Tipagine Gbegberẽ Apai na Arungo Amanga Ti Ni?

Ho gbegberẽ apai amanga ni, gu sanahe nga “tipagine?” rẽarẽ aboro asanaha. Nairiwo gu ngbarago du ani na ni ka bi wai Ziazia Kekeapai afu karagapai ziazia sa gu sanahe re!

1. Waigu Satana aye na gbegberẽpai ku rogo zegino?

Satana Bakitingbanga asamungu kuti Mbori. Satana aida ka zoga aboro, si du ko adu na maapai kurii bambata aboro nga Adamu na Eva, i koditiyo kuti ko rogo gako samungu yo. Satana amangi gipai re nipe ko ziree fu Eva. (Bambata Pai 3:1-5) Ko asari ri berẽ gupai nga Yekova aaka aka na wenepai beri. Gupai ko aaida ka pehe nga aboro arengbanga ka du na ngbarago ka i agiasangba Mbori te. Satana agumba bambata ziree nipe ko gupai fu Eva nga ri akpingo te. Si du nga ndu gupai Baibiri ayambako ti ni nga ‘irazire nga ko, nga baha.’—Yoane 8:44.

2. Ginipai Adamu na Eva asia ka mangaha?

Yekova aima gama ahe kpaima fu aAdamu na Eva. Ko aya fuyo i ima rengba ka ri agu angua dunduko du ati Edene yo kpara ti kina gu bangisaha sa. (Bambata Pai 2:15-17) Ono tie, i adiberã ka ri gu zuzungua si adu nga ka i ringa ha re ya. Eva ‘ki kati zuzuhe ki ri he.’ Kusa, Adamu ‘ki ri he a.’ (Bambata Pai 3:6) I dunduko ue abasasangba Mbori. Bambiko Adamu gbiati Eva adu ni rengberengbe yo i aima du na rengba ka manga gupai du ni ruruhe. Ono tie, i ata inoaino kini basasangba Mbori, i aingipai na ki ka gako pagbia. Gu diaberã re aima ye na bakere rungo fuyo.—Bambata Pai 3:16-19.

3. Waigu ga aAdamu na Eva diaberã nadu na maapai kurirani?

Ho aAdamu na Eva aingipai ni, i ada ni aira zangarengba, na ngba gi gene re, i afu zangarengba fu awiriyo dunduko. Baibiri nagumba gupai tipa Adamu nga: ‘Wa gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ.’—ARomo 5:12.

Ani narungo mbiko dungu ndu apai. Ti kura aregbo ani narungo mbiko gu gbegberẽ adiaberã ani amangaha. Ti kura aregbo ani narungo mbiko gu gbegberẽ adiaberã kura aboro amangaha. Ti kura aregbo ani narungo mbiko ani rogo gbegberẽ ba ti gbegberẽ regbo.—Mo gedi Batungusipai 9:11.

MO WIRIKI KURA DUNGU APAI

4. Gu boro nga mburu gaani arungo

Badungu aboro idi kuti gupai nga Mbori du nazoga zegino naabaha. Ya mo rengo du? Mo bi gu VIDIO re.

VIDIO: Da Nazoga Zegino? (1:24)

Mo gedi Yakoba 1:13 na 1 Yoane 5:19, na tifuoho, mo ki sakipai tipa gi sanahe re:

• Ya mo Mbori du nga mburu arungo gbiati gbegberẽ apai?

5. Mo makianga gu sangbanapai du ti ga Satana zogarago

VIDIO: Tipagine Mbori Nambu Arungo Ti Ni?—Paparaha (3:07)

Mo gedi Bambata Pai 3:1-6, na tifuoho, mo ki sakipai tipa agi asanahe re:

• Gini ziree Satana agumbaha?—Mo bi averesi 4 na 5.

• Waigu Satana asa apai si naangera wa Yekova aka aka na weneapai be aboro?

• Ringbisihe kuti ga Satana bipai, ya mo si naida aboro duadu na Yekova ni gayo Bazogo i kini ru ka du na ngbarago?

Mo gedi Batungusipai 8:9, na tifuoho, mo ki sakipai tipa gi sanahe re:

• Mbiko wa adunga Yekova ni Bazogo gi zegino re ya, ginipai mangi?

1. A. Adamu na Eva adu ni rengberengbe yo na kini raki Paradizo yo. Ono tie i agisangba Satana na ki samungu kuti Yekova

2. B. Tingbafuo samungu, zegino ahi be ingapai, arungo, gbiati kpio

3. D. Yekova nika dia ingapai, arungo, gbiati kpio kusayo. Aboro nika da berewe ni rengberengbe yo, na kini raki Paradizo yo

6. Yekova naberãpa gaani arungo aberã

Ya mo Mbori naberãpa gaani arungo? Mo bingo gupai Bakindo Davide gbiati gu mokedi nangia Petero akehe. Mo gedi Atambuahe 31:7 na 1 Petero 5:7, na tifuoho, mo ki sakipai tipa gi sanahe re:

• Si nasa ro mo du wai ka ino gupai nga Yekova nabi agu apai abi mo andu rogoho na ko nangera angera fuo gamo arungo?

GINIPAI MO NAWIRIKIHE?

Satana Bakitingbanga gbiati gu bambata aboro ue i akusi yo, i du gbe nga mburu gu gbegberẽ apai du rogo zegino. Yekova naberãpa agu arungo aberã ani andu rogoyo dudunguro, na barambeda ko nika diaha kusayo.

Fugöpai

• Gini Ziree Satana Bakitingbanga agumbaha fu Eva?

• Waigu ga Adamu na Eva samungu aye na sangbanapai kurirani dunduko?

• Waigu ani aino gupai nga Yekova naberãpa gaani arungo aberã?

MO WETEKE GU KURA APAI

Mo bingo gupai Baibiri apehe tipa guhe nga ingapai.

“Ginihe Nga Ingapai?” (Gu kekeapai du rogo gaani bangiriba nga ga Internet)

Mo gedi kura dungu apai tipa gupai Satana Bakitingbanga agumbaha ati Edene yo.

“Tipagine Mbori Nambu Arungo ti ni Si Niimangi?” (Ngbaõbambu Sinziri, Ngi 1, 2014)

Mo bingo akaragapai nga gu nafu wasa sa gu sanahe du ni kpakarakpakaraha.

“Tipagine du Bakere Imotise Ti Ni? Tipagine Mbori Arugusa Nga Ha ti ni Ya?” (Gu kekeapai du rogo gaani bangiriba nga ga Internet)

Mo bingo gupai kura kumba sa awirikihe tipa gu rungo ko abihe si ni mangi pati ko.

Mi Berewe Nisare Te (5:09)