WIRIKAPAI 41
Ginipai Baibiri Apehe Tipa Kodaba?
Badungu aboro zee amanga yo ka fura tipa kodaba. Ono tie, ho Baibiri afura ni tipa kodaba, si nafura afura tipaha gbaiga ono ngba iriiri gene. Gupai si apehe nafu undo afu furani. Gipai re ruaru wo mbiko Baibiri naye be Bakusirani nga Yekova. Si du, ko ima ino gupai du ni wenehe tipa rani. Ko nayugo wai furani rengbe gaani mangaapai ka sa ngbarago tiko na gupai rengbe ka undo rani ani raki na ngbarago nyeanye kindi.
1. Ga Yekova bipai nga gine tipa kodaba?
Kodaba nga gamahe be Yekova. Ko naida kodaba fu ngbarago fu gu kumba na dee naima rogatiyo. Gi gamahe re nambu gene fu arogotise i vunguagude na kurigure, i yugu gayo nyemuse a dagbatiyo ngba wene gene. Si nga ndu gupai Fugo Mbori ape gupai ti ni nga: ‘Mo ningí tipa de parangaro.’ (Asanza 5:18, 19) Yekova naida agu aKristano nga arogotise du ni ruruyo fu gayo badiarogatise, sidu, si aidanga i mangi bäri te.—Mo gedi AEbere 13:4.
2. Ginihe nga wasiwasi kodaba?
Baibiri nagumba gupai nga ‘airameteka, na airabäri . . . i adía nga kumbo ga Mbori ngbi te.’ (1 AKorindo 6:9, 10) Agu abake Baibiri nakehe rogo pa-Giriki amangisunge na gu fugo nga por·neiʹa tipa ka sakapai tipa wasiwasi kodaba. Gu fugo re nakoda (1) Kodabaa bangbanda agu aboro ata manganga rogatise ya, (2) kodaba dagba kumba na kurako watadu dee na kurari, na (3) kodaba na anyaa. Ani nasa ngbarago ti Yekova na kini gbia undo nitirani ho ani ane “pa bari” ni.—1 ATesaroniko 4:3.
MO WIRIKI KURA DUNGU APAI
Mo bingo wai rengbe mo ka ne wasiwasi kodaba na wai rengbe mo ka gbia undo ti nye mo gigiri rogo gamo mangapai yo.
3. Mo oro be wasiwasi kodaba
Gu ruru kumba nangia Yosefa amangi ome nyanyaki tipa ka nye ni gigiri ko rogo mangapai yo. Mo gedi Bambata Pai 39:1-12, na tifuoho, mo ki sakipai tipa agi asanahe re:
Ginipai nafõ ngbadu Yosefa yo ko zubo?—Mo bi veresi 9.
Ya mo mo nabihe nga ruru diaberã du Yosefa amangihe re? Tipagine mo abihe ti ni wo?
Waigu rengbe paranga aboro areme ka wirika Yosefa na ki oro be wasiwasi kodaba? Mo bi gu VIDIO re.
Yekova naida wa du ani dunduko ani ka wasiwasi kodaba. Mo gedi 1 AKorindo 6:18, na tifuoho, mo ki sakipai tipa agi asanahe re:
Gini apai rengbe ka sa boro ni mangi wasiwasi kodaba?
Waigu rengbe mo ka ora be wasiwasi kodaba?
4. Mo ima rengba ka ká asada
Ginipai rengbe ka saha ni mbumbuhe boro ka gu asada du tipa wasiwasi kodaba? Mo bi gu VIDIO re, na tifuoho, mo ki sakipai tipa gu sanahe ngbefuo ho.
Ho gu wirina nidu rogo gu vidio re ni ini gupai ni nga gako aberã gbiati mangaapai ima rengba ka sako ko zanga du ni ruruko fu diako, ginipai ko nimangihe?
Zavura agu aKristano du ni ruruyo i naasota asota ti kura aregbo ka banda gayo aberã si du ni gigirihe. Waigu rengbe mo ka ne nye kaa berã kindi kina kurii wasiwasi apai? Mo gedi AFiripoio 4:8, na tifuoho, mo ki sakipai tipa agi asanahe re:
Gini ngbatunga ahe si aida ani naaberãpaha?
Waigu geda Baibiri gbiati futirani tipa gu sunge nga ga Yekova narengbe ka undo rani ani ka gu asada rengbe ka sarani ani mangi ingapai?
5. Ga Yekova rugute nafu undo furani
Yekova ima ino gupai du ni wenehe tipa rani. Ko na gumba pa wai furani rengbe ani ka nye gigiri rogo mangaapai yo na gu undo rengbe ani ka gbiaha ti mangaha wo. Mo gedi Asanza 7:7-27 watadu mo bi gu VIDIO re, na tifuoho mo ki sakipai tipa agu asanahe ngbefuo ho.
Waigu gu paranga kumba re arimisitiko ku rogo gupai yo nadu ni asada fuko?—Mo bi Asanza 7:8, 9.
Ringbisihe kuti Asanza 7:23, 26, wasiwasi kodaba ima rengba kadu na kere gbegberẽ asangbanaha. Ka ani nye gigiri rogo gaani mangaapai yo, gini akpakarapai rengbe ani ka zanga gbiatirani na ni?
Waigu padu ani gigiri rogo gaani mangaapai yo narengbe ka undo rani ani raki na ngbarago nyeanye kindi?
Kura aboro naberã gupai nga nyemuse ti gupai Baibiri apehe tipa kumba di kurako watadu dee di kurari te. Ono Yekova nga Mbori nyemuse, naida aboro dunduko raki na ngbarago nyeanye kindi. Tipa ka rẽ ka gbia gu ngbarago re, ani du wa ka ani raki ringbisihe kuti gako arugute. Mo gedi 1 AKorindo 6:9-11, na tifuoho, mo ki sakipai tipa gi sanahe re:
Bangiri Mbori, gu nyemupai nga kumba di kurako watadu dee di kurari nga gu yangara gbegberẽpai du ho?
Tipa ka sa ngbarago ti Mbori, ani dunduko si aida ani mangi ariapai rogo gaani raka yo. Ya mo gu ome ani amangaha rẽarẽ? Mo gedi Atambuahe 19:8, 11, na tifuoho, mo ki sakipai tipa agi asanahe re:
Ya mo mo nabihe nga gu ga Yekova arugute du tipa ruru mangaapai rẽarẽ? Tipagine mo abihe ti ni wo watadu tipagine mo abingo ho ti ni wo ya?
Yekova ima undo dungu aboro i gisangba gako arugute. Ko ima rengba ka undo ro a
GU KURA ABORO NAPE GUPAI NGA: “Gbegberẽpai ho du ti boro mangi kodaba na gu kura boro kia te, ka si du nga i ima kpinyemu tiyo.”
Ginipai rengbe mo ka pehe?
GINIPAI MO NAWIRIKIHE?
Kodaba nga gamahe be Yekova fu kumbakudee na diako i gbia ngbarago ti ni.
Fugöpai
Gini apai wasiwasi kodaba akodaha?
Ginipai nika undo rani ani ne wasiwasi kodaba?
Waigu ani agbia undo ho ani apekafuo gu ga Yekova arugute ni du tipa wenesino mangaapai?
MO WETEKE GU KURA APAI
Mo bingo ndu gupai Mbori aida gupai ti ni nga gu kumba na dee naraka kina sa rogotiyo.
Mo wisigi gu ga Baibiri yugopai nape gupai nga gu sino nga kumba di kurako watadu dee di kurari ni gbegberẽhe ono si ayugongo gupai nga si naida ani sogo agu aboro namangaha te.
Mo bingo wai ga Mbori andiko dunduko nga gu du tipa kodaba abanda rani.
“Ya Mo Kodaba Ngbaseyo Nga Ndikidi Kodaba?” (Gu kekeapai du rogo gaani bangiriba nga ga Internet)
Rogo gu pangbanga du riihe nga “I Amangipai na Mi Rogo Irisa Yo,” mo bingo gupai nafõ ngbadu gu kura baagburu yo ko mangi ariapai rogo gako raka yo tipa ka irisa Mbori.
“Ziazia Kekeapai Rengbe Arengba Ka Aria Gaoni Raka” (Ngbaõbambu Sinziri, Zerekpe 1, 2011)
a Gi sino kodaba nga gu adunga ni iriirihe re ya nakoda dungu mangapai wa gu nga kodaba, kodaba ngbaseyo, kodaba basungose yo, na zapada barangba kura boro rogo gu gene yo nga ga kodaba.