Oni Gbia Amaku Be Gu Bakindo Ga Yekova Toro Angbe Fuko Mbatayo!

“Ga Yekova Toro anyé ri ko.”—YES. 11:2.

1. Gini apai kura aboro napekehe tipa agu apai namanga rogo zegino?

“ROGO gi zegino duna bakere fudifudiapai rogoho re, wai rengbe aboro ka bata tipa agarã 100 kumbatayo?” Gure nga gu sanahe bawisigipai tipa kpotosende na akerekuru du rimoko nga Stephen Hawking asanaha rogo 2006. I akepai rogo waraga apangbanga sa ki yaa: “Ani atanyasanga riipa rungo watadu ka ye na zereda kurogo zegino te. Ono kina agu apai ani akpinga nyemuhe ya si namanga. Anga si wo mbiko gupai nga sungu ani asungo gbua zanga mangapai te. Ani ima asada apai dunduko, ki asadi azogarago dunduko, tona ti gu zogarago nga komunisti (gu zogarago kina irangbii abanda aũkumuko rogoho tipa kparakaha) ki dati gu zogarago kina aboro abanda aũkumuko rogoho; na ki asadi ka ká na vura nikusa ani gu riigbu nga League of Nations (Gu Kodatise Nga ga Aringara) si niibanda pa kusa kere abundu. Ani ima so badungu ‘avura tipa ka nyasariipa vura,’ kini berẽ gupai nga ani rengbe arengba ka digiso vura.”

2. Wai Yekova nika mangasunge na gako pagbia kurii kpotosende barambeda?

² Ga Yekova amoyambu aima rugatiyo na gipai re. Ziazia Kekeapai naya furani wee Mbori aakusanga aboro i nizogo tiyo nisayo te. (Yere. 10:23) Kina Yekova sa duna rengo beko ka zoga rani. Kina ko sa duna rengo beko ka rũ andiko furani, ki gumba gupai furani si aida ani mangihe rogo raka, na ka undo rani ani mangihe. Kurigure, ko nika mangasunge na gako pagbia barambeda tipa ka digiso gu zogarago nga ga aboro. Ti kina gu regbo re, ko nika gbarasa agu aboro dunduko aidanga na gako pagbia ya kini sa aboro i nye ni akanga fu ingapai, fu zangarengba, na fu “mbori gi zegino re,” nga Satana Bakitingbanga.—2 Kor. 4:4.

3. Ginipai Yesaya agumbaha tipa Masiya?

³ Rogo vovo zegino, ga Yekova bakere pagbia nikadu niyuguyuguhe rogo gu Kindo nga ga Masiya. (Dan. 7:13, 14) Yesaya agumba sangbanebi tipa gipai re ki yaa: “Tomohe akúra ti rukurumo Yisai, be ngua nikakura ti atarãko. Ga Yekova Toro anyé ri ko, gu toro nga ga tatamana nga toro rugatinapai, nga toro rugapai nga toro tandu, nga toro inahe nga toro gunde ti Yekova.” (Yes. 11:1, 2) Rogo gini agene ga Mbori ziazia toro asa ‘gu tomohe nakuru ti kurumo Yisai,’ nga Yesu Kristo, ko rẽ ka zoga aboro? Gini amaku aboro nika gbiaha mbiko gako zogarago? Na gini apai si aida ani mangihe tipa ka gbia agu amaku re?

Mbori Asako Ko Rẽ ka Zoga Aboro

4-6. Gini inohe nika undo Yesu ko mangisunge nigu Bakindo duna tatamana na nunga, nigbiamotumo, na ni Basapungbanga?

⁴ Yekova naida gako aboro dani rengberengbeyo zanga ingapai tiibe gu Bakindo duna tatamana nzunzu, kidu na nunga, kingia Gbiamotumo, na kingia Basapungbanga. Si du Mbori asia Yesu Kristo ti ni ki undoko na gako ziazia toro tipa ko rẽ tipa gu nyanyakipa asunge re. Ani bingo bete agu apai nika sa Yesu ko mangi agu asunge re amanga wa Mbori akpinyemuhe.

⁵ Yesu ima ino Mbori gbe. Yesu nga bangisa Wiri Mbori ima ino Bako susi aboro dũ, bambiko ko aima duna ko tipa badungu agarã, isoke tipa abirioni agarã. Vuru gu regbo Yesu adihe na Bako re, ko aima inoko sirisiri gbe ko ki di agu asino nga ga ko. (Koro. 1:15) Yesu nitiko ayaa: “Gu ni bi re ni bi Buba.”—Yo. 14:9.

⁶ Fuo Yekova, kina Yesu sa inipa agu ahe wenengai Mbori akusihe, kodihe na aboro. AKorosaio 1:​16, 17 nayaa: “I afu ahe dũ rogo ko yo; watadu ku ngbangbaturũ yo na auru kpotosende, gu i abi na gu i abi nga ya . . . Ko nadu mbata yo fu ahe dũ, ahe dũ nakpamia tihe rogo ko yo.” Oni berẽnga kurii gupai re! Yesu angia “bangbasia boro sunge” ki mangi sunge kusaahe dunduko na Mbori. Sidu, ko ima rugatiko na agu apai dunduko du tipa agu ahe Mbori akusihe, tona ti gu yangara rukutuhe ki da ti gu iiriwo he nga dudu boro. Yesu Kristo nga boro tatamana nzunzu!—Snz. 8:12, 22, 30, 31.

7, 8. Wai Mbori amangisunge na gako toro si undo Yesu ti ngba gako sunge tungusapai?

⁷ Yekova ambedi Yesu na gako ziazia toro. Yesu ayaa: “Ga Gbia Toro ti re, bambiko ko auka nzeme ku ri re mi tungusi wene pangbanga fu rungorungo aboro. Ko akedi re mi gumba pa kusa kisikisi aboro fu kina yo, na pa hahasa bangiri airavurari, ka kusa agu aboro du ni rungosirungosi yo, ki nitungusi pa garã ga Gbia inapai.” (Ruka 4:18, 19) Si nawira gupai nga ho Yesu azi bapatiza ni, ziazia toro aima undoko ko tingidi agu apai dunduko ko awirikihe mbata fu vungayo ko niboro, kodihe na gupai Mbori aidi ko mangihe auru kpotosende ni Masiya.​—Oni gedi Yesaya 42:1; Ruka 3:​21, 22; Yoane 12:50.

⁸ Wa duhe nga Yesu agbia ome be ziazia toro, na kidu nirengberengbe ko ti kpotoko na berãko yo, ko nga gu babakerepa kumba kisusi naraki, na bawene Bayugupai kisusi. Nirengo, “gako yugopai airiwo ti arimbasa.” (Mt. 7:28) Bambatapai nga, Yesu apepa ndu gupai naye na fudifudiapai, nga ingapai, zangarengba, na zanga inohe tipa Mbori. Berewe a, ko arengbe arengba ka ino ngbadu aboro yo kini mangiyo ringbisihe kina kuti ni.—Mt. 9:4; Yo. 1:47.

9. Wai gaoni kido kuti Yesu nibazogo akio ho oni aberã ni kurii agu apai ko amangihe aʹuru kpotosende?

⁹ Yesu araki niboro. Pa raka ko niboro na kini kodi tiko na kpakpa aboro nasa gupai nga ko rẽ ni Bakindo. Gu mokedi nangia Pauro akepai ki yaa: “Si du si arengbe ti ni fu [Yesu] ko du rogo apai dũ wa kina awirinako, ya ko rengbe na du ni gu gbiamotumo du na inapai na ngarã ti ni tipa agu apai nga ga Mbori, ka gbata ũmotumo tipa gu ingaapai nga ga aboro. Bambiko wa ko adu ni asadiasadi ko tigako ki hi apai be he, ko rengbe na unda agu yo du ni asadiasadi yo.” (Eb. 2:17, 18) Wa duhe nga Yesu aima gbia tiko na aʹasada ki hi apai be he, ko rengbe arengba na unda aguyo nagbiatiyo na asada. Ga Yesu nunga adu niyuguyuguhe ti regbo gako sunge auru kpotosende. Si anidu taata fu aborokaza na gbarigbari aboro gbiati agude tipa i fura na Yesu. (Mk. 5:22-24, 38-42; 10:14-16) Zavura bayee aboro na aguyo nadu na gomoro rogo toro yo anaaye aye fuoko. Ono tipa aboro rukö tigayo na agu aboro naadunga na “nyemu Mbori” kpotoyo yo ya, i aká ko aká, kini sogoko, na kini bisirapako.—Yo. 5:40-42; 11:47-53.

10. Rogo gini gene Yesu ayugu gako bakere nyemuse tipa rani?

¹⁰ Yesu afu ungako tipa rani. Gu bakere gopai duho nayugo gupai nga kina Yesu sa nga gu boro rẽ niwene Bazogo nga, pa ida ko ka kpi tipa rani. (Oni gedi Atambuahe 40:​6-​10.) Yesu ayaa: “A nga boro sa du na bakere nyemuse susi gi nga, boro bagi kpioni tipa abadiangbani te.” (Yo. 15:13) Yesu aadunga wa agu abazogo nga awiri aboro ninaaida kina undo kina be gayó azogo te, ono ko afu kina boro ungako tipa aboro.—Mt. 20:28.

Yesu Agbia Ome ka Fu Agu Aundo Duti Gako Motumo

11. Tipagine si aida ti ni ani duna kido dunduko kuti Yesu wangia ko Batumorirani?

¹¹ Wangia Yesu Gbiamotumo, ko du nga gu bambata boro nafu agu aundo duti gako motumo tumorii. Ti regbo gako sunge auru kpotosende, ko ayugukpia agu apai ko nika mangaha ti regbo gu gako zogarago nikadu tipa agarã kutu, nga gu rengbe ani ka gbia undo behe ka ani du niruru rani. Ko ahusi aborokaza na gbarigbari aboro, ki zingisi kpikpi aboro, ki rigi ndurumo aboro, na ki rugusi yuge na sungburosungburo baime. (Mt. 8:26; 14:14-21; Ruka 7:14, 15) Ko amangi agi apai re angianga mbiko ka yugopa gako tandu gbiati ome ya, ono ka yugopa gako nunga na nyemuse. Ho boro ngbataka azungodi ko ni ko husi ko, ko aya fuko: “Mi nakpi nyemu he; mo hú.” (Mk. 1:40, 41) Yesu nika yugo kina gu bangisa nunga re ti regbo gako zogarago ono ngba bakere gene.

12. Wai Yesaya 11:9 nika ringbisatihe?

¹² Kristo na gako abadiazogarago nikaa ndu kindi kumbatayo na gu sunge yugopai ko atonaha ho ko aduni auru kpotosende agarã 2,000 kusayo. Sidu, sangba Yesaya nika digo adigo, nga gu nayaa: “Kpotosende ahí be ina pa Yekova wa aime nahisa gango baime.” Zanga kapa, gu yugopai re nikadu adu a tipa wai ka ngerafuo kpotosende na gu badungu ungaahe du auruhe, a wa Mbori arugu Adamu ko nimangihe. Ti digido agarã kutu, gu ga Mbori bambata ringbisapai du rogo Bambata Pai 1:28 aima ringbisatihe, na aboro dunduko nika ima gbia agu aundo dunduko duti ga Yesu motumo.

Yesu Agbia Ome ka Sapangbanga Aboro

13. Wai Yesu ayugu gupai nga ko nakpinyemu rurupai?

¹³ Yesu nga “gu ko ya Mbori ko du ni basapungbanga unga aboro na kangba aboro.” (Amo. 10:42) Nairiwo wai duhe nipa wasa ka ino gupai nga Yesu nika nyeanye kindi, na rurupai na yososopai nga giri dimoko, ko natapaha dimoko nyanyakii! (Yes. 11:5) Ko asogo agu asino nga sogote, ngbaduse, biriki, na gu kura gbegberẽ apai, na ko abisirapa agu aboro aberãnga pa gu rungo nga ga akurayó ya. (Mt. 23:1-8, 25-28; Mk. 3:5) Kurigure, Yesu anaabingo aboro gbua ti kina kpotoyo te, “bambiko ko aini gu pai aina nadu kpotoboro yo.”—Yo. 2:25.

14. Rogo gini gine Yesu ayugo gupai nga ko nakpinyemu rurupai na ruru sarangbanga awere, na gini asanahe si aida ani sana tirani nani?

¹⁴ Yesu nayugo nyemuse kindi tipa rurupai na ruru sarangbanga ningera ko kurii gu bakere sunge nga ga tungusapai na yugopai namanga rogo zegino. Zogarago ho nga ga awiri aboro watadu gbigbita toro rengbe ka rugusa ga Mbori pai ka si mangingo ki da wai Ko akpinyemuhe ya te. Were, ani ima rengba kadu na kido nga, fuo susa Aramegido, rurupai azugo. (Oni gedi Yesaya 11:4; Matayo 16:27.) Oni sananga tironi nga: ‘Ya mo mi na ga Yesu bipai koyo du aboro ni ho mi atungusapai ni? Ya mo mi naʹasada tire ka mangasunge fu Yekova wa rengbehe na omere, si ki vura du nga auwa-kpotore na agu apai du tipa re asanga re mi mangihe wai ka mi nimangihe te?’

15. Ginipai ka ani atingidaha si ki sa rani ani nimangisunge fu Mbori na ngbaduraniyo dũ?

¹⁵ Ka ani atingida gupai nga tungusapai nga ga Mbori sunge si aida ani mangihe, ani nimangihe amanga na ngbaduraniyo dũ. Ko naya i tungusipai; ko nanungusa sunge tungusapai vurube Wiriko; na ko nafu ziazia toro fu agu aboro natungusaha tipa i gbia ome. Ya mo oni nabi gu momu na nyanyakipaha nga kadu niga Mbori abadiasunge, kini mangisunge sa na gu Wiriko ziazia toro angbe fuko mbatayo? Gini boro duho fuo kina Yekova sa rengbe ka sa kpoto aboro yo bangeyo naima susa amirioni saba, du badunguyo nga agu aboro aboro abingo yo ‘ni airatatamana na airainahe’ ya, i naatungusa gu pangbanga nga ga Kindo fu aboro rogo aringara 236?—Amo. 4:13.

Oni Gbia Maku Mbiko Kristo!

16. Bambata Pai 22:18 nayugo ginipai tipa ga Mbori maku?

¹⁶ Yekova aya fu Abarayama wee: “Rogo ngbatunga ro i ka fu maku ni fu arikaaboro zegino dunduko, bambiko wa gi mo sangbare.” (Bam. P. 22:18) Gipai re nayugo gupai nga, agu aboro nabi gayó sunge fu Mbori na nyanyakipaha, i namaabangiriyo ka gbia agu amaku Masiya nga ngbatunga Abarayama nika ye nani. I namangasunge fu Mbori naapa agu amaku re berãyo yo areme.

17, 18. Ginipai Yekova akidopaha rogo Pa Fu Rugute ni Ue he 28:2, na wai rengbe ani ka degaturani sa fugo Yekova?

¹⁷ Mbori aya fu ngbatunga Abarayama nangia aYisaraere wee: “Agi amaku re ayé ku ri roni, ki dusia roni, ka oni dege turoni sa fugo Yekova gaoni Mbori.” (Pa Rug. 28:2) Kina gu bangisapai re rengbe kadu fu ga Mbori aboro areme. Ka oni aida ga Mbori maku, “oni dege turoni sa fugo” ko. Sidu tie, gako amaku “ayé ku ri roni, ki dusia roni.” Ginipai tie degatue akodaha?

¹⁸ Degatue nakoda dia gupai na nyanyakipaha Ziazia Kekeapai agumbaha na gu riahe nga ga toro Yekova afuhe vurube kangara moyambu. (Mt. 24:45) Si a nga giasangba Mbori na Wiriko. Yesu ayaa: ‘Aguyo naya ti re, “Gbia, Gbia,” i aríma nga ku rogo gu ngbi nga ga ngbangbaturũ dunduko te; kina guni namanga wa Buba akpinyemu he du ngbangbaturũ yo.’ (Mt. 7:21) Degatue a nga ka ndu kuti gu mbakadapai Mbori namangihe nga ga gu dungurati nga ga aKristano, kini gisangba agu abaakumba du rogoho, nga aguyo duni ‘agamahe’ furani.—Ef. 4:8.

19. Wai rengbe ani ka mbakadatirani tipa ka gbia maku?

¹⁹ Agu aboro du dagba agu ‘agamahe’ re nga agu abaakumba du rogo Riigbu Bipasunge, nga aguyo narukuba gu dungurati nga ga aKristano dũ. (Amo. 15:2, 6) Pai sa i ka sapangbanga rani ringbisihe kutini ti regbo bakere gberãngbi nga, gu bipai du ani nani tipa agu awirina Kristo duni mbedimbediyo nitoro. (Mt. 25:34-40) Pai sa rengbe ka sa rani ani gbia maku nga, undo ga Mbori mbedimbedi aboro.

20. (a) Gini bangua sunge agu ‘agamahe’ nga abaakumba amangaha? (b) Wai rengbe ani ka yugo gupai nga ani nabi agi awirina re na kikiipayo?

²⁰ Gu kura agu ‘agamahe’ du fu aboro re nga agu awirina du rogo Rondo Be-basunge, agu ababiapai ninaata ata, gbiati agu abaakumba du rogo dungurati. Ziazia toro du nasia agi aboro re dũ. (Amo. 20:28) Gu bambata sunge agi awirina re amangaha nga ka sonosa aboro i da “ti gu du sa nga ga idapase, na ga ina Wiri Mbori, sa du ni bakumba, sa rengba na sona gu hibepai nga ga Kristo.” (Ef. 4:13) Wa vura duhe nga i nga kpakpa aboro wakina rani, ka ani agiasangbayo na kidu na tambuahe tipa gayó sunge, ani gbia maku agbia.—Eb. 13:7, 17.

21. Tipagine si aida ti ni ani gisangba Wiri Mbori awere?

²¹ Fuo regbo ngbutuko, Kristo nika guari kuti gi ga Satana gbegberẽ zegino re. Ho ko nika manga gupai re ni, pa bata ani nikadu kina kubeko, bambiko ko nga gu boro Mbori nasia ní ningbembatayo fu “bakere rimbasa aboro” koyo du “agugaabi aime unga ni.” (Yugo. 7:9, 16, 17) Sidu tie, si naida ani asaditirani gbe tipa ka rafu gu ga Yekova Bakindo ziazia toro angbe fuko mbatayo.

Gini Apai Wiriki Oni He Rogo . . .

• Yesaya 11:​1-5?

• Marako 1:​40, 41?

• Amokedi 10:42?

• Bambata Pai 22:18?

[Gu kpiahe du ti kpewaraga 25]

Ga Yesu nunga adu niyuguyuguhe ho ko azingisi wiri Yairo ni bekpio