbia mbiko ko aya ko ‘abi Abarayama,’ a wa i apehe, garã Yesu ‘aadunga 50’ te. (Yo 8:50-58) Gupai Yesu aaida ka pehe fuyo nga ko aima raka mbata ni toro ngbangbaturũ yo mbata fu i batika Abarayama. Gu kura aboro idi kuti gupai nga gu veresi re nayugo Yesu ni Mbori. I nanyakasa gupai nga gu pa-Giriki i namangisunge na ni herẽ nga e·goˈ ei·miˈ (du rogo kura aBaibiri nga “mi kinaho”), si nafura tipa wai Septuagint ayugoho rogo Gate 3:14 na agu averesi re dunduko si aida i kehe kina sa. (Mo bi kekeapai tipa wisigopai tipa Yo 4:26.) Rogo gi bangiriba re, gu pa-Giriki nga ei·miˈ tonaha na gu fugo nga “mbata Abarayama nikadu mi adu kina ho” si kini yugu gupai naandu andu kindi kumbatayo. Sidu tie, nzunzu sasaha nga “mi adu kina ho” kuba gu nga “mi kinaho,” na kuru sasapai na vovo sasapai namangasunge na kina gu fugo du wa gu nga “mi adu kinaho.” Nirengo, rogo Yo 14:9, kina gu bangisa pa-Giriki nga ei·miˈ i amangisunge na ni tipa ka gumba agu afugo Yesu nga: ‘Wa mi aima diga niima na oni, mo aina nga re te, Firipo?’ Dungu sasa afugo namangasunge na kina gu bangisa fugo re, si kini yugu gupai nga ndiko ho tipa sa gu pa-Giriki nga ei·miˈ ni “adu kinaho” te. (Kura akpiapai tipa mangasunge na gu pa-Giriki du tipa gupai namanga awere na gu mangi ka fuoho ata ima nga ya gu du rogo Rk 2:48; 13:7; 15:29; Yo 1:9; 5:6; 15:27; Amo 15:21; 2Kor 12:19; 1Yo 3:8) Berewe a, agu afugo Yesu du rogo Yo 8:54, 55 nayugo gupai nga ko aasadanga ka rigisa tiko nga ko sa na Bako te.

Geda Ziazia Kekeapai

(Yoane 8:31-47)

    Agu Awaraga Nga ga Zande (2000-2025)
    Mo Kuru
    Mo Rimi
    • Zande
    • Mokedihe
    • Wai mo aida apai du
    • Copyright © 2025 Watch Tower Bible and Tract Society of Pennsylvania
    • Agu Andiko du Tipa Mangasunge na Ni
    • Pa Banda Agu Apai du Tipa Boro
    • Privacy Settings
    • JW.ORG
    • Mo Rimi
    Mokedihe