Tipagine Rungo Namoipai Ti Ni Ni Bakerehe?

1, 2. Gini sanahe dungu aboro naasana?

BAKERE SUNGBUROSUNGBURO BAIME gberesi ringara. Kumba no aboro kanisa yo, ko õgo aboro na ki imi badungu aguyo. Naagude kpi be kansa ki mbu awiriri bisue ni sayo.

² Ho agberãngo gbiati tunguotunguopai amanga ni wa gere, dungu aboro nasanahe nga, “Tipagine?” Dungu aboro nasanahe nga tipagine du zegino nahi ti ni be sogote na arungo. Ya mo mo abakingo bangiri ro tipa gipai re?

3, 4. (a) Gini sanahe Abakuka asanaha? (b) Wai du Yekova akaragapai fuko?

³ Rogo Baibiri yo, ani bi gupai yo nga, agu akumba naadu na nyanyaki idapase kuti Mbori aima sana ngbatunga agi asanahe re. Ni kpiapai, gu nebi nangia Abakuka asana Yekova ki ya: “Tipagine mangi mo re ti ni mi bi irairapai? Ki ningere ku ri fudifudipai Gbarasahe du bara bangire na zuu; kpata nakura na kangu.”—Abakuka 1:3.

⁴ Rogo Abakuka 2:2, 3, ani nageda pa ga Yekova karagapai fu Abakuka na pa gako kidohe tipa ka mbakadaapai. Yekova na bakere nyemuse tipa aboro. Baibiri naya: “Ko naberã pa” ro aberã. (1 Petero 5:7) Ni rengo, gu gberãrago du ti Mbori ho ko abi arungo, ni si ima susa gaani. (Yesaya 55:8, 9) Awere tie, ani sakingo pai tipa gu sanahe nga, Tipagine rungo namoipai ti ni areme rogo zegino?

TIPAGINE RUNGO NAMOIPAI TI NI?

5. Ginipai dungu abayugu pambori apehe tipa arungo? Ono ginipai rengbe Baibiri ka yugoho furani?

⁵ Apasita, gbiati abayugu pambori naape gupai dedede nga Mbori du naida aboro ni rungo. Agu akurayo naya agu apai dunduko namanga boro kodihe na agberãngo, kina Mbori naasiaha na ani arengbanga ka rugatirani na ndu gupai duhe ti ni wo te. Agu akurayo rengbe ka ya aboro gbiati agude nakpi mbiko i naga ku ngbangbaturũ yo fuo Mbori. Rengo nga gipai re te. Anga Yekova nasa gbegberẽ apai si nimangi te. Baibiri naya: “Ka manga gbegberẽpai, si turũ ti Mbori, na ti gu Ko du na tandu apai dũ, ka manga irairapai.”—Eyobo 34:10.

6. Tipagine dungu aboro abira Mbori ti ni tipa agu arungo namanga rogo zegino?

⁶ Dungu aboro nabira Mbori tipa agu arungo namanga rogo zegino mbiko i naberãha tigayo nga Mbori du nazoga zegino. Ono a wa ani awirikihe rogo Kapita 3, ndikidi bazogo gi zegino re nga Satana Bakitingbanga.

7, 8. Tipagine du kumuko rungo ti ni rogo zegino?

⁷ Baibiri naya furani wẽ “zegino dunduko du ni zogozogo ho be gbegberẽ ko.” (1 Yoane 5:19) Bazogo gi zegino re nga Satana nga kere sino boro. Ko “nga banangi aboro kpotosende [no] dunduko.” (Yugoti 12:9) Dungu aboro nawirika ko. Na gere nga ndupai sa dagba gu nduapai hi zegino ti ni be nangahe, sogote, gbiati gbegberẽ mangaapai.

⁸ Gu kura nduapai kina ho nasa gupai nga rungo kumuko rogo zegino. Fuo Adamu na Eva samungu, i afu ingapai fu awiriyo. Gu ingapai re du nasa aboro i ni rungosi akurayo. Aboro naida kadu na payo kuari ti ga akurayo. I nata akpata, ni so avura, na kini gundesi akurayo. (Batungusipai 4:1; 8:9) Ti gu kura aregbo, aboro narungo mbiko “rago gbia kuti [gbegberẽ] mamu.” (Batungusipai 9:11) Ho du yo ni rogo gbegberẽ ba na ti gbegberẽ regbo, béno [accident] gbiati gu kura gbegberẽ apai ima rengba ka manga yo.

9. Tipagine rengbe ani ti ni ka ya wene ndupai kinaho Yekova nambugene ti ni fu arungo si nimangi?

⁹ Anga Yekova naye na arungo te. Si aidanga ani bira ko tipa vura, kuondiko, gbiati gbegberẽ mangaapai te. Anga Mbori du naye na agu agberãngo du wa bazigizo, bakere bavugumo, na ikiˈikiˈ-aime te. Ono mo rengbe ka bakabangiro nga, ‘Ka si du nga Yekova nga gu boro du na ome beni kisusi rogo zegino, tipagine du tie ko arugusanga gu kereapai namanga re ti ni ya?’ Ani ima ino gupai nga Mbori naberã parani aberã nyanyaki, sidu, wene ndupai kina beko mbuko gene ti ni fu arungo si nimangi.—1 Yoane 4:8.

NDU GUPAI MBORI NAMBUGENE TI NI FU ARUNGO

10. Gini soapai Satana aye na ni kuti Yekova?

¹⁰ Ati Edene yo, Bakitingbanga anangi Adamu na Eva. Satana akitingbanga Mbori ya ko nga gbegberẽ Bazogo. Ko ape gupai nga Mbori aaka na wene he be Adamu na Eva. Satana aaida ka sayo i bihe nga ko nika ngia wene bazogo ti Yekova na ndupai ho tipa i idi na Mbori te.—Bambata Pai 3:2-5; mo bi gu 27 rukutu kekeapai du ti digido gi buku re.

11. Gini sanahe si aida ani karagapai kuti ni?

¹¹ Adamu na Eva abasasangba Yekova na ki samungu kutiko. I aberẽhe tigayo nga rengo kina beyo tipa ka diaberã tipa gupai du ni ruruhe na gu du ni gbegberẽhe? Wai du ka Yekova arengbe ka yugo na ni nga agu asamungu re ima inga na ko ini gupai ngba gbe tipa rani?

12, 13. (a) Tipagine Yekova aagbarasanga agu asamungu re ti ni nibasa ya? (b) Tipagine Yekova nambugene ti ni fu Satana ko du ni bazogo gi zegino re na ka mbugene fu aboro i zogo tiyo?

¹² Yekova aanyasanga riipa Adamu na Eva ti gu regbo re nibasa te. Kuba gure, ko ambugene fuyo i batika agude. Fuo gure, Yekova asaha taata fu awiri Adamu na Eva i sia gu boro i aida ni du ni gayo bazogo. Ga Yekova ringbisapai adu nga ka hiso kpotosende na agu aboro adunga ingapai tiyo ya, na gipai re nika manga amanga ka Bakitingbanga vura manga kina gine vurũ.—Bambata Pai 1:28; Yesaya 55:10, 11.

¹³ Ga Satana soapai adu ku bangiri amirioni amaraika. (Eyobo 38:7; Daniere 7:10) Sidu, Yekova ambu regbo fu Satana tipa ka yugu na ni singia gako kitangbangase angia rengo. Ko ambu regbo a fu aboro i zogo tiyo tiibe ga Satana ngbembatayo tipa ka yugo na ni singia i rengbe kadu na diabese zanga ga Mbori undo.

14. Ginipai pa mbu Yekova regbo ni gbangaha nayuguhe?

¹⁴ Tipa dungu akutu agarã, aboro ima asada ka zoga tiyo ono i arẽnga na ni te. Aboro ima inoho nga Satana nga iraziree. Aboro naida aida na ga Mbori undo. Gu nebi nangia Yeremaya ape kina rengo ho ko aya ni wẽ: “Ako Yekova, mi ini he ya gu pai nga ga boro si rogo ni yo te, gu boro nata, pa ruga gani apai si rogo ni yo te.”—Yeremaya 10:23.

TIPAGINE SI NADI YEKOVA TI NI NA GBANGA REGBO WA GERE?

15, 16. (a) Tipagine Yekova nambugene ti ni fu arungo tipa gbanga regbo? (b) Tipagine Yekova ambakadanga agu akpakarapai ti ni Satana aye na ni ya?

¹⁵ Tipagine Mbori nambugene ti ni fu arungo si mangi tipa gbanga regbo? Tipagine ko arugusanga gbegberẽ mangaapai ti ni ya? Si ima dia gbanga regbo tipa ka yugo na ni nga sunge ti ga Satana zogarago te. Aboro ima asada ngbatunga azogarago dunduko zanga du na diabese. Wa vura duhe nga aboro ima manga bakere sonakumbatayo rogo birĩ-inohe na kini kusi vovo ahe, iraira mangaapai kindi ni bakerehe, rungo, kuondiko, gbiati avura ima susa gu naadu mbata. Ani arengbanga ka zoga tirani zanga Mbori te.

¹⁶ Ono tie, Yekova ata mbakadanga gu kpakarapai Satana aye na ni re te. Ka ko mbakadihe, gure du wa ko nasongoda ga Satana zogarago, na ka Ko mangingo ho te. Berewe a, si rengbe ka sa aboro i bihe nga i rengbe arengba ka zoga tiyo wenengai. Ono ziree du, na ka Yekova songodi nga gupai re a te. Ko apenga ziree te.—AEbere 6:18.

17, 18. Ginipai Yekova nika mangaha tipa gu gbegberẽ apai dunduko Satana aye na ni?

¹⁷ Ya mo Yekova rengbe ka mbakada agu apai dunduko Satana gbiati aboro agbarasihe re? Ii. Pai ho rengbe ka gasa Mbori te. Yekova ima ino gu regbo ko nika karagapai ti ni kuti ga Satana soapai dunduko. Fuo gure, ko nika sa kpotosende ni paradizo kina wai ko aaida si du. Agu aboro dunduko “du rogo amurã yo” i nika zingisa yo bekpio. (Yoane 5:28, 29) Aboro awoka nga berewe na ki ni kpiki te. Yesu nika nyasariipa gu gbegberẽ apai dunduko Satana aye na ni. Yekova nika mangasunge na Yesu “ko gbarasi ga bakitingbanga mangaapai.” (1 Yoane 3:8) Ani na bakere tambuahe mbikopa du Yekova na zerangbaduse na ani tipa ani iniko na ki rengbe ka diaberã nga ani naida ko du ni gaani Bazogo. (Mo gedi 2 Petero 3:9, 10.) Zavura ho ani arungo ni, ko naundo rani aundo ani hipai.—Yoane 4:23; mo gedi 1 AKorindo 10:13.

¹⁸ Yekova amanganga rani ngbaome tipa ani sia ko ni gaani Bazogo te. Ko aima fu ranirii fu aboro. Ani wisigingo pai awere tie tipa gupai gu wene gamahe re amangaha furani.

WAI DU MO NIKA MANGASUNGE NA GAMO RANIRII?

19. Gini bawene gamahe Yekova nafuhe furani? Tipagine si aida ani du ti ni na tambuahe tipaha?

¹⁹ Gu wene gamahe Yekova afuhe furani nga ranirii nasa rani ani du kia ti anya. Ami namanga apai mbiko wo du i ambakadi ra ami nimangihe, ono ani rengbe arengba ka sia wai ani aida ka raka gaani raka na ki diberã singia ani naida ka sa ngbarago ti Yekova. (Asanza 30:24) Berewe a, ani wa gu masini i ambakadihe si nimangi kina gupai i ambakadihe tipaha te. Ani na ranirii berani tipa ka sia gini ngbatunga boro ani aida ka du nga ni, gu boro ani aida ni du ni bakurearani, na gupai ani aida ka mangaha na gaani raka. Yekova naida ani gbia ngbarago rogo raka yo.

20, 21. Gini wene siapai rengbe mo ka mangaha awere?

²⁰ Yekova naida ani kpinyemuko. (Matayo 22:37, 38) Ko wakina gu bagude nidu na ngbarago ka gia wirini u niya “Mi ima kpinyemuro” kina boro kpoto ru yo angianga mbiko gupai nga i nizi ru azio u pehe ya. Yekova aima fu ranirii furani singia ani nasia ka mangasunge fuko watadu ka zanga mangasunge fuko. Satana, Adamu, na Eva asia ka zanga ida na Yekova. Mo nika mangasunge na gamo ranirii wai?

²¹ Mo mangisunge na gamo ranirii tipa ka mangasunge fu Yekova. Badungu amirioni aboro kinaho diberã tipa ka sa ngbarago ti Mbori na ki ka Satana. (Asanza 27:11) Ginipai rengbe mo ka mangaha awere tipa kadu rogo ga Mbori vovo zegino ho ko nika nyasa ni riipa arungo kusayo? Gu Kekeapai ngbefuo gere nika karagapai kuti gu sanahe re.